Yave ozolele vo awana besompa bakala ye kiese ye ngwizani ambote muntu yo nkwandi yakwele mvu. (Mat. 19:4-6) Avo luzolo lwa sompa una lwau, aweyi olenda sololwela o muntu ambote mu sompana yandi? Wau vo Yave i Mvangi eto, ozeye mawonso tuvuidi o mfunu muna banda e kimakangu yo kala ye longo lwakiese. Ozevo, avo osadidi e nkanikinu miawonso Yave kekutuvananga, okala ye kiese kiakieleka. Yambula twafimpa miankaka muna nkanikinu miami.

Wantete, edi tufwete bakula mu kuma kia yeto kibeni: “O ntima usundidi tekama muna lekwa yawonso, wambi kikilu.” (Yer. 17:9) Vava wantu wole bazolele kazala bezayananga yo yantika mokena kwayingi, e nzola vana vena wantu wole awaya ilenda wokela mu nzaki. Avo ediadi divangamene, dilenda kala se diampasi kwa yau awole mu baka e nzengo zambote. Vava wantu bebakanga e nzengo zasompana mu kuma kia zola kaka bena kwau muna ntima kwa muntu yo nkwandi, kuna kulanda ediadi dilenda kubatwasila mpasi zayingi. (Nga. 28:26) Muna kuma kiaki, ke diangangu ko kwa wantu wole ana ke batomene zayana ko mu yantika banda kimakangu. Ozevo, dikala kaka diambote mu banda e kimakangu vava otoma zaya o muntu ndioyo.

Muna Ngana 22:3, tutanganga vo: “O nlungaladi omwene vonza, oswekamene, kansi e minkondwa ngangu balutakene yo baka e mfwilu.” Osadila internete yovo aplicativo za bandila kimakangu nkia vonza dilenda twasa? Diankenda vo mpangi zankaka babwa mu vonza yo vunua kwa muntu bazayana yandi muna internete. Vana ntandu, vena yo wantu ana besianga e nkumbu zaluvunu muna internete muna vuna yo yiya e nzimbu za awana ke balungalala ko. Avuni awaya belwakanga nkutu yamu tezo kiavova vo oyau mpe Mbangi za Yave.

Tala e vonza kiankaka kilenda kubwila. E nzila zankaka za internete za bandila kimakangu, zisadilanga e programa mu zaya kana vo muntu kingandi olenda sompana yo kingandi yovo ve. Kansi, ke vena ye ziku ko kisonganga vo e ndekwa zazi nluta zitwasanga. Yindula diambu edi: osola muntu osompana yandi ke diambu diakete ko. Ozevo, nga diangangu mu sadila e programa ya komputadore ina yavangwa kwa wantu muna sola o muntu osompana yandi? Nga e programa zazi za komputadore zilenda tezaneswa ye nkanikinu mia Bibila?—Nga. 1:7; 3:5-7.

Tala e nkanikinu wankaka wamfunu wasonama muna Ngana 14:15, uvovanga vo: “O muntu wakondwa  ngangu okwikilanga konso diambu, kansi nlungaladi otoma kebanga konso lutambi.” Muna zaya kana vo muntu ndioyo nkento ambote yovo yakala diambote kekala, entete ofwete toma kunzaya. Kansi, ke dilendakana ko muna sadila internete muna toma zaya o muntu. Nulenda nkutu twikaziana mafoto ye mensagem, kansi nga ediadi disongele vo nutomene zayana? Akaka babanzanga vo basolwele e yakala yovo nkento muna internete ona balenda sompana yandi, kansi vava bawanana e nkumbu antete, bakendalala kikilu.

Ntozi a nkunga wavova vo: “Kikalanga ntwadi ye akwa luvunu ko, ivenganga kala vamosi ye awana beswekanga kiwuntu kiau.” (Nku. 26:4) Muna moneka vo mote a muntu, ayingi besianga nkutu e foto dia wantu ankaka muna perfil zau yovo muna aplicativo za bandila kimakangu. Bevanganga mawonso muna sweka e fu yau yambi vava betwikanga e mensagem kwa wantu ankaka. Diamfunu kikilu mu kukiyuvulanga e yaka yuvu, kana nkutu o muntu tuna mokena yandi muna internete ovovele vo yandi Mbangi a Yave. Nga muntu ndioyo Nkristu wavubwa kikilu? Nga wazikuka muna mwanda? Nga ngwizani ambote kena yau yo Yave? Nga ampangi muna nkutakani bekunzitisanga? Nga mbandu ambi kesonganga yovo nkutu ke muntu avanga yandi kikundi ko? (1 Kor. 15:33; 2 Tim. 2:20, 21) Nga ke vena ye diambu ko dikunkakidilanga mu sompa mun’owu wa nkanikinu mia Bibila? Muna zaya e mvutu za yuvu yayi, entete ofwete mokena yo Mbangi a Yave ona otomene zaya o muntu ozolele banda yandi kimakangu. (Nga. 15:22) Dialudi vo, ke vena kana selo kimosi kia Yave ko ona ozolele sompana yo ‘mundembi-kwikila.’—2 Kor. 6:14; 1 Kor. 7:39.

Nze una tumwene, osadila internete ye aplicativo za bandila kimakangu diavonza kikilu. Kansi, vena ye mpila yambote ina tulenda zayila o muntu ona tuzolele sompana yandi. Akweyi olenda sololwela yakala yovo nkento ambote muna sompana yandi? Avo ke vena ye diambu ko dikakidilanga tukutakanu, nkumbu miayingi Mbangi za Yave bewanananga yau ye yau muna tukutakanu twakete ye twampwena.

Vava ke tulendanga lungana kumosi ko muna maseka ma Kintinu, nze muna kolo kia vuku kia COVID-19 tusadilanga internete muna lungana. Muna tukutakanu twatu, ampangi bena vo ampumpa bekalanga ye lau dia zayana yau ye yau. Olenda mpe mona una e mpangi zazi bevangilanga malongi yo vana e nkomena za lukasakeso. (1 Tim. 6:11, 12) Vana ntandu, tulenda mpe mokena ye mpangi zankaka muna maseka makete meziulwanga kuna mfoko a lukutakanu luvangamenanga muna videoconferência. Vava tukutakananga ye mpangi zankaka muna internete, olenda kala ye lau dia tala yo mona o muntu ozolanga una kekadilanga ye wantu ankaka. Ediadi dilenda kusadisa mu zaya kana nkia mpila muntu kena. (1 Pet. 3:4) Kuna kulanda, otoma zaya o muntu ndioyo yo bakula kana vo makani mamosi nuna mau yo zaya kana vo longo lwakiese nukala lwau.

Vava mpangi bena vo ampumpa besadilanga e nkanikinu mia Bibila mu sola ndiona besompana yandi, ediadi dikubasadisa mu kala yo longo lwakiese. Kadi e sono kia Ngana 18:22, kivovanga vo: “Ndiona osolwele nkento ambote [yovo yakala], osolwele lekwa kiambote, yo vua dienga dia Yave.”