Muna yangidika Yave, tufwete kala yo lukwikilu. Kansi, e Bibila kivovanga vo “ke wantu awonso ko bena yo lukwikilu.” (2 Tes. 3:2) Vava Paulu wa ntumwa kayika e mvovo miami, “akwa nsoki ye yimpumbulu” kavovela, i sia vo, awana bambangikanga. Kansi, dina kavova mu kuma kia lukwikilu ditadidi mpe wantu ankaka. Wantu ankaka ke bekwikilanga ko vo vena yo Nzambi ona wasema e lekwa yawonso. (Roma 1:20) Akaka bevovanga vo bekwikilanga muna Nzambi. Kansi o kwikila kaka muna Nzambi ke diafwana ko muna yangidika Yave.

Tufwete kalanga ye ziku vo Yave una kieleka ye “nsendi” a awana bena yo lukwikilu lwakieleka. (Ayib. 11:6) O lukwikilu i kimosi muna fu ya mbongo a mwanda. Muna kala ye mwand’avelela, divavanga vo twalombanga wo kwa Yave muna sambu. (Luka 11:9, 10, 13) E mpila yankaka tulenda vuila mwand’avelela i tanganga e Diambu dia Nzambi diavumunuinua. Diambote mpe twabadikanga muna mana tutanganga yo sadila mana tulongokanga. Avo tuvangidi mawonso mama, o mwand’avelela a Yave ufila e zingu kieto yo kutusadisa mu kala yo lukwikilu luyangidikanga Yave.