1. Ezak’e ntangwa ekuma e selo yankaka ya Yave bemwenanga kinsona?

AYINGI mu yeto, ezak’e ntangwa kinsona tumonanga. Kuna kwa akaka, e kinsona vana vau kiviokanga. Kansi, kuna kwa akaka ntangw’ayingi divavanga muna viokesa e kinsona. Kana una vo tulenda kala vamosi yo wantu, tulenda mona kinsona. Kuna kwa mpangi zankaka, diampasi dikalanga muna vanga yikundi yampa muna nkutakani. Akaka bemonanga kinsona kadi bayaluka yo sisa e yitu yau ana bazinganga kumosi. Akaka nkutu bemonanga kinsona kadi bafwilwa o muntu batoma zolanga. Avo i akaka wau vo wantu ampa muna ludi, bemonanga kinsona kadi babembolwa yo siwa kitantu kwa yitu yau ye awana bakala se akundi au.

2. Nkia yuvu ivaninua e mvutu mu longi diadi?

² Yave ozeye ye obakulanga mambu mawonso mu kuma kieto. Obakulanga vava tumonanga e kinsona ye ozolele kutusadisa mu sunda e kinsona kiaki. Kansi, aweyi Yave kekutusadisilanga? Adieyi tufwete vanga muna kuyisadisa? Aweyi tulenda sadisila e mpangi zeto muna nkutakani ana bemonanga kinsona? E longi diadi divana e mvutu za yuvu yayi.

3. Aweyi Yave kasongela vo watokanenanga e wete dia Eliya?

³ Yave ozolele vo e selo yandi yawonso bakala ye kiese. Ofinamene konso muntu mu yeto ye obakulanga vava tukendalalanga. (Nku. 145:18, 19) Tala una Yave kasongela vo watokanenanga e wete dia Eliya wa ngunza. O ngunza ndioyo wa nkwa kwikizi, wazingila muna kolo kiampasi kia lusansu lwa Isaele. Muna kolo kiokio, e selo ya Yave bangikwa batoma bangikwanga  kwa mbeni za Yave yo vava nkutu vonda Eliya. (1 Nti. 19:1, 2) Vana ntandu, Eliya wabanzanga vo yandi kaka i ngunz’a Yave wasala. E diambu diadi mpe diakendelekanga kikilu Eliya. (1 Nti. 19:10) Vana vau, Nzambi wavanga e diambu muna sadisa Eliya. Wafila e mbasi muna sikidisa e ngunz’andi vo kakala yandi mosi ko kadi ayingi muna Aneyisaele basadilanga Nzambi ye kwikizi kiawonso.—1 Nti. 19:5, 18.

4. Aweyi e sono kia Maku 10:29, 30, kisongelanga vo Yave otokanenanga e wete dia selo yandi ana bemonanga e kinsona?

⁴ Yave ozeye wo vo ndonga muna yeto lekwa yayingi twabembola muna kunsadila. Nanga twabembola lusadisu twatambulanga kwa yitu ye akundi eto ana ke besadilanga Yave ko. Nanga e ntokani zazi i zau zafila Petelo wa ntumwa mu yuvula Yesu vo: “Oyeto tusisidi yawonso yo kulanda; ozevo, nki tutambula?” (Mat. 19:27) Kuna ngemba zawonso, Yesu wasikidisa alongoki andi vo ampangi muna nkutakani bekala se yitu yau. (Tanga Maku 10:29, 30.) Yave wa Se dieto dia zulu, osianga o nsilu vo osadisa awana bazolele kunsadila. (Nku. 9:10) Owau, yambula twalongoka e maka mambu olenda vanga muna tambula lusadisu lwa Yave vava omonanga kinsona.

5. Ekuma dinina o mfunu mu sianga e sungididi muna mpila ina Yave kekusadisilanga?

⁵ Sianga e sungididi muna mpila ina Yave kekusadisilanga. (Nku. 55:22) Avo ovangidi wo, obakula vo kuna ngeye mosi ko, Yave una yaku. Mpangi ankento Carol * una vo mpumpa, yandi mosi kaka una muna ludi, wavova vo: “Vava iyindulanga una Yave kansadisila muna ntangw’ampasi, dikunkwikidisanga vo kina mono mosi ko. Yave okwamanana kala yame.”

