LONGI DIA 1
NKUNGA WA 2 Yave i Nkumbu Aku
Nuvana Nkembo kwa Yave
SONO KIA MVU WA 2025: “Nuvana kwa Yave o nkembo ufwanukini e nkumbu andi.”—NKU. 96:8.
DIAMBU DIASINA TULONGOKA
Tulongoka una tulenda vanina kwa Yave o nkembo una umfwanukini.
1. Wantu ayingi o unu nkia diambu kaka bevavanga?
NANGA omonanga vo o unu, wantu ayingi nkembo a yau kibeni kaka bevavanga. Kasikil’owu, akaka besadilanga e nzila za mwangina e nsangu muna kuyisana yo songa mana bevanganga. Kansi, wantu akete kaka bevananga nkembo kwa Yave wa Nzambi. Mu longi diadi, tulongoka e nsas’a vana nkembo kwa Yave ye dina difwete kutukasakesanga mu vanga wo. Tulongoka mpe una tulenda vanina kwa Nzambi o nkembo una umfwanukini ye una yandi kibeni kekembesela nkumbu andi ke kolo ko.
OVANA NKEMBO KWA YAVE AWEYI DISONGELE?
2. Aweyi Yave kasongela nkembo andi vana Mongo a Sinai? (Tala mpe fwaniswa.)
2 Nki i nkembo? Muna Bibila o mvovo “nkembo,” ulenda sadilwa mu sanisina muntu ovangidi diambu dia sivi. Vava e zula kia Isaele kia vevolwa muna ubundu wa Engipito, ke vavioka kolo ko Yave wasonga nkembo andi. Mafunda ye mafunda ma Aneyisaele bakutakene vana ndimb’a Mongo a Sinai mu wanana yo Nzambi au. Tuti diampwena dia ndombe difukidi mongo. Vana vau o mwisi uvaikidi muna mongo, o ntoto uyantikidi zakama. Vakedi mpe ntemo, miandazi ye zú diangolo dia mpungi. (Luv. 19:16-18; 24:17; Nku. 68:8) Se yindula e mpila ina Aneyisaele basivikila vava Yave kasonga o nkuma wa nkembo andi.
Yave osongele o nkembo andi kwa Aneyisaele vana Mongo a Sinai (Tala e tini kia 2)
3. Aweyi tulenda vanina nkembo kwa Yave?
3 Adieyi tuvova mu kuma kia wantu? Nga tulenda vana nkembo kwa Yave? Elo. Imosi muna mpila tulenda vanina nkembo kwa Yave, i zayisanga kwa akaka o nkum’andi wa sivi ye fu yandi. Tulenda mpe vana nkembo kwa Nzambi vava tusonganga vo mu lusadisu lwandi tuvangilanga konso diambu. (Yes. 26:12) Davidi wa Ntinu wasonga mbandu ambote muna vana nkembo kwa Yave. Muna sambu kina kalomba vana ntadisi a nkutakani a Isaele, Davidi wavova kwa Nzambi vo: “O nene waku, e Yave, ye ngolo yo nkembo yo vienga yo zitu, kadi yawonso ina koko zulu y’ova nza, yaku.” I bosi, vava Davidi kafokola e sambu kiandi, “e nkutakani yawonso ikembelele Yave.”—1 Tus. 29:11, 20.
4. Aweyi Yesu kavanina nkembo kwa Yave?
4 Vava Yesu kakala ova ntoto, wavananga nkembo kwa Se diandi muna zayisa kwa wantu vo Yave wamvana nkuma una kavangilanga masivi. (Maku 5:18-20) Yesu wavana mpe nkembo kwa Yave muna mpila kavovelanga oma ma Se diandi ye mpila ina kakadilanga yo wantu. Lumbu kimosi vava Yesu kalonganga muna sambilu, vana kati kwa nkangu vakala yo nkento mosi wayeleswa kwa nkuya mu mvu 18. Muna kuma kia mpasi zina kamweswanga kwa nkuya, o nkento ndiona wakovama kibeni, kalendanga nkutu vumbuka ko. Mu mpasi kikilu kakala. Muna kuma kia nkenda, Yesu wamfinama, kuna zola kwawonso wamvovesa vo: “E nkento, osasukidi kwaku muna mayela maku.” I bosi, untensekele moko, vana vau osingamene, “oyantikidi kembelela Nzambi.” Wavutula matondo kwa Yave ona wasasula kimbevo kiandi. (Luka 13:10-13) O nkento ndiona ndungidi kakala yau muna vana nkembo kwa Yave. Oyeto mpe diau dimosi tuvanganga.
EKUMA TUVANINANGA NKEMBO KWA YAVE?
