DANIEL YO MIRIAM mu ngonde a Setemba ya mvu wa 2000 basompana. Zingu kiambote bakala kiau kuna mbanza Barcelona, Espanha. Daniel wavova vo: “E nzimbu twafutwanga muna salu zatusadisanga mu dila muna restaurante zambote, vanga nkangalu yo vuata mvuatu miantalu. Twatoma vaikanga mpe muna salu kia umbangi.” Kansi, diambu dimosi diabwa.

Vava bakala mu lukutakanu lwa mvivu muna mvu wa 2006, Daniel wawá longi dimosi diayuvula e kiuvu vo: “Nga tuvanganga mana tulenda mu sadisa awana bena mu nzil’a lufwa kimana bakota mu nzil’a moyo a mvu ya mvu?” (Ngana 24:11) E longi diadi diasasila vo mbebe tuna yau ya longa e ludi kia Nkand’a Nzambi kw’akaka kimana bavuluzwa. (Mavangu 20:26, 27) Daniel osungamenanga vo: “Vava yawá e longi diadi, diakala nze Yave wamokenanga yame.” O mpovi wakudikila vo o kuyivana muna salu kia Yave kiese kiayingi ditwasanga. Daniel wazaya wo vo ediadi dialudi kadi o nkaz’andi Miriam, ona wakala vo mviti anzila, kiese kiayingi kakala kiau.

E longi diadi diasimba kikilu o ntim’a Daniel. Muna kuma kiaki, wavanga nsobani zampwena muna zingu kiandi. Wakulula e ola zandi za salu yo kota mu salu kia kimviti a nzila. Wayindula e kiese kina balenda vua avo yandi yo nkaz’andi Miriam bele sadila kuna kuvuilu ateleki ayingi o mfunu.

Muna ngonde a Mayu ya mvu wa 2007, Daniel yo Miriam bayambula e salu yau yo kwenda zingila kuna Panamá, nsi ina bateka kingula. E zunga kiampa bayenda kia Bocas del Toro kiazala ye sanga ina muna Mbu a Caribe. Ayingi mun’awana bezingilanga mu sanga yayi esi Guaymi. Daniel yo Miriam bamona vo e nzimbu bakala zau zafwana mu zingila ngonde nana kuna Panamá.

Daniel yo Miriam nzaza ye mvelo basadilanga mu kwenda mu sanga yankaka. Besungamenanga o nkangalu wantete bavanga wa 30 ma kilometa. Batomboka miongo miandá kuna nsi a mini miangolo. Daniel wayoya kikilu, fioti fiasala nga wafwa e kiambu. Kansi, esi Guaymi ana bazingilanga muna ndambu a nzila batoma kubatambulanga, musungula vava balongoka miaka mvovo mia ndinga ya esi Guaymi. Ke vavioka kolo ko, bayantika longoka Nkand’a Nzambi ye 23 dia wantu.

Adieyi diabwa vava bafokola e nzimbu zau zawonso? Daniel wavova vo: “Twakendalala kikilu yo bakamwa kwa ngindu za vutuka kuna Espanha. Ke twazola sisa alongoki eto ko.” Kansi, vava vavioka ngonde mosi, batambula nsangu zambote. Miriam wavova vo: “Twatambula e mboka ya kota mu salu kia kimviti a nzila a espesiale. Kiese kikilu twamona mu kwamanana sadila kuna Panamá.”

Mu kuma kia nsobani zavangama muna nkubik’a Yave muna mvu wa 2015, Daniel yo Miriam bayambula e salu kia kimviti a nzila a espesiale. Bakasakeswa vo bakwamanana sala e salu kia kimviti a nzila a ngonde ke ngonde. Adieyi bavanga? Babunda e vuvu muna nsilu una muna Nkunga 37:5 uvovanga vo: “Yekeka nzil’aku kwa Yave; wambund’e vuvu, oyandi ovanga wo.” Basolola salu kiabasadisa mu kwamanana sala e salu kia kimviti a nzila a ngonde ke ngonde. O unu, mu nkutakani mosi ya zunga kia Veraguas bena kuna Panamá.

Daniel wavova vo: “Vitila twayaluka kuna Espanha, ke twakala ye ziku ko kana vo twadi lenda vevola e zingu kieto. O unu tumonanga vo tulenda vevola e zingu ye ke tukondwanga má ko muna lekwa yawonso tuvuanga o mfunu.” Nkia diambu ditoma kubatwasilanga e kiese? Bavova vo: “O sadisa akwa ntima miambote mu longoka mambu ma Yave kiese kiayingi dikututwasilanga.”