1. Adieyi Yave kavanga kwa konso muntu mu yeto?

YAVE watunta konso muntu mu yeto muna nkutakani andi. (Yoa. 6:44) Yindula e nsas’a diambu diadi. Ekolo Yave kafimpanga mafunda ye mafunda ma wantu omu nza yayi, wamona diambu diamfunu muna ngeye, i sia vo, wamona o zola wakala kwau muna ntima mu kuma kiandi. (1 Tus. 28:9) Yave otomene kuzaya, okubakulanga ye okuzolanga. Ozaya e diambu diadi, dialukasakeso kikilu.

2. Aweyi Yesu katusadisila mu bakula una Yave ketokanenanga e wete dia konso muntu mu yeto?

² Yave otoma tokanenanga e wete diaku ye otokanenanga mpe e wete dia mpangi zaku zawonso za Akristu. Muna kutusadisa twabakula e diambu diadi, Yesu watezanesa Yave yo mvungudi. Adieyi o mvungudi kevanga avo meme dimosi divididi vana vena 100 mameme? “Osisa 99 vana miongo yo kwenda vavi dina divididi.” Avo mvungudi osolwele e meme divididi, ke fungila dio makasi ko. Kansi, otoma yangalala. Adieyi tulongokele muna nona kiaki? Tulongokele vo, konso meme mfunu dina kwa Yave. Yesu wavova vo: “Ke luzolo lwa Se diame ko una kuna zulu vo vavila kana nkutu mosi mun’awaya andwelo.”—Mat. 18:12-14.

3. Nkia mambu tulongoka mu longi diadi?

³ Ke tuzolele vanga diambu ko dina dikendeleka yovo yoyesa mpangi zeto. Ozevo, aweyi tulenda vengela tesesela akaka e sakuba? Adieyi tulenda vanga avo mpangi mosi utukendelekele? E longi diadi, divana e mvutu za yuvu yayi. Kansi entete, yambula twazaya kana aki nani beyikilwanga vo “awaya andwelo” muna Matai kapu kia 18.

4. Aki nani beyikilwanga vo “awaya andwelo”?

⁴ “Awaya andwelo” i alongoki a Yesu a ntela zawonso. Yau  awonso, bena “nze yingiana-ngiana,” kadi bezolanga longwa kwa Yesu. (Mat. 18:3) Kana una vo baswaswana muna nsi, fu ya kinsi nsi, mpila bebadikilanga mambu ye kiwutu kiau, yau awonso bekwikilanga muna Kristu. Muna kuma kiaki, Kristu otoma kubazolanga.—Mat. 18:6; Yoa. 1:12.

5. Aweyi Yave kemonanga vava muntu kekendelekanga mosi muna selo yandi yovo kuntesesa sakuba?

⁵ “Awaya andwelo,” mfunu kikilu bena kuna kwa Yave. Muna bakula una Yave kemonanga, yindula una yeto tumonanga mu kuma kia yingiana-ngiana. Oyau mfunu kikilu bena kwa yeto. Tuzolanga kubatanina kadi tuzeye wo vo ke bena yo nkuma ko, ke bazeye mambu mayingi ko muna zingu ye ke bena ye ngangu ko nze ambuta. Dialudi vo, tukendalalanga vava tumonanga muntu obangikanga o nkwandi. Kansi, tutoma kendalalanga yo funga makasi mu sungula vava tumonanga muntu obangikanga kingiana-ngiana. Diau dimosi mpe, Yave ozolele kututanina. Okendalalanga yovo funga makasi vava muntu ketesesanga nkangu andi sakuba.—Yes. 63:9; Maku 9:42.

6. Landila e sono kia 1 Korinto 1:26-29, aweyi o wantu a nza bebadikilanga alongoki a Yesu?

⁶ Nkia mpila yankaka alongoki a Yesu beyikilwanga vo “awaya andwelo?” Aki nani o wantu a nza bebadikilanga vo mfunu bena? Amvuama, akwa tunda ye akwa wisa. Kiaki i kuma kifilanga o wantu a nza mu badikila alongoki a Yesu, i sia vo, “awaya andwelo” vo ke bena mfunu ko. (Tanga 1 Korinto 1:26-29.) Kansi o Yave, ke wau ko kekubabadikilanga.

