LONGI DIA 5
NKUNGA WA 108 Zola kwa Nzambi
Nkia Nsambu Tuvuanga Muna Zola kwa Yave?
“Kristu Yesu wayiza va nza mu vuluza asumuki.”—1 TIM. 1:15.
DIAMBU DIASINA TULONGOKA
Tulongoka una tulenda vuila nluta muna lukûlu ye una tulenda vutulwilanga matondo kwa Yave.
1. Adieyi tulenda vanga muna yangidika Yave?
YINDULA vo okayidi lukau lwambote ye lwantalu kwa muntu ona otoma zolanga! Aweyi omona kele vo muntu ndioyo oswekele lukau lolo muna nkela ye ke sungamenanga lo diaka ko? Kalukatikisu ko vo otoma kendalala. Kuna diak’e sambu, kiese kiayingi okala kiau kele vo muntu ndioyo mu toma sadila kena o lukau lolo yo kuvutula matondo. E nona kiaki nkia ngwizani kina ye lukûlu? Yave wavana Mwan’andi muna wete dieto. Kieleka, Yave kiese kiayingi kekalanga kiau vava tukumvutulanga matondo mu kuma kia lukûlu katuvana yo zola kwandi kwamfila muna kutuvana lukûlu.—Yoa. 3:16; Roma 5:7, 8.
2. Nkia mambu tubadika mu longi diadi?
2 Kansi ekolo mvu miviokanga, tulenda yantika mona vo lukûlu ke luna kibeni mfunu ko. Avo tuvilakene e fu kia vutula matondo mu kuma kia lukûlu, dikala nze yeto tuswekele muna nkela o lukau lwalu lwantalu lwatuka kwa Nzambi. Muna lembi yambula vo ediadi diavangama, ntangwa zawonso tufwete yindulanga mana Nzambi yo Kristu bavanga muna wete dieto. E longi diadi dilenda kutusadisa muna wo vanga. Tubadika una tulenda vuila e nluta muna lukûlu tuka owau yakuna sentu. Tubadika mpe una tulenda vutulwilanga matondo muna zola kwa Yave, musungula muna nsungi a Luyindulu.
UNA TUVUILANGA NLUTA MUNA LUKÛLU TUKA OWAU
3. Nkia nluta tuvuanga muna lukûlu tuka owau?
3 Tuvuanga e nluta muna kimenga kia Yesu kia lukûlu tuka owau. Kasikil’owu, mu kuma kia lukûlu Yave ololokanga masumu meto. Ke vena muntu ko okunkomekenanga vo kaloloka masumu meto. Mu luzolo lwa yandi kibeni kekutulolokelanga. O ntozi a nkunga ona wakala ye fu kia vutula matondo wavova vo: “Kadi ngeye, e Yave, wambote, wakubama muna loloka.”—Nku. 86:5; 103:3, 10-13.
4. Mu kuma kia nani Yave kavanina lukûlu? (Luka 5:32; 1 Timoteo 1:15)
4 Akaka muna yeto nanga bemonanga vo o luloloko lwa Yave ke lubafwanukini ko. Dialudi, yeto awonso ke tufwanukini lolokwa ko. Paulu wa ntumwa wabakula vo ‘kafwana yikilwa ntumwa ko.’ I bosi, wavova vo: “Muna nkenda za Nzambi i nginina owu ngina.” (1 Kor. 15:9, 10) Vava tuvilukanga e ntima muna masumu meto, Yave okutulolokanga. Ekuma? Ke mu kuma kia sia ko vo tufwanukini lolokwa, kansi, mu kuma kia zola kwandi muna yeto. Muna kuma kiaki, avo oyindwidi vo Yave nanga kalendi kuloloka ko, sungamena wo vo Yave mu kuma kia asumuki kavanina lukûlu, ke mu kuma kia wantu alunga ko.—Tanga Luka 5:32; 1 Timoteo 1:15.
5. Ekuma ke mosi ko omu yeto olenda yindula vo Yave kafwete kutuloloka mu kuma kia mana tuvanganga mu salu kiandi? Sasila.
