Kuyambula ko vo Zola Kwaku Kwavola
“Muna kuma kia wokela kwa umpumbulu, o zola kwa wantu ayingi kuvola.”—MATAI 24:12.
NKUNGA: 60, 135
1, 2. (a) E mvovo mia Yesu mina muna Matai 24:12 kwa aki nani ntete misadilwanga? (b) Aweyi o nkand’a Mavangu usongelanga vo Akristu ayingi muna tandu kiantete bakwamanana wokesa o zola kwau? (Tala fwaniswa va ntandu.)
VAVA Yesu kakala ova ntoto, wayika una wantu badi zayila vo “mbaninu a tandu” ifinamene. Wasakula mpe vo: “O zola kwa wantu ayingi kuvola.” (Matai 24:3, 12) Ayuda muna tandu kiantete bavovanga vo yau i nkangu a Nzambi, kansi bayambula vo zola kwau muna Nzambi kwavola.
2 Kansi, Akristu ayingi muna tandu kiakina bakala baswaswana. Basamunanga “e nsangu zambote mu kuma kia Kristu” kuna vema kwawonso yo songa zola muna Nzambi ye mpangi zau Akristu. Basonganga mpe zola kw’awana ke bazaya ludi ko. Akristu awaya bakwamanana wokesa zola kwau muna Nzambi. (Mavangu 2:44-47; 5:42) Kansi, diankenda vo Akristu ankaka muna tandu kiantete bayambula vo zola kwau kwavola. Aweyi tuzayidi wo?
3. Adieyi diafila Akristu ankaka mu kulula zola kwau?
Lusengomono 2:4) Nanga Akristu awaya bavukumunua kw’awana bazinganga yau vamosi, ana bavavanga kaka wete dia yau kibeni. (Efeso 2:2, 3) Efeso mbanza ya kimvuama yakala. Wantu ana bazingilanga mo mavua ye zingu kiambote kaka batokanenanga ke mu mambu mankaka ko. Wantu ayingi bayivananga muna mavangu ma zumba ye ke bazitisanga nsiku mia Nzambi ko. Vana fulu kia songa zola kwa nsi a ntima muna Nzambi ye kw’akaka, wete dia yau kibeni kaka basianga vana fulu kiantete.
3 Yesu wavovesa Akristu ana bazingilanga muna mbanza Efeso vo: ‘Nwayambwidi o zola nwakala kwau kuna lubantiku.’ (4. (a) Yamu nkia tezo zola kuvolele o unu? (b) Mu nkia mambu tatu tufwete wokesela o zola kweto?
4 E mvovo mia Yesu mia sia vo zola kwa wantu ayingi kuvola milungananga mpe mu lumbu yeto. O unu, wantu ke bena diaka ye zola ko muna Nzambi. Vana fulu kia bunda e vuvu vo Nzambi osinga fokola e mpasi za nza, ayingi bebundanga e vuvu muna nkubika za wantu. O zola kwau mu vola kaka kwina. Kana nkutu o zola kwa selo ya Yave kulenda mpe vola nze una wavolela o zola wa Akristu muna nkutakani ya Efeso kuna tandu kiantete. Muna kuma kiaki, yambula twafimpa mambu tatu mevavanga vo twawokesa o zola kweto: (1) zola muna Yave, (2) zola muna ludi kia Nkand’a Nzambi ye (3) zola muna mpangi zeto.
ZOLA MUNA YAVE
5. Ekuma tufwete zolelanga Nzambi?
5 Nani tufwete luta zola? Yesu wavova vo: “‘Zola Yave wa Nzambi aku muna nsi a ntim’aku yawonso, muna kiwuntu kiaku kiawonso ye muna nyindu aku wawonso.’ I wau wuwu i nkanikinu anene, ye wantete mpe.” (Matai 22:37, 38) O zola kweto muna Nzambi kukutufilanga mu lemvokela e nkanikinu miandi, mu kala yo luzindalalu yo menga oma mambi. (Tanga Nkunga 97:10.) Kansi, Satana ye nz’andi bevavanga yoyesa yo fwasa zola kweto muna Nzambi.
