Paulu wasoneka vo: “Muna nsiku mono yafwa muna nsiku, kimana yazinga mu kuma kia Nzambi.”—Ngal. 2:19.

Dina Paulu kasoneka, ngwizani diakala ye diambu diasina kasasilanga kwa ampangi muna nkutakani a Ngalatia kuna Roma. Akristu akaka muna nkutakani yayi bavukumunuanga kwa alongi aluvunu. Alongi awaya balonganga vo muna vuluzwa, o muntu kafwete lemvokela Nsiku a Mose, mu sungula nsiku mu kuma kia zengwa. Kansi, Paulu wazaya wo vo Nzambi kavavanga diaka ko vo Akristu bazengwa. Muna sadila e mvovo miami miakwikidisa, Paulu wasonga vo malongi mama maluvunu ye wakumika lukwikilu lwa ampangi muna kimenga kia lukûlu kia Yesu Kristu.—Ngal. 2:4; 5:2.

E Bibila kitoma kiesesanga vo o muntu avo ofwidi, ke zayanga diaka diambu ko. Ke vena diambu ko dilenda kumvanga e mbi. (Kim. 9:5) Ozevo, vava Paulu kavova vo: “Yafwa muna nsiku,” edi kazola vova vo, o Nsiku a Mose ke wakala diaka ye wisa ko muna yandi. Kieleka, Paulu wakala ye ziku vo lukwikilu lwandi muna lukûlu, i lwau lwansadisanga mu ‘zinga mu kuma kia Nzambi.’

E nsobani yayi yavangama kwa Paulu mu kuma kia “nsiku.” Mu nkia mpila? Paulu wasasila vo: “Muntu ke lungisilwanga muna mavangu ma nsiku ko, kansi muna lukwikilu muna Yesu Kristu kaka.” (Ngal. 2:16) Dialudi vo, o Nsiku diambu diamfunu walungisa. Paulu wasasila diambu diadi kwa esi Ngalatia, oku vo: “Wakudikilwa muna senzeka masumu yavana kikwiza e mbongo ina yasilwa nsilu.” (Ngal. 3:19) Kieleka, o Nsiku watoma dio kiesesanga vo o wantu alembi lunga ke balendi lemvokela Nsiku ko mu mpila yalunga. Kadi kimenga kialunga ye kiakwele mvu bavuanga o mfunu. Muna kuma kiaki, o Nsiku wasadisa nkangu mu bakula vo Kristu i “mbongo” ina yasilwa o nsilu. O muntu wakwikilanga muna Yesu Kristu wabadikilwa vo muntu ansongi vana meso ma Nzambi. (Ngal. 3:24) Paulu wabadikilwa vo muntu ansongi kadi mu kuma kia Nsiku, watambulwila Yesu yo kwikila muna yandi. Muna kuma kiaki, Paulu ‘wafwa muna nsiku’ yo ‘zinga mu kuma kia Nzambi.’ O Nsiku ke wakala diaka ye wisa ko muna Paulu, kansi Nzambi kaka.

Paulu wayika mpe e diambu diadi vava kasonekena ampangi kuna Roma. Wasoneka vo: “E mpangi zame, oyeno mpe nuafwa muna Nsiku muna nitu a Kristu . . . Tuvevuelo muna Nsiku, kadi twafwa muna Nsiku watusimba.” (Roma 7:4, 6) E sono kiaki ye sono kia Ngalatia 2:19, kisonganga vo Paulu kavovela lufwa lwa nsumuki ko ona otumbilu muna Nsiku. Kansi, luvevoko kavovela. O Nsiku ke wakala diaka ye wisa ko muna yandi ye muna Akristu akaka mpe nze yandi. Oyau bavevolwa mu kuma kia lukwikilu lwau muna kimenga kia Kristu.