1. Adieyi bevavanga zaya mase vitila wan’au bavubwa?

“MU NGONDE zayingi yazayisanga Papa yo Mama vo nzolele vubwa. Nkumbu miayingi bamokenanga yame mu kuma kia diambu diadi. Bazola yabakula vo e nzengo za vubwa ke nzengo zakete ko. Kina kia 31 kia Desemba ya mvu wa 1934, e lumbu kiafwana mu lungisa e nzengo zazi zamfunu muna zingu kiame.” I diau mpangi Blossom Brandt Kavova vo diambwila vava kabaka e nzengo za vubwa. Diau dimosi mpe o unu, mase mayingi besadisanga wan’au mu baka e nzengo zambote. Avo mwana ozolele vingila mvu miayingi i bosi kevubwa lembi kala ye kuma kiasikila, ediadi dilenda fwasa kikundi kia mwan’au yo Yave. (Yakobo 4:17) Vitila mwan’au kavubwa, mase mangangu bevavanga zaya kana vo mwana wakubama kena muna kituka nlandi a Kristu.

2. (a) Nkia diambu bemonanga akengi ayingi a zunga? (b) Adieyi tuvovela mu longi diadi?

 ² Akengi ayingi a zunga bemonanga vo aleke ayingi ana bazolele lungisa kimbuta kia mvu 20 ke bavubilu ko yamu wau, kana nkutu ana basansukila muna ludi. Nkumbu miayingi, aleke awaya bekwendanga muna tukutakanu, muna salu kia umbangi yo kuyibadikila vo Mbangi za Yave. Kana una vo i wau, ke bayiyekwele ntete ko kwa Yave yo vubwa. Ezak’e ntangwa, ediadi divangamanga kadi mase beyindulanga vo wan’au ke balweke mu ntela ya vubwa ko. Mu longi diadi, tuvovela mambu yá mekakidilanga mase mankaka mu kasakesa wan’au mu baka e nzengo za vubwa.

3. Nkia diambu diatokanesanga mase ma mpangi Blossom?

³ Mase ma mpangi Blossom ona tuyikidi muna tini kiantete, batokananga kwayingi kana vo mwan’au walwaka mu ntela ya bakula o mfunu ye nsas’a luvubu. Aweyi mase balenda zayila kana vo mwan’au wakubama kena muna kukiyekola kwa Yave?

4. O nkanikinu a Yesu una muna Matai 28:19, 20 aweyi ulenda sadisila mase o unu?

⁴ Tanga Matai 28:19, 20. Nkand’a Nzambi ke uvovanga ko vo muntu kafwete lungisa mvu kingandi muna vubwa. Kansi, diambote mase batoma fimpa e nsas’a kitula wantu se alongoki. Muna Kingerekia, e mvovo ‘kitula wantu se alongoki’ miasadilwa muna Matai 28:19 misongele vo longa muntu ye kani dia kunsadisa kakituka nlongoki. O nlongoki i ndiona olongokanga yo bakula mana Yesu kalonga yo kala ye tima dia kunlemvokela. Muna kuma kiaki, mase bafwete longanga wan’au tuka muna kinsedia ye kani dia kubasadisa mu baka e nzengo za kukiyekola kwa Yave yo kituka nlongoki a Kristu. Dialudi vo mwana ona wakinu nsedia kalendi vubwa ko. Kana una vo i wau, Nkand’a Nzambi usonganga vo kana nkutu wan’akete balenda kwau bakula yo zola e ludi kia Nkand’a Nzambi.

5, 6. (a) Dina Nkand’a Nzambi uvovanga mu kuma kia Timoteo adieyi disonganga mu kuma kia luvubu lwandi? (b) Nkia mpila yambote mase balenda sadisila wan’au?