7. Aweyi Yave kazolele vo twabadikilanga mpangi zeto?

⁷ Yave ozolanga selo yandi yawonso, kiakala vo se mvu miayingi bekunsadilanga yovo ve. Mpangi zeto zawonso mfunu bena kwa Yave. Muna kuma kiaki, mfunu mpe bena kwa yeto. Tufwete zolanga “kintwadi kia wana-ngudi awonso” lembi sia mpambula. (1 Pet. 2:17, mvovo vana yanda.) Tufwete vanga mawonso tulenda muna kubatanina yo kubalunga-lunga. Avo tubakwidi vo mpangi mosi tukendelekele yovo tutesese e sakuba, ke tufwete veza diambu diadi ko yo yindula vo o mpangi ndioyo kafwete kutuloloka yo vilakana e diambu diadi. Nki kifilanga mpangi zankaka mu kendalala? Nanga mu kuma kia mpila basansukila, mpangi zankaka bemonanga vo ke bena mfunu ko. Akaka wantu ampa muna ludi, ke bazeye ntete ko una balenda lolokela e mpilakanu za wantu. Kiakala nkia kuma kikubafilanga mu kendalala, oyeto tufwete vanga mawonso tulenda muna vutulwisa luvuvamu. Kuna diak’e sambu, o mpangi ona ofunganga makasi mu nzaki, kafwete dio sungamena vo e kiaki ke fu kiambote ko, kafwete vanga e ngolo mu soba. Avo sobele e fu kiaki, okala ye kiese ye ngwizani ambote ye mpangi zankaka.

8. Nkia fu o wantu basonganga muna lumbu ya Yesu kiasambukila alongoki andi?

⁸ Ekuma Yesu kasadila e mvovo, “awaya andwelo”? Kadi alongoki andi banyuvula e kiuvu eki: “Nani kieleka osundidi o nene muna Kintinu kia zulu?” (Mat. 18:1) Ayuda ayingi muna lumbu ya Yesu, bafilanga wantu ankaka mu kubabadikila vo yau basunda o mfunu. Nkwa ngangu mosi wavova vo: “Otambula o nkembo yo kala nkwa tunda, i diambu diasundanga o mfunu muna zingu kia Ayuda.”

9. Alongoki a Yesu nkia diambu bafwana o vanga?

⁹ Yesu wazaya wo vo Ayuda ayingi bayindulanga vo basundidi akaka. Muna kuma kiaki, diavavanga vo alongoki andi basia e ngolo mu katula muna ntima miau e fu kiaki kia Ayuda. Wabavovesa vo: “Ndiona una vo wanene vana kati kweno, yambula kakituka se nleke, ndiona ovitanga o ntu, kakala nze ndiona  osadilanga akaka.” (Luka 22:26) Tusonganga vo tu aleke, vava ‘tubadikilanga ankaka vo batusundidi.’ (Fili. 2:3) Avo tutomene yima e fu kiaki, diampasi dikala mu kendeleka akaka yovo kubatesesa e sakuba.

10. Nkia luludiku lwa Paulu tufwete lemvokela?

¹⁰ Konso mpangi muna nkutakani, utusundidi muna diambu dimosi yovo diankaka. Diasazu mu bakula e diambu diadi, avo tusidi e sungididi muna fu yambote ya mpangi zeto. Muna kuma kiaki, tuzolele lemvokela luludiku luna Paulu wa ntumwa kavana kwa esi Korinto: “Nani usidi nswaswani ye ankaka? Nkia lekwa una kiau kina walembi tambula? Avo tambula watambula kio, ekuma okuyisanina nze kiau walembi tambula?” (1 Kor. 4:7) Muna kuma kiaki, ke tuzolele nkutu sivikisa akaka ko yovo kubafila batubadikila vo yeto tubasundidi. Kasikil’owu, mpangi ayakala una vo mpovi ambote yovo mpangi ankento una ye alongoki ayingi a Bibila bafwete vananga o nkembo kwa Yave muna mawonso bevanganga.

