1, 2. Nkia ungunza una mu Nkand’a Nzambi uyikanga wokela kwa nkangu a Nzambi?

MU NZA yawonso, vena ye nkubika ina yo wantu bezolanga Yave yo kunsadila. Wantu awaya i Mbangi za Yave. Kana una vo bevanganga vilwa, Yave osadilanga mwand’andi avelela muna fila nkangu andi. Yambula twazaya una kesambulwilanga nkangu andi.

² Muna mvu wa 1914, buka kiakete kaka kia wantu basambilanga Yave. Kansi, Yave wasambula e salu basalanga kia samuna nsangu zambote. Muna kuma kiaki, mazunda ye mazunda ma wantu balongoka e ludi kia Nkand’a Nzambi yo kituka Mbangi zandi. Yave wayika lunungunuku lwalu vava kavova vo: “Ona wandwelo okituka s’ezunda, ona wankè se zula kiangolo: omono Yave nzabula dio muna ntangw’andi.” (Yesaya 60:22) O unu, tumonanga e ndungan’a ungunza wau. Nkangu a Yave una nze zula kiampwena. Mu nza yawonso, vena ye nsi zayingi zina vo lutangu lwa  nkangu a Yave lusundidi lutangu lwa nkangu a nsi zazi.

3. Aweyi selo ya Nzambi besongelanga o zola?

³ Mu lumbu yayi yambaninu, Yave osadisanga nkangu andi mu kumika o zola kwa muntu yo nkw’andi. Wau vo “Nzambi i zola,” o nkangu andi bekuntangininanga. (1 Yoane 4:8) Yesu wakanikina alandi andi vo ‘bazolaziananga.’ Wabavovesa mpe vo: “Muna wau i bezayila o wantu awonso vo nu alongoki ame​—avo nzolani nuna yau.” (Yoane 13:34, 35) O unu, selo ya Yave besonganga o zola kwaku kwa muntu yo nkw’andi kana nkutu vava vebwanga e vita. Kasikil’owu, muna vit’anzole ya nz’amvimba, tezo kia mafuku 55 dia wantu bavondwa. Kansi, o nkangu a Yave ke bavonda muntu ko muna vita yayina. (Tanga Mika 4:1, 3.) Ediadi diabasadisa mu lembi kala akwa “kuma muna menga ma wantu awonso.”​—Mavangu 20:26.

4. Ekuma o wokela kwa nkangu a Yave kwinina kwa sivi?

⁴ Nkangu a Nzambi wakinu wokela kana una vo besiwanga kitantu kwa Satana. Yandi i “nzambi a tandu kiaki.” (2 Korinto 4:4) Satana una ye wisa muna nkubika za tuyalu twa nza yayi kumosi ye nzila za amwangi a nsangu. Satana osadilanga nzila zazi mu vava ningamesa e salu kia samuna e nsangu zambote. Kansi, kalendi kio ningamesa ko. Satana ozeye wo vo kolo kiandwelo kaka kasidi kiau. Muna kuma kiaki, ovanganga mawonso mu kutusima twalembi sambila Yave.​—Lusengomono 12:12.

5. Ezak’e ntangwa, ekuma akaka balenda vangila diambu dilenda kutufungisa makasi? (Tala fwaniswa kuna lubantiku lwa longi.)

⁵ Selo ya Yave belongwanga o mfunu wa zola Nzambi ye wantu ankaka. Yesu wavova vo: “Zola Yave wa Nzambi aku muna nsi a ntim’aku yawonso, muna kiwuntu kiaku kiawonso ye muna nyindu aku wawonso.’ I wau wuwu i nkanikinu anene, ye wantete mpe. Owu wanzole ufwanane y’owu wantete, i wau wuwu: ‘Zola nkw’aku wauna okuyizolelanga.’” (Matai 22:35-39) Kansi, Nkand’a Nzambi usonganga vo wantu awonso basambukila sumu dia Adami. (Tanga Roma 5:12, 19.) Muna kuma kiaki, akaka muna nkutakani balenda vova yovo vanga diambu dilenda kutufungisa makasi. Avo diadi ditubwididi, adieyi tuvanga? Nga tusiamisa zola kweto muna Yave? Nga tusikila ye kwikizi muna yandi yo nkangu andi? Nkand’a Nzambi uyikanga selo yankaka ya Yave bavova yovo bavanga diambu diakendeleka akaka. Yambula twabadika dina tulenda longoka muna dina diababwila.

