LONGI DIA 30
Kwamanana Wokesa o Zola Kwaku
“Yambula twanungunuka muna mambu mawonso, muna zola.”—EFE. 4:15.
NKUNGA WA 2 Yave i Nkumbu Aku
MANA TULONGOKA a
1. Nkia mambu walongoka vava wayantika longoka e Bibila?
NGA osungamenanga mawonso walongoka vava wayantika longoka e Bibila? Nanga wasivika vava walongoka vo Nzambi una ye nkumbu. Nanga mpe wayangalala vava walongoka vo Yave ke yokanga wantu ko muna bilungi bia tiya. Wayangalala mpe mu zaya vo azolwa aku ana bafwa, befulwa yo zingila muna paradiso ova ntoto.
2. Vava walongoka e ludi kia Bibila nkia diambu diaka wavanga muna nungunuka? (Efeso 5:1, 2)
2 Ekolo wakwamanananga longoka e Diambu dia Nzambi, o zola kwaku muna Yave kwawokela. O zola kwaku, kwafila muna sadila mana olongokanga. Wabaka e nzengo zambote muna sadila e nkanikinu mia Bibila. Watomesa mpe fu yaku ye mavangu kadi wazola yangidika Nzambi. Nze mwana ona otangininanga mase mandi manzodi, o ngeye mpe watanginina Se dieto dia zulu.—Tanga Efeso 5:1, 2.
3. Nkia yuvu tulenda kukiyuvula?
3 Tulenda kukiyuvula: ‘Nga o zola kwame muna Yave kutomene kumama lutila e kolo kina yakituka Nkristu? Tuka yavubilwa, nga iyindulanga yo vangila mambu nze Yave musungula muna diambu ditadidi songa o zola kwa mpangi zame?’ Kana nkutu omwene vo “o zola wakala kwau kuna lubantiku” kukulukidi mu kuma kia diambu divangamene, kukendalala ko. Kadi i diau mpe diavangama kwa Akristu muna tandu kiantete. Yesu kababembola ko ye kesinga mpe kutubembola ko. (Lus. 2:4, 7) Kadi ozeye wo vo tulenda vutukila o zola kuna twakala kwau vava twayantika longoka e ludi.
4. Nkia mambu tuvovela mu longi diadi?
4 E longi diadi divovela una tulenda wokesela o zola kweto muna Yave ye kwa akaka. I bosi, tuvovela e nsambu tulenda vua yeto awonso avo tuwokese o zola kweto.
WOKESA O ZOLA KWAKU MUNA YAVE
5-6. Nkia mambu mampasi o Paulu kawanana mau muna salu kiandi kia umbangi? Nki kiansadisa muna kwamanana sadila Yave?
5 Kana una vo Paulu wa ntumwa wawanana ye mambu mampasi, wayangalelanga e zingu kiandi muna salu kia Yave. Paulu mpe wavanganga nkangalu mianda ye diampasi diakalanga mu vanga e nkangalu muna lumbu yandi. Muna nkangalu miandi, Paulu nkumbu miayingi wakalanga muna “vonza ya nzadi” ye “vonza ya mivi.” Ezak’e ntangwa nkutu wawandwanga kwa mbeni zandi. (2 Kor. 11:23-27) Ampangi mpe nkumbu miayingi ke basonganga luyangalalu ko muna ngolo Paulu kavanganga za kubasadisa.—2 Kor. 10:10; Fili. 4:15.
6 Nki kiasadisa Paulu muna kwamanana sadila Yave? Paulu mayingi kalongoka muna sono mu kuma kia kiwuntu kia Yave ye muna mbandu a yandi kibeni. Paulu wakala ye ziku vo Yave wa Nzambi watoma kunzolanga. (Roma 8:38, 39; Efe. 2:4, 5) O zola kwandi mpe muna Yave kwawokela kikilu. Paulu wasonga o zola kwandi muna Yave muna ‘sadila avauki yo kwamanana kubasadila.’—Ayib. 6:10.
