E sono kiaki fu vua kiyikanga. Kivovanga vo: “E mbongo a mwanda i zola, kiese, luvuvamu, luzindalalu, walakazi, wete, lukwikilu, lulembamu, volo.” Kansi, ke tufwete yindula ko vo e fu yayi i yau kaka tulenda yima muna lusadisu lwa mwand’a Nzambi.

Aweyi tuzayidi wo? Vitila Paulu wa ntumwa kayika e fu ya mbongo a mwanda, wasoneka vo: “Mavangu ma nitu . . . i mau mama: mavangu ma zumba, mavangu ma usafu, mavangu mansoni, sambila teke, mpandu, kitantu, unzonzi, kimpala, makasi masaka, ntantani, mpambula, landa malongi ma wantu, zinu, nkolwa, nkinzi miakondwa tezo ye mambu ma mpila yayi.” (Ngal. 5:19-21) O mvovo “mambu ma mpila yayi” usonganga vo Paulu wadi yika mambu mankaka se “mavangu ma nitu” nze mana kayika muna Kolosai 3:5. Diau dimosi mpe, vava kayika e fu vua yambote, wasoneka vo: “Muna mambu mama ke muna nsiku ko.” Ozevo, Paulu kayika fu yawonso ko tulenda yima muna lusadisu lwa mwand’avelela.

Tubakulanga wo vava tutezanesanga e mbongo a mwand’avelela ye mbongo a ntemo ina Paulu kasonekena nkutakani a Efeso. Wavova vo: “E mbongo a ntemo i mawonso mambote, mansongi ye maludi.” (Efe. 5:8, 9) Kieleka, mambu mawonso “mambote,” kumosi yo unsongi ye ludi i “mbongo a ntemo” kadi e fu yayi ina mpe muna “mbongo a mwanda.”

Tulenda wo bakula mpe avo tutezanese e fu ya mbongo a mwanda ye fu sambanu ina Paulu kavovesa Timoteo vo kayima, i sia vo: “Unsongi, vumi wa Nzambi, lukwikilu, zola, luzindalalu yo lulembamu.” (1 Tim. 6:11) Fu tatu kaka muna fu yayi, i sia vo, lukwikilu, zola yo lulembamu, iyikwanga muna “mbongo a mwanda.” Kansi, diavavanga mpe vo Timoteo kayima e fu yankaka nze unsongi, vumi wa Nzambi ye luzindalalu. Wazaya wo vo muna lusadisu lwa mwand’avelela kaka kadi yimina e fu yayi.—Tezanesa ye Kolosai 3:12; 2 Petelo 1:5-7.

Ozevo, e sono kia Ngalatia 5:22, 23, ke kiyikanga fu yawonso ko Akristu bafwete yima. Dialudi vo, mwand’a Nzambi ulenda kutusadisa mu yima e fu vua iyikwanga muna “mbongo a mwanda.” Kansi, vena ye fu yankaka tufwete yima ekolo tunungunukanga yo kituka Akristu azikuka yo vuata “kiwuntu kiampa kina kiavangilwa muna luzolo lwa Nzambi, muna unsongi wakieleka ye kwikizi kiakieleka.”—Efe. 4:24.