1-2. O nsilu wasonama muna Yesaya 65:16, 17, aweyi ukutusadisilanga muna kwamanana zizidila?

“KUYOYI KO!” E mvovo miami, miakala se ntu a diambu wa lukutakanu lweto lwa mvivu lwa mvu wa 2017. O lukutakanu lwalu, lwatusonga una tulenda zizidila e mambu mampasi tunuananga mau. Mvu nya miviokele kala tuka lukutakanu lwalu lwavangamena. Yamu wau, twakinu zizidila e mambu mampasi omu nza yayi ya Satana.

² Nkia mambu mampasi ozizidilanga owau? Nga yitu yovo nkundi wafwidilu? Nga kimbevo kilembi sasuka onuananga kiau? Nga mpasi za kinunu onuananga zau? Nga sumbula wabwidilu? Nga diambu diansoki wavangilu yovo lubangamu onuananga lwau? Nga mfwilu obakidi mu kuma kia vuku kia COVID-19 yovo diambu diankaka? Kieleka, tulakukilwanga o moyo e lumbu kina o mambu mama mawonso ke mekala diaka ko ngatu sungamena mo!—Tanga Yesaya 65:16, 17.

3. Nkia diambu tufwete vanga owau? Ekuma?

³ E zingu omu nza yayi, kiampasi kikilu ye muna lumbu ikwiza, e mpasi zazi wokela kikilu ziwokela. (Mat. 24:21) Muna kuma kiaki, tufwete kwamanana zindalala. Ekuma? E kuma kadi, Yesu wavova vo: “Muna luzindalalu lweno i nuvuluzila e mioyo mieno.” (Luka 21:19) Oyindula una akaka bezizidilanga e mambu mampasi benuananga mau, dilenda kutusadisa mpe mu zizidila.

4. Ekuma tulenda vovela vo Yave i mbandu isundidi ya luzindalalu?

⁴ Nani i mbandu isundidi ya luzindalalu? Yave wa Nzambi. Nga mvutu zazi zisivikisi? Avo tomene yindula e diambu diadi, obakula e kuma kia mvutu zazi. Nkadi ampemba yandi oyalanga e nza yayi, ekiaki i kuma e nza inina ye mambu mayingi mampasi. Yave ovuidi nkuma wafokola e mpasi zeto vana vau. Kansi,  ovingilanga e lumbu kina kasikidisa. (Roma 9:22) Ekolo kevingilanga e lumbu kiaki, o Nzambi osonganga luzindalalu. Owau, yambula twafimpa mambu vua mana Yave kezizidilanga.

5. Aweyi e nkumbu a Nzambi ivezelwanga? Aweyi omonanga mu kuma kia luvezo lwalu?

⁵ Luvezo muna nkumbu andi. Yave ozolanga e nkumbu andi ye ozolele vo wantu awonso bazitisa yo. (Yes. 42:8) Kansi, se vioka mafunda sambanu ma mvu e nkumbu andi ivezuanga. (Nku. 74:10, 18, 23) O luvezo lwalu lwayantika muna mpatu a Edene vava Nkadi ampemba (i sia vo, “Nkumbi”) kavunina Nzambi o mambu vo Adami yo Eva kaswekelanga e diambu diambote dilenda kubatwasila e kiese. (Tuku 3:1-5) Tuka muna kolo kiakina, Yave ovuninuanga o mambu vo wantu keswekelanga e mambu mambote mana bavuidi o mfunu. Yesu watokana wau kamonanga una nkumbu a Se diandi yavezelwanga. Muna kuma kiaki, walonga a longoki andi basambanga vo: “E Se dieto koko zulu, yambula e nkumbu aku yazitiswa.”—Mat. 6:9.

6. Ekuma Yave kayambulwila ntangwa yayingi muna songa kwa wantu awonso vo yandi kaka una yo nswa wa yala?

⁶ Kitantu kisiwanga muna kimfumu kiandi. Yave yandi kaka una yo nswa wayala tuka kuna zulu ye ova ntoto. E mpil’andi ya yadila, i yau isundidi o wete. (Lus. 4:11) Kansi, Nkadi ampemba, ovunanga ambasi ye wantu bayindula vo Nzambi kena ye nswa wau ko. Ozevo, ntangwa ayingi diavavanga muna songa e ziku ko Yave una yo nswa wa yala ye e mpil’andi ya yadila i yau isundidi. Nzambi diambu diangangu kavanga wau kayambula e ntangwa kwa wantu kimana bakiyala yo mona vo kondwa kwa lusadisu lwa Mvangi, o wantu ke balendi sikila ko. (Yer. 10:23) Muna kuma kia luzindalalu lwa Nzambi, e diambu diadi disingikwa mu nkumbu mosi yakwele mvu. Yave otundidika kimfumu kiandi muna songa kwa wantu vo, e Kintinu kiandi kiau kaka kiafwana yala yo twasa luvuvamu ye ngemba ova nza.

