LONGI DIA 26
“Nuvutuka kwa Mono”
“Nuvutuka kwa mono, omono mpe ivutuka kwa yeno.”—MAL. 3:7.
NKUNGA WA 102 “Nusadisa Awana Batovokele”
MANA TULONGOKA *
1. Aweyi Yave kemonanga vava mosi muna mameme mandi ovutukanga kwa yandi?
NZE UNA twalongokele muna longi diaviokele, Yave okuyitezanesanga ye mvungudi ambote ona otoma lunga-lunganga konso meme diandi. Ovavanga konso ndiona oyoyele muna mwanda. Yave wavovesa Aneyisaele ana bayambula kunsadila vo: “Nuvutuka kwa mono, omono mpe ivutuka kwa yeno.” Tuzeye wo vo i una Yave kemonanga kadi wavova vo: “Kisobanga ko.” (Mal. 3:6, 7) Yesu wavova vo Yave ye ambasi kiese kiayingi bemonanga avo mosi muna asadi andi ovutukidi kwa Yave.—Luka 15:10, 32.
2. Nkia mambu tuvovela mu longi diadi?
2 Yambula twabadika yingana tatu ina Yesu kasadila isonganga una tulenda sadisila awana bayambula sadila Yave. Tuvovela mpe yaka fu tufwete songa kimana twasadisa e meme diavila diavutuka kwa Yave. Tulongoka mpe vo kiese kiayingi tukala kiau avo tusidi e ngolo muna sadisa awana bayoya muna mwanda bavutuka kwa Yave.
VAVA DRAKIMA YAVILA
3-4. Ekuma o nkento oyikwanga muna Luka 15:8-10, katoma vavila e drakima kavidisa?
3 Diambote twasianga e ngolo muna solola awana bazolele vutuka kwa Yave. Muna kingana kiasonama muna nkand’a Luka, Yesu wayika una nkento mosi kavavila e lekwa kiamfunu kavidisa, i sia vo, drakima mosi. E kingana kiaki, kikutusadisa mu sia e sungididi muna salu kia vava awana bayambula sadila Yave.—Tanga Luka 15:8-10.
4 Yesu wasasila una nkento ndiona kamona vava kasolola e drakima yamfunu ina kavidisa. Muna lumbu ya Yesu, vava mwan’ankento a Isaele kasompanga, ezak’e ntangwa o ngudi andi wamvananga drakima kumi se lukau. Nanga e drakima yayi yamfunu kikilu yakala kwa nkento ndiona kadi ngudi andi wamvana yo. O nkento ndiona wabakula vo e drakima va ntoto yasotoka. Muna kuma kiaki, wakwika e mwinda yo vava e drakima, kansi kasolola yo ko. O mwinda kasadila ke wavananga o ntemo wafwana ko muna solola e drakima yakete. I bosi, watoma komba e nzo yawonso. Wasolola e drakima yayi vana ntoto kakutika vava kakomba e nzo. E drakima yakezima mu kuma kia ntemo a mwinda. Ekwe kiese kamona! Muna kuma kiaki, wabokelesa akundi ye mfinangani zandi muna kubazayisa e nsangu zazi zambote.
5. Ekuma dilenda kadila diampasi mu solola awana bayambula sadila Yave?
5 Nze una tumwene muna kingana kia Yesu, ngolo divavanga muna solola e lekwa kivididi. Diau dimosi mpe yo yeto, tufwete vanganga e ngolo muna salu kia solola awana bayambula sadila Yave. Nanga mvu miayingi miviokele kala tuka bayambulwila lungana yo nkangu a Yave. Dilenda kala vo bayaluka ku zunga kina ke bazayakene ko kwa ampangi. Kansi, tulenda kala ye ziku vo akaka muna yau bazolele vutuka kwa Yave. Bazolele sadila diaka Yave kumosi ye ampangi muna nkutakani, kansi lusadisu lweto bavuidi o mfunu.
6. Aweyi yeto awonso muna nkutakani tulenda vavila awana bayoya muna mwanda?
6 Nani olenda sala e salu kia vava awana bayoya muna mwanda? Ateleki awonso muna nkutakani balenda sadisa muna kubasolola, kumosi ye akuluntu, aviti a nzila ye awana bena ye yitu bayoya muna mwanda. Nga una ye nkundi yovo yitu ona wayoya muna mwanda? Nga wawanana kala yo mpangi mosi ona wayoya muna mwanda, kiakala muna salu kia nzo ye nzo yovo vava wasilanga umbangi vana fulu kia ndonga? Zayisa kwa mpangi ndioyo vo avo ozolele vo kakingulwa, okala ye kiese kia vana e número andi ya telefone kwa akuluntu a nkutakani aku.