5. Ekuma tuzitisilanga Yave?
5 Tuvananga nkembo kwa Yave muna songa vo zitisa tukunzitisanga. Tuvuidi kuma yayingi muna kunzitisa. Yave i Mpungu ngolo; nkum’andi wakondwa tezo. (Nku. 96:4-7) E ngangu zandi zimonekanga muna lekwa ina kasema, yandi i nto a mioyo mieto ye okutuvananga yawonso tuvuidi o mfunu muna kwamanana zinga. (Lus. 4:11) Yave nkwa kwikizi. (Lus. 15:4) Mawonso kevanganga mesikilanga ye ntangwa zawonso olungisanga nsilu miandi. (Yos. 23:14) Ekiaki i kuma Yeremiya wa ngunza kavovela mu kuma kia Yave vo: “Vana vena akwa ngangu awonso a zula ye muna yintinu yawonso, kavena ona ofwanane yaku ko.” (Yer. 10:6, 7) Dialudi, tuvuidi kuma yayingi muna zitisa Se dieto dia zulu. Kansi, vana ntandu a zitisa Yave, tukunzolanga mpe mu kuma kia fu yandi.
6. Ekuma tuzolelanga Yave?
6 Tuvananga nkembo kwa Yave mu kuma kia zola kweto muna yandi. Tala diaka fu ya Yave ikutufilanga muna kunzola. Nkwa nkenda yo walakazi. (Nku. 103:13; Yes. 49:15) Yave okuyisianga vana fulu kieto, vava tumonanga e mpasi yandi mpe okendalalanga. (Zak. 2:8) Okutusadisanga muna kunzaya ye kutuvana e lau dia kala akundi andi. (Nku. 25:14; Mav. 17:27) Yave nlembami, “oyenzamanga katala e zulu ye ntoto, ozangula munkondwa nsadisi vana ntoto.” (Nku. 113:6, 7) Muna kuma kia mawonso mama, tuzolanga kembelela Nzambi eto anene.—Nku. 86:12.
7. Nkia lau diampwena tuvuidi?
7 Tuvananga nkembo kwa Yave kadi tuzolele vo akaka mpe banzaya. Wantu ayingi ke bazeye ludi ko mu kuma kia Yave. Ekuma? Kadi Satana ovondanga meso mau muna sayanesa luvunu mu kuma kia Nzambi. (2 Kor. 4:4) Satana ofilanga wantu mu kwikila vo Yave nlandi a kunda, ke vuanga wantu mfunu ko, yandi i tuku dia mpasi zayingi tumonanga ova nza. Kansi, oyeto tuzeye e ludi mu kuma kia Nzambi eto. Tuna ye lau dia zayisa kwa akaka e mpila muntu kena o Nzambi yo kubasadisa kimana yau mpe bankembelela. (Yes. 43:10) O Nkunga 96 usonganga o mfunu wavana nkembo kwa Yave. Ekolo tubadika miaka mvovo miavumunuinua mu nkunga wau, yindula una olenda vanina kwa Yave o nkembo una umfwanukini.
AWEYI TULENDA VANINA KWA YAVE O NKEMBO UNA UMFWANUKINI?
8. Mu nkia mpila tulenda kembelela Yave? (Nkunga 96:1-3)
8 Tanga Nkunga 96:1-3. Tulenda vana nkembo kwa Yave muna mana tuvovanga mu kuma kiandi. Muna tini yayi, o nkangu a Yave bebokelwanga kimana ‘bayimbidila Yave,’ ‘bakembelela nkumbu andi,’ ‘basamuna e nsangu zambote za mpuluz’andi’ ye ‘basamuna o nkembo andi muna zula.’ Zawonso zazi i mpila tulenda vanina nkembo kwa Se dieto dia zulu mu mana tuvovanga mu kuma kiandi. Ayuda akwa kwikizi ye Akristu a tandu kiantete ke bakalanga yo lukatikisu ko muna zayisa kwa akaka mambu mawonso mambote mana Yave kavanga muna wete diau yo tanina e nkumbu andi. (Dan. 3:16-18; Mav. 4:29) Aweyi tulenda vangila diau dimosi?
9-10. Adieyi olongokele muna nona kia mpangi Angelina? (Tala mpe foto.)
9 Badika e nona kia mpangi ankento Angelina a ozingilanga kuna Estados Unidos. Kuna unkabu wawonso watanina nkumbu ambote a Yave kuna kompani dina kasadilanga. Wau vo muntu ampa kakala kuna salu, walombwa vo kayisunzula kwa akwandi a salu ana bakala mpe vo wantu ampa. Mpangi Angelina wakubika e video ya mafoto muna songa e kiese kekalanga kiau wau vo Mbangi a Yave. Kansi, vitila ntangw’andi ya vova yafwana, mosi muna nkwandi a salu wakisunzula vo mu nzo a Mbangi za Yave kasansukila. Wayantika veza mana tukwikilanga. Mpangi Angelina wavova vo: “Ntim’ame wayantika dudila. Kansi yayindula vo: ‘Nga mfwete yambula vo muntu kavova luvunu mu kuma kia Yave? Yovo mfwete tanina nkumbu andi ambote?’”
