1, 2. Nkia diambu konso muntu mu yeto kafwete zaya? (Tala fwaniswa va ntandu.)

NZE una twalongokele muna longi diaviokele, Nkadi ampemba wavova vo Yave kafwana ko mu yala wantu. Wavova vo Yave ke nyadi ambote ko, wantu bekala ye kiese avo bakiyadidi yau kibeni. Nga Satana ndungidi kena yau? Yindula kele vo wantu bakiyala yau kibeni yo zinga yakwele mvu. Nga kiese kiayingi badi kala kiau lutila kina badi mona kele vo bayalwa kwa Nzambi? Nga ongeye kiese wadi kala kiau kele vo wazinga yakwele mvu lembi yalwa kwa Nzambi?

² Ke vena muntu ko olenda vana e mvutu za yuvu yayi vana fulu kiaku. Konso muntu mu yeto kafwete toma yindulanga e yuvu yayi. I bosi, tufwete songanga vo luyalu lwa Yave lusundidi o wete yo yikama lo ye nsi a ntim’eto yawonso. Tuna ye ziku kia diambu diadi mu kuma kia mana tutanganga muna Nkand’a Nzambi. Yambula twafimpa dina Nkand’a Nzambi uvovanga mu kuma kia wisa kena kiau o Yave kia yala nsema wawonso.

3. Ekuma Yave kafwanukini kala Mfumu a nsema wawonso?

³ Yave kaka i Mfumu a nsema wawonso kadi yandi i Nzambi mpungu-ngolo ye Mvangi. (1 Tusansu 29:11; Mavangu 4:24) Muna mona-meso kimosi kia zulu, 144.000 ana beyala yo Kristu bavova vo: “E Yave wa Nzambi eto, ngeye ofwene tambula nkembo yo zitu ye ngolo, e kuma kadi ngeye wasema lekwa yawonso, muna luzolo lwaku inina yo semwa.” (Lusengomono 4:11) Wau vo Yave wavanga lekwa yawonso, yandi una ye wisa kia yala vangwa yawonso, kiakala vava ntoto yovo kuna zulu.

4. Ekuma o nswa wa kuyisolela ke ufwete kutufidila ko mu kolamena Nzambi?

⁴ Satana kavanga kana lekwa kimosi ko. Muna kuma kiaki, kafwanukini kala nyadi a nza ko. Satana ye akazi antete babembola Yave vava bakolamena kimfumu kiandi. (Yeremiya 10:23) Nga o nswa wa kuyisolela bakala wau wafwana kubafila mu bembola luyalu lwa Yave? Ve. O nswa wa kuyisolela uvananga muntu e lau dia sola yo baka e nzengo, kansi ke ufwete kumfila ko mu kolamena Yave wa Mvangi. Kieleka, o kolamena Nzambi i sadila o nswa wa kuyisolela mu mpila yambi. Yeto wantu, luyalu lwa Yave tuvuidi o mfunu yo luludiku lwandi.

5. Ekuma nzengo za Nzambi zikadilanga kaka zambote?

⁵ Badika diambu diankaka disonganga e kuma Yave kafwanukini yala e nza. Yave osadilanga e wisa kiandi mu mpila yambote. Okutuvovesanga vo: “Mono i Yave on’osonganga walakazi ye ndungidi yo unsongi ova nza: kadi muna mama nyangalelanga.” (Yeremiya 9:24) Yave kavuidi mfunu a nsiku mia wantu ko kimana miansadisa mu baka e nzengo zambote. Kansi, wasikidisa nsiku mia nkal’ambote. Muna unsongi wandi, Yave wavana nsiku kwa wantu. Ntozi a nkunga wavova vo: “O unsongi ye ndungidi i nkubilw’a kunda kiaku.” Muna kuma kiaki, konso nsiku, nkanikinu yovo nzengo zitukidi kwa Yave, zambote kaka zikalanga. (Nkunga 89:14; 119:128) Satana wavova vo Yave ke Nyadi ambote ko. Vana ntandu, Satana kalendi twasa unsongi ko ova nza.

