1. Nkia diambu alongoki a Yesu bavovesa kwa ndong’ayingi?

VAKALA ye ndong’ayingi ya akala ye akento batuka muna nsi zankaka ye bavovanga ndinga zaswaswana bakutakana muna Yerusaleme. Muna lumbu kiakina diambu diasivi diavangama. Vana vau buka kia alongoki a Yesu bakala vo Ayuda bayantika vova e ndinga za kingutukila za ndonga yayina. Ediadi diasivikisa kibeni ndonga yayi. Kansi, e diambu diasunda kubasivikisa i dina alongoki ye Petelo wa ntumwa babavovesa. Balongoka vo, muna vuluzwa bafwete songa lukwikilu muna Yesu Kristu. Ediadi diasimba kikilu e ntima miau. Muna kuma kiaki, bayuvula vo: “Adieyi tufwete vanga?” Petelo wabavutula vo: ‘Yambula konso muntu mu yeno kavubwa.’—Mav. 2:37, 38.

2. Nkia mambu tulongoka mu longi diadi? (Tala e foto dia fukwa.)

² Kuna kwalanda, vavangama diambu dimosi diasivi. Muna lumbu kiakina, tezo kia 3.000 ma wantu bavubwa yo kituka se alongoki a Kristu. O lwalu i lubantiku lwa salu kiampwena kina Yesu kavovesa alandi andi vo basala, i sia vo, kitula wantu se alongoki. Yamu wau, alandi a Yesu bekukivananga emvimba mu salu kiaki. Omu lumbu yeto, ke dilendakana ko mu longoka yo muntu mu ola zakete kaka yo vubwa. Muna sadisa muntu kavubwa, tulenda vanga ngonde zayingi, mvu mosi yovo vioka. Avo muntu olongokanga yandi e Bibila, ozeye wo vo ngolo divavanga mu kitula muntu se nlongoki a Kristu. Mu longi diadi, tulongoka dina olenda vanga mu sadisa nlongoki aku a Bibila kanungunuka yamuna luvubu.

3. Mun’owu wa sono kia Matai 28:19, 20, nkia diambu o nlongoki kafwete vanga vitila kavubwa?

³ Vitila kavubwa, o nlongoki a Bibila kafwete sadilanga  mana kelongokanga muna Bibila. (Tanga Matai 28:19, 20.) Vava nlongoki kesadilanga mana kelongokanga, okitukanga nze “nkwa ngangu” oyikwanga muna kingana kia Yesu, ona watoma tima yo tunga e nzo andi vana nsenzele. (Mat. 7:24, 25; Luka 6:47, 48) Aweyi tulenda sadisila nlongoki kasadilanga mana kelongokanga? Yambula twabadika mambu tatu.

4. Aweyi tulenda sadisila nlongoki kakwamanana vanga ngolo muna vubwa? (Tala mpe e babu, “ Sadisa Nlongoki aku Kayisila Makani ma Mwanda yo Lungisa Mo.”)

⁴ Sadisa nlongoki aku kayisila makani ma mwanda. Ekuma ofwete wo vangila? Badika e nona kiaki: Yindula vo nkangalu wandá ozolele vanga kia malu yovo mu mvelo. Avo ovangidi nkubika za ningama muna nzila ye kani dia tala fulu yambote, nze makululuka ma maza ye miongo ediadi dikusadisa walembi mona vo o nkangalu wandá. Diau dimosi mpe, vava o nlongoki kekuyisilanga makani ma mwanda kalenda lungisa mu kolo kiankufi, omona vo ke diampasi ko mu lungisa e kani dia vubwa. Muna sadisa o nlongoki aku kakwamanana nungunuka, sadila e babu kina yo ntu a diambu “Kani,” muna nkanda Zinga ye Kiese Yakwele Mvu! Kuna mfoko a konso longi, sadisa o nlongoki aku kabakula una e kani diadi dikunsadisila mu sadila mambu kalongokele. Avo kani diankaka una diau dina ozolele vo nlongoki aku kalungisa, soneka dio vana fulu kiasonama “Makani Mankaka.” Sadilanga e fintu fia diambu fiafi muna mokena yo nlongoki mu kuma kia makani mandi ma mwanda, kiakala makani ma kolo kiankufi yovo ma kolo kiandá.

