LONGI DIA 3
NKUNGA WA 35 “Nuazaya Mambu Masundidi o Mfunu”
Bakanga Nzengo Ziyangidika Yave
“O vumi wa Yave i lubantiku lwa ngangu, ozaya o Mvauki i umbakuzi.”—NGA. 9:10.
DIAMBU DIASINA TULONGOKA
Tulongoka una tulenda sadila zayi, ngangu ye umbakuzi muna baka nzengo zambote.
1. Nkia diambu diampasi tuwanananga diau yeto awonso?
LUMBU yawonso divavanga vo twabaka e nzengo. Muna mambu mankaka ke diampasi ko muna baka e nzengo, nze ntangwa tufwete dia muna mene yovo ntangwa tufwete kwenda vana mfulu kimana twaleka. Muna mambu mankaka, diampasi kikilu dikalanga mu baka e nzengo. E nzengo tubakanga muna mambu mampasi zilenda vanga diambu muna vimpi weto, zilenda kulula yovo wokesa e kiese kieto, zilenda twasa nluta yovo mfwilu kwa esi nzo eto ye muna nsambila eto. Yeto awonso tuzolanga vo e nzengo zeto zatutwasila e nluta kumosi ye yitu yeto. Edi disundidi o mfunu tuzolanga vo e nzengo zeto zayangidika Yave.—Roma 12:1, 2.
2. Nkia mambu ofwete vanga muna bakanga e nzengo zambote?
2 Avo ozolele vo wabakanga e nzengo zambote, (1) ofwete zaya ziku kia mambu mawonso, (2) ofwete vava zaya e ngindu za Yave muna konso diambu ozolele bakila e nzengo, ye (3) ofwete toma yindula mu kuma kia nzengo zina ozolele baka. Mu longi diadi tuvovela dimosi-dimosi muna mambu mama. E longi diadi dikutusadisa mpe mu mona una tulenda wokesela umbakuzi weto.—Nga. 2:11.
ZAYA E ZIKU KIA MAMBU MAWONSO
3. Yika e nona kisonganga o mfunu wateka zaya ziku kia diambu vitila wabaka e nzengo.
3 O zaya e ziku kia mambu mawonso i diambu diantete tufwete vanganga muna baka e nzengo zambote. Ekuma dinina o mfunu? Yindula muntu wele tadisa o vimpi wandi kwa dotolo. Nga dotolo olenda kumvana e nlongo vitila kamfimpa yovo kunyuvula e yuvu? Ve kikilu. Ngeye mpe avo ozolele baka nzengo zambote, entete ofwete teka zaya e ziku kia diambu dibwidi. Aweyi olenda wo vangila?
4. Landila Ngana 18:13, adieyi olenda vanga muna songa vo ozeye ziku kia diambu? (Tala mpe foto.)
4 Nkumbu miayingi muna zaya e ziku kia diambu, ofwete yuvula e yuvu. Yindula vo obokeleso ku nkinzi. Nga ofwete kwenda? Avo kuzeye ko muntu ubokelese yovo kuma kia nkinzi wowo, ofwete yuvula yuvu nze eyi: “Nkia fulu ye nkia ntangwa ukala o nkinzi wowo? Nga ndong’ayingi ikala ko? Nani okala se ntu? Aki nani bekala muna nkinzi wowo? Nkia mambu mevangama? Nga malavu mankolwa mekaywa mo?” E mvutu za yuvu yayi, zikutusadisa mu baka nzengo zambote.—Tanga Ngana 18:13.
Yuvula e yuvu kimana wazaya e ziku kia mawonso (Tala e tini kia 4) a
5. Adieyi ofwete vanga avo ozeye e ziku kia diambu?
5 Avo ozeye e ziku kia diambu, toma badika mawonso malenda bwa. Kasikil’owu, adieyi ovanga avo obakwidi vo wantu ke belemvokelanga nsiku mia Bibila ko bekala muna nkinzi yovo ke vekala muntu ko ovita ntu muna kaya malavu mankolwa? Nga omwene e vonza kilenda bwa kele vo wele kuna nkinzi wowo? (1 Pet. 4:3) Kuna diaka e sambu, adieyi ovanga kele vo nkinzi wowo mu ola ya lukutakanu yovo mu lumbu kiaku kia vaika mu salu kia umbangi ukala? Avo ozeye mawonso malenda bwa, wakubama okala muna baka e nzengo zambote. Kansi, vena ye diambu diankaka ofwete vanga. Ongeye omwene e ziku kia diambu; kansi aweyi Yave keyindulanga mu kuma kia diambu diodio?—Nga. 2:6.