6. Adieyi disonganga vo Yave kaka una ye wisa kia yala?

⁶ E diambu diankaka disonganga e kuma Yave kafwanukini yala, i dia sia vo una yo zayi ye ngangu za lunga-lunga o nsema. Tumonanga e ziku kia diambu diadi mu mpila ina kavanina Mwan’andi e ngangu za wuka yimbevo ina madotolo ke balendanga wuka ko. (Matai 4:23, 24; Maku 5:25-29) Kana una vo ediadi diasivi kwa yeto, kuna kwa Yave ke diakala diasivi ko. Yave otomene zaya una usadilanga e nitu a muntu ye olenda wuka konso fulu kina ye kimbevo. Olenda mpe fula mafwa yo kakidila sumbula yalembi bwa.

7. Adieyi disonganga vo e ngangu za Yave zisundidi e ngangu za wantu mu nza ya Satana?

 ⁷ E nza yayi iyalwanga kwa Satana ke ilendi twasa luvuvamu ko, kiakala kwa wantu bezingilanga mu nsi mosi yovo kwa wantu a nsi zaswaswana. Yave kaka una ye ngangu za twasa luvuvamu mu nza. (Yesaya 2:3, 4; 54:13) Tumonanga nze una wamona Paulu wa ntumwa vava kavova vo: “Ekwe sina kwa umvuama, ngangu yo zayi wa Nzambi! E mfundisa zandi zilembi fimpakana, e nzila zandi zilembi bakulwa!”—Roma 11:33.

8. Aweyi omonanga mu mpila ina Yave keyadilanga?

⁸ Nze una tuzeye, Nkand’a Nzambi utoma songanga vo Yave una ye wisa kia yala. Usonganga mpe e kuma kenena Nyadi ambote. Kimosi muna kuma i kia sia vo mu zola keyadilanga. E ngwizani eto yo yandi iwokelanga vava tuyindulanga vo Yave nkwa “nkenda ye nsambu, nkwa ntim’evundu, o mwingi muna walakazi ye ziku.” (Luvaiku 34:6) Nzambi okutuvananga o zitu yo kutuvua o mfunu. Okutulunga-lunganga lutila nkutu yeto kibeni. Nkadi ampemba wavova vo Yave lekwa yambote keswekelanga selo yandi. Kansi, ediadi dialuvunu. Nzambi wavana nkutu Mwan’andi ona ketoma zolanga kimana twakala ye vuvu kia zinga yakwele mvu.—Tanga Nkunga 84:11; Roma 8:32.

9. Aweyi tuzayidi wo vo Nzambi olunga-lunganga konso muntu mu yeto?

⁹ Yave ozolanga nkangu andi wawonso. Kansi, osianga mpe sungididi muna konso muntu mu yeto. Yindula dina diavangama kuna nz’ankulu. Mu tezo kia nkama tatu za mvu, Yave wasadila afundisi mu fila nkangu andi yo kubasadisa mu sunda atantu au. Muna kolo kiaki kiawonso, Yave wasianga sungididi muna wantu. Mosi muna yau i Rutu. Kakala mwisi Isaele ko, lekwa yayingi kayambula kimana kakituka selo kia Yave. Yave wasenda Rutu kadi wasolola yakala yo wuta mwana. Vana ntandu, mwan’a Rutu wakituka se mosi muna luvila lwawutukila Masia. Yave wasonekesa mpe lusansu lwa Rutu muna Nkand’a Nzambi, mu nkanda uyikilwanga muna nkumbu andi. Aweyi obenze kemona o Rutu vava kefuluka yo zaya e mambu mama?—Rutu 4:13; Matai 1:5, 16.

10. Ekuma tulenda vovela vo Yave ke yadilanga mu mpila yambi ko?

¹⁰ Yave ke yadilanga mu mpila yambi ko. Awana bekunlemvokelanga mu luvuvamu ye kiese bena. (2 Korinto 3:17) Davidi wavova mu kuma kia Yave vo: “Zitu yo nkembo wina vana kena. O nkuma ye kiese wina vana kalu kiandi.” (1 Tusansu 16:7, 27) Ntozi a nkunga wasoneka vo: “Akwa nsambu o nkangu uzeye yaya kiankembo: E Yave, muna ntemo a ndose aku i bekangadila. Muna nkumbu aku bemona kiese lumbu ke lumbu: Muna unsongi waku i betundalela.”—Nkunga 89:15, 16.

