1. Ekuma tulenda vovela vo Yave ovuidi e lekwa yawonso? (Tala e fwaniswa ova ntandu.)

LEKWA yawonso kwa Yave ivuilu! Yandi ovuidi e ‘zulu ye zulu dia mazulu yo ntoto ye yawonso ina mo.’ (Nsiku 10:14; Lusengomono 4:11) Wau vo Yave wavanga o wantu, yeto awonso kwa yandi tuvuilu. (Nkunga 100:3) Kansi, muna wantu awonso bazinga kala, Nzambi wasola akaka kimana bakala vua kwandi mu mpila yaswaswana kikilu.

2. Mun’owu wa Nkand’a Nzambi, aki nani bavuilu kwa Yave mu mpila yaswaswana?

² Kasikil’owu, o nkand’a Nkunga 135 uyikilanga e selo yakwikizi ya Yave kuna Isaele yankulu vo “lusalu luandi luakuvwila.” (Nkunga 135:4) Kuna diak’e sambu, Osea wa ngunza wasakula vo esi zula besinga kituka nkangu a Yave. (Osea 2:23) O ungunza wau walungana vava Yave kayantika sola wantu ana bena vo ke Aneyisaele ko mu kwenda yala yo Yesu  kuna zulu. (Mavangu 10:45; Roma 9:23-26) O wantu awaya bakuswa yo mwand’avelela beyikilwanga vo “zula kiavauka.” Bena se “nkangu akuvuila” a Yave. (1 Petelo 2:9, 10) Kansi, adieyi tuvova mu kuma kia Akristu akwikizi bena ye vuvu kia zinga yakwele mvu ova ntoto? Yave okubayikilanga mpe vo “nkangu ame ana nsolele.”—Yesaya 65:22.

3. (a) Aki nani bena ye ngwizani ambote yo Yave o unu? (b) Adieyi tuvovela mu longi diadi?

³ O unu, e buka kia “fikambi-kambi” ana bena ye vuvu kia zingila yakwele mvu kuna zulu ye “mameme mankaka” ana bena ye vuvu kia zingila yakwele mvu ova ntoto, besambilanga Yave entwadi nze “kambi dimosi.” (Luka 12:32; Yoane 10:16) Tuzolele songa vo tuvutulanga matondo kwa Yave wau tuna ye ngwizani ambote yo yandi. Mu longi diadi, tuvovela una tulenda vutulwila matondo kwa Yave wau katuvana e lau diampwena.

4. Aweyi tulenda vutulwila matondo kwa Yave wau katuvana e lau dia kala ye ngwizani ambote yo yandi? Aweyi o Yesu kavangila diau dimosi?

⁴ Tusonganga luyangalalu lweto kwa Yave vava tukukiyekolanga kwa yandi yo vubwa. Muna mpila yayi, awonso bemona vo kwa Yave tuvuilu ye tuzolele kunlemvokela. (Ayibere 12:9) Diau dimosi kavanga o Yesu vava kavubwa. Kana una vo wakala mosi muna nkangu wakiyekola kwa Yave, Yesu wayekola e zingu kiandi kwa Yave. Diakala nze yandi wavova vo: ‘O vanga luzolo luaku, e Nzambi ame, i kwau nyangalele.’—Nkunga 40:7, 8.

5, 6. (a) Adieyi Yave kavova vava o Yesu kavubwa? (b) Nkia nona kilenda kutusadisa mu bakula una Yave kemonanga vava tuyekolanga e zingu kieto kwa yandi?

⁵ Aweyi kamona o Yave vava Yesu kavubwa? Nkand’a Nzambi uvovanga vo: “Vava kavubilu, Yesu vana vau otombokele muna maza, e zulu diziukidi, omwene mwand’a Nzambi unkulumukini nze yembe. I bosi, e ndinga itukidi kuna zulu, oku vo: ‘Ndioyo i Mwan’ame anzolwa, ona iyangalelanga.’” (Matai 3:16, 17) Vava kavubwa, Yesu wakivuilwa kala kwa Nzambi. Kansi, Yave wayangalala kikilu vava kamona vo Yesu ozolele sadila e zingu kiandi kiawonso muna salu kiandi. Yave oyangalalanga mpe vava tuyekolanga e zingu kieto kwa yandi yo kutusambula.—Nkunga 149:4.

⁶ Kansi Yave i mfumu a lekwa yawonso. Ozevo nki diaka tulenda kumvana? Yindula vo muntu una ye mvuma zambote-mbote muna mpatu andi. Lumbu kimosi, o mwan’andi akete obakidi mvuma mosi yo kumvana yo. Kana una vo e mvuma yayi mu mpatu andi kabakidi yo, o se dianzodi oyangalela lukau lwalu. Ediadi disongele vo mwana okunzolanga kikilu. Kuna kwa yandi, e mvuma yayi kaveno kwa mwana ilutidi e mvuma zankaka o mfunu. Diau dimosi, Yave oyangalalanga kikilu vava tuyekolanga e zingu kieto kwa yandi.—Luvaiku 34:14.

