1. Adieyi dikukwikidisanga vo Diambu dia Nzambi divuidi nkuma? (Tala fwaniswa va ntandu.)

NKANGU a Yave una ye ziku vo e diambu diandi, i sia vo, e nsangu zandi kwa wantu, “diamoyo ye nkuma.” (Ayibere 4:12) Tumonanga o nkum’a Nkand’a Nzambi muna zingu kieto ye muna zingu kia wantu ankaka. Vitila bakituka Mbangi za Yave, akaka yiya bayiyanga, akaka mfomo banuanga yo tá zumba. Akaka akwa tunda ye amvuama bakala. Kansi, bamonanga vo diambu diakondwanga muna zingu kiau. (Kimpovi 2:3-11) Diakiese vo, ayingi mun’awana ke bakala diaka ye vuvu ko, owau bena ye vuvu kiasikila kia kusentu ye bazeye e nzila bafwete landa. Mun’Eyingidilu, tutanganga lusansu lwa wantu awaya muna malongi mena yo ntu a diambu “Nkand’a Nzambi Zingu kia Wantu Usobanga.” Kansi, kana nkutu vo se mvu miayingi miviokele kala tuka bakitukila Akristu, wantu bafwete kwamanana siamisa e ngwizani au yo Yave muna lusadisu lwa Nkand’a Nzambi.

2. Aweyi o nkum’a Diambu dia Nzambi wasadisila Akristu a tandu kiantete?

 ² Ke diasivi ko mu mona wantu ayingi bevanganga nsobani zampwena vava belongokanga e ludi. Muna tandu kiantete, mpangi zeto ana bakala ye vuvu kia kwenda kuna zulu bavanga mpe nsobani zazi. (Tanga 1 Korinto 6:9-11.) Vava Paulu wa ntumwa kavovela awana ke badi vua Kintinu kia Nzambi ko, wakudikila vo: “Akaka muna yeno i wau nuakala.” Edi diabasadisa mu vanga e nsobani zazi i Diambu dia Nzambi yo mwand’andi avelela. Kansi, kana nkutu vava bakituka Akristu, akaka muna yau bavanga vilwa wasia e ngwizani au yo Yave mu vonza. Kasikil’owu, Nkand’a Nzambi uvovelanga mpangi mosi akusua wavaikiswa muna nkutakani. Kuna kwalanda, wavanga nsobani yo vutuka muna nkutakani ya Kikristu. (1 Korinto 5:1-5; 2 Korinto 2:5-8) Dia lukasakeso kikilu mu mona ulolo wa mpangi zeto bevanganga nsobani muna lusadisu lwa nkum’a Diambu dia Nzambi.

3. Adieyi tuvovela mu longi diadi?

³ Diambu dia Nzambi divuidi kikilu nkuma. Wau vo Yave watuvana e Diambu diandi, tufwete dio toma sadilanga. (2Timoteo 2:15) Mu longi diadi, tuvovela una tulenda sadila o nkum’a Diambu dia Nzambi (1) muna zingu kieto, (2) muna salu kia umbangi, ye (3) vava tulonganga muna nkutakani. Mana tulongoka mu longi diadi mekutusadisa mu songa zola yo luyangalalu lweto muna Se dieto una kuna zulu, ona okutulonganga muna wete dieto.—Yesaya 48:17.

4. (a) Adieyi tufwete vanga avo tuzolele vo Diambu dia Nzambi diatusadisa? (b) Nkia ntangwa otanganga Nkand’a Nzambi?

⁴ Avo tuzolele vo Diambu dia Nzambi diatusadisa, tufwete dio tanganga. Tufwete sianga ngolo za tanga dio lumbu yawonso. (Yosua 1:8) Ayingi mu yeto salu yayingi tuna yau, kansi ke tufwete yambula konso diambu ko, kana nkutu malau meto ma salu, matukakidila twalembi tanga Nkand’a Nzambi. (Tanga Efeso 5:15, 16.) Tulenda vaula e ntangwa muna mene, muna masika yovo muna fuku. Tuzolele vova nze una wavova ntozi a nkunga vava kasoneka vo: “Ekwe nzola nzolele nsiku aku! E lumbu kiamvimba i wau ibadikanga.”—Nkunga 119:97.

5, 6. (a) Ekuma tufwete badikilanga mana tutanganga? (b) Aweyi tulenda vuila nluta vava tubadikanga? (c) Nkia nluta ovuanga vava otanganga Nkand’a Nzambi yo badika mana otanganga?