11. Ekuma tulenda kadila ye ziku vo kimfumu kia Yave kisundidi o wete?

 ¹¹ Avo tubadikidi wete wa Yave, tumona vo luyalu lwandi lwambote kikilu. Tumona nze una kamona o ntozi a nkunga ona wavova kwa Nzambi vo: “Lumbu kimosi muna yanzala kiaku kisundidi ezunda o wete.” (Nkunga 84:10) Wau vo Yave watuvanga, ozeye kikilu dina dilenda kututwasila e kiese. Okutuvananga lutila nkutu ina tuvuidi o mfunu. Konso diambu Yave kekutulombanga vo twavanga i mu kuma kia wete dieto. Kana nkutu vo divava vo twayambula maka mambu, tukala ye kiese avo tulemvokele Yave.—Tanga Yesaya 48:17.

12. Nkia kuma kiantete kikutufilanga mu yikama e kimfumu kia Yave?

¹² Muna Nkand’a Nzambi tulongokanga vo kuna mfoko a Luyalu lwa Kristu lwa Zunda dia Mvu, akaka bekolamena kimfumu kia Yave. (Lusengomono 20:7, 8) Adieyi dikubafila mu kolama? Muna kolo kiakina, Nkadi ampemba ovava fila wantu mu vanga oma mambi. I diau kevanganga tuka kolo. Nanga ovava diaka kwikidisa wantu vo balenda kwau zinga yakwele mvu kana nkutu vo ke balemvokele Yave ko. Ediadi ke dilendi vangama ko. Kansi, tufwete kiyuvula: ‘Nga ikwikila mu luvunu lwalu?’ Avo tuzolanga kikilu Yave yo kala ye ziku vo Nzambi ambote ye una ye wisa kia yala nsema wawonso, ke tukwikila mu luvunu lwalu ko. Tukala ye kani dia yikama kimfumu kia Yave eki kiyadilanga kuna zola.

13. Aweyi tuyikamenanga kimfumu kia Nzambi vava tukuntangininanga?

¹³ Nze una tumwene, Yave una ye wisa kia yala. E mpila keyadilanga yambote kikilu. Tufwete yikamanga kimfumu kiandi ye kwikizi kiawonso. Tuyikamanga kio vava tusikilanga ye kwikizi muna Yave yo kuntanginina. Vava tusianga e ngolo za vangila mambu muna mpila ina iyangidikanga Yave, tusonganga vo tuzolanga luyalu lwandi yo yikama lo.—Tanga Efeso 5:1, 2.

14. Aweyi mase ye akuluntu balenda tanginina Yave?

¹⁴ Muna Nkand’a Nzambi tulongokanga vo Yave osadilanga nkum’andi kuna zola. Mase ye akuluntu ana bezolanga e kimfumu kia Yave bekuntangininanga yo lembi kala akwa ntima miambâdi yovo tumina akaka. Paulu wa ntumwa wavanganga mawonso mu tanginina Nzambi yo Mwan’andi. (1 Korinto 11:1) Kafusulwisanga akaka nsoni ko ngatu kubakomekena mu vanga oma mambote. Kansi, wabakasakesanga kuna ngemba zawonso mu vanga oma mambote. (Roma 12:1; Efeso 4:1; Filemone 8-10) Muna mpila yayi, Paulu watangininanga Yave. Vava tusonganga zola kw’akaka, kimfumu kia Yave tuyikamanga.

15. Aweyi tuyikamenanga luyalu lwa Yave vava tuzitisanga awana bena ye wisa?

¹⁵ Tuyikamanga mpe kimfumu kia Yave vava tuzitisanga yo lemvokela awana kavana e wisa. Kana nkutu vo ke tubakwidi ko yovo tambulwila e nzengo babakidi, tufwete kubayikama. Ediadi diaswaswana  kikilu ye dina wantu a nza bevanganga. Kansi, i diau tuvanganga vava tutambulwilanga vo Yave kakala Nyadi eto. (Efeso 5:22, 23; 6:1-3; Ayibere 13:17) Ediadi kiese dikututwasilanga kadi Nzambi wete dieto kevavanga.