5 Ke vena muntu ko omu yeto ofwete yindula vo Yave kafwete kutuloloka kaka kadi se mvu miayingi tukunsadilanga. Kieleka, Yave otoma yangalelanga e kwikizi tusonganga muna salu kiandi. (Ayib. 6:10) O Mwan’andi i lukau katuvana, kansi ke mfutu wa salu kieto ko. Muna kuma kiaki, ke diambote ko mu yindulanga vo Yave okutuloloka mu kuma kia mawonso tuvanganga muna salu kiandi. Avo tukedi ye ngindu zazi, tusonganga vo lufwa lwa Kristu ke lwakala kwandi mfunu ko.—Tezanesa dio ye sono kia Ngalatia 2:21.
6. Ekuma Paulu kayivaninanga emvimba muna salu kia Yave?
6 Paulu wazaya wo vo kana nkutu ukivene emvimba muna salu kia Yave, Nzambi kadi kunloloka ko. Ozevo, ekuma kayivaninanga emvimba muna salu kia Yave? Ke mu vava dienga dia Nzambi ko, kansi muna vutula matondo muna nkenda zina Yave kamfwila. (Efe. 3:7) Nze Paulu, oyeto mpe tukwamanananga sala yo vema, ke mu vava dienga dia Yave ko, kansi muna kumvutula matondo muna nkenda zandi.
7. Nkia nluta wankaka tuvuanga tuka owau mu kuma kia lukûlu? (Roma 5:1; Yakobo 2:23)
7 Okala ye ngwizani ambote yo Yave a i nluta wankaka tuvuanga tuka owau mu kuma kia lukûlu. Nze una usonganga e longi divitidi, vava twawutuka, ke twakala ye ngwizani ambote yo Nzambi ko. Kansi, muna kuma kia lukûlu tulenda kala mu “luvuvamu yo Nzambi” yo kituka se akundi andi akola.—Tanga Roma 5:1; Yakobo 2:23.
8. Ekuma tufwete vutulwilanga matondo kwa Yave muna lau tuna diau dia samba kwa yandi?
8 O samba kwa Yave i lau diampwena tuvuanga wau twina ye ngwizani ambote yo yandi. Yave ke wanga kaka ko e sambu ya nkangu andi muna tukutakanu, kansi owanga mpe e sambu ilombwanga kwa konso selo kiandi vana fulu kia yandi kaka. Vana ntandu a kutuvuvika o ntima, e sambu nluta miayingi kikututwasilanga. E sambu kilenda kumika e ngwizani eto yo Nzambi. (Nku. 65:2; Yak. 4:8; 1 Yoa. 5:14) Vava kakala ova ntoto, Yesu ntangwa zawonso wasambanga, kadi wazaya wo vo Yave owanga e sambu. Wazaya wo mpe vo e sambu kikumika e ngwizani andi yo Yave. (Luka 5:16) Tuvutulanga funda dia matondo wau tuzeye wo vo muna kuma kia kimenga kia Yesu, tulenda kituka se akundi a Yave yo mokena yandi nkutu muna sambu!
UNA TULENDA VUILA E NLUTA KUNA SENTU
9. Asambidi a Yave ana bena ye kwikizi, aweyi bevuila e nluta muna lukûlu kuna sentu?
9 Asambidi a Yave ana bena ye kwikizi, aweyi bevuila e nluta muna lukûlu kuna sentu? Yave okubavana moyo a mvu ya mvu. Wantu ayingi beyindulanga vo ediadi ke dilendakana ko kadi o wantu bekwamanananga fwa. Kansi, tuka kuna lubantiku, Yave una ye kani vo wantu bazinga yakwele mvu. Kele vo Adami kasumuka ko, ke muntu ko wadi yindula vo ke dilendakana ko muna zinga yakwele mvu. Kanele vo owau diampasi kwa yeto mu yindula una ukala e zingu kiakwele mvu, tulenda kwikila vo ediadi vangama divangama, kadi Yave ntalu anene kafuta, i sia vo, moyo a Mwan’andi kavana kimana e diambu diadi diavangama.—Roma 8:32.