7. Adieyi tulongokele muna mvovo mia mpangi Thomas una vo nkuluntu?
7 Nkia mambu akuluntu balenda vanga kimana basolola awana bazolele vutuka kwa Yave? Tala dina kavova mpangi Thomas * ozingilanga kuna Espanha, una vo nkuluntu ona wasadisa vioka 40 ma ampangi bavutuka kwa Yave. Wavova vo: “Entete iyuvulanga ampangi avo bazeye kuna kezingilanga owau o mpangi wayoya muna mwanda yovo iyuvulanga kwa ateleki kana vo basungamene mpangi ona ke kwizanga diaka mu tukutakanu ko. Mpangi zayingi muna nkutakani kiese bekalanga kiau mu sadisa akuluntu kadi bemonanga vo oyau mpe bena muna salu kia vava awana bayoya muna mwanda. I bosi, vava ikingulanga mpangi wayoya muna mwanda, ikunyuvulanga mu kuma kia wan’andi ye yitu yandi. Akaka muna yau banatanga wan’au muna tukutakanu, nanga wana awaya ateleki mpe bakala. Oyau mpe lusadisu bavuidi o mfunu muna vutuka kwa Yave.”
SADISA AWANA BAVILA BAVUTUKA KWA YAVE
8. Mun’owu wa kingana kiasonama muna Luka 15:17-24, adieyi o se kavanga kwa mwan’andi waviluka o ntima?
8 Nkia fu tufwete songa kimana twasadisa awana bazolele vutuka kwa Yave? Tala mana tulenda longoka muna kingana kia Yesu kia mwana wasisa e nzo a se diandi. (Tanga Luka 15:17-24.) Yesu wasasila vo kuna kwalanda, o mwana ndioyo wakibanza yo bak’e nzengo za vutuka kwa se diandi. O se watikuna muna wanana yo mwan’andi yo kumbimbakana kimana kazaya wo vo se diandi zola kekunzolanga. O mwana wakendalala kikilu yo mona vo kafwana yikilwa diaka mwana ko. O se wafwila mwan’andi e nkenda wau kamvovesa una kamonanga. I bosi, o se wavanga e diambu muna songa vo watoma tambula o mwan’andi, ke nze kimpumbulu ko, kansi nze mwan’anzolwa. Muna songa kikilu vo watoma kuntambula, o se wavangisa e nkinzi yo vuika o mvuatu wambote kwa mwan’andi ona waviluka o ntima.
9. Nkia fu tufwete songa muna sadisa awana bayoya muna mwanda bavutuka kwa Yave? (Tala e babu “ Aweyi Tulenda Sadisila Awana Bazolele Vutuka kwa Yave?”)
9 Yave otezaneswanga yo se oyikilu mu kingana kiaki. Otoma zolanga ampangi ana bayoya muna mwanda ye ozolele vo bavutuka kwa yandi. Muna tanginina Yave, tulenda kubasadisa bavutuka kwa yandi. Muna kuma kiaki, divava vo twasonga luzindalalu, ngemba, nkenda yo zola. Ekuma ye aweyi tulenda songela e fu yayi?
10. Ekuma tuvuididi luzindalalu o mfunu muna sadisa muntu kavutuka kwa Yave?
10 Luzindalalu tuvuidi o mfunu kadi ntangwa yayingi ivavuanga kwa muntu mu vutuka kwa Yave. Ayingi muna awana bayoya muna mwanda kansi bavutuka kwa Yave bevovanga vo, akuluntu ye mpangi zankaka muna nkutakani nkumbu miayingi babakingulanga vitila bavutuka kwa Yave. Mpangi mosi ankento una ye nkumbu Nancy, ozingilanga kuna Ásia, wasoneka vo: “Mpangi mosi muna nkutakani wakala se nkundi ambote kwa mono, nkumbu miayingi kansadisanga. Watoma kunzolanga nze mbut’andi ankento. Wansungamesanga mambu mambote twavanganga kumosi. Wawinikinanga kuna luzindalalu lwawonso vava yamvovesanga una yamonanga. Kakatikisanga ko muna kumpana e longi. Wasonga vo nkundi ambote kakala, wakubama muna kunsadisa konso ntangwa.”
