Yuvu Y’atangi
Nkia ntangwa Yesu kakituka se Ngang’ambuta?
E ziku yisonganga vo Yesu wakituka se Ngang’ambuta vava kavubwa muna mvu wa 29 T.K. Aweyi tuzayidi wo? Vava kavubwa, Yesu wayisunzula se kimenga vana ziku dia “luzolo” lwa Nzambi. (Ngal. 1:4; Ayib. 10:5-10) E ziku diadi diakubikwa vava Yesu kavubwa. Kuna nz’ankulu, e ziku mfunu kikilu diakalanga muna tempelo. Muna kuma kiaki, tulenda vova vo e tempelo ya kimwanda yasikidiswa tuka Yesu kavubilwa yamu unu. E tempelo yayi, i mawonso Yave kevanganga muna sadila e kimenga kia lukûlu kia Yesu kimana o wantu bansambila mu mpila yavelela.—Mat. 3:16, 17; Ayib. 5:4-6.
Kuna nz’ankulu, diavavanga vo vakala ye ngang’ambuta muna tempelo, i diau mpe divavuanga muna tempelo a kimwanda. Muna kuma kiaki, Yave wakusa Yesu muna “mwand’avelela yo nkuma” se ngang’ambuta. (Mav. 10:37, 38; Maku 1:9-11) Ozevo, aweyi tulenda kadila ye ziku vo Yesu watumbikwa se Ngang’ambuta vava kavubwa, i sia vo, vitila lufwa ye lufuluku lwandi? E nona kia Arone ye nganga zankaka zambuta ana bavinga vana fulu kiandi, kikutusadisa mu zaya e mvutu za kiuvu kiaki.
O nsiku una Yave kavana kwa Mose wavovanga vo ngang’ambuta kaka olenda kota vana Fulu Kisundidi o Vauka muna saba. I bosi, vava kiasikidiswa e tempelo yandi kaka wakotanga muna Fulu Kisundidi o Vauka. Vakala ye rido yavambulanga e Fulu Kiavauka ye Fulu Kisundidi o Vauka. O ngang’ambuta waviokelanga kaka vana rido yayi muna Lumbu kia Luyambulwilu lwa Masumu. (Ayib. 9:1-3, 6, 7) Arone ye ankaka ana banlandila, batumbikwa se nganga zambuta vitila baviokela “vana rido” yo kota vana Fulu Kisundidi o Vauka. Diau dimosi mpe, vitila kafwa, Yesu watumbikwa se ngang’ambuta kimana kaviokela “vana rido, i sia vo, nitu andi” yo kota kuna zulu. (Ayib. 10:20) Kiaki i kuma Paulu wa ntumwa kavovela mu kuma kia Yesu vo vava kayiza nze “ngang’ambuta” wakota “muna saba kianene ye kiambote, kina ke kiavangilwa muna moko ko,” i sia vo, “kuna zulu kikilu.”—Ayib. 9:11, 24.
Nga vena ye nswaswani muna lumbu kina Nzambi katambulwila e kangu diampa ye lumbu kina diayantika o sala?
Ve, ke vena nswaswani ko muna lumbu kina Nzambi katambulwila e kangu diampa ye lumbu kina diayantika o sala. Ekuma? Kadi vava Yesu kavutuka kuna zulu yo sunzula kwa Nzambi o moyo andi alunga muna wete dieto, wavanga dimosi muna mambu tatu mavavuanga kimana Nzambi katambulwila e kangu diampa. E mambu tatu mama mpe mavavuanga kimana e kangu diampa diayantika o sala. Nkia mambu tatu mama?
Diantete, Yesu wavutuka kwa Yave kuna zulu. Diazole, Yesu wasunzula e kimenga kiandi kwa Yave. Diatatu, Yave watambulwila e kimenga kia Yesu. Vitila mambu tatu mama mavangama, e kangu diampa ke diakiyantikila sala ko.
Bibila ke kiyikanga ko e lumbu kiasikididi kina Yave katambulwila e kimenga kia Yesu. Muna kuma kiaki, ke tulendi vova ye sikididi kiawonso ko e lumbu kina Yave katambulwila e kangu diampa ye lumbu kina diayantika o sala. Kansi, tuzeye wo vo Yesu wavutuka kuna zulu lumbu kumi vitila e lumbu kia Pentikosti. (Mav. 1:3) Muna kolo kiaki kiankufi, Yesu wasunzula e kimenga kiandi, o Yave watambulwila kio. (Ayib. 9:12) Dina diavangama muna lumbu kia Pentikosti wa mvu wa 33 T.K. i ziku kiasonga vo e kangu diampa diayantika o sala. (Mav. 2:1-4, 32, 33) Kalukatikisu ko vo e kangu diampa diayantika o sala.
Muna lukufi, Yave watambulwila e kangu diampa, e kangu diadi diayantika o sala vava Yesu kasunzula e kimenga kiandi yo kotesa akuswa muna kangu diadi. Ozevo, o Yesu wa Ngang’ambuta i Nkambami a kangu diadi diampa.—Ayib. 7:25; 8:1-3, 6; 9:13-15.