VAVA ZAYA E NGINDU ZA YAVE
6. Landila Yakobo 1:5, ekuma tufwete lombelanga lusadisu lwa Yave muna sambu?
6 Lomba kwa Yave muna sambu kimana kasadisa mu bakula ngindu zandi mu kuma kia diambu dibwidi. Yave osianga nsilu vo okutuvana ngangu kimana twabakula kana vo e nzila ina tuzolele landa ikunyangidika. Ovananga e ngangu zazi “kuna mvevo kw’awonso yo lembi semba.”—Tanga Yakobo 1:5.
7. Aweyi olenda zayila ngindu za Yave? Yika e nona.
7 Avo olombele lusadisu lwa Yave muna sambu, sia sungididi e mpila kekuvanina e mvutu. Muna bonga e nona: Kele vo ovididi ekolo wina mu nkangalu, olenda lomba lusadisu kwa ntungi. Kansi, nga olenda yantika kwenda vitila o ntungi kavana e mvutu? Dialudi vo kuvanga wo ko. Osia sungididi muna luludiku kekuvana. Diau dimosi, avo olombele kwa Yave kavana e ngangu, muna zaya e mvutu kekuvana ofwete longoka nsiku ye nkanikinu mia Bibila mina olenda sadila muna diambu diodio. Kasikil’owu, vitila wabaka e nzengo za kwenda kuna nkinzi una obokeleso, ofwete vava zaya dina Bibila kivovanga mu kuma kia nkinzi miampwena, yikundi yambi ye mfunu wa sianga salu kia Kintinu va fulu kiantete muna zingu kiaku, ke mu zolele ya ngeye kibeni ko.—Mat. 6:33; Roma 13:13; 1 Kor. 15:33.
8. Adieyi olenda vanga kele vo lusadisu ovavanga muna solola diambu dina ovuidi o mfunu? (Tala mpe foto.)
8 Kana una vo i wau, ezak’e ntangwa lusadisu ovua mfunu muna solola diambu ovavanga. Olenda lomba luludiku kwa mpangi ayakala yovo mpangi ankento wazikuka. Kansi, muna vua e nluta diambote ngeye kibeni wavavulula. Tuvuidi ulolo wa malongi muna salanganu yeto ya longokela, nze Nkanda wa Vavulwila wa Mbangi za Yave ye Sono Ikutusadisanga mu Sadila Yave una Ufwene. Sungamena wo vo e kani diaku i baka e nzengo ziyangidika Yave.
Vava zaya ngindu za Yave (Tala e tini kia 8) b
9. Aweyi tulenda kadila ye ziku vo e nzengo tubakidi ziyangidika Yave? (Efeso 5:17)
9 Aweyi tulenda kadila ye ziku vo e nzengo tubakidi ziyangidika Yave? Entete, tufwete toma kunzaya. Kadi e Bibila kivovanga vo: “Ozaya o Mvauki i umbakuzi.” (Nga. 9:10) Kieleka, muna vua umbakuzi wakieleka tufwete zaya fu ya Yave, kani diandi, mambu mana kezolanga ye mambu mana kemenganga. Ukiyuvula: ‘Landila mana nzeye mu kuma kia Yave, nkia nzengo ndenda baka ezi zilenda kunyangidika?’—Tanga Efeso 5:17.
10. Ekuma nkanikinu mia Bibila misundidi o mfunu ke mu fu ya makanda ko yovo ya kisi nsi?
10 Muna yangidika Yave, ezak’e ntangwa tufwete vanga diambu dikendeleka yitu yovo akundi eto. Muna bonga e nona, mase mankaka ye kani diambote balenda komekena mwan’au wankento kasompana yo yakala una ye nzimbu zayingi yovo ndiona bazeye vo olenda futa nkam’a longo yantalu kana nkutu vo wayoya kwandi muna kimwanda. Bazolele vo mwan’au katoma lungwa-lungwanga muna kinitu, kansi nani okunlunga-lunga muna kimwanda? Aweyi Yave kebadikilanga diambu diadi? E mvutu za kiuvu kiaki zina muna Matai 6:33. Mu sono kiaki, Akristu bekasakeswanga vo ‘bavavanga ntete Kintinu.’ Kana una vo tutoma zitisanga mase meto yo wantu muna vata dieto, e diambu disundidi o mfunu i yangidika Yave.
TOMA YINDULA MU KUMA KIA NZENGO OZOLELE BAKA
11. Nkia fu kivovelo muna Filipi 1:9, 10 eki kilenda kusadisa mu toma fimpa e nzengo zaku?
11 Avo omwene nkanikinu mia Bibila mina osadila muna nzengo ozolele baka, ofwete yindula mu kuma kia nzengo zina ozolele baka. (Tanga Filipi 1:9, 10; tala “pleno discernimento,” muna nota de estudo.) Okala ye umbakuzi dilenda kusadisa mu zaya e nluta yovo mfwilu mia konso nzengo ozolele baka. Muna mambu mankaka, dilenda kala vo ke diampasi kwandi ko muna baka e nzengo. Kansi, ke nzengo zawonso ko zikalanga zatoma kia. O umbakuzi ulenda kusadisa mu baka nzengo zambote kana nkutu muna mambu mampasi.