11. Ekuma tufwete songela e ngemba muna sadisa mpangi una wakendalala?
11 E fu kia songa e ngemba kilenda tezaneswa ye nlongo miambote milenda wuka o muntu. Mpangi zankaka bayoya muna mwanda mu kuma kia diambu diambi bavangwa kwa mpangi mosi muna nkutakani se vioka mvu miayingi, muna kuma kiaki bakinu mona makasi yo kendalala kwayingi. Ediadi dikakidilanga muntu mu vutuka kwa Yave. Akaka edi beyindulanga vo dina bavangwa ke diansongi ko. Muna kuma kiaki, mpangi ona otoma winikinanga bavuidi o mfunu ye ndiona obakulanga una bemonanga. (Yak. 1:19) Mpangi María, ona wayoya mu fikolo, wavova vo: “Mpangi yavuanga o mfunu muna kungwinikina, kumfiaulwisa, kumpana e longi yo kunsadisa.”
12. Yika e nona kisonganga una Yave ketuntilanga awana bayoya muna mwanda bavutuka kwa yandi.
12 Bibila kivovanga vo o zola kwa Yave muna nkangu andi kulenda tezaneswa ye nsinga watuntila e lekwa. Mu nkia mpila o zola kwa Nzambi kuna nze nsinga watuntila lekwa? Badika e nona kiaki: Yindula vo mu dimuka una muna mbu. Mavuku mampwena mena mo ye maza manzizi. Oyantikidi mina nkaki yovo nkwiti. I bosi, muntu mosi muna nlungu uvene lekwa kikusadisa walembi dimuka. Otomene yangalala. Kansi, lusadisu lwankaka ovuidi o mfunu muna vuluka. Kadi ofwete vaika muna maza. Muna kuma kiaki, ozolele vo wantu bena muna nlungu batubila e nsinga yo kutunta muna nlungu. I diau mpe Yave kavanga kwa Aneyisaele ana bavengomoka, vava kavova vo: ‘Yakwamanana kubafidila muna nsinga mia zola.’ (Osea 11:4) I wau mpe Yave kemonanga o unu mu kuma kia awana bayambula kunsadila ye awana benuananga ye mambu mampasi ye ntokani zasaka. Yave ozolele vo bazaya wo vo zola kekubazolanga yo kubasadisa bavutuka kwa yandi. Yave olenda kusadila muna songa kwa mpangi zazi vo oyandi zola kekubazolanga.
13. Aweyi e nona kia mpangi Pablo kisongelanga vo o zola kweto muna akaka kulenda kubasadisa mu vutuka kwa Yave?
13 Diamfunu twavovesanga awana bayoya muna mwanda vo Yave zola ketoma kubazolanga, oyeto mpe zola tutoma kubazolanga. Mpangi Pablo ona twayikidi muna longi diaviokele, wayoya kakala muna mwanda mu vioka mvu 30. Wavova vo: “Lumbu kimosi muna mene, ekolo yavaikanga muna nzo ame, yawanana ye mpangi mosi ankento wa nkwa ngemba una vo nunu yo mokena yame kuna zola kwawonso. Yayantika dila nze mwan’akete. Yamvovesa vo Yave wamfila kimana kamokena yame. Muna lumbu kiakina yabaka e nzengo za vutuka kwa Yave.”
TUSADISA ATOVOKI KUNA ZOLA KWAWONSO
14. Mun’owu wa kingana kiasonama muna Luka 15:4, 5, adieyi mvungudi kavanga muna solola e meme diavila?
14 Diamfunu mu kwamanana sadisa yo kasakesa awana bayoya muna mwanda. Nze muna kingana kia Yesu kia mwana wavila, ntangwa yayingi divavanga muna katula lukendalalu muna ntima. Mu kuma kia mana bamona mu nza ya Satana, diampasi kwa yau mu finama diaka Yave. Tufwete kubasadisa kimana bakumika diaka lukwikilu lwau muna Yave. Muna kingana kia meme diavila, Yesu wayika una mvungudi kasila e meme vana mavembo yo kumvutula muna kambi. O mvungudi wavaula e ntangwa yayingi ye ngolo muna solola e meme diavila. Kansi, wabakula vo muna kumvutula muna kambi kafwete kunata kadi kakala ye ngolo za diatila ko.—Tanga Luka 15:4, 5.
