Haykanush, nteleki walembi vubwa ozingilanga kuna Armênia, wamona passaporte vana ndambu a nzo andi. Muna kati kwa passaporte, mwakala ye kalati ya banco, mwakala mpe ye ulolo wa nzimbu. Wazayisa dio kwa yakala diandi ona wakala mpe vo nteleki walembi vubwa.

Akazi awaya mpasi za nzimbu bakala zau kumosi ye mfuka. Kansi, babaka e nzengo za kwenda sisa e nzimbu zazi kuna kwa muntu ovuidi zo wau vo lutangu lwa nzo lwasonama muna passaporte. O muntu ona wavidisa e passaporte yayi kumosi ye esi nzo andi basivika kikilu. Haykanush yo nkaz’andi bavova vo mana belongokanga muna Nkand’a Nzambi mekubasadisanga mu kala akwa ziku. Basadila e lau diadi mu vovela e salu kia Mbangi za Yave yo vana nkanda kwa esi nzo yayina.

Esi nzo awaya bazola vana nzimbu kwa Haykanush muna kumvutula matondo. Kansi, Haykanush katambula zo ko. Muna lumbu kialanda, o nkento a yakala diadina wayenda kingula Haykanush yo nkaz’andi. Muna songa vo bavutula kikilu matondo, o nkento wakomekena Haykanush katambula mpeto ya diamante.

Nze esi nzo awaya, wantu ayingi o unu badi sivika mu kuma kia ziku kina Haykanush yo nkaz’andi basonga. Nga Yave mpe wasivika? Aweyi kabadikila e fu basonga? Nga mfunu kikilu kina?

E mvutu za yuvu yayi ke zampasi ko. Ekuma? E kuma kadi selo ya Nzambi bazeye wo vo kuna kwa Yave o tanginina e fu yandi disundidi o mfunu ke mu diamante ko ngatu wolo yovo mavua mankaka. Kieleka, mana Yave kebadikilanga vo masundidi o mfunu, maswaswana kikilu ye mana wantu ayingi bebadikilanga vo mamfunu. (Yesaya 55:8, 9) Selo ya Yave bazeye wo vo e ngolo bevanganga za tanginina fu yandi mfunu kikilu zina.

Tulenda mona e ziku kia diambu diadi mu dina Nkand’a Nzambi uvovanga mu kuma kia umbakuzi ye ngangu. E sono kia Ngana 3:13-15 kivovanga vo: “Nkwa nsambu on’osolola ngangu, yo muntu obaka umbakuzi. Kadi nkitu andi uviokele nkitu a palata, o nlut’andi una wa wolo wabiza. E ntalu andi isundidi ina ya makolado: Muna yawonso in’ozolele, ke mwina ma kintezaniswa ko.” Kieleka, Yave oyangalelanga e fu yayi lutila konso lekwa kia ntalu.

Adieyi tuvova mu kuma kia kala nkwa ziku?

Yave nkwa ziku. “Kalendi vuna ko.” (Tito 1:2) Wavumunwina Paulu wa ntumwa mu sonekena Akristu Ayibere muna tandu kiantete vo: “Nutusambidilanga, kadi tutomene wo zaya vo tuna ye ntona zambote, tuzolele kala akwa ziku muna mambu mawonso.”—Ayibere 13:18.

Yesu mbandu ambote katusisila mu diambu ditadidi kala nkwa ziku. Kasikil’owu, vava Kayafa wa ngang’ambuta kavova vo: “Idisisi e ndofi muna nkumbu a Nzambi amoyo, utuvovesa kana vo ngeye i Kristu wa Mwan’a Nzambi!” Yesu wasonga e ziku yo kuyisunzula vo yandi i Masia. Wavova e ludi kana una vo wazaya wo vo mimbanda-banda bekumvunina mambu yo kunzengela tumbu kia lufwa.—Matai 26:63-67.

Adieyi tuvova mu kuma kieto? Nga tusonga vo tu akwa ziku avo tuvunini yovo sweka maka mambu wau vo nluta dikututwasila?

Dilenda kala diampasi mu kala nkwa ziku mu lumbu yayi yambaninu yazala yo wantu bena vo “akwa kizola, minzol’a nzimbu.” (2 Timoteo 3:2) Vava vebwanga mpasi za nzimbu yovo kondwa e salu, ayingi beyindulanga vo ke diambi ko mu yiya, vuna yovo vanga mambu mankaka malembi songa. Wau vo e ngindu za mpila yayi zasayana mu nza yawonso, ayingi bebanzanga vo muna vua nzimbu bafwete vuna. Kana nkutu akaka muna Akristu bebakanga nzengo zambi. Muna kuma kia “ndandu za lembi songa,” beyivisanga nkumbu au ambote muna nkutakani.—1 Timoteo 3:8; Tito 1:7.