6. Adieyi Ele kavanga ko kwa wan’andi?

⁶ Kasikil’owu, Ele ngang’ambuta kakala muna Isaele. Kansi, wan’andi wole bakolamenanga nsiku mia Yave. Nkand’a Nzambi uvovanga vo: “O wan’a Ele yimpumbulu kwau; ke bazeye Yave ko.” (1 Samuele 2:12) Ele wazaya wo vo wan’andi mambu mambi bavanganga. Kana una vo i wau, kabavananga tumbu kiasikididi ko. Kuna kwalanda, Yave watumba Ele yo wan’andi wole. I bosi, Yave kayambula diaka ko vo wan’a Ele basala e salu kia kinganga. (1 Samuele 3:10-14) Kele vo wazingila muna tandu kia Ele yo zaya vo wayambulwilanga wan’andi bavanga oma mambi, nga wadi tá sakuba? Nga wadi kulula lukwikilu lwaku muna Yave  yo yambula kunsadila?

7. Nkia masumu mampwena kavanga o Davidi? Adieyi Nzambi kavanga?

⁷ Davidi fu yayingi yambote kakala yau. E kiaki i kuma Yave katoma kunzolelanga. (1 Samuele 13:13, 14; Mavangu 13:22) Kansi, Davidi diambu dimosi diambi kavanga. Vava Ureya kakala muna vita, Davidi wavukana yo Bate-seba wa nkaz’andi yo kunyimitisa. Davidi kazola ko vo wantu ankaka bazaya dina kavanga. Muna kuma kiaki, wabokelesa Ureya kuna nzo andi yo kunkomekena vo kavutuka kuna nzo. Davidi wabanza vo Ureya ovukana yo Bate-seba kimana o wantu bayindula vo Ureya i se dia mwana ndiona. Kansi, Ureya kayenda ko kuna nzo andi. Muna kuma kiaki, Davidi wasikidisa vo Ureya kavondwa kuna vita. Muna kuma kia masumu mampwena kavanga, Davidi ye esi nzo andi mpasi zayingi bamona. (2 Samuele 12:9-12) Kana una vo i wau, Yave wamfwila e nkenda yo kunloloka. Wazaya wo vo Davidi wazolanga vanga oma mansongi. (1 Ntinu 9:4) Kele vo wazingila muna tandu kiakina, aweyi wadi mona mu kuma kia dina Davidi kavanga? Nga wadi yambula sadila Yave?

8. (a) Aweyi Petelo wa ntumwa kalembi lungisila mvovo miandi? (b) Vava Petelo kavanga o vilwa, ekuma Yave kakwamanena kumvana yiyekwa?

⁸ E nona kiankaka kina muna Nkand’a Nzambi i kia Petelo wa ntumwa. Yesu wansola kimana kakala se ntumw’andi. Kansi, ezak’e ntangwa Petelo wavovanga  yo vanga mambu mambi. Kasikil’owu, Petelo wavova vo kalendi bembola Yesu ko kana nkutu vo akaka bambembwele. (Maku 14:27-31, 50) Kansi, vava Yesu kakangwa, e ntumwa zandi zawonso, kumosi yo Petelo, bambembola. I bosi, mu nkumbu ntatu, Petelo wavakula o nkalu vo kazeye Yesu ko. (Maku 14:53, 54, 66-72) Kansi, Petelo wakendalala kikilu mu kuma kia dina kavanga. Yave wanloloka yo kwamanana kumvana yiyekwa. Kele vo wakala u nlongoki muna tandu kiakina yo zaya dina Petelo kavanga, nga wadi kwamanana bunda e vuvu muna Yave?