6. Aweyi e sono kia 1 Petelo 5:9, 10, kilenda kasakesela awana bemonanga kinsona?

⁶ Yindula una Yave kesadisilanga mpangi zankaka ana benuananga ye mpasi. (Tanga 1 Petelo 5:9, 10.) Mpangi ayakala Hiroshi, una vo yandi mosi kaka i Mbangi a Yave muna yitu yandi, wavova vo: “Muna nkutakani,  diasazu mu bakula vo konso muntu una ye diambu diampasi kenuananga diau. Ozaya vo konso muntu muna nkutakani ovanganga mawonso kalenda muna sadila Yave una ufwene, dilenda sadisa awana bena vo yau mosi kaka bena muna ludi nze mono.”

7. Aweyi e sambu kilenda kusadisila?

⁷ Sambanga, tanganga e Bibila yo kwenda muna tukutakanu konso lumingu. Ediadi divavanga vo wazayisanga kwa Yave ye sikididi kiawonso una omonanga muna ntima. (1 Pet. 5:7) Tala dina mpangi ankento Massiel una vo nleke kavova. Wau vo yandi mosi kaka osadilanga Yave muna nzo au, kinsona kamonanga. Wavova vo: “E diambu diatoma kunsadisa muna sunda e kinsona, i ziula o ntim’ame kwa Yave muna sambu. Muna kolo kiakina kiampasi, yabakula vo Yave Se dianzodi kakala kwa mono. Yasambanga nkumbu miayingi muna lumbu yo kunzayisa una yamonanga muna ntima.”

8. Otanga yo badika e Diambu dia Nzambi aweyi dilenda kusadisila?

⁸ Tanganga e Diambu dia Nzambi lumbu yawonso, badikanga e tusansu twa Bibila tusonganga una Yave kekuzolelanga. Mpangi Bianca ona ozizidilanga e mvovo mia lutiangu mia yitu yandi, wavova vo: “Otanga yo badika tusansu twa Bibila ye tusansu twa selo ya Yave o unu ana bazizidila luvezo nze mono, dikunsadisanga kikilu.” Mpangi zankaka belundanga e sono ya Bibila muna ntu ina ilenda kubafiaulwisa, nze Nkunga 27:10 ye Yesaya 41:10. Akaka bewanga e audio vava bekubikanga malongi ma tukutakanu yovo vava betanganga e Bibila, ediadi dikubasadisanga mu lembi mona kinsona.

9. Okwenda muna tukutakanu aweyi dilenda kusadisila?

⁹ Vanganga mawonso muna kwendanga muna tukutakanu konso lumingu. E malongi ma tukutakanu metoma kukasakesa ye otoma zaya mpe ampangi muna nkutakani. (Ayib. 10:24, 25) Mpangi Massiel ona tuyikidi kala, wavova vo: “Kana una vo i nkwa nsoni, yabaka e nzengo zakalanga muna tukutakanu twawonso yo vana e mvutu. Ediadi diansadisa mu toma finama ampangi muna nkutakani.”

10. Ekuma dinina o mfunu mu vanga kikundi ye ampangi muna nkutakani?

¹⁰ Vanganga yikundi ye ampangi muna nkutakani. Vanganga yikundi ye ampangi ana balenda kala se mbandu ambote kwa ngeye. E mpangi zazi balenda kala aleke yovo ambuta ana bena ye kisi nsi kiaswaswana ye kiaku. E Bibila kikutusungamesanga vo ‘e ngangu kwa anunu zina.’ (Yobi 12:12) Kansi, ampangi bena vo ambuta balenda mpe longoka mayingi kwa aleke muna nkutakani. Davidi nleke kikilu kakala, kansi kikundi kiakola kakala kiau yo Yonatane. (1 Sam. 18:1) Yau awole basadisa  muntu yo nkwandi kana una vo banuananga ye mambu mampasi. (1 Sam. 23:16-18) Mpangi Irina wasia e ngolo za vanga yikundi ye ampangi muna nkutakani. Yamu wau, yandi mosi kaka i Mbangi a Yave muna yitu yandi. Wavova vo: “E mpangi zeto muna nkutakani balenda kituka kikilu se yitu yeto. Yave olenda kubasadila mu lungisa e nsatu zeto.”