⁵ Timoteo wabaka e nzengo za sadila Yave tuka muna kileke kiandi. Paulu wa ntumwa wavova vo Timoteo wayantika longoka e ludi kia Diambu dia Nzambi tuka “muna kinsedia.” O se dia Timoteo kasambilanga Yave ko, kansi o ngudi yo nkak’andi bansadisa mu zola Diambu dia Nzambi. Muna kuma kiaki, Timoteo lukwikilu lwasikila kakala lwau. (2 Timoteo 1:5; 3:14, 15) Nanga tezo kia 20 ma mvu kakala vava kayifwanisa mu tambula malau ma salu muna nkutakani.—Mavangu 16:1-3.

⁶ Konso mwana waswaswana. Ke wana awonso ko bezikukanga muna mwanda mu ntela mosi. Wana ankaka bebakulanga e ludi, bebakanga nzengo zambote yo songa luzolo lwa vubwa ekolo bakinu wan’akete. Vo i akaka, bekuyifwanisanga muna luvubu vava bekituka matoko yovo ndumba. Mase mangangu ke bekomekenanga wan’au ko mu baka e nzengo za vubwa. Kansi, besadisanga konso mwana kimana kanungunuka muna mwanda mun’owu wa umbakuzi wandi. Mase beyangalalanga vava mwan’au kelungisanga e sono kia Ngana 27:11. (Tanga.) Mase bafwete sungamenanga vo e kani diau i sadisa wan’au mu kituka alongoki  a Kristu. Bafwete kukiyuvula: ‘Nga mwan’eto zayi wafwana kena wau muna kukiyekola kwa Nzambi yo vubwa?’

7. Nga o muntu kafwete zaya mawonso ma Nkand’a Nzambi vitila kavubwa? Sasila.

⁷ Vava mase belonganga wan’au, bafwete kubasadisanga batoma zaya e ludi. O zayi wau ufila wana mu baka e nzengo za kukiyekola kwa Nzambi. Kansi, ediadi ke disongele ko vo mwana kafwete zaya malongi mawonso ma Nkand’a Nzambi vitila kakiyekola kwa Nzambi yo vubwa. Alongoki awonso a Kristu bafwete kwamanana longoka kana nkutu vo bavubwa kala. (Tanga Kolosai 1:9, 10.) Ozevo, nkia tezo kia zayi kafwete kala wau o muntu vitila kavubwa?

8, 9. Adieyi diabwila nyingidi mosi a pelezo kuna mbanz’a Filipi? Adieyi tulenda longoka muna nona kiandi?

⁸ E nona kia esi nzo mosi kuna nz’ankulu kilenda sadisa mase o unu. (Mavangu 16:25-33) Muna mvu wa 50, Paulu wayenda kuna mbanz’a Filipi muna nkangalu andi wanzole wa salu kia kimisionario. Vava kakala muna mbanza yayi, yandi yo Sila bavuninua mambu, bakangwa yo siwa muna pelezo. Muna fuku, nzakam’a ntoto yaziula mielo miawonso mia pelezo. O nyingidi a pelezo wabanza vo abakami awonso batinini. Muna kuma kiaki, wazola kuyivonda. Kansi, Paulu wansima. I bosi, Paulu yo Sila balonga o nyingidi ndioyo ye esi nzo andi e ludi mu kuma kia Yesu. Bakwikila muna mambu bawá mu kuma kia Yesu yo bakula o mfunu wa kunlemvokela. Muna kuma kiaki, bavubwa vana vau. Adieyi tulenda longoka muna nona kia esi nzo yayi?

⁹ O nyingidi nanga kesa dia Roma kakala. Kakala yo zayi wa Diambu dia Nzambi ko. Muna kituka Nkristu, diavava vo kalongoka malongi masina ma Nkand’a Nzambi, kazaya mana Yave kevavanga kwa selo yandi yo lemvokela malongi ma Yesu. Mana kalongoka muna fikolo fiafina mansadisa mu baka e nzengo za vubwa. Ka lukatikisu ko vo nyingidi ndioyo wakwamanana longoka vava kavubwa. Muna kuma kiaki, avo mwan’aku uvovese vo luzolo lwa vubwa kena lwau wau vo Yave kezolanga yo kunlemvokela, adieyi ofwete vanga? Olenda kumvovesa vo kenda mokena ye akuluntu kimana bafimpa kana vo wafwana muna vubwa. * (Tala e mvovo vana yand’a lukaya.) Nze Akristu awonso ana bavubwa, o mwana okwamanana longoka oma ma Yave muna zingu kiandi kiawonso, kana nkutu vava kevua moyo a mvu ya mvu.—Roma 11:33, 34.

