1. Nkia nluta tuvuanga vava tulungananga muna Luyindulu lwa lufwa lwa Kristu konso mvu?

 YAVE watuvana lukau lusundidi o mfunu vava katuma o mwan’andi anzolwa kimana kafwa muna wete dia wantu. (2 Kor. 9:15) Wau vo Yesu wavana moyo andi, ongeye olenda kala ye ngwizani ambote yo Yave wa Nzambi. Olenda mpe kala ye vuvu kia zinga yakwele mvu. Tuvuidi kuma yayingi mu vutula matondo kwa Yave ona watuvana lukûlu, kadi lusonganga vo zola ketoma kutuzolanga. (Roma 5:8) Muna kutusadisa twavutulanga matondo yo lembi vilakana dina Yave yo Yesu bavanga muna wete dieto, Yesu wasikidisa Luyindulu lwa lufwa lwandi olu luvangamanga konso mvu.—Luka 22:19, 20.

2. Nkia mambu tulongoka mu longi diadi?

² Mu mvu wau, o Luyindulu Kiasabala lukala, kia 12 kia Abidi, 2025. Kalukatikisu ko vo yeto awonso mu kubama twina kimana twenda lungana muna Luyindulu. Nluta miayingi tuvua avo tuvawidi e ntangwa muna nsungi a Luyindulu muna badika a mana Yave yo Mwan’andi bavanga muna wete dieto. Mu longi diadi tubadika mana lukûlu lukutulonganga mu kuma kia Yave yo Mwan’andi. Muna longi dilanda, tubakula una tulenda vuila nluta muna lukûlu ye una tulenda songela luyangalalu lweto muna lukûlu.

ADIEYI O LUKÛLU LUKUTULONGANGA MU KUMA KIA YAVE?

3. Aweyi o lufwa lwa muntu mosi lulenda vevolwela wantu ayingi muna sumu yo lufwa? (Tala mpe fwaniswa.)

³ O lukûlu lukutulonganga o unsongi wa Yave. (Nsi. 32:4) Mu nkia mpila? Vava Adami kakolamena Nzambi, wakituka nsumuki yo twasa lufwa. Wau vo tu mbongo andi, yeto mpe twa asumuki ye tufwanga. (Roma 5:12) Muna kutuvevola muna  sumu yo lufwa, Yave wavanga e nkubika kimana Yesu kavana moyo andi se lukûlu. Kansi, aweyi o lufwa lwa muntu mosi walunga lulenda vevolwela wantu ayingi muna sumu yo lufwa? Paulu wa ntumwa wasasila vo: “Wau vo muna ukolami wa muntu mosi [Adami], ndonga yakitulwa se asumuki, diau dimosi mpe muna nlemvo wa muntu mosi [Yesu], ndonga bekitulwa se ansongi.” (Roma 5:19; 1 Tim. 2:6) Ozevo, Paulu edi kazola vova vo wantu awonso asumuki ye befwanga mu kuma kia muntu mosi alunga ona wakolamena Nzambi. Muna kuma kiaki, muna kutukula muna sumu yo lufwa, diavavanga vo muntu mosi walunga kalemvokela Nzambi.

4. Ekuma Yave kayambulwila kaka ko vo wan’a Adami ana besonga o nlemvo bazinga yakwele mvu?

⁴ Nga mfunu kikilu diakala vo Yesu kafwa muna kutuvuluza? Nga Yave kafwana yambula kaka ko vo wan’a Adami ana besonga o nlemvo bazinga yakwele mvu? Kuna kwa wantu alembi lunga, tulenda yindula vo e yayi i mpila yambote kafwana singikila e diambu diadi. Kansi, ke ina ngwizani ko ye unsongi wa Yave. Kadi Yave kwa unsongi, kafwana yambulwila kaka ko e vangu dia ukolami wa Adami.

5. Ekuma tulenda kadila ye ziku vo Yave ntangwa zawonso mambu mansongi kaka kevanga?

⁵ Kansi, adieyi diadi vangama kele vo Yave kavana lukûlu ko yo lembi sadila unsongi wandi muna yambula vo wana alembi lunga a Adami bazinga yakwele mvu? Nanga wantu badi yindula vo Yave olenda yambula songa unsongi wandi muna mambu mankaka mpe. Kasikil’owu, o wantu badi katikisa kana vo Yave olungisa kikilu nsilu miandi miawonso. Ke dina mfunu ko mu tokana mu kuma kia diambu diadi. Ekuma? Kadi Yave wavanga diambu diansongi, i sia vo, wavana Mwan’andi mosi kaka se lukûlu, kanele vo diampasi kikilu diakala kwa yandi. Tulenda kala ye ziku vo Yave ntangwa zawonso mambu mansongi kaka kevanganga.