16. Aweyi e nzengo tubakanga zilenda songela vo tuyikamanga kimfumu kia Nzambi?

¹⁶ Tulenda mpe yikama kimfumu kia Nzambi muna nzengo tubakanga. Yave ke kutuzayisanga ko dina tufwete vanga muna konso diambu. Kansi, okutuzayisanga e ngindu zandi. Ediadi dikutusadisanga mu zaya dina tufwete vanga. Kasikil’owu, ke Yave ko ozayisanga Akristu e mvuatu mina bafwete vuata ye mina ke bafwete vuata ko. Kansi, okutuvovesanga vo twavuatanga mvuatu mialuzitu mina misonga vo tu Mbangi zandi. (1 Timoteo 2:9, 10) Yave ozolele vo twayindulanga una nzengo zeto zilenda vanga kw’akaka. (1 Korinto 10:31-33) Vava tubakanga nzengo zina ngwizani ye ngindu za Yave, tusonganga vo tuzolanga luyalu lwandi yo yikama lo.

17, 18. Aweyi akazi balenda songela vo beyikamanga kimfumu kia Yave?

¹⁷ Badika una akazi bena vo Akristu balenda yikamena kimfumu kia Yave. Akazi balenda wanana ye mambu muna longo mana ke bayindulanga ko. Dilenda kala vo mambu mampasi benuananga mau. Avo i  wau, balenda vua nluta muna yindulanga una Yave kakadila ye zula kia Isaele kuna nz’ankulu. Yave wakibadikilanga nze yakala kuna kwa nkangu andi. (Yesaya 54:5; 62:4) E zula kia Isaele nkumbu miayingi kiakendelekanga Yave. E ngwizani vana vena Yave ye zula kia Isaele yakala nze muntu una mu longo lwampasi. Kansi, ke vana vau ko Yave kabembola Isaele. Wabalolokanga yo lungisa nsilu mina kabasila.—Tanga Nkunga 106:43-45.

¹⁸ Akazi bena vo Akristu ana bezolanga Yave bevavanga kuntanginina. Kana nkutu vo ntantani bena zau muna longo, belandanga nkanikinu mia Nkand’a Nzambi mu vava singika e ntantani. Bazeye wo vo kuna kwa Yave, o nsilu a longo ke diambu diakete ko. Ozolanga vo yakala yo nkento ‘balaminina’ muntu yo nkwandi. O tá zumba i kuma kimosi kaka kiyikwanga muna Nkand’a Nzambi kilenda fila akazi mu vonda longo yo sompa muntu ankaka. (Matai 19:5, 6, 9) Vava Akristu bevanganga mawonso balenda mu kala ye longo lwasikila, beyikamanga kimfumu kia Yave.

19. Adieyi tufwete vanga avo vilwa tuvangidi?

¹⁹ Yeto awonso tu wantu alembi lunga, ezak’e ntangwa tuvanganga mambu mekendelekanga Yave. Yave ozeye wo, ekiaki i kuma kakubikila kimenga kia Kristu kia lukûlu. Avo tuvangidi edi diambi, tufwete lombanga e ndoloki kwa Yave. (1 Yoane 2:1, 2) Vana fulu kia mona kaka e ntantu mu kuma kia vilwa tuvangidi, tufwete vava longoka diambu muna vilwa tuvangidi. Tufwete finama Yave ona olenda kutuloloka yo kutusadisa kimana twakwamanana kunsadila.—Nkunga 103:3.

20. Ekuma tufwete yikamena kimfumu kia Yave owau?

²⁰ Muna nz’ampa, awonso beyalwa kwa Yave yo longoka e nzila zandi zansongi. (Yesaya 11:9) Kansi, kana nkutu owau, tulenda longoka una Yave kebadikilanga mambu ye una kazolele vo twavangilanga e mambu. Ke kolo ko, ke vekala diaka muntu ko ofidisa mpaka muna wisa kena kiau o Nzambi kia yala. Muna kuma kiaki, yambula twavanganga mawonso tulenda mu yikama kimfumu kia Yave muna kunlemvokelanga, kunsadila kuna kwikizi kiawonso yo sia ngolo za kuntanginina muna mawonso tuvanganga.