1. Ekuma Yave kayitezanesa ye ngudi oyemekanga?

MUNA lumbu ya Yesaya wa ngunza, Yave wayuvula vo: “Nga o nkento olenda vilakana o mwan’andi a nsedia?” Yave wavovesa nkangu andi vo: “Kana nkutu vo akento awaya bavilakene, omono kisinga kuvilakana ko.” (Yes. 49:15) Ke nkumbu miayingi ko Yave kekuyitezanesanga ye ngudi. Kansi, mu sono kiaki wayitezanesa ye ngudi. Yave wasadila e nzola ikalanga vana vena ngudi yo mwana mu songa vo otoma zolanga selo yandi. Ngudi zayingi balenda kwikila muna mvovo mia mpangi mosi ankento una ye nkumbu Jasmin ona wavova vo: “Vava ngudi keyemekanga mwan’andi, ediadi disiamisanga e nzol’andi yo mwana.”

2. Aweyi Yave kemonanga vava mosi muna wan’andi kekunyambulanga?

² Yave obakulanga vava mosi muna wan’andi keyambulanga samuna e nsangu zambote yo yambula kwenda muna tukutakanu. Yindula e mpasi kemonanga vava ayingi muna selo yandi beyoyanga muna mwanda * konso mvu.

3. Adieyi Yave kazolele?

³ Ayingi muna mpangi zazi bevutukanga muna nkutakani yo toma tambulwa. Yave ozolele vo bavutuka, oyeto mpe i diau tuzolele. (1 Pet. 2:25) Aweyi tulenda kubasadisila? Vitila twavana e mvutu za kiuvu kiaki, diambote twateka zaya e kuma akaka beyambulwilanga kwenda muna tukutakanu ye muna salu kia umbangi.

4. Adieyi diabwila akaka mu kuma kia salu yau?

⁴ Akaka beyambulanga sadila Yave kadi besianga e salu kiau va fulu kiantete muna zingu kiau. Mpangi Hung * ozingilanga kuna Ásia wavova vo: “Yakivana emvimba muna salu kiame, kadi ngindu za uzowa yakala zau za sia vo o kala ye mavua mayingi dikunsadisa mu sadila Yave una ufwene. Muna kuma kiaki, yasalanga ola zayingi. Malembe-malembe yayantika kondwa muna tukutakanu. Kuna kwalanda, yayambula kwenda emvimba muna tukutakanu. Satana osadilanga e nza mu vukumuna wantu bayambula sadila Yave malembe-malembe.”

5. Adieyi mpangi mosi kavanga vava kabwilwa mambu mampasi?

⁵ E mpangi zankaka benuananga ye mambu mampasi. Mpangi Anne ozingilanga kuna Grã-Bretanha una yo wana tanu, wavova vo: “O mwan’ame wansuka wa yakala wawutuka ye yimbevo yampasi. I bosi, mosi muna wan’ame amakento wavaikiswa muna nkutakani, kuna kwalanda o mwan’ame ankaka wa yakala wabakama kimbevo kia ntu. Yakendalala kikilu yo yambula kwenda muna tukutakanu ye muna salu kia umbangi. Kuna kwalanda, yayoya muna mwanda.” Diankenda kikilu mu zaya wo vo mpangi Anne ye akaka benuananga ye mpasi za mpila yayi!

6. O lembi lemvokela luludiku lwasonama muna Kolosai 3:13, aweyi dilenda fidila muntu mu vambuka nkangu a Yave?

⁶ Tanga Kolosai 3:13. Akaka muna selo ya Yave, bafunga makasi mu kuma kia diambu diambi mpangi mosi kabavanga. Paulu wa ntumwa wazaya wo vo ezak’e ntangwa tulenda ‘bakana e diambu’ ye mpangi. Balenda nkutu kutuvanga mambu kondwa kwa unsongi. Avo ke tukebele ko, tulenda lundila mpangi eto makasi. Kuna kulanda e makasi malenda fila o muntu mu vambuka o nkangu a Yave. Badika e nona kia mpangi Pablo ozingilanga kuna América do Sul. Wavuninua mambu vo diambu diambi kavanga, muna kuma kiaki wakatulwa kiyekwa muna nkutakani. Adieyi o mpangi Pablo kavanga? Wavova vo: “Yafunga kikilu makasi, kuna kwalanda yayambula e nkutakani.”

7. Adieyi dilenda bwila muntu okuyitumbanga?

⁷ Ezak’e ntangwa, o mpangi olenda kuyitumba mu kuma kia sumu kavola. Olenda yindula vo Nzambi ke kunzolanga diaka ko. Kanele vo waviluka o ntima yo lolokwa kwa Yave, olenda mona vo kafwana ko mu kala mosi muna nkangu a Nzambi. Mpangi mosi una ye nkumbu Francisco i wau mpe kamona. Wavova vo: “Wau vo zumba yatá, yatumbwa. Kanele vo yakwamanana kwenda muna tukutakanu, yabakama lukendalalu lwasaka yo yambula e nkubik’a Yave. Yakitumbanga yo kwikila vo Yave kaloloka masumu mame ko. Kuna kwalanda, yayambula kwenda muna lukutakanu.” Aweyi omonanga mu kuma kia mpangi benuananga ye mambu mama tuyikidi kala? Nga nkenda okubafwilanga? Aweyi Yave kemonanga mu kuma kiau?