10. Nkia nsendo bevingilanga Akristu akuswa ye mameme mankaka?
10 Kanele vo moyo a mvu ya mvu kuna sentu kaka tuvuila wo, Yave ozolele vo tuka owau twayindulanga wo. Akristu akuswa bevingilanga zingu kiambote kuna zulu ekolo beyala e nza kumosi yo Kristu. (Lus. 20:6) Mameme mankaka bevingilanga e zingu kiakwele mvu muna paradiso ova ntoto, kondwa kwa kazu ye mpasi. (Lus. 21:3, 4) Nga umosi muna mameme mankaka ana bena ye vuvu kia zinga yakwele mvu ova ntoto? O nsendo wavuila moyo a mvu ya mvu ova ntoto ke wandwelo ko avo utezaneso yo nsendo wavuila moyo kuna zulu. I kani Yave kavangila wantu. Muna kuma kiaki, kiese kiayingi tukala kiau mu zinga yakwele mvu ova ntoto.
11-12. Nkia nsambu tuvua muna Paradiso zina tulenda yindulanga? (Tala mpe mafoto.)
11 Yindula una ukala e zingu kiaku ova ntoto muna Paradiso. Kutokana diaka ko mu kuma kia mayela yo lufwa. (Yes. 25:8; 33:24) Yave olungisa e zolela yaku yawonso. Nga ozola longoka oma ma bulu ye nuni? Nga ozola longoka sika miziki? Yovo ozola longoka bandula fwaniswa? Kalukatikisu ko vo, muna paradiso wantu ana bazeye salu kia vanga mbandu a zinzo ye atungi tuvua o mfunu. Vena mpe ye wantu ayingi bekala o mfunu, nze awana bazeye salu kia mpatu a nsengo, lamba madia, vanga salanganu ye awana bazeye kuna mvuma muna zinzo yo lunga-lunga zo. (Yes. 35:1; 65:21) Wau vo ozinga yakwele mvu, okala ye ntangwa yafwana mu longoka e salu yayi yawonso ye yankaka mpe.
12 Ekwe kiese tukala kiau mu tambula awana befuluka! (Mav. 24:15) Yindula mpe kiese tukala kiau muna longoka mambu mayingi mu kuma kia Yave muna talanga ulolo wa mavangu mandi muna nsema. (Nku. 104:24; Yes. 11:9) Vana ntandu a mawonso mama, yindula e kiese tukala kiau muna sadila Yave, ke tukala diaka ye mfunu ko mu lombanga e ndoloki a masumu. Nga dia ngangu mu sobanesa e nsambu zazi zawonso ye “wete wa sumu wa kolo kiandwelo”? (Ayib. 11:25) Ve kikilu! E nsambu zazi ziviokele mawonso tulenda vanga yovo vua omu nza yayi. Sungamena vo e Paradiso ova ntoto ke diambu ko tukwamanana vingila. Kansi, ikala se fulu kina tuzingila lumbu ke lumbu. Mawonso mama lungana kikilu melungana, e kuma kadi muna nzola katuzola o Yave i kavanina Mwan’andi kimana kafwa muna wete dieto.
Nkia nsambu zikala muna Paradiso olakukilanga o moyo? (Tala e tini kia 11-12)
VUTULANGA MATONDO MU KUMA KIA ZOLA KWA YAVE
13. Adieyi tulenda vanga muna vutulanga matondo kwa Yave mu kuma kia lukûlu kavana muna wete dieto? (2 Korinto 6:1)
13 Adieyi tulenda vanga muna vutulanga matondo kwa Yave mu kuma kia lukûlu kavana muna wete dieto? Tufwete sianga e salu kia Yave vana fulu kiantete muna zingu kieto. (Mat. 6:33) Vana ntandu, Yesu wafwa “kimana awana bena moyo, balembi kadila diaka o moyo muna yau kibeni, kansi muna ndiona wabafwila yo fulwa.” (2 Kor. 5:15) Yave okutusonganga ngemba yo loloka masumu meto. Avo tuvangidi mawonso tulenda muna kunsadila, tusonga vo tubakulanga mawonso kavanga muna wete dieto ye tukumvutula matondo.—Tanga 2 Korinto 6:1.