⁵ Kansi, mayingi mevavuanga, ke tanga kaka ko. Tufwete badikanga yovo toma yindula mana tutanganga muna Nkand’a Nzambi. (Nkunga 1:1-3) Muna mpila yayi kaka tulenda sadila ngangu za Nkand’a Nzambi muna zingu kieto. Muna kuma kiaki, kiakala vo mu papela yovo tablet tutangilanga Nkand’a Nzambi, tufwete yambulanga  vo Diambu dia Nzmbi diatukasakesa yo soba zingu kieto.

⁶ Aweyi tulenda vuila nluta vava tubadikanga? Vava tutanganga Nkand’a Nzambi, tufwete vundanga yo kukiyuvula: ‘Adieyi ndongokele mu kuma kia Yave? Aweyi isadilanga mana ilongokanga? Nkia nsobani mfwete vanga?’ Vava tubadikanga mana tulongokanga muna Diambu dia Nzambi yo samba, tukala ye tima dia sadila mo muna zingu kieto. Avo tuvangidi wo, tumona nkum’a Nkand’a Nzambi muna zingu kieto.—2 Korinto 10:4, 5.

7. Aweyi tulenda toma sadila Diambu dia Nzambi muna salu kia umbangi?

⁷ Diambote twasadilanga Diambu dia Nzambi vava tusilanga umbangi yo longa wantu. Mpangi mosi wavova vo: “Yindula vo ntwadi wina yo Yave muna salu kia sila umbangi mu nzo ke nzo, nga ngeye kaka okala vova yovo okunyambula mpe vo kavova?” Vava tutangilanga muntu sono kia Nkand’a Nzambi, tuyambulanga vo Yave kavova kwa muntu ndioyo. E sono kimosi kitomene solwa kisundidi o nkuma ke mu konso diambu ko tulenda vova. (1 Tesalonika 2:13) Vava okalanga muna salu kia umbangi, nga otoma sadilanga Nkand’a Nzambi?

8. Vana fulu kia tangila kaka muntu e sono kia Nkand’a Nzambi, adieyi diaka tufwete vanga?

⁸ Kansi, o tangila wantu e sono kia Nkand’a Nzambi vava tusilanga umbangi ke diau kaka ko divavuanga. Wantu ayingi ke bazeye nsas’a sono ya Nkand’a Nzambi ko. Ediadi diavangama muna tandu kiantete, divangamanga mpe o unu. (Roma 10:2) Ke tufwete banzikisanga ko vo muntu tusilanga umbangi ozeye e nsas’a sono tutangidi. Tulenda kunsadisa muna vutukilanga yo sasila mvovo yovo ngindu zasina zina muna sono. Muna mpila yayi e Diambu dia Nzambi dikota muna ntim’a muntu.—Tanga Luka 24:32.

9. Mana tuvovanga vitila twatangila muntu e sono aweyi malenda kunsadisila mu zitisa Nkand’a Nzambi? Yika nona.

⁹ Mana tuvovanga vitila twatanga e sono malenda fila muntu mu zitisa Nkand’a Nzambi. Kasikil’owu, tulenda vova vo: “Yambula twazaya dina Mvangi eto kevovanga mu kuma kia diambu diadi.” Avo muntu tumokenanga yandi ke kwikilanga mu Kristu ko, tulenda vova vo: “Tutala dina Sono Yavauka ikutuvovesanga.” Avo tuwananene yo muntu kesambilanga ko, tulenda kunyuvula: “Nga wawá kala kingana kiaki kiankulu?” O sungamena vo konso muntu una ye diambu kekwikilanga dikutusadisa mu zaya una tulenda yatikila e moko muna salu kia umbangi.—1 Korinto 9:22, 23.

10. (a) Nkia diambu kawanana diau mpangi mosi? (b) Aweyi omwenanga nkum’a Diambu dia Nzambi muna salu kia umbangi?

¹⁰ Ayingi bemonanga una Diambu dia  Nzambi disadisilanga wantu ana besilanga umbangi. Kasikil’owu, mpangi mosi wakingula nunu mosi watanganga nkanda mieto se mvu miayingi. Lumbu kimosi, vana fulu kia kumvana kaka Eyingidilu, o mpangi wantangila sono kia Nkand’a Nzambi. Watanga e sono kia 2 Korinto 1:3, 4 kivovanga vo: “Se dia nkenda ye Nzambi a fiauzi wawonso, . . . okutufiaulwisanga muna mpasi zeto zawonso.” E mvovo miami miasimba kikilu ntim’a nunu ndioyo. Walomba kwa mpangi kavutukila diaka tanga e sono kiaki. I bosi, wavova vo yandi yo nkaz’andi lufwiaulwisu bavuanga o mfunu. Muna kuma kia sono kiaki, wavava zaya diaka mankaka mu kuma kia Nkand’a Nzambi. O sadila Diambu dia Nzambi muna salu kia umbangi mfunu kikilu dina.—Mavangu 19:20.