11. Adieyi olenda vanga muna kala ye akundi ambote?

¹¹ Dilenda kala diampasi mu vanga yikundi yampa mu sungula avo u nkwa nsoni. Mpangi ankento Ratna, una vo nkwa nsoni ona walongoka e ludi kana una vo wasiwanga kitantu, wavova vo: “Diavava vo yatambulwila vo lusadisu lwa mpangi zame muna nkutakani yavuanga o mfunu.” Dilenda kala diampasi mu zayisa kwa muntu ankaka una omonanga muna ntima, kansi o ziula o ntima disadisa mu vanga kikundi kiakola. Dialudi vo akundi aku bazolele kusadisa yo kukasakesa, kansi ngeye ofwete kubazayisa una bafwete wo vangila.

12. Aweyi olenda vangila yikundi yambote?

¹² Imosi muna mpila yambote olenda vangila yikundi, i vaikanga muna salu kia umbangi ye mpangi zankaka. Mpangi ankento Carol ona tuyikidi kala, wavova vo: “Osala e salu kia umbangi ye salu yankaka ya mwanda kumosi ye mpangi zamakento a nkutakani ame, diansadisa mu vanga yikundi yambote. Mu mvu miami miawonso, Yave osadilanga akundi awaya muna kunsadisa.” Kieleka, diamfunu kikilu mu vanganga yikundi ye mpangi zeto muna nkutakani. Yave osadilanga akundi awaya muna kutusadisa mu sunda e mambu mampasi tunuananga mau nze kinsona.—Nga. 17:17.

13. Nkia mbebe tuna yau yeto awonso muna nkutakani?

¹³ Awonso muna nkutakani, bena ye mbebe yakitula e nkutakani se fulu kia luvuvamu yo songa o zola kwa wantu awonso kimana valembi kala ye muntu omona vo wabembolwa kena. (Yoa. 13:35) E mvovo ye mavangu meto malenda vanga diambu muna zingu kia mpangi zeto. Tala dina mpangi mosi ankento kavova: “Vava yalongoka e ludi, mpangi zawonso muna nkutakani bakituka se yitu yame. Kondwa kwa lusadisu lwau, kiadi kituka Mbangi a Yave ko.” Adieyi olenda vanga muna sadisa mpangi una vo yandi mosi kaka kena muna ludi kamona vo zolwa ketoma zolwanga muna nkutakani?

14. Aweyi olenda vangila kikundi yo wantu ampa muna nkutakani?

¹⁴ Vitanga o ntu muna vanga kikundi yo wantu ampa muna nkutakani. Tulenda wo vanga muna toma kubatambula vava bekwizanga muna tukutakanu. (Roma 15:7) Kansi, mayingi diaka tufwete vanga ke kubakayisa kaka ko. Kuna kulanda tuzolele kituka akundi au akola. Muna kuma kiaki, kala nkwa ngemba yo songa vo ozolanga kikilu o wantu ampa bekwizanga muna nkutakani. Vava bakula e mpasi benuananga zau, kansi kuyisie mu mambu ma zingu kiau ko. Sungamena dio vo kuna kwa mpangi zankaka diampasi dikalanga mu zayisa kwa akaka una bemonanga muna ntima. Muna kuma kiaki, kubakomekena ko. Muna bakula una bemonanga, vanga e yuvu kuna zola ye ndekwa yo winikina e mvutu zau kuna luzindalalu lwawonso. Kasikil’owu, olenda kunyuvula: ‘Aweyi wazayila e ludi?’

15. Aweyi mpangi zazikuka balenda sadisila akaka muna nkutakani?

¹⁵ Vava mpangi zazikuka mu sungula akuluntu besonganga o zola kwa akaka, ediadi dikumikanga e nkutakani yawonso. Mpangi Melissa ona wasansilwa muna ludi kwa ngudi andi, wavova vo: “Kina ye mvovo ko mu songa  luyangalalu lwame kwa ampangi ana bakala se mase kwa mono mu mvu miami miawonso. Oyau batokanenanga e wete diame yo kala yame kumosi. Konso ntangwa yazolanga mokena, oyau bakubama bakalanga muna kungwa.” Mpangi Maurício una vo nleke, wamona kinsona vava nlongi andi a Bibila kayoya muna mwanda, wavova vo: “Akuluntu basonga vo wete diame batokanenanga, ediadi diankasakesa kikilu. Bamokenanga yame ntangwa zawonso. Bavaikanga yame mpe muna salu kia umbangi yo kunzayisa e mambu mamfunu mana balongokanga muna longi diau dia Bibila ye bambokelanga muna nsaka zau.” O unu, mpangi Melissa yo mpangi Maurício besadilanga Yave muna salu kia ntangwa ke ntangwa, i sia vo, kuna Betele.