9. Ekuma okwikidilanga vo Nzambi mansongi kaka kevanganga?

⁹ Muna nona yayi yawonso, tumwene vo akaka muna selo ya Yave mambu mambi bavanga yo kendeleka akaka. Avo diadi divangamene o unu, adieyi ovanga? Nga oyambula kwenda muna tukutakanu yovo bembola Yave yo nkangu andi? Nga osungamena vo Yave nkwa nkenda ona ovingilanga vo muntu kaviluka o ntima? Kansi, dilenda kala vo muntu ovangidi sumu diampwena ye kazolele viluka ntima ko. Nga okala ye vuvu vo Yave ozeye diambu diadi ye osinga dio singika muna ntangw’andi? Avo divuilu o mfunu, olenda nkutu vaikisa muntu ndioyo muna nkutakani. Nga okwikilanga vo Yave mansongi kaka kevanganga?

10. Adieyi Yesu kavanga vava Yuda yo Petelo bavanga o vilwa?

¹⁰ Nkand’a Nzambi uyikanga wantu ayingi basikila ye kwikizi muna Yave ye nkangu andi kana una vo akaka muna yau bavanganga mambu mambi. Yesu mbandu ambote kasonga. Vitila kasola ntumwa zandi 12, Yesu wasamba fuku wamvimba mu lomba lusadisu lwa Se diandi. Kansi, mosi muna yau, Yuda wa mwisi Kereote, wanyekola kwa mbeni. Vana ntandu, Petelo wa ntumwa wavakula nkalu vo kazeye Yesu ko. (Luka 6:12-16; 22:2-6, 31, 32) Yesu kafungila Yave makasi ko ngatu alongoki ankaka vava akaka muna yau bankendeleka. Yesu wasiamisa ngwizani andi yo Se diandi yo kwamanana kunsadila ye kwikizi kiawonso. Muna kuma kiaki, Yave wamfula muna mafwa. Kuna kwalanda, wantumbika se Ntinu a Kintinu kuna zulu.​—Matai 28:7, 18-20.

11. Adieyi diasakulwa muna Nkand’a Nzambi mu kuma kia selo ya Yave mu lumbu yeto?

¹¹ E mbandu a Yesu ikutulonganga o mfunu wa sikila ye kwikizi muna Yave yo nkangu andi. Tuvuidi kuma yayingi tufwete wo vangila. Tulenda kala ye ziku vo Yave ofilanga selo yandi mu lumbu yayi yambaninu. Okubasadisanga mu samuna e ludi mu nza yawonso. Yau kaka besalanga e salu kiaki. Mana Yave kekubalonganga  mekubasadisanga mu kala mu kintwadi ye kiese. Yave wasakula diambu diadi vava kavova vo: “E ntaudi zame beyimbila muna wete wa ntima.”​—Yesaya 65:14.

12. Aweyi tufwete badikilanga vilwa wa wantu ankaka?

¹² Tuna ye kiese wau vo Yave okutufilanga yo kutusadisa mu vanga mambu mayingi mambote. Nswaswani yo yeto, o wantu mu nza ya Satana ke bena ye kiese ko ngatu vuvu kiasikila kia kusentu. Muna kuma kiaki, dia uzowa kikilu dia bembola Yave yo nkangu andi mu kuma kia mpangi ovovele yovo vanga diambu diambi. Tufwete sikila ye kwikizi muna Yave yo lemvokela luludiku lwandi. Tufwete mpe longoka una tufwete badikilanga vilwa wa wantu ankaka.

13, 14. (a) Ekuma tufwete kadilanga ye luzindalalu muna mpangi zeto? (b) Nkia nsilu tufwete sungamenanga?

¹³ Adieyi ofwete vanga avo mpangi ovovele yovo vanga diambu dikendelekele? Nkand’a Nzambi uvananga longi edi: “Kusazuki o tutis’ekudi ko; kadi ekudi dina muna tulu ya mazowa.” (Kimpovi 7:9) Yeto awonso tu wantu alembi lunga, tuvanganga mpe vilwa. Muna kuma kiaki, ke tufwete vingila ko vo mpangi zeto bavanganga kaka oma mambote. Ke diambote ko dia kwamanana yindula e mbi batuvangidi. Avo tuvangidi wo, tuvidisa kiese kieto kia sadila Yave. Tulenda nkutu yoya muna lukwikilu yo bembola nkubik’a Yave. Muna mpila yayi, ke tusadila diaka Yave ko ngatu kala ye vuvu kia zingila muna nz’ampa.