5. Landila e sono kia Maku 10:17-22, nkia diambu Yesu kavovesa kwa toko dia mvuama vo kavanga? Ekuma?

⁵ Sadisa nlongoki aku kavanga nsobani muna zingu. (Tanga Maku 10:17-22.) Yesu wazaya wo vo diampasi diadi kala kwa toko dia mvuama mu teka mavua mandi mawonso. (Maku 10:23) Kana una vo i wau, Yesu wamvovesa vo  kavanga diambu diadi diampasi. Ekuma? Kadi Yesu wazola toko diadi. Ezak’e ntangwa, ke tukasakesanga nlongoki ko mu sadila mana kelongokanga, kadi tubanzanga vo e ntangwa ke yafwene ko mu vanga e nsobani. Dialudi vo ntangwa divavanga mu yambula e fu yambi yo vuata kiwuntu kiampa. (Kol. 3:9, 10) Kansi, avo tuvovele diambu diadi kuna lubantiku, disadisa nlongoki mu yantika vanga e nsobani tuka kuna lubantiku. Vava omokenenanga e diambu diadi yo nlongoki aku, osonganga vo wete diandi otokanenanga.—Nku. 141:5; Nga. 27:17.

6. Ekuma tufwete sadilanga yuvu ifila nlongoki mu songa ngindu zandi?

⁶ Sadilanga e yuvu ifila nlongoki mu vova dina keyindulanga mu kuma kia diambu nulongokanga. Kadi e yuvu ikusadisa mu zaya mana o nlongoki kabakwidi kala ye mana kekwikilanga. Avo okedi ye fu kiaki, diasazu dikala kwa ngeye mu mokena yo nlongoki aku mambu mana memonekanga vo mampasi kwa yandi. Muna nkanda Zinga ye Kiese Yakwele Mvu! muna ye yuvu ya mpila yayi. Muna bonga e nona, muna longi dia 04 muna ye kiuvu eki: “Muna ngindu zaku, aweyi Yave kemonanga vava osadilanga e nkumbu andi?” Muna longi dia 09 muna ye kiuvu eki: “Nkia mambu ozolele lomba muna sambu?” Kuna lubantiku, o nlongoki olenda zingila mu vana e mvutu muna yuvu ya mpila yayi. Kansi, olenda sadisa nlongoki aku kazaya e ngwizani ina muna sono ye mafoto yovo fwaniswa ina muna longi.

7. Aweyi tulenda sadila tusansu twa zingu kia wantu mu sadisa nlongoki?

⁷ Vava o nlongoki kebakula e mambu kafwete soba muna zingu kiandi, sadila lusansu lwa zingu kia wantu muna kunkasakesa kavanga wo. Muna bonga e nona, avo nlongoki aku nkakalakani kena zau mu lungana muna tukutakanu, olenda kunsonga e video, Yave Okundunga-Ndunganga, ina vana fintu fia diambu “Tala mpe Oma Malende” muna longi dia 14. Muna malongi mayingi ma nkanda Zinga ye Kiese Yakwele Mvu! osolola tusansu twa zingu kia wantu vana ntu mia mambu “Zaya Diaka Mankaka” ye “Tala mpe Oma Malende.” * Venga e fu kiatezanesa nlongoki aku yo wantu ankaka muna kumvovesa vo: “Avo yandi walenda wo vanga, ongeye mpe olenda wo vanga.” Yambula yandi kibeni kabakula diambu diadi. E diambu olenda vanga i vovela mambu mamfunu masadisa o muntu oyikilu muna video mu sadila malongi ma Bibila muna zingu kiandi. Olenda yika sono yovo diambu diasikididi o muntu kavanga. Diambote mpe mu yika e mpila ina Yave kasadisila muntu ndioyo.

8. Aweyi olenda sadisila nlongoki aku kazola Yave?

⁸ Sadisa nlongoki aku kazola Yave. Aweyi olenda wo vangila? Sadilanga konso lau muna yikanga e fu ya Yave. Sadisa nlongoki aku kazaya vo Yave i Nzambi a kiese ona osadisanga awana bekunzolanga. (1 Tim. 1:11; Ayib. 11:6) Songa kwa nlongoki vo osadila malongi ma Bibila nluta kaka ditwasanga, e nluta miami i ziku kisonganga vo Yave okunzolanga. (Yes. 48:17, 18) Ekolo nlongoki kesiamisanga o zola kwandi muna Yave, ediadi dikunsadisa mu vanga nsobani muna zingu.—1 Yoa. 5:3.