16-17. Adieyi diaka tulenda vanga muna sadisa akaka?

¹⁶ Vanga diambu muna sadisa akaka. (Ngal. 6:10) Mpangi Leo ona osalanga se misionario ye wasisa e yitu yandi, wavova vo: “Nkumbu miayingi, e diambu ditoma kungiangidikanga i vava mpangi mosi kekumpananga lusadisu luna vuidi o mfunu muna ola yayina. Isungamenanga e lumbu kina yavanga e sumbula kia kalu. Vava yalwaka kuna nzo, yayoya kikilu yakala. Kansi, akazi mosi bambokela mu kwenda dila kuna nzo au. Kisungamenanga madia twadia ko, kansi kivilakananga ko e mpila bansila e sungididi ekolo twamokenanga. Kuna kwalanda, o ntim’ame wavuvama.”

¹⁷ Yeto awonso tuzolanga tukutakanu twampwena nze twa zunga ye twa mvivu. Muna kolo kiokio tulenda kala kumosi ye ampangi yo mokenena mana tulongokele muna tukutakanu. Kansi, tala dina mpangi Carol ona tuyikidi kala kavova: “Muna tukutakanu twa zunga ye twa mvivu, kolo kiampasi kikilu kiakalanga kwa mono.” Ekuma? “Dialudi vo yazungwanga kwa mafunda ye mafunda ma ampangi, kansi omona e mpangi zazi kumosi ye esi nzo zau, diampasi kikilu diakalanga kwa mono. Eyayi i ntangwa yatoma monanga kinsona.” Avo i akaka diampasi kikilu dikalanga muna kwenda mu tukutakanu twatu kuna nima fwilwa yakala yovo nkento. Nga ozeye mpangi onuananga ye diambu diadi? Adieyi obenze nga olenda bokelesa e mpangi ndioyo mu kwenda yandi kumosi kuna lukutakanu lwa zunga yovo lwa mvivu?

18. Aweyi tulenda sadila e sono kia 2 Korinto 6:11-13, muna songa o zola kwa nzenza?

 ¹⁸ Vaulanga e ntangwa mu kala yau kumosi. Vaulanga e ntangwa mu kala kumosi ye mpangi zaswaswana, mu sungula awana bemonanga kinsona. Tuzolele kikilu “ziula e ntima [mieto]” mu sungula kwa mpangi zazi. (Tanga 2 Korinto 6:11-13.) Mpangi Melissa ona tuyikidi kala, osungamenanga vo: “Twatoma yangalalanga vava ampangi batubokelanga mu kwenda kuna nzo au yovo vanga e nkangalu kumosi muna lumbu ya vundu.” Nga osungamene mpangi mosi muna nkutakani aku ona olenda songa o zola kwa mpila yayi?

19. Nkia ntangwa yambote tufwete kalanga kumosi ye mpangi zeto?

¹⁹ Vekala kaka ye ntangwa ina e mpangi zeto bemona o mfunu wakala yeto vamosi. Kasikil’owu, dilenda kala diampasi kwa akaka mu kala vamosi ye yitu yau ana bena vo ke Mbangi za Yave ko ekolo bekembelelanga e nkinzi mia nza yayi. Avo i akaka, balenda kendalala muna lumbu kina o muntu batoma zolanga kafwa. Tusonganga vo tutokanenanga e wete dia mpangi zeto vava tukalanga yau vamosi muna kolo kiaki kiampasi.—Fili. 2:20.

20. Aweyi e mvovo mia Yesu muna Matai 12:48-50, milenda kutusadisila vava tumonanga kinsona?

²⁰ Nze una tulongokele, vena ye kuma yayingi ifilanga o Nkristu mu mona kinsona e zak’e ntangwa. Kansi, ke tulendi vilakananga ko vo Yave otoma bakulanga una tumonanga muna ntima. Vana ntandu, nkumbu miayingi osadilanga e mpangi zeto zakwikizi muna kutuvana lusadisu tuvuidi o mfunu. (Tanga Matai 12:48-50.) Muna songa kwa Yave vo tuvutulanga matondo mu kuma kia nkutakani, tuzolele vanga mawonso tulenda muna sadisanga mpangi zeto. Kiakala nkia mpila omonanga, kala ye ziku vo kuna ngeye mosi ko. O Yave okwamanana kala kuna sambu diaku.