Una Olenda Kitulwila e Longi Diaku dia Nkand’a Nzambi Diakiese

WINIKINA MU

YOSUA wavewa e kiyekwa kia fila nkangu a Isaele muna Nsi a Nsilu. Kiyekwa kiampasi kikilu kiakala. Muna kuma kiaki, Yave wankumika yo kunkasakesa vava kavova vo: “Vama yo kumama.” Wamvovesa mpe vo avo otangidi yo lemvokela e Nsiku, obaka nzengo zambote yo sunda.—Yosua 1:7, 8.

Mu “nsungi zampasi” tuzingilanga. Muna kuma kiaki, e zingu kieto kilenda kala kiampasi. (2 Timoteo 3:1) Avo tuzolele sunda nze Yosua, tufwete landanga luludiku luna Yave kamvana. Tufwete tanganga Nkand’a Nzambi lumbu yawonso yo sadila mana tulongokanga muna baka nzengo zambote.

Kansi, akaka muna yeto ke bezayanga ko una balenda longokela yovo ke bekalanga ye kiese kia longoka ko. Kana una vo i wau, o longoka Nkand’a Nzambi mfunu kikilu dina. Ekolo obadikanga e babu kina yo ntu a diambu “ Teza Sadila e Ndekwa Ezi,” osolola mambu mekusadisa mu vua nluta muna longi diaku yo yangalela dio.

Ntozi a nkunga wayimbila vo: “Umfila mun’eyendelo dia nkanikinu miaku; kadi mûna nyangalela.” (Nkunga 119:35) Ngeye mpe olenda yangalela longoka Diambu dia Nzambi. Osolola mambu mayingi mambote avo okwamanene longoka o Nkand’a Nzambi.

Kana una vo ku mfidi a nkangu ko nze Yosua, ngeye mpe una ye mpasi onuananga zau. Muna kuma kiaki, nze Yosua, longokanga yo lemvokela e Diambu dia Nzambi. Avo ovangidi wo, obaka nzengo zambote yo kala ye kiese.

TEZA SADILA E NDEKWA EZI

Samba vitila walongoka. Muna Nkand’a Nzambi muna ye mvovo mia Yave ye wasonekwa muna wete diaku. Muna kuma kiaki, vava otanganga Nkand’a Nzambi lombanga vo Yave kasadisa mu bakula mana otanganga, sungamena yo sadila mo muna baka nzengo zambote muna zingu kiaku.—Ezera 7:10.
Ukiyuvulanga e yuvu ekolo otanganga o Nkand’a Nzambi yovo nkanda mieto. Kasikil’owu: ‘Adieyi ndongokele mu kuma kia Yave? Nkia ngwizani dina yo ntu a diambu wa Nkand’a Nzambi? Aweyi ndenda sadila mambu mama muna sadisa akaka?’
Badikanga mana olongokanga. Vundanga fioti yo badika mana otangidi. Ukiyuvula: ‘Aweyi imonanga mu kuma kia diambu diadi? Ekuma ngindulwidi dio? Nkia ngwizani dina ye diambu diambwila kala, dina dikumbwilanga owau ye dina dilenda kumbwila kuna sentu? Aweyi ndenda sadila nkanikinu yovo luludiku lwalu lwa Nkand’a Nzambi muna zingu kiame?’ (Yobi 23:5; Nkunga 49:3) Vava obadikanga, teza zaya kana vo olenda sasila e kuma Yave kelukisilanga nkangu andi mu venga maka mambu. Yindula e mfwilu kadi baka muntu oyikilu mu lusansu lwalu kele vo wavangila e mambu mu mpila yankaka.—Nsiku 32:28, 29.
Uyisia muna lusansu otanganga. Kasikil’owu, nga olenda yindula una Yosefe kamona vava mpangi zandi banteka kwa Aneyisemaele? (Etuku 37:18-28) Nkia diambu omwene yo wá? Uyisia vana fulu kia wantu bayikilu mu lusansu lwalu. Nkia diambu bayindulanga yo mona? Vava okuyisianga muna lusansu otanganga, dikusadisa mu vua nluta mu mana olongokanga.
Sadilanga e salanganu ya longokela ivaikiswanga kwa nkubik’a Yave. Ediadi dikusadisa mu toma vavulula. Longoka una olenda sadila e salanganu ina muna nding’aku, kiakala muna Internete yovo yanietekwa. Kukadinge ye nsoni ko za lomba lusadisu kwakaka mu zaya una olenda sadila e salanganu yayi mu mpila yambote. Kasikil’owu, e Índice das Publicações da Torre de Vigia yovo Nkanda wa Vavulwila wa Mbangi za Yave ulenda kusadisa mu zaya malongi mana mavaikiswa kala mu kuma kia lusansu lwalu ye nsas’a sono yayingi ya Nkand’a Nzambi. Sadila e yinkanda-nkanda Lusadisu mu Longoka Diambu dia Nzambi ye Mana Tulenda Longoka Muna Diambu dia Nzambi avo ina muna nding’eno. Mu salanganu yayi muna ye mambu mamfunu matadidi fulu, kolo, ntezelo ye mambu mankaka.
Soneka e mambu masina. Ediadi dikusadisa mu sungamena mana olongokele. Edi disundidi o mfunu, zayisanga kw’akaka mana olongokele. Nga vena ye diambu olenda sadila muna salu kia umbangi? Avo ovangidi mambu mama, osungamena mambu masina olongokele. Akaka mpe bevua nluta mu mana olongokanga.