6. Nkia mpila o lukûlu lusongelanga o zola kwa Yave? (1 Yoane 4:9, 10)

⁶ Kanele vo o lukûlu lukutusadisanga mu bakula vo Yave nkwa unsongi, lukutusadisanga mpe mu toma bakula o zola kwandi kuna kwa yeto. (Yoa. 3:16; tanga 1 Yoane 4:9, 10.) Wau vo Yave watuma mwan’andi kimana kafwa muna wete dieto, kazolele kaka ko vo twazinga yakwele mvu, kansi ozolele mpe vo twakota muna kanda diandi. Badika edi: Vava Adami kasumuka, Yave wanyinga muna kanda dia asambidi andi. Muna kuma kiaki, yeto awonso ke tuwutukilanga mu kanda dia Nzambi ko. Kansi, muna nzil’a lukûlu, Yave ololokanga masumu meto ye wantu awonso ana  besonganga lukwikilu muna Nzambi yo kunlemvokela balenda kota muna kanda diandi. Kana nkutu owau tulenda kala ye ngwizani ambote yo Yave ye akweto asambidi. Kieleka, Yave zola kikilu kekutuzolanga.—Roma 5:10, 11.

7. E mpasi Yesu kamweswa, aweyi zikutusadisilanga mu bakula vo Yave zola kikilu kekutuzolanga?

⁷ Avo tuyindwidi e mpasi o Yave kamona vava kavana mwan’andi se lukûlu, tutoma bakula e mpila o Yave kekutuzolelanga. Satana wavova vo ke vena selo kia Nzambi ko osikila ye kwikizi muna Nzambi avo owanane ye diambu diampasi. Muna songa vo Satana mvuni, Yave wayambula vo Yesu kamona e mpasi vitila kafwa. (Yobi 2:1-5; 1 Pet. 2:21) Yave wamona vava wantu basakanenanga Mwan’andi, makesa manwanda yo kunkoma vana nti. I bosi, Yave wamona vava Mwan’andi anzolwa kafwa lufwa lwampasi. (Mat. 27:28-31, 39) Yave wakala yo nkuma mu kakidila e diambu diadi. Kasikil’owu, vava wantu bavova vo: ‘Yambula [Nzambi] kavuluza owau, avo zola kekunzolanga,’ Yave wadi wo vanga. (Mat. 27:42, 43) Kansi, kele vo Yave kakakidila e diambu diadi, o lukûlu ke lwadi futwa ko ye ke twadi kala ye vuvu ko. Muna kuma kiaki, Yave wayambula vo Mwan’andi kazizidila e mpasi yamuna lufwa.

8. Nga Yave wamona mpasi za ntima vava kamona Mwan’andi muna mpasi? Sasila. (Tala mpe fwaniswa.)

⁸ Ke tulendi yindula ko vo wau vo Yave i Mpungu-ngolo ke monanga mpasi za ntima ko. Wau vo mu fwaniswa kiandi katuvangila, watuvana lendo kia mona mpasi muna ntima yovo kendalala, tulenda kala ye ziku vo Yave mpe omonanga mpasi mu ntima yovo kendalala. E Bibila kivovanga mu kuma kiandi vo ‘banlweka ntima’ yo ‘kunkendeleka.’ (Nku. 78:40, 41) Badika mpe e nona kia Abarayama yo Isaki. Sungamena vo Nzambi walomba kwa Abarayama kavana mwan’andi mosi kaka se lukau. (Tuku 22:9-12; Ayib. 11:17-19) Yindula una Abarayama kamona ekolo kakubamanga muna vonda mwan’andi Isaki. Wau se yindula e nkenda ye ntantu kakala zau o Yave ekolo kamona wantu bawandanga Mwan’andi yo kumvonda! Tala e video, Tanginina Lukwikilu Lwau—Abarayama, Ndambu ya Zole, muna jw.org.

