Yeto awonso ke tukalanga ye ntangwa yafwana ko muna vanga longi dia yeto kibeni. Kansi, aweyi tulenda toma sadila e ntangwa? E ntete sikidisa e ntangwa. Ovua nluta miayingi avo olongokele mambu makete ye sungididi kiawonso ke mu longoka mambu mayingi ko mu nzaki ye mu nkumbu mosi.

I bosi vanga e nkubika ya mambu ofwete sia va fulu kiantete. (Efe. 5:15, 16) Badika e mambu malende:

• Tanganga e Bibila lumbu yawonso. (Nku. 1:2) Olenda yantikila muna sadila e programa ya ntangilu a Bibila ya lukutakanu lwa kati kwa lumingu.

• Kubika e longi dia Eyingidilu yo lukutakanu lwa kati kwa lumingu. Kala wakubama muna vana e mvutu.—Nku. 22:22.

• Avo osidi diaka ye bintangwa, sadila yo muna tanga malongi mankaka, nze, Eyingidilu dia nkangu yovo Despertai!, video ye malongi mana mesiwanga muna jw.org.

• Vanga e nkubika ya malongi ovuidi o mfunu olenda longoka. Olenda vavulula malongi malenda kusadisa mu zizidila mana onuananga mau, malongi mekusadisa mu zaya e mvutu za yuvu yaku yovo mambu mana ozolele toma bakula. Muna zaya diaka mana olenda longoka, tala vana kunku, Exercícios Bíblicos muna jw.org.