6. Adieyi divangamanga vava wantu beyambulanga zola Nzambi?
6 Wantu a nza ngindu zabendomoka bena zau mu kuma kia zola. Vana fulu kia zola Nzambi, wantu ayingi bena vo “akwa kizola.” (2 Timoteo 3:2) Besianga sungididi kiau kiawonso muna “zolela ya nitu, zolela ya meso ye lusanu mu kuma kia mavua.” (1 Yoane 2:16) Paulu wa ntumwa watulukisa mu kuma kia dina dilenda kutubwila avo tusidi zolela yeto vana fulu kiantete. Wavova vo: “O nyindu a nitu, i lufwa.” Ekuma? E kuma kadi awana bena yo nyindu a nitu bekitukanga atantu a Nzambi. (Roma 8:6, 7) Awana bekuyivananga muna mavua yovo mu mavangu ma zumba, mpasi zayingi bekuyitwasilanga.—1 Korinto 6:18; 1 Timoteo 6:9, 10.
7. Nkia ngindu zaluvunu zilenda vukumuna Akristu o unu?
7 Awana ke bekwikilanga mu Nzambi ko ye awana bekwikilanga mu longi dia lunungunuku, bevavanga fila wantu mu lembi zola Nzambi yo kubakwikidsa vo Nzambi kena ko. Befilanga wantu mu yindula vo awana bekwikilanga muna Mvangi, mazowa yovo ke bakota sikola ko. Vana ntandu, wantu ayingi beluta zitisanga akwa ngangu za nza ke mu Mvangi ko. (Roma 1:25) Kana nkutu Nkristu olenda vukumunwa kwa ngindu zazi zaluvunu. E kikundi kieto yo Yave kilenda kuluka. O zola kweto muna yandi kulenda vola.—Ayibere 3:12.
8. (a) Nkia mambu malenda kendeleka selo ya Yave? (b) O nkanda Nkunga 136 aweyi ulenda kutufiaulwisila?
8 Wau vo mu nza yambi ya Satana tuzingilanga, vena ye mambu mayingi malenda kutukendeleka. (1 Yoane 5:19) Kansi, avo tuyambwidi vo lukendalalu lwatuyala, lukwikilu lweto lulenda yoya, o zola kweto muna Nzambi kulenda vola. Kasikil’owu, tulenda mona mpasi mu kuma kia kinunu, mayela yovo mu kuma kia kondwa nzimbu. Tulenda kendalala wau vo ke tulendanga diaka vanga mawonso ko tuzolele. Tulenda mpe funga makasi wau vo diambu kingandi ke divangamene nze una twavingilanga ko. Kiakala nkia diambu ditubwididi, ka tufwete yindula ko vo Yave utubembwele. Yindula e mvovo mia lukasakeso mina muna Nkunga 136:23: “On’okutuyindwilanga muna lusakalalu lueto: Kadi o walakazi wandi wakwele mvu.” Tufwete kala ye ziku vo Yave owanga e ‘ndodokela’ zeto ye osinga zo vanina e mvutu.—Nkunga 116:1; 136:24-26.
9. Adieyi diavana Paulu o nkuma mu kwamanana wokesa zola kwandi muna Yave?
9 Paulu wa ntumwa selo kia Nzambi kakala, ona watoma yindulanga una Yave kansadisilanga. Ediadi diamvananga o nkuma. Wasoneka vo: “Yave i nsadisi ame; kimona wonga ko. O muntu adieyi kalenda kumpanga?” (Ayibere 13:6) E vuvu kina Paulu kakala kiau muna Yave kiansadisa mu zizidila e mpasi za zingu. Vava Paulu kawanananga ye mpasi, wakwamanana bunda e vuvu muna Yave. Kana nkutu vava kakala mu pelezo, wasadisanga akwandi Akristu, wasonekanga e nkanda muna kasakesa ampangi muna nkutakani. (Efeso 4:1; Filipi 1:7; Filemone 1) Kiakala nkia mpasi Paulu kawanananga zau, wakwamanana wokesa o zola kwandi muna Yave. Wabundanga e vuvu muna “Nzambi a fiauzi wawonso, ona okutufiaulwisanga muna mpasi zeto zawonso.” (2 Korinto 1:3, 4) Aweyi tulenda tanginina Paulu?