7. Aweyi nkand’a Malaki ukutusadisilanga mu bakula una Yave kemonanga mu kuma kia awana bekunsadilanga?

⁷ Tanga Malaki 3:16. Ekuma dinina diamfunu dia yekola e zingu kiaku kwa Yave yo vubwa? Tuka wakadila muna vumu kia ngudi aku, wakivuilwa kala kwa Yave wa  Mvangi aku. Kansi, yindula e kiese kamona o Yave vava wantambulwila se Mfumu aku yo yekola e zingu kiaku kwa yandi. (Ngana 23:15) Yave ozeye awana bekunsambilanga, osonekanga e nkumbu zau muna “nkand’a luyindwilu.”

8, 9. Adieyi Yave kelombanga kwa awana basonama e nkumbu muna “nkand’a luyindwilu”?

⁸ Avo tuzolele vo e nkumbu eto yakala muna “nkand’a luyindwilu” wa Yave, diambu tufwete vanga. Malaki wavova vo tufwete vumina Yave yo badika e nkumbu andi. Kansi avo tusambidi muntu yovo lekwa kiankaka, e nkumbu eto ivunzunua muna nkand’a Yave.—Luvaiku 32:33; Nkunga 69:28.

⁹ Ke divavanga kaka ko vo twasia o nsilu wa vanga luzolo lwa Yave yo vubwa. O mambu mama nkumbu mosi kaka tuvanganga mo, kansi o sambila Yave i mpil’a zingu kieto. E lumbu yawonso ya zingu kieto tufwete songanga muna mavangu meto vo Yave tulemvokelanga.—1 Petelo 4:1, 2.

10. Nkia nswaswani ifwete kala vana vena selo ya Yave ye awana ke bekunsadilanga ko?

¹⁰ Muna longi diaviokele, twalongokele vo Kaini, Solomo ye Aneyisaele edi babanzanga vo Yave kaka basambilanga, kansi ke basikila ye kwikizi ko muna yandi. E nona yayi itulongele vo ke tufwete vova kaka ko vo Yave tusambilanga. Kansi tufwete mpe menganga oma mambi yo zola oma mambote. (Roma 12:9) Yave wavova vo wantu bemona e nswaswani “mun’asongi ye yimpumbulu, muna ndion’osadila Nzambi yo ndion’olembi kunsadila.”—Malaki 3:18.

11. Ekuma ke difwete kadila diampasi ko kwa wantu awonso mu bakula vo Yave kaka tusambilanga?

¹¹ Tuvutulanga kikilu matondo wau o Yave katusola mu kala nkangu andi. Ke difwete kala diampasi ko kwa wantu awonso mu bakula vo ku sambu dia Yave tuna. (Matai 5:16; 1 Timoteo 4:15) Ukiyuvula: ‘Nga akaka bemonanga vo ngina ye kwikizi kiasikila muna Yave? Nga wonga imonanga wa kuyisunzula vo i Mbangi a Yave?’ Yindula una Yave kemona avo tumwene e nsoni za zayisa kw’akaka vo kwa yandi tuvuilu.—Nkunga 119:46; tanga Maku 8:38.

12, 13. Nkia mambu bevanganga mpangi zankaka mefilanga wantu mu kala ye lukatikisu kana vo Mbangi za Yave kikilu?

¹² Diankenda vo akaka muna mpangi zeto “mwand’a nza” betangininanga. Ke bekalanga baswaswana ko ye awana bena vo ke selo ya Yave ko. (1 Korinto 2:12) O “mwand’a nza” ufilanga wantu mu sia e sungididi muna zolela ya yau kibeni. (Efeso 2:3) Kasikil’owu, kana una vo tuvewanga tuludiku twayingi, akaka ke bevuatanga mvuatu mia luzitu ko. Bevuatanga mvuatu miakwitama ye mina misonganga e nitu kana nkutu vava bekwendanga  muna tukutakanu twa Kikristu. Beviokesanga e tezo muna mpila bezengelanga yovo kangila e nsuki. (1 Timoteo 2:9, 10) Muna kuma kiaki, diampasi dikalanga mu zaya kana vo Mbangi za Yave yovo ve.—Yakobo 4:4.

¹³ Vena ye mambu mankaka mena vo diampasi dikalanga mu swaswanesa mpangi zankaka ye wantu a nza. Kasikil’owu, vava bena kuna nkinzi, akaka bekinanga makinu yovo vanga mambu mena vo ke mambote ko kwa Akristu. Akaka betulanga mafoto mau muna internete, twikaziana e nsangu yo vana nkomena zisonganga e ngindu zau zabendomoka. Kana una vo e mambu mama ke mevaninuanga tumbu ko muna nkutakani nze una divangamanga kwa muntu ovolele sumu diampwena, ediadi dilenda kala se mbandu ambi kwa mpangi zankaka ana bevanganga ngolo za kala baswaswana ye nza.—Tanga 1 Petelo 2:11, 12.