9. Landila e sono kia Maku 10:29, 30, nki kilenda sadisa nlongoki mu vanga nsobani zampwena yo vubwa?

⁹ Muna nungunuka yamuna luvubu, o nlongoki a Bibila kafwete vanga nsobani zampwena.  Nze mvuama ona oyikilu kala, divavanga vo alongoki akaka babembola maka mambu. Avo salu besalanga ke kina ngwizani ko ye nkanikinu mia Bibila, nanga divava vo basala salu kiankaka. Divavanga mpe vo alongoki akaka bayambula akundi ana ke bezolanga Yave ko. Alongoki akaka babembolwa kwa yitu yau ana ke bezolanga Mbangi za Yave ko. Yesu wazaya wo vo diampasi dikalanga kwa wantu ankaka mu vanga nsobani zazi zampwena. Kansi, wasia nsilu vo awana bekunlandanga ke befusulwiswa nsoni ko. Besambulwa muna tambula mase ye mpangi zayingi akwa zola muna nkutakani. (Tanga Maku 10:29, 30.) Aweyi olenda sadisila nlongoki aku mu vua nsambu zazi?

10. Nkia diambu olongokele muna nona kia mpangi Manuel?

¹⁰ Vanga kikundi yo nlongoki aku. Diamfunu mu songanga kwa nlongoki aku vo otokanenanga e wete diandi. Ekuma? Tala nona kia mpangi Manuel ona ozingilanga kuna México. Vava kasungamena e ntangwa ina kakala nlongoki a Bibila, wavova vo: “Vitila twayantika longoka, o nlongi ame wayuvulanga mavimpi mame. Ediadi diansadisanga mu kala wavuvama yo kunzayisa konso diambu. Yamonanga vo wete diame kikilu katokanenanga.”

11. Ekuma dinina diambote twaviokesanga e ntangwa ye alongoki eto?

¹¹ Viokesanga e ntangwa kumosi ye alongoki aku wauna Yesu kaviokeselanga e ntangwa ye alandi andi. (Yoa. 3:22) Avo dilendakana, bokelanga nlongoki aku a Bibila ona onungunukanga mu dia yaku kuna nzo yovo tala entwadi e programa ya TV ya Mbangi za Yave. Diambote mpe dikala avo umbokele muna lumbu ina yitu ye akundi andi bekembelanga nkinzi mia mabundu maluvunu, kadi olenda mona kinsona. Mpangi Kazibwe ozingilanga kuna Uganda wavova vo: “Mayingi yalongoka mu kuma kia Yave vava yalongoka e Bibila ye nlongi ame, kansi mayingi mpe yalongoka vava yaviokesanga yandi e ntangwa. Yamona una Yave  kelunga-lungilanga nkangu andi ye una nkangu andi benena akwa kiese. Mono mpe yazola kala ye kiese kiaki.”

12. Ekuma tufwete natinanga ateleki aswaswana vava tukwenda longokanga yo nlongoki?

¹² Natanga ateleki aswaswana vava okwenda longokanga yo nlongoki aku. Ezak’e ntangwa, tulenda mona vo diambote twenda yeto mosi yovo kwenda ye ateleki ana kakulukila. Ediadi dilenda kala diambote, kansi avo tunete ateleki aswaswana, tusadisa nlongoki eto mu baka nluta miayingi. Mpangi Dmitrii ozingilanga kuna Moldávia wavova vo: “Konso nteleki kayizanga yandi o nlongi ame, wakala ye mpila yaswswana yasasila e mambu. Ediadi diansadisa mu bakula e mpila yankaka ndenda sadila mana yalongokanga. Ediadi diansadisa mpe mu lembi kala ye nsoni vava yayenda mu lukutakanu mu nkumbu antete, kadi ayingi muna mpangi bakala muna lukutakanu yateka kubazaya.”

13. Ekuma tufwete sadisila nlongoki eto kalungananga muna tukutakanu?

¹³ Sadisa nlongoki aku kalungananga muna tukutakanu. Ekuma? Kadi Yave wakanikina asambidi andi vo balungananga. Ediadi i dimosi muna mambu mevavuanga muna nsambil’eto. (Ayib. 10:24, 25) Vana ntandu, ampangi muna nkutakani bena se yitu yeto muna mwanda. Ozevo, vava tukalanga yau kumosi muna tukutakanu, tumonanga nze yeto tuvuende mu nzo yo dia madia mambote kumosi. Avo osadisi nlongoki aku a Bibila kendanga muna tukutakanu, zaya dio vo mu kunsadisa wina mu vanga diambu diamfunu dikumfila mu vubwa. Kansi, dilenda kala diampasi kwa yandi mu yantika kwenda muna tukutakanu. Aweyi nkanda Zinga ye Kiese Yakwele Mvu! ulenda sadisila nlongoki aku mu sunda nkakalakani zazi?