8. Nga Yave ovilakananga awana bansadila kala? Sasila.

⁸ Yave ke vilakananga ko awana bansadilanga, kansi bayambula lungana yo nkangu andi mu fikolo. Ke vilakananga mpe ko mana bavanga muna salu kiandi. (Ayib. 6:10) Yesaya wa ngunza wayika nona kimosi kiambote kisonganga una Yave kelunga-lungilanga o nkangu andi. Yesaya wasoneka vo: “Nze mvungudi, oyandi olunga-lunga e kambi diandi. Muna koko kwandi, okutakesa wan’a mameme,  Okubanatina vana tulu kiandi.” (Yes. 40:11) Aweyi Yave wa Mvungudi Anene kemonanga vava selo yandi beyambulanga kunsadila? Yesu wasonga una Yave kemonanga vava kayuvula alongoki andi vo: “Adieyi nubenze? Avo muntu una ye 100 mameme, ovidisi dimosi, nga kesisa 99 ko vana miongo yo kwenda vavi dina divididi e? Avo osolwele dio, kieleka inuvovese vo, otoma dio yangalela ke mu 99 ko lulembele vila.”—Mat. 18:12, 13.

9. Kuna nz’ankulu, aweyi mvungudi ambote kakadilanga ye mameme mandi? (Tala e fwaniswa kia fukwa.)

⁹ Ekuma tulenda tezanesena Yave ye mvungudi? Kadi kuna nz’ankulu avungudi ambote batoma lunga-lunganga mameme mau. Muna bonga e nona, Davidi wanuana ye nkosi ye use mu tanina mameme mandi. (1 Sam. 17:34, 35) Mvungudi ambote wabakulanga vava vakondwanga kana nkutu meme dimosi. (Yoa. 10:3, 14) Mvungudi a mpila yayi wasisanga 99 lwa mameme vana fulu kiambote yovo kwa nkwandi mvungudi yo kwenda vavi e meme dimosi dikondele. Yesu wasadila nona kiaki muna kutulonga ludi kiamfunu: “Ke luzolo lwa Se diame ko una kuna zulu vo vavila kana nkutu mosi mun’awaya andwelo.”—Mat. 18:14.

10. Landila Yezekele 34:11-16, nkia nsilu o Yave kesianga kwa mameme mandi mavila?

¹⁰ Yave ozolanga konso muntu mu yeto, kumosi ye ‘awana andwelo’ bavengomoka muna kambi diandi. Muna Yezekele wa ngunza, Nzambi wasia nsilu vo ovava mameme mandi mavila ye okubasadisa mu vutulwisa ngwizani au yo yandi. Wayika mambu kevanga muna kubavuluza, mambu mama i mau o mvungudi kuna Isaele kavanganga vava meme diavilanga. (Tanga Yezekele 34:11-16.) Diantete, o mvungudi kafwete vava e meme divididi, kansi o vanga wo ntangwa ye ngolo diavavanga. Vava kasololanga e meme, o mvungudi wavutulanga dio muna kambi. Kansi, e meme avo nzala difwa, o mvungudi kuna zola kwawonso wadikilanga dio, avo lwala dilwele, wawukanga dio, wakanganga e mputa zandi yo lunga-lunga dio. Akuluntu bena vo avungudi  a “kambi dia Nzambi,’ bafwete vanganga diau dimosi mu sadisa awana beyambulanga e nkutakani. (1 Pet. 5:2, 3) Akuluntu bekubavavanga, kubasadisa bavutuka muna kambi yo kubasonga o zola kimana bavutukila e kikundi kiau yo Yave. *

11. Adieyi o mvungudi ambote kazayanga?

¹¹ O mvungudi ambote wazayanga vo e meme dilenda vila. Avo meme divengomokene e kambi, katumbanga dio ko. Badika e mbandu kasikidisa o Yave vava kasadisa akaka muna selo yandi ana bavengomoka mu fikolo.

12. Aweyi Yave kakadila yo Yona?

¹² Yona wa ngunza wakolamena Yave yo lembi kwenda kuna Ninive. Kana una vo i wau, Yave kabembola Yona vana vau ko. Nze mvungudi ambote, Yave wamvuluza yo kunsadisa kavutukila o nkuma kavuanga o mfunu kimana kalungisa e kiyekwa kiandi. (Yona 2:7; 3:1, 2) I bosi, Nzambi wamenesa nsing’a nkalu mu sadisa Yona kabakula vo o moyo wa konso muntu mfunu wina. (Yona 4:10, 11) Adieyi tulongokele? Akuluntu ke bafwete bembola vana vau ko awana bayoyele muna mwanda. Kansi, bafwete vavanga bakula e kuma e meme divambukidi e kambi. Vava e meme divutukanga kwa Yave, akuluntu bafwete kwamanana songa o zola yo tokanenanga e wete diandi.