10 Vava kamanisa vova, mpangi Angelina walomba sambu kiankufi muna nsi a ntima. I bosi, wavovesa nkwandi a salu kuna ngemba vo: “O lusansu lwa zingu kiaku lwafwanana fioti yo lwame. Mono mpe mu nzo a Mbangi za Yave yasansukila ye yakinu Mbangi a Yave yamu unu.” Kana una vo diatwasa fintantani, mpangi Angelina wavuvama, wasonga kwa akwandi a salu e mafoto mana kakatula muna salu ya kimwanda ye akundi andi bena vo Mbangi za Yave ye kuna ndekwa zawonso watanina lukwikilu lwandi. (1 Pet. 3:15) Vava mpangi Angelina kafokola songa mafoto, o muntu ndiona wavuvama. Wayika nkutu mambu mambote kamona ekolo kasansukilanga muna nzo a Mbangi za Yave. Mpangi Angelina wavova vo: “Yave ofwene taninua. Lau diampwena kikilu mu samuna e nkumbu andi kwa akaka.” Yeto mpe tulenda kembelela Yave vava akaka betiangunanga nkumbu andi. Ediadi lau diampwena kikilu.
Tulenda vana nkembo kwa Yave muna mpova zeto (Tala e tini kia 9-10) b
11. Asambidi akieleka muna tandu yawonso, aweyi belandilanga o nkanikinu una muna Nkunga 96:8?
11 Tanga Nkunga 96:8. Tulenda vana nkembo kwa Yave muna mavua meto. Asambidi akieleka, ntangwa zawonso besadilanga mavua mau muna kembelela Yave. (Nga. 3:9) Kasikil’owu, Aneyisaele bavana tukau twasadilwa muna tunga yo lunga-lunga e tempelo. (2 Nti. 12:4, 5; 1 Tus. 29:3-9) Akaka muna alongoki a Kristu bavananga “mavua mau” kimana o Yesu ye ntumwa zandi bakala ye ina bavuanga o mfunu. (Luka 8:1-3) Akristu muna tandu kiantete, bavananga mpe nkayilu muna sadisa mpangi zau bakala mu mpasi. (Mav. 11:27-29) Yeto mpe o unu, tulenda kembelela Yave muna vananga tukau kuna mvevo.
12. Aweyi e nkayilu mieto mitwasilanga nkembo kwa Yave? (Tala mpe foto.)
12 Tala nona kimosi kisonganga una nkayilu mieto mivaninanga nkembo kwa Yave. Muna mvu wa 2020, kuna Zimbábue kwakala ye kala kiazingila kolo kianda. Mafunda ye mafunda ma wantu ke bakala diaka ye madia ko kumosi yo mpangi ankento una ye nkumbu Prisca. Kana nkutu muna nsungi a kala, mpangi Prisca wakwamanana sadila e programa andi ya salu kia umbangi. Wavaikanga mu salu kia umbangi kina Kiatatu ye Kiatanu kana nkutu muna sungi a kuna mbongo. Mfinangani zandi bamvezanga wau kayendanga muna salu kia umbangi vana fulu kia kwenda kuna e mbongo kuna mpatu. Bavovanga vo: “O ngeye nzala ofwa.” Mpangi Prisca wavutulanga vo: “Yave ke bembolanga selo yandi ko.” Ke vavioka kolo ko, watambula lusadisu lwatuka kuna Vula. E lekwa yayina mu nzimbu za nkayilu mieto yasumbilwa. E mfinangani za mpangi Prisca batoma sivika ye bamvovesa vo: “Nzambi okusadisanga e ntangwa zawonso, yeto mpe tuzolele longoka mayingi mu kuma kiandi.” Nsambwadi muna mfinangani zandi bayantika kwenda muna tukutakanu.