Songanga zola muna Yave (Tala tini kia 10)
10. Aweyi tulenda wokesela zola kweto muna Yave?
10 Paulu wayika imosi muna mpila tulenda kwamanena wokesa o zola kweto muna Nzambi vava kasoneka vo: “Nusamba ntangwa zawonso.” Kuna kwalanda, wasoneka diaka vo: “Nukwaminina muna sambu.” (1 Tesalonika 5:17; Roma 12:12) Ekuma sambu kiwokeselanga kikundi kieto yo Nzambi? Vava tusambanga, Yave tumokenanga yandi. Ediadi dikutusadisanga mu kala ye ngwizani ambote yo yandi. (Nkunga 86:3) Vava tuzayisanga kwa Se dieto kuna zulu mana tuna mau muna ntima, kikundi kieto yo yandi kiwokelanga. (Nkunga 65:2) Vana ntandu, o zola kweto muna Yave kuwokelanga vava tumonanga una kevaninanga e mvutu za sambu yeto. Tuna ye ziku vo ‘Yave ofinamanga awonso bekumbokelanga.’ (Nkunga 145:18) Avo tubundidi e vuvu muna zola kwa Yave ye lusadisu lwandi, dikutusadisa mu sunda konso diambu diampasi dilenda kutubwila owau ye kuna sentu.
ZOLA MUNA LUDI KIA NKAND’A NZAMBI
11, 12. Aweyi tulenda wokesela zola kweto muna ludi kia Nkand’a Nzambi?
11 Wau vo tu Akristu, tutoma zolanga e ludi. Tulenda solola e ludi kiaki muna Diambu dia Nzambi. Yesu wavova kwa Se diandi vo: “E diambu diaku i ludi.” (Yoane 17:17) Muna zola e ludi kia Nkand’a Nzambi, tufwete zaya mana mena muna Nkand’a Nzambi. (Kolosai 1:10) Kansi, mayingi mevavuanga, ke zaya kwankatu ko. Tala una nsoneki a Nkunga 119 katusadisila mu bakula dina tufwete vanga. (Tanga Nkunga 119:97-100.) Konso lumbu, tufwete badikanga mana tutanganga muna Nkand’a Nzambi. Vava tubadikanga e nluta tuvuanga muna sadilanga e ludi kina muna Nkand’a Nzambi, o zola kweto muna ludi kuwokelanga.
12 Ntozi a nkunga wavova mpe vo: “Kuna kwa nzenza wina mvovo miaku muna matu mame! Milutidi wiki o zenza muna nua.” (Nkunga 119:103) E nkanda misasilanga o Nkand’a Nzambi mivaikiswanga kwa nkubik’a Nzambi mina nze madia matoma lambwa. Vava tudianga madia mana tuzolanga, ke tudianga mo nzaki-nzaki ko. Diau dimosi, tufwete vaulanga ntangwa yafwana ya longoka Nkand’a Nzambi. Muna mpila yayi, tuyangalela e ‘mambu mambote’ ma ludi. Diasazu dikala mu sungamena mana tutanganga yo sadila mo mu sadisa akaka.—Kimpovi 12:10.
13. Adieyi diasadisa Yeremiya mu zola e mambu ma Nzambi? Nkia nluta diantwasila?
13 Yeremiya wa ngunza watoma zolanga mambu ma Nzambi. Wavova vo: “O mambu maku masoloka, yadia mo; makala kwa mono s’eyangi ye kiese kia ntima: kadi nyikilu nkumbu aku, e Yave wa Nzambi a vu.” (Yeremiya 15:16) Yeremiya wayindulanga e mambu mambote ma Nzambi yo yangalela mo. Wakalanga ye kiese kia sunzula Yave yo samuna e nsangu zandi. Avo tukedi yo zola muna ludi kia Nkand’a Nzambi, tubakula e lau diampwena tuna diau dia kala Mbangi za Yave yo samuna e nsangu za Kintinu mu lumbu yayi yambaninu.