10, 11. (a) Adieyi mase mankaka beyindulanga? (b) Adieyi dilenda tanina o mwana?

¹⁰ Mase mankaka beyindulanga vo muna  vubwa o mwan’au kafwete fokola tanga sikola yo baka salu kiambote. Makani ma mase mama malenda kala mambote, kansi bafwete kukiyuvula: ‘Nga ediadi disadisa mwana mu kala ye kiese kiakieleka? Nga ngwizani dina ye mana tulongokanga muna Nkand’a Nzambi? Aweyi Yave kazolele twasadila e zingu kieto?’—Tanga Kimpovi 12:1.

¹¹ Diambote twasungamenanga vo e nza yayi ye lekwa ina mo ke ina ngwizani ko yo luzolo lwa Yave. (Yakobo 4:7, 8; 1 Yoane 2:15-17; 5:19) O kala ye ngwizani ambote yo Yave i diau dilenda tanina mwana muna lembi vukumunua kwa Satana, kwa nza keyalanga ye ngindu zambi za wantu. Avo mase basidi e sikola ye salu kiambote vana fulu kiantete muna zingu kiau, dilenda fila o mwan’au mu kwikila vo e lekwa ina ova nza yau isundidi o mfunu ke mu kala ye ngwizani ambote ko yo Yave. Ediadi diavonza kikilu. Mase manzodi, nga nuzolele kikilu vo e nza yalonga mwan’eno dina dilenda kuntwasila kiese kiakieleka? E mpila imosi kaka tulenda kadila ye kiese kiakieleka, i sia Yave vana fulu kiantete muna zingu kieto.—Tanga Nkunga 1:2, 3.

12. Ekuma mase mankaka bemwenanga vo diambote mwan’au kateka vingila muna vubwa?

¹² Ngudi mosi wayika e kuma kazolelanga ko vo mwan’andi ankento kavubwa. Wavova vo: “Nsoni ngina zau mu vova vo e kuma kiantete kiazolelanga ko vo mwan’ame kavubwa i diambu ditadidi vaikiswa muna nkutakani.” Nze mpangi ndioyo, mase mayingi bemonanga vo diambote o mwan’au kateka vingila yavana kekituka se mbuta i bosi kevubwa kimana kalembi vanga vilwa wampwena. (Etuku 8:21; Ngana 22:15) Mase mama nanga beyindulanga vo avo mwan’au kavubilu ko, kalendi vaikiswa ko mu nkutakani. Ekuma e ngindu zazi zinina zabendomoka?—Yakobo 1:22.

13. Avo mwana kavubilu ko, nga disongele vo ke nkwa kuma ko vana meso ma Yave? Sasila.

¹³ Dialudi vo mase ke bezolanga ko vo  mwan’au kavubwa vitila kalwaka mu ntela ya baka e nzengo za kukiyekola kwa Yave. Kansi, ke diambote ko mu yindula vo mwana ke fundiswa ko kwa Yave wau vo kavubilu ko. O mwana obadikilwanga vo nkwa kuma vana meso ma Yave vava keyantikanga zaya mana Yave kemwenanga vo mambote yovo mambi. (Tanga Yakobo 4:17.) Mase mangangu ke bekakidilanga wan’au ko mu baka e nzengo za vubwa. Tuka muna kinsedia, mase belonganga mwan’au kimana kazola mana Yave kebadikilanga vo mambote yo menga mana kebadikilanga vo mambi nze una yau mase bevanganga. (Luka 6:40) O zola kwa mwan’eno muna Yave kukuntanina mu lembi vola masumu mampwena kadi okala ye tima dia vanga mana Yave kebadikilanga vo mambote.—Yesaya 35:8.