9. E sono kia Roma 8:32, 38, 39, aweyi kisadisidi mu bakula o zola kwampwena kwa Yave muna ngeye ye akwaku Akristu?

⁹ O lukûlu lukutulonganga vo ke vena muntu ko osundidi kutuzola avo ke Yave kaka ko, kana nkutu yitu ona tutoma zolanga ngatu nkundi. (Tanga Roma 8:32, 38, 39.) Tulenda kala ye ziku vo Yave osundidi kutuzola lutila una yeto kibeni tukuyizolelanga. Nga ozolele zinga yakwele mvu? O Yave mpe i wau kibeni  kazolele. Nga ozolele vo masumu maku malolokwa? Yave mpe ozolele kibeni loloka masumu maku. Edi kaka kekutulombanga vo twatambulwila lukau lwandi muna songa lukwikilu yo kunlemvokela. O lukûlu i sinsu kia zola kwampwena kwa Nzambi. Muna nz’ampa mayingi diaka tulongoka mu kuma kia zola kwa Yave.—Kim. 3:11.

ADIEYI O LUKÛLU LUKUTULONGANGA MU KUMA KIA YESU?

10. (a) Nkia diambu diatoma kendeleka Yesu muna lufwa lwandi? (b) Aweyi Yesu katundidikila nkumbu a Yave? (Tala mpe babu, “ E Kwikizi kia Yesu Kiatundidika Nkumbu a Yave.”)

¹⁰ Yesu wavanga mawonso muna lembi safula nkumbu a Se diandi. (Yoa. 14:31) Yesu watoma kendalala vava kavuninua mambu vo Nzambi katianguna ye mbendomoni a wantu. Kadi ediadi diadi twasa luvezo muna nkumbu a Se diandi. Ekiaki i kuma kasambila vo: “E Tata, avo dilendakana, yambula e mbungwa yayi yampioka.” (Mat. 26:39) Vava kasikila ye kwikizi muna Yave yamuna lufwa, Yesu watundidika nkumbu a Se diandi.

11. Aweyi Yesu kasongela o zola kwa wantu? (Yoane 13:1)

¹¹ O lukûlu lukutulonganga mpe vo Yesu otoma zolanga wantu, musungula alandi andi. (Nga. 8:31; Tanga Yoane 13:1.) Kasikil’owu, Yesu wazaya wo vo mambu mankaka kewanana mau muna salu kiandi ova ntoto mampasi kibeni mekala, musungula lufwa lwandi lwampasi. Kana una vo i wau, kayambula ko vo mambu mama mampasi mankakidila mu lungisa e kiyekwa kiandi ova ntoto. Kavanga wo ko mu lungisa kaka e mbebe ina kavewa kwa Yave. Kansi, wavanga wo mpe mu kuma kia zola kwandi muna wantu. Yesu wasia e sungididi kiandi kiawonso muna salu kia samuna e nsangu zambote, longa yo sadisa akaka. Kana nkutu muna fuku wavitila lufwa lwandi, Yesu  wavaula e ntangwa muna longa, fiaulwisa yo kumika ntumwa zandi. (Yoa. 13:12-15) I bosi, vava kakala vana nti ampasi ekolo lufwa lwandi lwafinamanga, Yesu wavaula nkutu e ntangwa muna vovesa kwa kimpumbulu ona wakomwa vana ndambu andi vo osinga kala muna paradiso. Watokanena mpe wete dia ngudi andi ye walomba kwa Yoane vo kasala kulunga-lunga. (Luka 23:42, 43; Yoa. 19:26, 27) Kieleka, Yesu ke mu lufwa lwandi kaka ko kasongela o zola kwa wantu, kansi muna zingu kiandi kiawonso ova ntoto.

12. Nkia salu kesalanga o Yesu muna wete dieto owau?

¹² Dialudi vo Yesu “nkumbu mosi kafwa,” kansi wakinu sala muna wete dieto. (Roma 6:10) Aweyi kevangilanga wo? Ovanganga mawonso kimana twavua e nluta mia lukûlu. Tala e salu kesalanga. Osalanga se Ntinu, Ngang’ambuta ye ntu a nkutakani. (1 Kor. 15:25; Efe. 5:23; Ayib. 2:17) Yesu osalanga mpe muna lungalakesa akuswa ye ndong’ayingi. E salu kiaki kisinga fokoka kuna mfoko a kolo kia mpasi zayingi. b (Mat. 25:32; Maku 13:27) Osadisanga mpe ntaudi akwikizi yo lulungalalu kimana e selo yandi yakwikizi yatoma dikilwanga muna kimwanda mu lumbu yayi yambaninu. (Mat. 24:45) Muna kolo kia Luyalu lwandi lwa Funda dia Mvu, Yesu okwamanana sala muna wete dieto. Kieleka, Yesu wakivana emvimba muna wete dieto. Yandi i lukau lwatuka kwa Yave.