Songanga zola muna Diambu dia Nzambi (Tala tini kia 14)
14. Adieyi tulenda vanga diaka mu wokesa zola kweto muna ludi kia Nkand’a Nzambi?
14 Adieyi diaka dilenda kutusadisa mu wokesa zola kweto muna ludi kia Nkand’a Nzambi? Tufwete kwendanga muna tukutakanu, kadi i muna tulongelwanga kwa Yave. E Nkunga 1:2.
longi dia Nkand’a Nzambi dia konso lumingu muna lusadisu lwa Eyingidilu, imosi muna mpila tulongelwanga. Avo tuzolele vua nluta muna lukutakanu lwalu, tufwete teka kubamanga kuna nzo. Kasikil’owu, tulenda tanga e sono yawonso ina muna longi. O unu, wantu ayingi balenda tanga yovo bandula Eyingidilu muna Internete kadi divaikiswanga mu ndinga zayingi muna nzil’eto ya Internete jw.org ye muna JW Library. E salanganu yankaka ikutusadisanga mu solola e sono mu nzaki. Kansi, o zola kweto muna ludi kia Nkand’a Nzambi kuwokelanga vava tulongokanga malongi mawonso ye vava tutanganga yo toma fimpa e sono ina mo.—TangaZOLA MUNA MPANGI ZETO
15, 16. (a) Mun’owu wa sono kia Yoane 13:34, 35, nkia nkanikinu Yesu katuvana? (b) Aweyi o zola kweto muna Nzambi ye muna Nkand’a Nzambi kwinina e ngwizani ye zola muna mpangi zeto?
15 Muna fuku wansuka kakala ova ntoto, Yesu wavovesa alongoki andi vo: “Nkanikinu ampa inuvene, nuzolaziana; wauna inuzolele, i una mpe nuzolazianina. Muna wau i bezayila o wantu awonso vo nu alongoki ame—avo nzolani nuna yau.”—Yoane 13:34, 35.
16 O zola mpangi zeto ngwizani dina yo zola Yave. Avo ke tuzolanga Nzambi ko, ke tulendi zola mpangi zeto ko. Vana ntandu, avo ke tuzolanga mpangi zeto ko, ke tulendi mpe zola Nzambi ko. Yoane wa ntumwa wasoneka vo: “Ndiona olembi zolanga mpangi andi ona kemonanga, kalendi zola Nzambi ko ona kalembele mona.” (1 Yoane 4:20) O zola kweto muna Yave ye muna mpangi zeto, ngwizani mpe kwina yo zola kweto muna Nkand’a Nzambi. Ekuma? E kuma kadi avo tuzolele mana tulongokanga muna Nkand’a Nzambi, tukalanga mpe ye tima dia lemvokela nkanikinu una mo wa zola Nzambi ye mpangi zeto.—1 Petelo 1:22; 1 Yoane 4:21.
Songanga zola muna mpangi zeto (Tala tini kia 17)
17. Aweyi tulenda songela zola muna mpangi zeto?
17 Tanga 1 Tesalonika 4:9, 10. Aweyi tulenda songela zola muna mpangi za nkutakani eto? Dilenda kala vo mpangi anunu lusadisu kavuidi o mfunu mu kwenda mu tukutakanu yo vutuka kuna nzo. Nkento ansona olenda vava lusadisu mu singika lekwa muna nzo andi. (Yakobo 1:27) Tulenda mpe kasakesa mpangi zeto ana bayoya, fiaulwisa ana bakendalala yovo sadisa ana benuananga ye mpasi. (Ngana 12:25; Kolosai 4:11) Tusonganga vo tuzolanga ‘awana tuna yau entwadi muna lukwikilu’ mu mana tuvovanga yo vanga.—Ngalatia 6:10.
18. Adieyi dikutusadisa mu singika konso diambu tubakanene ye mpangi zeto?
18 Nkand’a Nzambi uvovanga vo “muna lumbu yambaninu” ya nza yayi yambi, wantu ayingi bekituka akwa loko. (2 Timoteo 3:1, 2) Wau vo tu Akristu, tufwete sianga ngolo za kwamanana wokesa zola kweto muna Yave, muna Diambu diandi ye muna muntu yo nkwandi. Wau vo tu wantu alembi lunga, ezak’e ntangwa tulenda bakana diambu ye mpangi zeto. Kansi, wau vo tuzolanga muntu yo nkwandi, tufwete vavanga singika vana vau konso diambu tubakanene yo mpangi yo vanga wo kuna zola kwawonso. (Efeso 4:32; Kolosai 3:14) Ke tufwete yambula ko vo zola kweto kwavola. Yambula twakwamanana wokesa o zola kweto muna Yave, muna Diambu diandi ye muna mpangi zeto.