14. Aweyi tulenda songela vo tubundanga e vuvu muna luludiku lwa Yave?
14 Tulenda mpe vutulanga matondo muna zola kwa Yave muna kumbundanga e vuvu yo landa luludiku lwandi. Mu nkia mpila? Avo tuzolele baka nzengo, nze nzengo za tezo kia sikola tutanga yovo mpil’a salu tusala, tufwete vava zaya dina Yave kazolele vo twavanga. (1 Kor. 10:31; 2 Kor. 5:7) Vava tubakanga e nzengo mun’owu wa lukwikilu lweto muna Yave, o lukwikilu lweto muna yandi ye kikundi kieto yo yandi kikumamanga. E vuvu kieto kia zinga yakwele mvu kikumamanga mpe.—Roma 5:3-5; Yak. 2:21, 22.
15. Aweyi tulenda vutulwila matondo muna nsungi a Luyindulu?
15 Vena diaka ye mpila yankaka tulenda vutulwilanga matondo muna zola kwa Yave. Tuvanganga mawonso tulenda muna kolo kia Luyindulu muna vutula matondo kwa Yave mu kuma kia lukûlu. Vana ntandu a kubama kimana twakala muna Luyindulu, tulenda mpe bokela akaka kimana balungana yeto. (1 Tim. 2:4) Sasila kwa awana obokelesa mawonso mevangama muna Luyindulu. Muna toma kubasadisa ubasonga e video, Ekuma Yesu Kafwila? ye Luyindulu lwa Lufwa lwa Yesu muna jw.org. Akuluntu bafwete vanga e ngolo mu bokelesa ateleki awonso ana bayoya muna kimwanda. Yindula e kiese kikala kuna zulu ye ova ntoto kele vo akaka muna mameme ma Yave mavila babakidi e nzengo za vutuka muna kambi diandi. (Luka 15:4-7) Muna Luyindulu, tuvanga e ngolo za kayisa awonso, musungula awana bezidi mu nkumbu antete yovo awana ke belungananga yeto diaka ko se vioka mvu miayingi. Tuzolele bamona vo tutomene kubatambula.—Roma 12:13.
16. Ekuma tufwete kadila ye kani dia wokesa e salu kia umbangi muna nsungi a Luyindulu?
16 Nga olenda wokesa e salu kiaku kia umbangi muna nsungi a Luyindulu? Ovanga wo i mpila yambote olenda songela luyangalalu lwaku muna mawonso o Nzambi yo Kristu bavanga muna wete dieto. Avo tutomene wokesa e salu kieto kuna kwa Yave, tutoma tambula lusadisu lwandi, e vuvu kieto mpe muna yandi kitoma kumama. (1 Kor. 3:9) Vanga mpe mawonso muna tanga e sono ya Bibila ya Luyindulu muna finkanda, Fimpanga e Sono Lumbu Yawonso yovo sono ina muna babu kina muna Nkand’a Malongi. Olenda mpe sadila e sono yayi muna nkubik’aku ya longokela.
17. Nkia diambu diyangidikanga Yave? (Tala mpe babu, “ Mpila Olenda Vutulwila Matondo Muna Zola kwa Yave.”)
17 Kieleka, mu kuma kia mambu mankaka ma zingu kiaku, nanga kulenda sadila ko tuludiku twawonso tuyikilu mu longi diadi. Sungamena wo vo Yave ke kutezanesanga ye akaka ko mu mana ovanganga, kansi oyangalelanga o zola okunsonganga. Otoma yangalalanga vava kemonanga e mpila okumvutulwilanga matondo mu kuma kia lukûlu, luna vo i lukau lwandi lusundidi o mfunu.—1 Sam. 16:7; Maku 12:41-44.
18. Ekuma tuvutulwilanga matondo kwa Yave yo Yesu Kristu?
18 Muna kuma kia lukûlu Yave ololokanga masumu meto, tuna ye ngwizani ambote yo Yave ye vuvu kia vua moyo a mvu ya mvu. Muna kuma kiaki, yambula twakwamanana vutulanga matondo muna zola kwa Yave, kadi i kwau kwamfila muna kutuvana e nsambu zazi zawonso. (1 Yoa. 4:19) Tuvutulanga mpe matondo kwa Yesu ona watoma kutuzola yamu tezo kia vana moyo andi muna wete dieto.—Yoa. 15:13.
NKUNGA WA 154 Zola ke Kusuka Ko