13. Adieyi tulenda longoka muna mpila Yave kakadila yo nsoneki a Nkunga 73?

¹³ O nsoneki a Nkunga 73 wakendalala vava kamona yimpumbulu bakala ye zingu kiambote. Wakiyuvula kana vo o vanga luzolo lwa Yave nluta dikuntwasila. (Nku. 73:12, 13, 16) Adieyi Yave kavanga? Yave kantumba ko. Kansi, Nzambi wasonekesa e mvovo mia ntozi a nkunga muna Bibila. Ntozi a nkunga wabakula vo e kikundi yo Yave i nsabi muna kala ye zingu kiambote. (Nku. 73:23, 24, 26, 28) Adieyi tulongokele? Akuluntu ke bafwete tumbanga mu nzaki ko awana beyantikanga katikisa o mfunu wa sadila Yave. Kansi, bafwete vavanga bakula e kuma bavovele  yovo vanga diambu kingandi. I bosi, akuluntu balenda sadila e Bibila muna kubakasakesa.

14. Ekuma Eliya kavuila lusadisu o mfunu? Aweyi Yave kansadisila?

¹⁴ Eliya wa ngunza watina Izebele wa Ntinu ankento. (1 Nti. 19:1-3) Wayindula vo ke vakala diaka ngunza ankaka ko ona wasadilanga Yave, muna kuma kiaki wamona vo salu kiandi ke kiakala mfunu ko. Eliya wakendalala kikilu, wazola vo kafwa kwandi. (1 Nti. 19:4, 10) Vana fulu kia tumba Eliya, Yave wamvovesa vo kena yandi mosi ko ye wafwana bunda e vuvu muna nkum’a Nzambi. Wanzayisa mpe vo salu kiayingi kena kiau kafwete sala. Kuna ngemba zawonso, Yave wawá ntokani za Eliya yo kumvana yiyekwa yampa. (1 Nti. 19:11-16, 18) Adieyi tulongokele? Yeto awonso, musungula akuluntu tufwete songanga e ngemba kwa mameme ma Yave. Avo mpangi ovovele vo ku makasi kena yovo okuyimwenanga vo kafwanukini nkenda za Yave ko, akuluntu bafwete toma kunwinikina ekolo keziulanga o ntim’andi yo kubazayisa mambu mekuntokanesanga. I bosi, bafwete vanga mawonso mu songa kwa meme diavila vo Yave mfunu kekumvuanga.

15. Mun’owu wa Yoane 6:39, aweyi Yesu kabadikilanga mameme ma Se diandi?

¹⁵ Aweyi Yave kazolele vo twabadikilanga mameme mandi mavila? Tulenda longoka mayingi muna mbandu a Yesu. Wazaya wo vo kuna kwa Yave, mameme mandi mawonso  mfunu mena. Muna kuma kiaki, Yesu wavanga mawonso mu sadisa “mameme mavila ma nzo a Isaele” mavutuka kwa Yave. (Mat. 15:24; Luka 19:9, 10) Nze mvungudi ambote, Yesu wavanga mpe mawonso kimana valembi vila kana nkutu meme dimosi dia Yave.—Tanga Yoane 6:39.

16-17. Aweyi akuluntu bafwete sadisila awana bayoya muna mwanda? (Tala e babu “ Aweyi e Meme Diavila Dimonanga?.”)

¹⁶ Paulu wa ntumwa wawondelela akuluntu a nkutakani a Efeso batanginina mbandu a Yesu. Wabavovesa vo: ‘Nufwete sadisa awana batovokele yo sungamena mvovo mia Mfumu Yesu vava kavova yandi kibeni vo: ‘E diambu disundidi e kiese i vana, ke mu tambula ko.’’ (Mav. 20:17, 35) Kieleka, e sono kiaki kisonganga vo akuluntu kiyekwa kiamfunu bena kiau kia lunga-lunga nkangu a Nzambi. Mpangi Salvador una vo nkuluntu ozingilanga kuna Espanha wavova vo: “Vava iyindulanga e mpila Yave ketokanenanga e wete dia mameme mandi mavila, ivanganga mawonso muna kubasadisa. Nzeye wo vo Yave ozolele vo yatoma lunga-lunganga e mameme mandi.”

¹⁷ Mpangi zawonso tuyikidi mu longi diadi ana bayoya muna mwanda basadiswa yo vutuka kwa Yave. Ayingi muna awana bayoya muna mwanda bazolele mpe vutuka kwa Yave. E longi dilanda divovela dina tulenda vanga muna kubasadisa bavutuka kwa Yave.