11. Adieyi Yesu katulonga muna nona kia ntinu yo ntaudi andi?

¹¹ Ke vavioka kolo ko vava Yesu kalukisa alandi andi mu lembi tesesa akaka sakuba, wayika nona kia ntinu yo ntaudi andi. O ntinu wayambulwila e mfuka yayingi kakala yau o ntaudi andi. Kansi, kuna kwalanda, o ntaudi ndioyo kazola yambulwila ko e mfuka yakete o nkwandi ntaudi kakala yau. I bosi, vava o ntinu kazaya wo wasia ntaudi ndioyo wakondwa e nkenda muna pelezo. Nkia diambu tulenda longoka muna nona kiaki? Yesu wavova vo: “O Se diame una kuna zulu i wau mpe kevanga kwa konso muntu mu yeno ona olembi loloka mpangi andi muna ntima.”—Mat. 18:21-35.

12. Adieyi dilenda vangama avo ke tuzolele loloka mpangi zeto ko?

¹² E vangu dia ntaudi ndioyo ke diakendeleka kaka nkwandi ntaudi ko ona wandia e mfuka, kansi diakendeleka mpe akaka. Entete, wakendeleka o nkwandi ntaudi muna “kunsia muna pelezo yavana kefuta e mfuka.” Diazole, wakendeleka mpe akwandi ntaudi ana bamona dina diavangama. Vava “akwandi ntaudi bamwene mana mavangamene, bakendalele kikilu.” Diau dimosi mpe, o mavangu meto malenda kendeleka akaka. Avo mpangi mosi utuvangidi diambu diambi ye ke tuzolele kunloloka ko, adieyi divangama? Diantete, tukunkendeleka wau ke tuzolele kunloloka ko, muna kumveza yo lembi kunsonga o zola. Diazole, tukendeleka mpe mpangi zankaka muna nkutakani vava bezaya vo ke tuna ye ngwizani yambote ko yo mpangi ndioyo.

13. Adieyi tulongokele muna nona kia mviti a nzila mosi?

¹³ Vava tulolokanga mpangi zeto, yeto kibeni tukala mu luvuvamu ye tusadisa mpe mpangi zankaka bakala mu luvuvamu. I diau diavangama kwa mviti a nzila mosi tuyikila muna nkumbu a Kristina. Mpangi mosi wankento muna nkutakani, wankendeleka. Mpangi Kristina wavova vo: “Ezak’e ntangwa e mvovo mia mpangi ndioyo miandwekanga nze yandi wansukanga e mbele muna ntima. Kiazolanga nkutu vaika yandi ko muna salu kia umbangi. Muna kuma kiaki, yayantika kulula e kiese kiame yo vema muna salu kia umbangi.” Mpangi Kristina wayindulanga vo kuma kiasikila kakala kiau mu funga makasi. Kansi, mpangi Kristina kakwamanana fungila mpangi ndioyo makasi ko. Wasonga lulembamu yo sadila luludiku lwa Bibila kasolola muna Eyingidilu dia 15 dia Okutoba, 1999 muna longi dina yo ntu a diambu vo “Perdoe de coração.” Muna kuma kiaki, waloloka mpangi andi. Mpangi Kristina  wavova vo: “Owau ibakulanga vo yeto awonso muna nkutakani, ngolo tusianga muna soba e fu yeto. O Yave mpe wakubama kekalanga muna kutuloloka e lumbu yawonso. Imonanga nze mono yakatulwa e zitu yakala diau vana mavembo. Yavutukila e kiese kiame.”

14. (a) Mun’owu wa sono kia Matai 18:21, 22, nkia diambu diatokanesanga Petelo wa ntumwa? (b) Nki kilenda kutusadisa avo diambu diadi mpe tunuananga diau?