14. Aweyi akuluntu balenda yikamena mana mase bevanganga?

¹⁴ Akuluntu balenda yikama dina mase bevanganga muna vovelanga kuna kiese kiawonso o mfunu wa kala ye makani muna salu kia Yave. Mpangi mosi ankento wasungamena dina mpangi Russell kamvovesa vava kakala ye kimbuta kia mvu sambanu. Wavova vo: “Miniti 15 kavanga muna mokena yame mu kuma kia makani mame ma mwanda.” Nkia nluta diatwasa? Kuna kwalanda, wakota muna salu kia kimviti a nzila yo sala e salu kiaki vioka 70 lwa mvu. Kieleka, e mvovo mia lukasakeso milenda soba emvimba zingu kia muntu. (Ngana 25:11) Akuluntu balenda mpe lomba kwa mase yo wan’au mu vana moko muna salu isalwanga muna Seka dia Kintinu. Balenda lomba kwa wan’akete basalanga e salu ina betela ye ntela ye umbakuzi wau.

15. Aweyi akaka muna nkutakani balenda sadisila aleke?

¹⁵ Aweyi akaka muna nkutakani balenda sadisila mase? Balenda wo vanga muna sianga e sungididi muna wan’akete. Kasikil’owu, sianga e sungididi muna ngolo bevanganga aleke mu siamisa e kikundi kiau yo Yave. Nga o nleke nkomena yambote kavene  muna lukutakanu? Nga otomene lungisa kiyekwa kiandi muna lukutakanu lwa kati kwa lumingu? Nga muntu kasididi umbangi kuna sikola? Nga nzengo zambote kabakidi vava katontelo mu vanga edi diambi? Avo i wau, unsanisina. Diambote twakalanga ye kani dia mokena y’aleke kuna lubantiku ye kuna mfoko a lukutakanu. Avo tuvangidi wo, aleke bemona vo mfunu bena “muna nkutakani.”—Nkunga 35:18.

16, 17. (a) Ekuma dinina diamfunu kwa wana mu baka e nzengo za vubwa? (b) Nkia kiese balenda kala kiau mase bena vo Akristu? (Tala e fwaniswa kuna lubantiku lwa longi.)

¹⁶ Dimosi muna malau bena mau mase i longa wan’au kimana bakala yo zola muna Yave. (Nkunga 127:3; Efeso 6:4) Kuna Isaele yankulu, o wana bayekolwanga kwa Yave muna lumbu kia luwutuku. Ke diau ko divangamanga kwa wan’eto. O kala ye mase bezolanga Yave ye ludi ke disongele ko vo wan’au mpe diau dimosi bevanga. Tuka muna lumbu kina mwana kawutukidi, mase bafwete kala ye kani dia kunsadisa kimana kakituka nlongoki, kakiyekola kwa Nzambi yo vubwa. Nga vena ye diambu diankaka disundidi o mfunu? Avo muntu obakidi nzengo za kukiyekola kwa Yave yo vubwa yo kwamanana kunsadila ye kwikizi kiawonso, dilenda kunsadisa kimana kavuluka muna kolo kia mpasi zayingi.—Matai 24:13.

¹⁷ Vava mpangi Blossom Brandt kabaka e nzengo za vubwa, mase mandi bavava zaya e ziku kana vo wakubama kakala. Vava bamona vo wafwana muna vubwa, bayikama e nzengo zandi. Mpangi Blossom wayika dina se diandi kavanga muna fuku wavitila lumbu kina kavubwa. Wavova vo: “O se dieto walomba kwa yeto awonso vo twafukama. I bosi, wasamba. Wavova kwa Yave vo kiese kiayingi kena kiau wau vo mwan’andi wa dumbelele obakidi nzengo za yekola zingu kiandi kwa yandi.” Una vavioka tezo kia mvu 60, mpangi Blossom wavova vo: “Edi ndenda kunuzayisa vo yavana ifwa, kisinga vilakana fuku wauna ko.” Mase, yeno mpe nulenda kala ye kiese kia mpila yayi vava numona wan’eno bekituka selo ya Yave yakiyekola yo vubwa.