7. Akinani bakolamena Yave? Adieyi kekubavanga?

⁷ Ukolami wa akaka muna wan’andi. Vava Yave kasema ambasi yo wantu, alunga kabasema. Kansi, mosi muna wan’a Nzambi (i sia vo, “Ntantu”) wakolamena Nzambi yo fila mpe wantu alunga, Adami yo Eva mu kunkolamena. E mbasi zankaka ye wantu, banyikama mpe muna ukolami wau. (Yuda 6) Kuna kwalanda, kana nkutu muna nkangu a Isaele, i sia vo, zula kiasolwa kwa Nzambi, bambembola yo yantika sambila nzambi zaluvunu. (Yes. 63:8, 10) Kuna kwa Yave diakala nze yau bata e zumba. Kansi, Yave okwamanananga zizidila yavana kifwana e ntangwa kefwasa akolami awonso. Ekwe luvevoko ditwasa kwa selo yandi yakwikizi ana bena vo kumosi yo Nzambi, bezizidilanga e mambu mampasi ma nza yayi ya Satana!

8-9. Nkia luvunu luvovuanga mu kuma kia Yave? Adieyi tulenda vanga mu kuma kia luvunu lwalu?

⁸ Luvunu kesayanesanga Nkadi ampemba. Satana wavunina Yobi o mambu kumosi ye selo yakwikizi yawonso ya Yave vo kuna loko bekunsambidilanga. (Yobi 1:8-11; 2:3-5) Yamu wau, Satana okwamanananga sayanesa luvunu lwalu. (Lus. 12:10) Vava tuzizidilanga mambu mampasi yo sikila ye kwikizi mu kuma kia zola kweto muna Yave, tusonganga kwa Satana vo mawonso kavova maluvunu. Avo tutanginini o luzindalalu lwa Yobi, oyeto mpe tusambulwa mu kuma kia luzindalalu lweto.—Yak. 5:11.

⁹ Satana osadilanga mfumu za mabundu maluvunu mu vova vo Yave nkwa nsoki ye yandi i nkwa kuma muna mpasi zina o wantu bemonanga. Akaka nkutu bevovanga vo avo nsedia  ofwidi, Nzambi unete kuna zulu kadi mbasi ankaka kavuidi o mfunu. Nkia mpila kondwa kwa luzitu muna Nzambi eto! Kansi, tuzeye wo vo Yave i Se dianzodi kikilu. Vava tubakamanga kimbevo kiangolo yovo mosi muna awana tuzolanga ofwidi, ke tulendi tumba Nzambi eto ko. Kansi, oyeto tukwikilanga vo vekala ye lumbu kina yimbevo yawonso yifokoka ye awana bafwa, befuluka. Tulenda vovesa kwa awonso ana bazolele kutuwa vo Yave i Nzambi a zola. Muna mpila yayi, Yave olenda vana e mvutu kwa ndiona okuntiangunanga.—Nga. 27:11.

10. E sono kia Nkunga 22:23, 24, adieyi kikutulonganga mu kuma kia Yave?

¹⁰ Mpasi bemonanga e selo yandi. Yave i Nzambi a nkenda. Yave okendalalanga vava kemonanga e mpasi zeto. Zilenda kala mu kuma kia lubangamu, mayela ye usumuki weto. (Tanga Nkunga 22:23, 24.) Yave obakulanga e mpasi zeto, una ye luzolo lwa fokola zo ye osinga zo fokola kikilu. (Tezanesa ye Luvaiku 3:7, 8; Yesaya 63:9.) Ke kolo ko “okunguna mansanga mawonso muna meso [meto], o lufwa ke lukala diaka ko, ngatu kala diaka dilu, yovo kazu ngatu mpasi.”—Lus. 21:4.