7. Nkia mpila imosi tulenda wokesela o zola kweto muna Yave?
7 Tulenda wokesa o zola kweto muna Yave muna longokanga e Diambu dia Nzambi. Ekolo o tanganga e Bibila yindulanga mana konso tini kisonganga mu kuma kia Yave. Ukiyuvula: ‘Aweyi e sono kiaki kisongelanga vo Yave okunzolanga? Nkia kuma ifwete kumfila muna zola Yave?’
8. Aweyi e sambu kilenda kutusadisila muna wokesa o zola kweto muna Nzambi?
8 E mpila yankaka tulenda wokesela o zola kweto muna Yave, i sambanga kwa yandi yo kunzayisa mana mena muna ntim’eto. (Nku. 25:4, 5) Ke lukatikisu ko vo, Yave ovana e mvutu za sambu yeto. (1 Yoa. 3:21, 22) Mpangi ankento Khanh ona ozingilanga kuna Ásia wavova vo: “Entete, yazolanga Yave mu kuma kia mana yalongoka, kansi vava yamona una kavanina e mvutu za sambu yame, o zola kwame muna yandi kwawokela diaka. Ediadi diamfila muna vanga mana mekunyangidikanga.” b
WOKESA O ZOLA KWAKU MUNA AKAKA
9. Aweyi Timoteo kasongela vo wanungunukanga muna songa o zola?
9 Vioka mvu miakete vava Paulu kakituka Nkristu wawanana yo nleke Timoteo. Timoteo watoma zolanga Yave yo wantu. Paulu wavovesa esi Filipi vo: “Kina yo muntu ankaka ko una ye luzolo nze, [Timoteo] ona otoma kunulunga-lunga.” (Fili. 2:20) Paulu kavovela ngangu za Timoteo ko nze, nkubiki a mambu yovo mpovi ambote, kansi Paulu wasivika o zola kuna Timoteo kasonganga kwa mpangi zandi. Ke lukatikisu ko vo ampangi muna nkutakani a Timoteo basutilanga e nkingula andi.—1 Kor. 4:17.
10. Aweyi mpangi Anna yo nkaz’andi basongela o zola kwa mpangi zau?
10 Yeto mpe tuvavanga e mpila tulenda sadisila e mpangi zeto. (Ayib. 13:16) Badika e nona kia mpangi Anna ona twayikidi muna longi diaviokele. Kuna nina a tembwa kia ngolo yandi yo nkaz’andi bayenda kingula esi nzo mosi ana bakala vo Mbangi za Yave. Vava balwaka ko, bamona vo nludi au a nzo wabanguka. Muna kuma kiaki esi nzo yayi ke bakala ye mvuatu miavelelela ko. Mpangi Anna wavova vo: “Twanata e mvuatu miau, twasukula mio, goma yo bundika mio. Kuna kwa yeto ke twavanga kweto diambu diampwena ko. Kansi ediadi diakumika e ngwizani eto yo kwamanana se akundi yamu wau.” O zola kuna mpangi Anna yo nkaz’andi bakala kwau muna mpangi, kwabafila mu vanga diambu muna kubasadisa.—1 Yoa. 3:17, 18.
11. (a) E ngolo tuvanganga muna songa o zola, aweyi zivanganga kwa akaka? (b) Landila e sono kia Ngana 19:17, aweyi o Yave kebadikilanga o zola tusonganga kwa akaka?
11 Vava tukadilanga ye akaka kuna zola ye ngemba, nkumbu miayingi akaka bemonanga e ngolo tuvanganga za yindula yo vangila e mambu nze Yave. Betoma yangalelanga e ngemba tusonganga muna mpila ina ke tuyindulanga ko. Mpangi Khanh ona tuyikidi kala, osungamenanga ana bansadisa. Wavova vo: “Itoma vutulanga matondo kwa mpangi za makento ana bandatanga muna salu kia umbangi. Bambokelanga mpe muna kwenda kiya yovo dia yau kumosi, i bosi bayenda kumfilanga kuna nzo. Yamonanga vo ngolo zayingi bavanganga, kansi bavangilanga wo kuna zola.” Dialudi vo ke wantu awonso ko bekutuvutula matondo muna mana tubavangidi. Mpangi Khanh wavova diaka mu kuma kia awana bansadisa vo: “O luzolo lwame i kubafuta muna ngemba zawonso bansonga, kansi kizeye ko kuna bezingilanga. Yave olenda kubasenda ye isambanga mpe kimana kabasenda.” Mpangi Khanh olungidi kwandi. Yave ke monanga kaka mavangu makete ko ma ngemba tuvanga kwa akaka, kansi, obadikilanga mo mpe vo se lukau lwa ntalu ye mfuka ina kesinga futa.—Tanga Ngana 19:17.