KWAMANANA LONGOKA MAMBU MAMPA

13. Obadika aweyi kulenda kusadisila mu kwamanana longoka muna zola kuna Yave yo Yesu bekutusonganga?

¹³ Avo okwamanene badika muna zola kuna Yave wa Nzambi yo Yesu batusonga, ozaya mambu mayingi mu kuma kia zola kwaku. Muna nsungi a Luyindulu lwa mvu wau, olenda sia sungididi kia tanga nkanda umosi yovo miole muna nkanda yá mia Nsangu Zambote. Vana fulu kia longoka mambu mayingi mu nkumbu mosi, longokanga malembe-malembe yo vavulula muna nkanda miankaka kimana wazaya e kuma yankaka tufwete zolelanga Yave yo Yesu. Vana ntandu a mawonso mama, zayisa kwa akaka mana olongoka.

14. Landila Nkunga 119:97 ye mvovo vana yand’a lukaya, o vavulula aweyi kulenda kutusadisila mu kwamanana longoka oma ma lukûlu ye malongi mankaka? (Tala mpe foto.)

¹⁴ Avo mvu miayingi se una mu ludi, nanga olenda yindula kana vo vena diaka ye mambu mampa vana ntandu a mambu mana otomene zaya, nze unsongi wa Nzambi, zola  kwandi ye lukûlu. Muna vova e ludi, ntangwa zawonso vekala kaka ye mambu mampa tulenda longoka muna mambu mama ye mankaka mpe. Ozevo, adieyi olenda vanga? Tanga yo longoka mambu mambote-mbote mena muna nkanda mieto. Avo omwene diambu muna Bibila dina kutomene bakula ko, vavulula. I bosi, muna lumbu kiawonso, toma badika diambu diampa dina osolwele ye dina olongokele mu kuma kia Yave, Mwan’andi ye zola kwau muna ngeye.—Tanga Nkunga 119:97 ye mvovo vana yand’a lukaya.

15. Ekuma tufwete kwamanena vavila tusalu tuna muna Bibila?

¹⁵ Avo kusololanga diambu diampa ko yovo diambu diakiese konso ntangwa otanganga Bibila yovo vava ovavululanga, kukendalala ko. Kala nze muntu otimanga wolo. Nkumbu miayingi, o muntu otimanga wolo divavanga vo kaviokesa ola zayingi yovo lumbu yayingi muna solola wolo. Kana una vo i wau, ke yoyanga ko, okwamanananga tima, kadi konso tadi dia wolo kesolola, kana nkutu diakete-kete diantalu kikilu kwa yandi. Kansi nswaswani ye wolo, konso diambu diampa osolola muna Bibila disundidi e ntalu. (Nku. 119:127; Nga. 8:10) Muna kuma kiaki, kwamanana songa luzindalalu yo simbinina e nkubik’aku ya tanga e Bibila.—Nku. 1:2.

16. Aweyi tulenda tanginina Yave yo Yesu?

¹⁶ Ekolo olongokanga, vavanga e mpila olenda sadila mana olongokanga. Kasikil’owu, muna tanginina o unsongi wa Yave, venga fu kia sia e mpambula. Muna tanginina o zola kwa Yesu muna Se diandi ye kwa akaka, kalanga wakubama mu mona mpasi mu kuma kia nkumbu a Yave ye muna wete dia akwaku Akristu. Kuna diak’e sambu, muna tanginina Yesu vanganga e ngolo kimana wasilanga umbangi kwa akaka kimana oyau mpe batambulwila lukau lwa ntalu lwa Yave.

17. Nkia mambu tuvovela muna longi dilanda?

¹⁷ Avo tukwamanene longoka oma ma lukûlu, o zola kweto muna Yave yo Mwan’andi kuwokela. O zola kwau mpe muna yeto kuwokela. (Yoa. 14:21; Yak. 4:8) Muna kuma kiaki, tutoma sadilanga e nkubika zawonso Yave kevanganga kimana twakwamanana longoka oma ma lukûlu. E longi dilanda divovela maka mambu tulenda vanga muna vua e nluta mia lukûlu ye una tulenda vutulwilanga matondo muna zola kwa Yave.