14. Adieyi tufwete vanga muna tanina kikundi kieto yo Yave?

¹⁴ E lekwa yawonso isokwanga mu nza yayi ina ye kani dia tunta e sungididi kieto muna “zolela ya nitu, zolela ya meso ye lusanu mu kuma kia mavua.” (1 Yoane 2:16) Wau vo kwa Yave tuvuilu, tufwete kalanga twaswaswana. Tufwete ‘tina e fu kia lembi vumina Nzambi ye zolela ya nza, twakala yo lulungalalu yo unsongi yo vumina Nzambi omu tandu kiaki.’ (Tito 2:12) Muna mawonso tuvanganga muna zingu, nze mpil’eto ya vovela, ndilu, ndwinu, mvuatu ye salu yeto ifwete songanga kwa wantu awonso vo kwa Yave tuvuilu.—Tanga 1 Korinto 10:31, 32.

15. Ekuma tufwete songelanga nkenda yo zola kwa mpangi zeto?

¹⁵ Tusonganga vo tuyangalelanga kikundi kieto yo Yave muna mpila tukadilanga ye mpangi zeto. Nze yeto, oyau mpe kwa Yave bavuilu. O sungamena diambu diadi dikutufila mu kubasonga e nkenda yo zola. (1 Tesalonika 5:15) Ekuma dinina diamfunu? E kuma kadi Yesu wavovesa alandi andi vo: “Muna wau i bezayila o wantu awonso vo nu alongoki ame—avo nzolani nuna yau.”—Yoane 13:35.

16. Adieyi tulongokele muna Nsiku a Mose mu kuma kia zola kwa Yave muna nkangu andi?

¹⁶ Muna Nsiku a Mose muna ye diambu dilenda kutusadisa mu bakula una tufwete kadilanga ye akaka muna nkutakani. Muna tempelo a Yave, mwakala ye salanganu yavauka yasadilwanga muna nsambila. O Nsiku watoma kiesesa una Anelevi bafwete sadila e salanganu yayi. Watoma kiesesa mpe vo avo muntu kalende nkanikinu wau ko kafwete vondwa. (Ntalu 1:50, 51) Avo Yave watokananga mu kuma kia mpila ifwete sadilwa e salanganu yasadilwanga muna nsambil’andi, disongele vo otokananga kwayingi mu mpila ina wantu bekadilanga ye selo yandi yakwikizi ana bakiyekola kwa yandi. Muna kutusonga vo mfunu twina kwa yandi, wavova vo: ‘On’okunuviakana, oviakene ngengele a disu diame.’—Zakariya 2:8.

17. Mu nkia diambu Yave ‘kesianga e sungididi yo mona’?

¹⁷ Malaki wavova vo Yave ‘osianga e sungididi yo mona’ una nkangu andi bekadilanga  muntu yo nkwandi. (Malaki 3:16) Yave “ozeye awana bavuilu kwa yandi.” (2 Timoteo 2:19) Yave ozayanga mawonso tuvanganga yo vova. (Ayibere 4:13) Yave omonanga vava tulembi songanga e nkenda kwa mpangi zeto. Kansi, tufwete mpe kala ye ziku vo Yave omonanga vava tusonganga e fu kia zola nzenza, ntim’a mvevo, loloka yo songa e nkenda kw’akaka.—Ayibere 13:16; 1 Petelo 4:8, 9.

18. Aweyi tulenda songela vo tuvutulanga matondo kwa Yave wau katusola twakala nkangu andi?

¹⁸ Tuzolele songa kwa Yave vo tuyangalalanga wau vo kwa yandi tuvuilu. Tuzeye wo vo e nzengo zisundidi o mfunu twabaka i yekola e zingu kieto kwa yandi. Kana una vo tuzingilanga ‘vana kati kwa mbandu yayi yambi ye yatekomoka,’ tulenda kala ‘twakondwa mpilakanu ye tumbu’ yo ‘kezima nze mini omu nza.’ (Filipi 2:15) Muna kuma kiaki, tufwete sianga e ngolo za venga mana Yave kemenganga. (Yakobo 4:7) Tufwete zolanga yo zitisa e mpangi zeto, kadi kwa Yave mpe bavuilu.—Roma 12:10.

19. Aweyi Yave kesendelanga awana bavuilu kwa yandi?

¹⁹ Nkand’a Nzambi usianga nsilu vo: ‘Yave ke yambula nkangu andi ko.’ (Nkunga 94:14) O nsilu wau ke ulendi funga ko. Kana nkia diambu dibwa, Yave ke kutuyambula ko. Kana nkutu tufwidi, ke kutuvilakana ko. (Roma 8:38, 39) “Avo tukala moyo, mu kuma kia Yave tukadila o moyo, avo tufwa, mu kuma kia Yave tufwila. Dianu vo, avo tukala moyo yovo tufwa, kwa Yave tuvuilu.” (Roma 14:8) Tuvingilanga ye kiese kiawonso e ntangwa ina Yave kefula akundi andi akwikizi ana bafwa. (Matai 22:32) Kana nkutu owau, tuyangalelanga tukau twayingi tutukanga kwa Yave wa Se dieto. Nkand’a Nzambi uvovanga vo: “Nkwa nsambu e zula kina vo o Yave i Nzambi andi; o nkangu kasola se vwa kwandi.”—Nkunga 33:12.