11. Aweyi Yave kemonanga mu kuma kia selo yandi yakwikizi ana bafwa?

¹¹ Lufwa lwa akundi andi. Aweyi Yave kemonanga mu kuma kia selo yandi yakwikizi, akala ye akento ana bafwa? Una kikilu ye tima dia kubamona diaka. (Yobi 14:15) Nga olenda yindula e tima kena diau o Yave diamona diaka o nkundi andi Abarayama? (Yak. 2:23) Yovo, olenda yindula e tima kena diau diamona diaka Mose ona wamokenanga yandi “mantalani”? (Luv. 33:11) Yindula e tima kena diau diawá diaka Davidi ye ntozi a nkunga zankaka ana bayimbilanga e nkunga miambote-mbote muna kunkembelela? (Nku. 104:33) Kana una vo akundi andi awaya bafwa, Yave  kabavilakene ko. (Yes. 49:15) Yave osungamenanga mawonso ma kiwuntu kiau. Bibila kivovanga vo: “Kuna kwa yandi awonso bena o moyo.” (Luka 20:38) Vekala ye lumbu kekubafutumuna, owá diaka e sambu yau ya nsi a ntima yo tonda e nsambil’au. Avo wafwilwa muntu ona otoma zolanga, sungamena wo vo e mvovo miami milenda kukasakesa yo kufiaulwisa.

12. Nkia mambu metoma kendelekanga Yave omu lumbu yayi yambaninu?

¹² Mona una yimpumbulu bebangikilanga akaka. Vava ukolami wayantika muna mpatu ya Edene, Yave wazaya wo vo e mpasi wokela kikilu ziwokela vitila katomesa o mambu. Yave omenganga umpumbulu, kondwa kwa unsongi ye mambu mansoki mevangamanga mu nza yayi. Yave otoma tokanenanga awana ke balendi kuyitanina ko, nze wan’a nsona ye akento bafwilwa akala. (Zak. 7:9, 10) Yave okendalalanga kikilu vava kemonanga e selo yandi yakwikizi bebangikwanga yo siwa muna pelezo. Kala ye ziku vo Nzambi ozolanga yeno awonso nuzindalalanga kumosi yo yandi.

13. Nkia mavangu ma usafu Nzambi kemonanga? Adieyi kesinga vanga?

¹³ Mona una wantu bekuyivaninanga emvimba muna mavangu ma zumba. Satana ozeye wo vo wantu bavangilwa muna fwaniswa kia Nzambi, kansi okubafilanga bayivana muna mavangu ma usafu. Vava Nzambi ‘kamona o bi wa wantu se wayingi’ muna lumbu ya Noa, “Yave omwene ntantu mu kuma kia muntu kavanga ova ntoto, o ntim’andi ukendalele.” (Tuku 6:5, 6, mvovo vana yanda, 11) Nga tuka muna kolo kiakina yamu wau o mambu matoma? Ve kikilu. Nkadi ampemba otoma yangalalanga wau kemonanga e mpila zawonso za mvukana zitoma tondakananga kwa wantu o unu nze, mvukana za usafu vana vena yakala yo nkento, yakala yo yakala yovo nkento yo nkento. (Efe. 4:18, 19) Satana otoma yangalalanga mu sungula vava kefilanga awana besambilanga Yave mu bwa muna sumu diampwena. Kansi, o luzindalalu lwa Yave lusinga lwaka oku mfoko. Ke kolo ko, ofwasa awonso ana bekuyivananga muna mavangu ma zumba ye ke bazolele soba ko.

14. Adieyi o wantu bevanganga muna ntoto ye bulu?

¹⁴ Mona una ntoto ufwasilwanga. O muntu ‘ke yalanga kaka nkwandi ko muna kumwesa e mpasi,’ kansi mpe ke toma lunga-lunganga ntoto ko ye bulu nze una Yave kankanikina. (Kim. 8:9; Tuku 1:28) Akwa ngangu za nza bevovanga vo mu kuma kia dina o wantu bevanganga, nanga tezo kia milhão mosi ya lekwa ya moyo * ifuka muna mvu mikwiza. Muna kuma kiaki, diasazu mu bakula e kuma o wantu bena tokanena e kalu kieto. Diakiese mu zaya vo Yave osianga nsilu wa “fwasa awana befwasanga e nza” yo kitula o ntoto wawonso se paradiso.—Lus. 11:18; Yes. 35:1.