Kansi, Akristu ayingi betangininanga Yesu. Bazeye wo vo o tanginina e fu ya Nzambi, disundidi o mfunu ke mu konso kimvuama ko. E kiaki i kuma aleke bena vo Akristu ke bevuninanga ko vava bevanganga kizame kuna sikola kimana basiwa va fulu kiantete. (Ngana 20:23) O kala nkwa ziku ke ntangwa zawonso ko ditwasanga nluta nze dina diabwila Haykanush. Kana una vo i wau, o kala nkwa ziku i diau diyangidikanga Nzambi. Dikutusadisanga  mu kala ye ntona zavelela zina vo i lekwa kiantalu kikilu.

E nona kia Gagik, kisonganga e ziku kia diambu diadi. Wavova vo: “Vitila yakituka Nkristu, mu kompani dianene yasadilanga. O mfunu a kompani diadina, kazolanga futa mpaku ko. Kasonekanga nluta miawonso ko miabakanga e kompani diandi. Wau vo mfidi a kompani yakala, diavava vo yawizananga y’awana balombanga e mpaku kimana balembi zayisa e nzimbu zaswekanga e kompani. Muna kuma kiaki, yazayakana vo munkondwa ziku. Vava yalongoka e ludi, yabaka e nzengo za yambula sadila mu kompani diadina, kana una vo nzimbu zayingi yafutwanga. Muna kuma kiaki, yayantika sala salu kia mono mosi. I bosi, yasonekesa e kompani diame kwa luyalu yo futa e mpaku zawonso balombanga.”—2 Korinto 8:21.

Gagik wavova vo: “E nzimbu zina yabakanga zakuluka mu tezo kia bula kati. Muna kuma kiaki, diampasi kikilu diakala mu lunga-lunga esi zo ame. Kansi o wau, kiese imonanga. Ngina ye ntona zavelela vana ndose a Yave. Isonganga mbandu ambote kwa wan’ame wole amakala. Vana ntandu, itambulanga malau mayingi ma salu muna nkutakani. Owau, nzayakene vo i nkwa ziku kw’akwa mpaku ye kw’awana isalanga yau.”

Yave ozolanga awana bekunkembelelanga yo tanginina fu yandi, kumosi ye ziku. (Tito 2:10) Vava tuvanganga wo, Yave osianga nsilu wa kutusadisa. Wavumunwina Davidi wa Ntinu mu soneka vo: “Toko yakala, se ndunuvini; kansi kiamona nsongi wayambuka ko, yovo mbongo andi yavava dia.”—Nkunga 37:25.

E nona kia Rutu wa nkwa kwikizi kisonganga e ziku kia mvovo miami. Vana fulu kia bembola Naomi wau vo nunu kakala, kuna kwikizi kiawonso Rutu walanda Naomi wa ngudi andi a longo. Rutu wayenda kuna Isaele kuna kadi sambidila Nzambi aludi. (Rutu 1:16, 17) Nkwa ziku kakala ye wayivana muna salu kia wonzolola, nkubika yasikidiswa muna Nsiku mu kuma kia asukami. Nze dina diabwila Davidi mu mvu mialanda, Yave kabembola Rutu yo Naomi ko. (Rutu 2:2-18) Mayingi kavanga mu kuma kia Rutu, ke kumvana kaka madia ko. Wansola mu kala mosi muna luvila lwa Davidi wa Ntinu luna lwawutukila Masia wasilwa nsilu.—Rutu 4:13-17; Matai 1:5, 16.

Dilenda kala diampasi kwa selo yankaka ya Yave mu vua nzimbu zafwana mu lungisa e nsatu zau za lumbu ke lumbu. Vana fulu kia vuna mu baka e nzimbu mu nzaki, besalanga ye fululu kiawonso. Muna mpila yayi, besonganga vo e fu ya Nzambi, nze ziku, isundidi o mfunu ke mu konso kimvuama ko.—Ngana 12:24; Efeso 4:28.

Nze Rutu, Akristu mu nza yawonso bekwikilanga vo Yave una yo nkuma wa kubasadisa. Bebundanga e vuvu muna Ndiona wasia o nsilu vo: “Kikuyambula nkutu ko, ngatu kubembola.” (Ayibere 13:5) Yave osonganga vo olenda sadisa awana besonganga ziku muna mambu mawonso. Olungisanga o nsilu kasia wa lungisa e nsatu za selo yandi.—Matai 6:33.

Dialudi vo wantu balenda badikila diamante ye lekwa yankaka vo yau isundidi o mfunu. Kansi, tuna ye vuvu vo Se dieto kuna zulu otoma yangalelanga e fu yambote tusonganga, nze kala nkwa ziku, lutila konso matadi mantalu.