¹⁴ Tuzeye wo vo tufwete lolokanga mpangi zeto, kadi ediadi i diambu diambote tufwete vanga. Kansi, ke diasazu ko mu vanga dio. Ezak’e ntangwa, i wau mpe Petelo wa ntumwa kamonanga. (Tanga Matai 18:21, 22.) Ozevo, nki kilenda kutusadisa mu loloka akaka? Diantete, badikanga una Yave kekulolokelanga. (Mat. 18:32, 33) Kana una vo ke tufwanukini lolokwa ko, Yave okutulolokanga kuna mvevo wawonso. (Nku. 103:8-10) Ozevo, “oyeto mpe tufwete zolananga.” Muna kuma kiaki, twazola yovo lembi wo zola, tufwete lolokanga e mpangi zeto. Disongele vo mfuka tuna yau ya lolokanga e mpangi zeto. (1 Yoa. 4:11) Diazole, badikanga e nluta tuvuanga vava tulolokanga e mpangi zeto. Tulenda sadisa o mpangi utukendelekele, e nkutakani ikala mu luvuvamu, tutanina e ngwizani eto yo Yave yo katula e zitu muna mavembo meto. (2 Kor. 2:7; Kol. 3:14) Diatatu, samba kwa Yave ona okutulombanga vo twalolokanga akaka. Kuyambula ko vo Satana kafwasa e ngwizani ambote una yau ye mpangi zaku muna nkutakani. (Efe. 4:26, 27) Kieleka, muna lusadisu lwa Yave ke tuyambula ko vo twabwa muna ntambu wau wa Satana.

15. Mun’owu wa Kolosai 3:13, adieyi ofwete vanga avo mpangi mosi ovovele diambu dilwekele?

¹⁵ Adieyi tuvova avo mpangi mosi muna nkutakani ovovele diambu dilwekele? Adieyi ovanga? Vanga mawonso olenda muna siamisa o luvuvamu yo mpangi aku. Samba kwa  Yave yo kunzayisa una omonanga muna ntima. Samba kwa Yave kasambula o mpangi uvangidi diambu diambi yo kusadisa mu sia e sungididi muna fu yandi yambote, i sia vo, fu ina Yave ketoma yangalelanga muna mpangi ndioyo. (Luka 6:28) Avo mwene vo kulenda vilakana ko dina mpangi kavangidi, yindula e mpila yambote olenda mokenena yandi. Ntangwa zawonso, diambote mu yindulanga vo o mpangi kakedi ye kani diakukendeleka ko. (Mat. 5:23, 24; 1 Kor. 13:7) Vava omokena yandi, sungamena e diambu diadi. Adieyi tuvova avo mpangi ndioyo kazolele vutulwisa luvuvamu ko? Kwamanana songa luzindalalu kwa mpangi aku. (Tanga Kolosai 3:13.) Edi disundidi o mfunu, kulundila mpangi aku makasi ko muna ntima, kadi ediadi dilenda fwasa e ngwizani aku yo Yave. Kuyambula ko vo konso diambu diatesesa e sakuba. Muna vanga wo, osonga vo o zola kwaku muna Yave kusundidi ke mu diambu diankaka ko.—Nku. 119:165.

16. Nkia mbebe konso muntu muna yeto kena yau?

¹⁶ Lau diampwena kikilu tuna diau dia sadila Yave entwadi ye mpangi zeto se “kambi dimosi, mvungudi mosi.” (Yoa. 10:16) O nkanda Organizados para Fazer a Vontade de Jeová, muna lukaya lwa 165, usasilanga vo: “Wau vo ovuanga e nluta mia kintwadi kiaki, mbebe una yau ya siamisa kio.” Muna kuma kiaki, “tufwete longoka badikilanga mpangi zeto wauna Yave kekubabadikilanga.” Kuna kwa Yave, yeto awonso mfunu twina. Nga i wau mpe obadikilanga e mpangi zaku? Yave omonanga yo yangalela mawonso tuvanganga muna sadisa e mpangi zeto yo kubalunga-lunga.—Mat. 10:42.

17. Nkia kani tuna diau?

¹⁷ Tuzolanga e mpangi zeto. Muna kuma kiaki, tuna ye “kani dialembi sia sakuba ngatu nkaku vana vena mpangi” zeto. (Roma 14:13) Tuzolele badikila mpangi zeto vo batusundidi ye tuzolele kubaloloka muna ntima. Ke tuzolele ko vo mpangi zeto batutesesa e sakuba yovo kutukendeleka. Muna kuma kiaki, “yambula twatatidila mambu metwasanga luvuvamu yo kasakesa muntu yo nkwandi.”—Roma 14:19.