15-16. Nki kilenda kutusadisa mu zizidila nze Yave? Yika e nona.

¹⁵ Wau yindula mambu mawonso mana Se dieto dia zulu kezizidilanga se vioka mafunda ye mafunda ma mvu. (Tala e babu, “ Nkia Mambu Yave Kezizidilanga?”) Yave olenda fwasa e nza yayi yambi konso ntangwa kazolele. Kansi o luzindalalu kesonganga, nluta miayingi lukututwasilanga. Yindula nona eki: Yakala yo nkento bavoveso kwa dotolo vo mwan’au kimbevo kiangolo kewutuka kiau. O mwana ndioyo mpasi zayingi kemona ye ke zinga mvu miayingi ko. Kana una vo mpasi zayingi kekubatwasila, mase mama babakidi e nzengo za wuta mwan’a ndioyo. Mu kuma kia zola bena  kwau muna mwan’au, bezizidila mawonso kimana o mwan’au kakala ye zingu kiambote.

¹⁶ Diau dimosi mpe, o wana awonso a Adami yo Eva kimbevo kia sumu bewutukanga kiau. Kana una vo i wau, Yave okubazolanga yo kubalunga-lunga. (1 Yoa. 4:19) Nswaswani ye mase mayikilu mu nona kiaki, Yave olenda fokola e mpasi zeto. Wasikidisa e lumbu kesinga fokola e mpasi zawonso o wantu bemonanga. (Mat. 24:36) Kieleka, o zola kwa Yave kufwete mpe kutufila mu zizidila yavana e mpasi zifokoka.

17. Mbandu a Yesu iyikwanga muna Ayibere 12:2, 3, aweyi ilenda kutusadisila mu kwamanana zindalala?

¹⁷ Yave i mbandu isundidi ya luzindalalu. Yesu watanginina o luzindalalu lwa Se diandi. Vava kakala ova ntoto, waveza e nsoni, wazizidila e mvovo mia lutiangu yo nti ampasi mu kuma kieto. (Tanga Ayibere 12:2, 3.) Kieleka, e mbandu a Yave ya luzindalalu yasadisa Yesu mu songa luzindalalu. Ilenda mpe kutusadisa mu zindalala.

18. Mun’owu wa sono kia 2 Petelo 3:9, o luzindalalu lwa Yave nkia nluta lutwasanga?

¹⁸ Tanga 2 Petelo 3:9. Yave ozeye e ntangwa yambote kefwasa e nza yayi yambi. Mu kuma kia luzindalalu lwandi, wantu ayingi bena ye lau dia kunzaya. Owau vena ye ndonga ayingi, yikunsambilanga yo kunkembelela. Yau awonso beyangalalanga kadi Yave osonganga luzindalalu mu kolo kiayingi yo yambula vo bawutuka, balongoka o kunzola yo yekola e zingu kiau kwa yandi. Vava Yave kesenda mafunda ye mafunda ma wantu ana bezindalala yakuna mbaninu, ediadi disonga e ziku vo Nzambi nzengo zambote kabaka wau kasonga luzindalalu.

19. Nkia kani tufwete kala diau? Nkia nsendo tutambula?

¹⁹ Mu longi diadi tulongokele una e mbandu a Yave ilenda kutusadisila mu zizidila ye kiese. Kana una vo Satana mpasi zayingi katwasa, Yave wakinu songa vo “Nzambi a kiese.” (1 Tim. 1:11) Diau dimosi mpe oyeto tulenda kwamanana ye kiese ekolo tuvingilanga kuna luzindalalu lwawonso e ntangwa ina Yave kevelelesa e nkumbu andi, ketundidika kimfumu kiandi, fokola umpumbulu ye mambu mawonso mekututwasilanga e mpasi owau. Muna kuma kiaki, yambula twakala ye kani dia zindalala yo fiaulwiswa muna zaya vo Se dieto dia zulu mpe ozindalalanga. Avo tuvangidi wo, e mvovo miasonama muna Yakobo 1:12 mikituka mialudi kwa konso muntu mu yeto: “Nkwa kiese ndiona ozindalalanga muna ntonta, kadi wau kesunda muna ntonta, otambula kolow’a moyo, ina Yave kasila o nsilu kw’awana bekunzolanga.”