14. Aweyi tulenda kasakesela nlongoki eto kendanga muna tukutakanu?

¹⁴ Olenda sadila longi dia 10 dina muna nkanda Zinga ye Kiese Yakwele Mvu! mu kasakesa nlongoki aku. Vitila nkanda wau wasunzulwa, akaka muna ateleki balombwa vo basadila e longi diadi mu kasakesa alongoki au. Ateleki awaya bavova vo, e longi diadi diasadisa alongoki mu yantika kwenda muna tukutakanu. Dialudi vo ke tufwete vingila ko vo nlongoki kalwaka muna longi dia 10, i bosi tukumbokelesa muna tukutakanu. Tufwete kumbokelesa kuna lubantiku yo vanganga wo ntangwa zawonso. Konso nlongoki a Bibila onuananga ye mambu maswaswana. Ozevo, sianga e sungididi muna nsatu za nlongoki aku yo zaya una olenda kunsadisila. Avo katambulwidi ko e mbok’aku vana vau, kuyoyi ko. Songa luzindalalu yo kwamanana kumbokelesa.

15. Nkia mambu o nlongoki kalenda mwena o wonga?

¹⁵ Nga wonga wamona muna kituka Mbangi a Yave? Nanga wayindulanga vo kusinga lenda sila umbangi mu nzo ke nzo ko. Dilenda kala mpe vo wonga wamona wasiwa kitantu kwa yitu ye akundi aku. Avo i wau wamona, olenda bakula mpe una nlongoki aku a Bibila kemonanga. Yesu wazaya wo vo vekala yo wantu bemwena mambu mama o wonga. Kansi, wakasakesa alandi andi balembi yambula vo wonga wabakakidila mu sadila Yave. (Mat. 10:16, 17, 27, 28) Aweyi Yesu kasadisila alongoki andi basunda o wonga? Aweyi olenda tanginina e mbandu andi?

16. Aweyi olenda sadisila nlongoki aku kazayisanga kwa akaka mana kelongokanga?

¹⁶ Sadisa nlongoki aku kazayisanga kwa akaka mana kelongokanga. Vava Yesu katuma alongoki andi benda sila umbangi, nanga wonga bamona. Kansi, Yesu wabasadisa muna kubazayisa  e fulu besila umbangi ye nsangu besamuna. (Mat. 10:5-7) Aweyi olenda tanginina e mbandu a Yesu? Sadisa nlongoki aku kazaya o wantu kalenda sila umbangi. Muna bonga e nona, olenda kunyuvula: ‘Nga ozeye muntu olenda yangalela wá malongi mama ma Bibila?’ I bosi, unsadisa kazaya una kalenda zayisila malongi mama kwa akaka mu mpila yaleboka. Avo dilendakana, nulenda vanga nsongesela muna sadila e ntu mia mambu “Avo Muntu Uvovese Vo” ye “Avo Muntu Uyuvuidi Vo,” mina muna nkanda Zinga ye Kiese Yakwele Mvu! Ekolo nuvanganga e nsongesela, sadisa nlongoki aku kazaya una kalenda sadila e Bibila mu vana e mvutu zaleboka ye kuna ngemba.

17. Aweyi olenda sadila e sono kia Matai 10:19, 20, 29-31, mu sadisa nlongoki aku kabunda Yave e vuvu?

¹⁷ Sadisa nlongoki aku kabunda Yave e vuvu. Yesu wavovesa alongoki andi vo Yave watoma kubazolanga ye okubasadisa. (Tanga Matai 10:19, 20, 29-31.) Sungamesa nlongoki aku vo Yave mpe okunsadisa. Olenda sadisa nlongoki aku kabunda Yave e vuvu muna kunzayisanga muna sambu e makani ma mwanda kekuyisilanga. Mpangi Franciszek ozingilanga kuna Polônia wavova vo: “Nkumbu miayingi, o nlongi ame wayikanga makani mame ma mwanda muna sambu yandi. Vava yamona vo Yave wavananga e mvutu muna sambu ya nlongi ame, omono mpe yayantika samba. Yamona lusadisu lwa Yave vava yabaka e salu yo lomba vo muna lumbu ya tukutakanu twakete ye twampwena yalembi salanga.”

18. Aweyi Yave kemonanga mu kuma kia salu tusalanga kia longa o wantu?

¹⁸ Yave ovuanga alongoki eto a Bibila o mfunu. Oyangalelanga mpe e ngolo Akristu bevanganga mu sadisa wantu bamfinama ye otoma kubazolanga. (Yes. 52:7) Avo kuna ye nlongoki a Bibila ko, vaikanga ye ateleki ankaka. Muna mpila yayi, olenda sadisa nlongoki a Bibila kanungunuka yamuna luvubu.