Vava o muntu kenungunukanga muna mwanda ovavanga e mpila kalenda sadisila akaka (Tala e tini kia 12)
12. Aweyi ampangi zamakala balenda songela o zola kwau muna nkutakani? (Tala mpe mafoto)
12 Avo u mpangi, aweyi olenda songela zola kwa akaka yo vanga diambu muna kubasadisa? Mpangi Jordan una vo nleke, wayuvula kwa nkuluntu mosi una kalenda toma yikamena e nkutakani. O nkuluntu wansanisina muna lunungunuku kavanga kala yo kumvana luludiku lwa mana kafwana vanga muna yikama e nkutakani una ufwene. Kasikil’owu, o nkuluntu ndioyo wavovesa Jordan vo kalwakanga mu ola yambote muna Seka dia Kintinu, kayisa ampangi, vana e mvutu muna tukutakanu, sila umbangi kumosi ye mpangi za buka kiandi yo vava e mpila zankaka kalenda sadisila akaka. Vava mpangi Jordan kasadila o luludiku lwalu, kalongoka kaka ndekwa zampa ko, kansi mpe wawokesa o zola muna mpangi zandi. Mpangi Jordan walongoka vo, vava mpangi ayakala kekitukanga selo kia salu, ke yantikanga kaka sadisa akaka ko, kansi okwamanananga kubasadisa.—1 Tim. 3:8-10, 13.
13. Aweyi o zola kwasadisila mpangi Christian mu kuyifwanisa diaka se nkuluntu?
13 Adieyi tuvova avo kusalanga diaka se selo kia salu ko yovo nkuluntu? Yave osungamenanga e salu kina wasala kala ye una o zola kwafidila mu sala kio. (1 Kor. 15:58) Omonanga mpe o zola kuna osonganga yamu wau. Mpangi Christian wakendalala kikilu vava kakatulwa e kiyekwa kia kinkuluntu. Kansi wavova vo: “Yabaka e nzengo za vanga mawonso ndenda muna sadila Yave kuna zola, kana una vo yavidisa malau mame ma salu.” Kuna kwalanda watumbikwa diaka se nkuluntu. Mpangi Christian wavova vo: “Muna vova e ludi, wonga yamona vava yatumbikwa diaka se nkuluntu. Kansi, wau vo Yave muna nkenda zandi wayambula yasala diaka se nkuluntu, yabaka e nzengo za tambulwila e salu kiaki mu kuma kia zola kwame muna Yave ye muna mpangi zame.”
14. Adieyi olongokele muna dina mpangi ankento ozingilanga kuna Geórgia kavova?
14 E selo ya Yave mpe besonganga o zola kwa mfinangani zau. (Mat. 22:37-39) Kasikil’owu mpangi Elena ozingilanga kuna Geórgia wavova vo: “Kuna lubantiku, e diambu diamfila mu yantika sila umbangi i zola kwame muna Yave, kansi ekolo o zola kwame muna Se diame dia zulu kwawokelanga, o zola mpe muna wantu kwawokela. Yayantika yindula e mpasi zina o wantu banuananga zau ye sono yafwana sadila muna simba e ntima miau. Ekolo yayindulanga muna mpasi zau, o luzolo lwa kubasadisa lwawokelanga.”—Roma 10:13-15.