11. Nkia mbebe bena yau ampangi ana belonganga muna nkutakani?

¹¹ Tuyangalelanga kwenda muna tukutakanu tweto twakete ye twampwena. E kuma kiantete tukwendelanga muna tukutakanu i sambila Yave. Tuvuanga mpe nluta mu mana tulongokanga. Muna kuma kiaki, ampangi ana belonganga vana tend’a nkongolo lau ye mbebe ampwena bena yau. (Yakobo 3:1) Bafwete kala ye ziku vo mana belonganga mu Diambu dia Nzambi matukidi. Avo bavene lau diadi, aweyi olenda sadila nkum’a Diambu dia Nzambi muna simba ntima mia wantu?

12. Aweyi o mpovi kalenda kadila ye ziku vo mana kelonganga mu Nkand’a Nzambi matukidi?

 ¹² E diambu disundidi o mfunu muna longi i sadilanga sono ya Nkand’a Nzambi. (Yoane 7:16) Muna kuma kiaki, ofwete kebanga kimana e mpila ofidilanga e longi ye nona osadilanga yalembi fila wantu mu sia sungididi kiasaka muna nona yayi ke mu Nkand’a Nzambi ko. Vana ntandu, sungamena vo o tanga e sono ya Nkand’a Nzambi ke diau dimosi ko yo longa oma Nkand’a Nzambi. Avo otangidi sono yayingi, wantu ayingi ke besungamena yo ko. Muna kuma kiaki, diambote mu sola sono ina ozolele sadila. I bosi, toma yo tanga, sasila, sadila nona, yo songa una wantu balenda yo sadila muna zingu kiau. (Nekemiya 8:8) Avo longi diasonekwa kala ozolele kubika, toma longoka longi diadi ye sono ina mo. Vava bakula una e sono iyikamenanga e ngindu zina muna longi. I bosi, sadila yaka sono mu longa mambu masina mena muna longi. (Olenda solola mpila yambote olenda wo vangila muna longi dia 21 yakuna 23 dia nkanda Beneficie-se da Escola do ministério teocrático.) Edi disundidi o mfunu, i samba kwa Yave kimana kasadisa walonga e ngindu zandi zina muna Nkand’a Nzambi.—Tanga Ezera 7:10; Ngana 3:13, 14.

13. (a) Aweyi mpangi mosi ankento kasadisilwa kwa sono kia Nkand’a Nzambi kawá muna lukutakanu? (b) Nkia nluta ovuanga muna sono ya Nkand’a Nzambi isasilwanga muna tukutakanu?

¹³ Vava mpangi mosi ankento kuna  Austrália kakala mwan’akete, mambu mayingi mampasi mambwila. Kana una vo kuna kwalanda wakituka selo kia Yave, kakwikilanga ko vo Yave zola kekunzolanga. Lumbu kimosi vava kakala mu lukutakanu, wawá sono kimosi kiasimba kikilu o ntim’andi. Watoma badika yo vavulula oma ma sono kiaki. Ediadi diamfila mu tanga sono yankaka ya Nkand’a Nzambi. Mpangi ankento wakwikila vo Yave zola kikilu kekunzolanga. * (Tala mvovo vana yand’a lukaya.) Nga wawá kala sono kiasasilwa muna lukutakanu eki kiasimba kikilu ntim’aku?—Nekemiya 8:12.

14. Aweyi tulenda songela vo tuzolanga yo zitisa Diambu dia Yave?

¹⁴ Nga ke tufwete vutulanga matondo ko kwa Yave wau katuvana Diambu diandi? Yave wasia nsilu vo e Diambu diandi disikila yakwele mvu. Olungisanga nsilu wau. (1 Petelo 1:24, 25) Muna kuma kiaki, tufwete tanganga Nkand’a Nzambi lumbu yawonso yo sadila mana tutanganga. Tufwete mo sadilanga mpe muna sadisa akaka. Avo tuvangidi wo, tusonga vo tuzolanga yo yangalela lukau lwalu lwantalu. Edi disundidi o mfunu, tusonga vo tuzolanga Yave wa Nzambi ona wasonekesa nkanda wau.