12-13. Okala ye umbakuzi aweyi dilenda kusadisila mu baka nzengo zambote muna diambu dia salu?
12 Yindula e nona eki: Mu vava una e salu kimana watoma sadisanga esi nzo aku. Osolwele salu yole. Tomene fimpa e ziku kia mambu mawonso, mpila salu, lumbu ina ofwete salanga, ola zina okala diata muna lwaka kuna salu ye mankaka mpe. E salu yayi yau yole, ke ikululanga nsiku mia Bibila ko. Nanga osolele kimosi, kadi omwene vo kisundidi o wete yovo mfutu usundidi. Kana una vo i wau, vena diaka ye mambu mankaka ofwete badika vitila wabaka e nzengo.
13 Kasikil’owu, nga e salu kiokio kikala kukakidila mu kwendanga muna tukutakanu twankaka? Nga ntangwa kikala kuyiya ina olenda sadila muna sadisa esi nzo aku muna kimwanda? Oyuvula yuvu yayi dilenda kusadisa mu sia “mambu masundidi o mfunu” va fulu kiantete, i sia vo, nsambil’aku ye nsatu za esi nzo aku. I bosi, olenda baka nzengo zina Yave kesambula.
14. Aweyi umbakuzi ulenda kutusadisila mu songa o zola yo venga tesesa akaka masakuba?
14 Okala ye umbakuzi dikutusadisa mpe mu zaya kana vo e nzengo zeto nluta yovo mfwilu zitwasa kw’akaka. Dilenda kutusadisa mpe mu venga “tesesa akaka masakuba.” (Fili. 1:10) Ediadi diamfunu kikilu vava tubakanga e nzengo muna mambu ma yeto kibeni, nze mpila ya vuatila ye kuyikubika. Kasikil’owu, nanga vena ye mvuatu yovo mpila ya kuyikubikila ina tuzolanga. Kansi, adieyi tuvova kele vo akaka bakendalele mu kuma kia mvuatu wowo, kiakala muna nkutakani yovo kuna mbazi? O umbakuzi ukutusadisa mu zitisa e ngindu zau. O zola kukutufila mu vava wete dia wantu akaka yo songa lusakalalu. (1 Kor. 10:23, 24, 32; 1 Tim. 2:9, 10) I bosi, tubaka e nzengo zisonga vo akaka tuzolanga yo kubazitisa.
15. Adieyi ofwete teka yindula vitila wabaka nzengo muna mambu mampwena?
15 Avo ozolele baka nzengo muna diambu diampwena, yindula dina ofwete vanga muna lungisa e nzengo zaku. Yesu watulonga vo ‘twateka vuandanga mu badika e ntalu.’ (Luka 14:28) Ediadi disongele vo teka badika e ntangwa, nzimbu ye ngolo ovua o mfunu muna lungisa dina obakidi e nzengo. Muna mambu mankaka, nanga ofwete yuvula kwa yitu yaku kimana wazaya dina kafwete vanga konso muntu muna yau mu yikama e nzengo zaku. Ekuma dinina o mfunu ediadi? Kadi dikusadisa mu zaya kana vo vena ye diambu ofwete singika yovo muntu una ye ngindu zankaka zina vo zisundidi o wete. Avo oyambwidi vo konso muntu muna yitu yaku kasonga e ngindu zandi yo tambulwila zo, diasazu dikala muna kuyikama. E nzengo zaku mpe nluta zitwasa.—Nga. 15:22.
BAKA NZENGO ZITWASA NLUTA
16. Nkia mambu malenda kusadisa muna baka nzengo zitwasa e nluta? (Tala mpe e babu “ Mpila Olenda Bakila Nzengo Zambote.”)
16 Avo osadidi mawonso tuvovele mu longi diadi, wakubama okala muna baka nzengo zambote. Ofwete zaya e ziku kia diambu yo fimpa nkanikinu mikusadisa mu baka nzengo ziyangidika Yave. I bosi, olenda samba kwa Yave kimana kasadisa wabaka e nzengo zitwasa e nluta.
17. Azeyi i nsabi muna baka nzengo zambote?
17 Kana nkutu vo muna mvu miavioka nzengo zayingi zambote wabaka, sungamenanga vo e nsabi muna baka nzengo zambote i bundanga e vuvu muna ngangu za Yave, kansi ke mu ngangu za ngeye kibeni ko. Yave kaka olenda kuvana ngangu zakieleka, umbakuzi ye ndwenga. E fu yayi yawonso yamfunu kikilu, kadi ntwadi isalanga. (Nga. 2:1-5) Yave olenda kusadisa mu baka e nzengo zikunyangidika.—Nku. 23:2, 3.
NKUNGA WA 28 Tukala Akundi a Yave