¹⁴ Adieyi dilenda kusadisa mu kwamanana sadila Yave ye kiese avo akaka bavangidi diambu dikendelekele? Sungamenanga o nsilu owu wa lufiaulwisu: “Nsem’ezulu diampa ye nz’ampa: oma mantete ke meyindulwa ko, ngatu kota muna ntima.” (Yesaya 65:17; 2 Petelo 3:13) Yave okuvana nsambu zazi zawonso avo osikidi ye kwikizi muna yandi.

15. Adieyi Yesu kavova tufwete vanga vava akaka bekutuvanganga e mbi?

¹⁵ Twakinu vingila e nz’ampa. Muna kuma kiaki, avo mpangi utukendelekele, tufwete yindulanga dina Yave kazolele vo twavanga. Kasikil’owu, Yesu wavova vo: “Avo nulolokele wantu makuzuka mau, o Se dieno kuna zulu okunuloloka mpe; diau dimosi, avo ke nulolokele wantu makuzuka mau ko, o Se dieno mpe ke loloka makuzuka meno ko.” Vava Petelo kayuvula Yesu kana vo tufwete lolokanga muntu “nkumbu nsambwidi,” Yesu wavutula  vo: “Kivovese ko vo yamuna nkumbu nsambwadi, kansi yamuna nkumbu 77.” Yesu watulonga vo tufwete lolokanga akaka.—Matai 6:14, 15; 18:21, 22.

16. Nkia mbandu ambote kasonga o Yosefe?

¹⁶ E mbandu a Yosefe ikutulonganga dina tufwete vanga avo akaka batuvangidi e mbi. Yosefe yo mbunzi andi i wana wole kaka Yakobo kawuta yo Rakele. Yakobo wakala diaka yo wana kumi, kansi Yosefe katoma zolanga muna yau awonso. Mpangi zandi bamwenanga Yosefe kimpala. Wau vo ke banzolanga ko, banteka muna ubundu yo natwa kuna Ngipito. Una vavioka mvu miayingi, o ntinu a Ngipito wasola Yosefe mu kala landi kiandi muna nsi yawonso kadi wasivikanga e salu kiambote kasalanga o Yosefe. Kuna kwalanda, mpangi za Yosefe bayenda sumba madia kuna Ngipito mu kuma kia mvengele. Vava bamona Yosefe, ke banzayidila ko, kansi yandi wabazayidila. Kana una vo mbi bamvanga, kabavana tumbu ko. Kansi, wabatonta mu zaya kana vo basoba kikilu e fu yau. Vava Yosefe kabakula vo mpangi zandi basoba e fu yau, wakisunzula vo nleke au. Kuna kwalanda, wabafiaulwisa yo kubavovesa vo: “Ke numoni wonga ko: omono ikunuyundula ye yingyanangyana.”​—Etuku 50:21.

17. Adieyi i kani diaku avo akaka bavangidi e mbi?

¹⁷ Sungamenanga vo yeto awonso vilwa tuvanganga. Ongeye mpe olenda kendeleka akaka. Muna kuma kiaki, avo diambu diambi ovangidi kwa muntu, landa luludiku lwa Nkand’a Nzambi. Unlomba e ndoloki yo vutulwisa luvuvamu. (Tanga Matai 5:23, 24.) Kiese tumonanga vava akaka bekutulolokanga. Yeto mpe tufwete vanganga diau dimosi. Muna Kolosai 3:13 tutanganga vo: “Nuvezananga mambu yo loloka muntu yo nkw’andi kuna mvevo, kana nkutu vo muntu obakidi nkw’andi diambu. Wauna Yave kanulolokela kuna mvevo, oyeno mpe i wau nufwete vanga.” Avo tuzolanga kikilu mpangi zeto, ke tukubalanda kunda ko mu kuma kia diambu batuvanga. (1 Korinto 13:5) Avo tulolokele akaka, Yave mpe okutuloloka. Muna kuma kiaki, vava akaka bekutuvanganga e mbi, tufwete kubalolokanga nze una Yave wa Se dieto kekutulolokelanga.​—Tanga Nkunga 103:12-14.