15. Aweyi tulenda sadisila awana bayoya muna mwanda bavutuka kwa Yave? (Tala e babu “ Nkanda Wamfunu Kikilu.”)
15 Oyeto mpe tufwete vaulanga e ntangwa yo sadila e ngolo zeto muna sadisa awana bayoya muna mwanda mu sunda e mambu mampasi mabayoyesa yo vutuka kwa Yave. Kansi, muna lusadisu lwa mwand’a Yave, Diambu diandi ye nkanda tutambulanga muna nkutakani, tulenda kubasadisa muna kumika e ngwizani au yo Yave. (Roma 15:1) Aweyi tulenda wo vangila? Mpangi mosi osalanga se nkuluntu mu mvu miayingi wavova vo: “Ayingi muna awana bayoya muna mwanda, longi dia Bibila bavuidi o mfunu muna vutuka kwa Yave.” * Muna kuma kiaki, avo balombele vo walongokanga ye mpangi wayoya muna mwanda, tambulwila e kiyekwa kiaki ye kiese kiawonso. O nkuluntu ndioyo wakudikila vo: “Mpangi ona olongoka ye mpangi wayoya muna mwanda, kafwete kala nkundi ambote kimana kambunda e vuvu yo ziula o ntim’andi.”
KIESE KUNA ZULU YE OVA NTOTO
16. Aweyi tuzayidi wo vo ambasi bekutusadisanga muna salu kia solola awana bayoya muna mwanda?
16 Vena ye nona yayingi isonganga vo ambasi besalanga kumosi yo yeto muna salu kiasolola awana bayoya muna mwanda kimana bavutuka kwa Yave. (Lus. 14:6) Muna bonga e nona, mpangi Silvio wa musi Equador, wasamba kwa Yave kimana kansadisa mu vutuka muna nkutakani. Ekolo kasambanga, akuluntu wole badodela e kielo kiandi. Muna nkingula yayi, akuluntu bayantika kumvana o lusadisu kavuanga o mfunu.
17. Nkia nluta tuvua muna sadisa awana bayoya muna mwanda?
17 Kiese kiayingi tukala kiau muna sadisa awana bayoya muna mwanda bavutuka kwa Yave. Tala dina diavova mpangi mosi una vo mviti a nzila ona osadisanga awana bayoya muna mwanda: “Ezak’e ntangwa, meso mame mezalanga ye mansanga mu kuma kia kiese kia mona mpangi wayoya muna mwanda ovutukidi kwa Yave. Kiese kiayingi mpe ikalanga kiau muna sala kumosi yo Yave muna sadisa e meme diandi kayambula e nza ya Satana yo vutuka kwa Yave.”—Mav. 20:35.
18. Avo wayoya muna mwanda, nkia ziku olenda kala kiau?
18 Avo wayambula lungana yo nkangu a Yave, kala ye ziku vo Yave wakinu kuzola. Yave ozolele vo wavutuka kwa yandi. Dialudi vo ngolo ofwete vanga muna vutuka kwa yandi. Kansi, nze se oyikwanga muna kingana kayika o Yesu, Yave ovingilanga e mvutuk’aku ye okala ye kiese kia kutambula muna nkutakani.
NKUNGA WA 103 Akuluntu Tukau twa Wantu
^ tini. 5 Yave ozolele vo awana bayambula lungana yo nkangu andi bavutuka kwa yandi. Tulenda vanga mayingi muna kasakesa awana bazolele tambulwila e mbok’a Yave vo: “Nuvutuka kwa mono.” Mu longi diadi, tuvovela una tulenda kubasadisila kimana bavutuka kwa Yave.
^ tini. 7 E nkumbu zankaka zasobwa.
^ tini. 15 Akaka muna awana bayoya muna mwanda, balenda longoka eyaka kapu ya nkanda ‘Nusikila Muna Zola kwa Nzambi.’ Kansi, akaka balenda vua e nluta muna longoka eyaka kapu ya nkanda Finama Yave. Akuluntu a Buka kia Salu kia Nkutakani yau bezaya mpangi ofwanukini muna fila e longi diadi.
^ tini. 68 FWANISWA: Mpangi tatu besadisanga mpangi mosi ozolele vutuka kwa Yave. Bevanganga wo muna kwamanana kumbokela muna telefone, kunsonga o zola yo toma kunwinikina vava kevovanga.