Tulenda vana nkembo kwa Yave muna mavua meto (Tala e tini kia 12) c
13. Aweyi tulenda vanina nkembo kwa Yave muna kadilu kieto? (Nkunga 96:9)
13 Tanga Nkunga 96:9. Tulenda vana nkembo kwa Yave muna kadilu kieto. Diavavanga vo anganga ana basadilanga muna tempelo a Yave bakala bavelela muna nitu. (Luv. 40:30-32) Yeto mpe tufwete kalanga twavelela, kansi ke muna kinitu kaka ko. Tufwete venganga mambu mawonso mana Yave kemenganga. (Nku. 24:3, 4; 1 Pet. 1:15, 16) Tufwete vanganga ngolo muna katula “kiwuntu kiankulu,” i sia vo, tufwete venganga mavangu mawonso masafu. I bosi, tuvuata “kiwuntu kiampa,” i sia vo, tufwete tangininanga nyindu a Yave ye fu yandi. (Kol. 3:9, 10) Muna lusadisu lwa Yave, kana nkutu minta-zumba ye akwa nsoki balenda soba yo vuata kiwuntu kiampa.
14. Adieyi olongokele muna nona kia mpangi Jack? (Tala mpe foto.)
14 Badika nona kia Jack ona wakala se vonza kiampwena mu kuma kia mavangu mandi mansoki ye wavewa e nkumbu vo Nkuya. Mu kuma kia nkanu mina kavola, Jack wazengelwa tumbu kia lufwa. Kansi, ekolo kavingilanga e lumbu kevondwa, watambulwila longoka e Bibila yo mpangi mosi ona wakingulanga e pelezo ina kakala Jack. Kana una vo nkanu miayingi kateka vola, Jack wakatula emvimba kiwuntu kiandi kiankulu. Kuna kwalanda, wavubwa se Mbangi a Yave. Wau vo Jack nsobani zampwena kavanga, muna lumbu kina kavondwa, akaka muna ayingidi a pelezo badila. Soladi dimosi wasadilanga muna pelezo wavova vo: “Jack i mbakami wasunda o umpumbulu mwamu pelezo yayi, kansi owau yandi i mbakami osundidi muna songa fu yambote.” Vava kavondwa, muna lumingu lwalanda, ampangi ana bayenda muna lukutakanu lwakati kwa lumingu muna pelezo bamona mbakami mosi wayenda mu lukutakanu mu nkumbu antete. Nki kiankasakesa? Watoma sivika mu mpila ina Jack kasobela kiwuntu kiandi. Wazola zaya dina kafwete vanga muna sambila Yave. Kieleka, e kadilu kieto kilenda vana nkembo kwa Se dieto dia zulu.—1 Pet. 2:12.
Tulenda vana nkembo kwa Yave muna kadilu kieto (Tala e tini kia 14) d
AWEYI YAVE KEKEMBESELA NKUMBU ANDI KE KOLO KO?
15. Aweyi Yave kekembesela emvimba e nkumbu andi ke kolo ko? (Nkunga 96:10-13)
15 Tanga Nkunga 96:10-13. E tini yayi yansuka ya Nkunga 96, iyikilanga Yave vo Mfundisi ansongi ye Ntinu. Aweyi Yave kekembesela nkumbu andi ke kolo ko? Muna mfundisa zandi. Ke kolo ko ofwasa Babele Anene eyi itwasanga luvezo muna nkumbu andi. (Lus. 17:5, 16; 19:1, 2) Akaka muna awana bemona lufwasu lwa Babele Anene nanga bekutuyikama mu nsambil’aludi. I bosi, muna vita ya Armangedo, Yave ofwasa nza yawonso ya Satana, awonso ana bekumenganga ye awana besafulanga e nkumbu andi. Kansi, awana bezolanga Yave, awana bekunlemvokela ye kumvana nkembo, vuluzua bevuluzua. (Maku 8:38; 2 Tes. 1:6-10) Muna lutonto lwansuka, kuna mfoko a Luyalu lwa Kristu lwa Funda dia Mvu, Yave ovelelesa emvimba e nkumbu andi. (Lus. 20:7-10) Muna kolo kiakina, “e nza izala yo zayi wa nkembo a Yave, wauna o maza mefukilanga kalunga.”—Kab. 2:14.
16. Nkia diambu ofwete vangila e ngolo mu vanga? (Tala mpe foto.)
16 Ekwe kiese tukala kiau vava wantu awonso bevana kwa Yave o nkembo ufwanukini e nkumbu andi! Kansi, ekolo tuvingilanga ntangwa yayina, tuzolele vanga mawonso tulenda muna vananga nkembo kwa Nzambi eto konso ntangwa tukalanga ye lau dia vanga wo. Muna toma songa o mfunu wa diambu diadi, e Selo Yambuta basolele Nkunga 96:8 se sono kia mvu wa 2025: “Nuvana kwa Yave o nkembo ufwanukini e nkumbu andi.”
Kuna sentu, wantu awonso bekala o moyo, bevana kwa Yave o nkembo ufwanukini e nkumbu andi (Tala e tini kia 16)
NKUNGA WA 12 Yave i Nzambi Anene
a E nkumbu zankaka zasobwa.