YAVE OKUTUSAMBULA MUNA ZOLA TUSONGANGA KWA AKAKA
E vangu dimosi dia zola dilenda twasa nsambu zayingi kwa akaka (Tala e tini kia 15-16)
15-16. Nze una usonganga e foto, nkia nsambu tuvuanga vava tusonganga o zola kwa akaka?
15 Vava tusonganga o zola kwa mpangi zeto, ke yau kaka ko bevuanga e nluta. Vava e vuku kia COVID-19 kia yantika, mpangi Paolo yo nkaz’andi basadisa mpangi zayingi zamakento zanunu muna kubalonga una balenda sadila e telefone ye tablete zau muna sila umbangi. Mpangi mosi ankento ona kalendanga sadila telefone andi ko kuna lubantiku, kuna kwalanda, walenda. Wasadila nkutu e telefone andi mu bokela o wantu benda muna Luyindulu. Muna wantu awaya, 60 bakala muna Luyindulu muna videoconferência. O mpangi ankento ye yitu yandi bavua e nluta muna ngolo mpangi Paolo yo nkaz’andi bavanga. Kuna kwalanda, mpangi ankento wasonekena mpangi Paolo vo: “Tutondele muna longa yeto anunu. Kisinga vilakana ko una Yave kekutulunga-lungilanga ye ngolo nuavanga muna kutusadisa.”
16 E nona nze yayi, yalonga mpangi Paolo longi diamfunu. Diansungamesa vo o zola kusundidi o mfunu lutila ngangu yovo ndekwa tulenda kala zau. Wavova vo: “Yasalanga se nkengi a zunga. O unu, i bakulanga vo, kana una vo ateleki bavilakana malongi mame kansi bakinu sungamena o lusadisu yabavana.”
17. Aki nani diaka bevuanga e nluta vava tusonganga o zola?
17 Vava tusonganga o zola kwa akaka, nluta miayingi tuvuanga mu mpila ina ke tuyindulanga ko. Mpangi Jonathan ona ozingilanga kuna Nova Zelândia wamona e ziku kia diambu diadi. Lumbu kimosi kia Sabala mu nkokela ye mwini angolo, wamona mviti a nzila mosi wasilanga umbangi. Mpangi Jonathan wabaka e nzengo za yantika sala yandi kumosi konso kia Sabala muna nkokela. Muna kolo kiakina kabakula e nluta ko mina yandi kibeni kadi baka muna ngemba kasonga. Mpangi Jonathan wavova vo: “Muna ntangwa yayina, kiayangalelanga salu kia umbangi ko. Kansi ekolo yawanga yo mona una mviti a nzila kalongelanga ye nluta kavuanga muna salu kia umbangi, mono mpe yayantika toma zola e salu kiaki. Yabaka mpe o nkundi ona watoma kunsadisa muna nungunuka muna mwanda, yakala ye kiese muna salu kia umbangi yo siamisa e ngwizani ame yo Yave.”
18. Nkia diambu o Yave kazolele vo twavanga?
18 Yave ozolele vo yeto awonso twawokesa o zola kweto muna yandi ye muna akaka. Nze una tulongokele, tulenda wokesa o zola kweto muna Yave muna tanganga e Diambu diandi, badika muna mana tulongokanga yo mokena yandi muna sambu ntangwa zawonso. Tulenda mpe wokesa o zola kweto muna mpangi zeto muna kubasadisanga mu mpila zayingi. Ekolo o zola kweto kuwokelanga tutoma finama Yave ye mpangi zeto za Akristu. Muna mpila yayi tukala se akundi au yakwele mvu!
NKUNGA WA 109 Tuzolana ye Nsi a Ntima
a Kiakala vo tu wantu ampa mu ludi yovo se kolo twazaya e ludi, yeto awonso tufwete kwamanana nungunuka. E longi diadi divovela una tulenda wokesela o zola kweto muna Yave ye muna akaka. Ekolo tubadika mambu mama, yindula mana wavanga kala muna nungunuka ye mana olenda vanga owau muna kwamanana nungunuka.
b E nkumbu zankaka zasobwa.