1, 2. (a) Mu nkia mpila e nza yayi inina yavambana? (b) Nkia yuvu tubakila e mvutu mu longi diadi?

MPANGI mosi ankento kuna Europa wavova vo:“Tuka muna kileke, mambu malembi songa kaka yamonanga. Muna kuma kiaki, kiazolanga kuyisia mu mambu ma luyalu lwa nsi eto ko. Yayikama e ngindu z’awana batelamenanga ayadi. Mu mvu miayingi, makangu mame kimpumbulu kakala.” Mpangi mosi ayakala ozingilanga kuna África wayika e kuma kavangilanga mavangu mansoki. Wavova vo: “Edi yakwikilanga vo e kanda diame disundidi makanda mankaka. Muna kuma kiaki, yakota mu buka kimosi kia mbumba. Twalongwanga vo twavondanga e mbeni zeto muna dionga, kana nkutu esi kanda dieto ana bakala mu buka yankaka.” Mpangi ankaka ankento ozingilanga kuna Europa wavova vo: “Ngindu zabendomoka yakala zau muna wantu. Yamenganga wantu a nsi zankaka yovo ana basambilanga mu mabundu mankaka.”

² O unu, wantu ayingi besonganga e fu kiaki nze ina yasonganga wantu tatu tuyikidi. Buka yayingi bevanganga mambu  mansoki muna vua e kimpwanza. Nkumbu miayingi, o wantu betantananga mu kuma kia mambu ma tuyalu. Mu nsi zayingi, o nkangu obangikanga wantu a nsi zankaka. Nze una wasakulwa muna Nkand’a Nzambi, wantu bakitukidi “minkondwa ngwizani” mu lumbu yayi yambaninu. (2 Timoteo 3:1, 3) Aweyi yeto Akristu tulenda tatidila e kintwadi kieto mu nza yayi yavambana? Tulenda longoka mayingi muna mbandu a Yesu. Vava kakala ova ntoto, o wantu bavambana mpe bakala muna mambu ma tuyalu. Mu longi diadi, tubaka e mvutu za yuvu tatu: Ekuma Yesu kayisila mu mambu ma tuyalu ko? Aweyi Yesu kasongela vo nkangu a Nzambi ke bafwete kuyisia mu mambu ma tuyalu ko? Aweyi Yesu katulongela vo ke tufwete vanga mambu mansoki ko?

3, 4. (a) Muna lumbu ya Yesu, adieyi Ayuda ayingi bavingilanga? (b) Aweyi e ngindu zazi zavanga kwa alongoki a Yesu?

³ Ayingi muna Ayuda ana Yesu kalonganga bavavanga vo bavevoka muna luyalu lwa Roma. E buka kimosi kia Ayuda kiayikilwanga vo Zelote, bafilanga nkangu mu kolamena ayandi. Ayingi muna yau balandanga muntu mosi wayikilwanga vo Yuda wa mwisi Ngalili, ona wazinga muna tandu kia Yesu. O Yuda masia aluvunu kakala ona wavukumuna wantu ayingi. Josefo wa nsoneki wa mwisi Yuda wavova vo: O Yuda wavovesa kwa Ayuda vo banuanisa esi Roma yo yikila awana batambulwilanga futa e mpaku vo “mazowa.” Kuna kwalanda, esi Roma bavonda Yuda. (Mavangu 5:37) Muna lungisa makani mau, akaka muna buka kia akolami bakituka akwa nsoki kikilu.

⁴ Ayingi muna Ayuda bavingilanga e ngiz’a Masia. Bayindulanga vo Masia wadi kubavevola muna luyalu lwa Roma yo kitula diaka Isaele se zula kiangolo. (Luka 2:38; 3:15) Ayingi muna yau bakwikilanga vo Masia osikidisa e kintinu muna Isaele. Kele vo e diambu diadi diavangama, Ayuda awonso ana bazingilanga mu fulu yankaka ova nza badi vutuka kuna Isaele. Lumbu kimosi, Yoane wa Mvubi wayuvula Yesu vo: “Ongeye i Ndiona okwiza, yovo wankaka tuvingila?” (Matai 11:2, 3) Nanga Yoane wakiyuvulanga kana vo wankaka osinga kwiza mu vuluza Ayuda. Kuna kwalanda, alongoki wole bawanana yo Yesu muna nzil’a Emau, kuna nim’a lufuluku lwandi. Bakala ye vuvu vo Yesu i ndiona wadi kûla Isaele. (Tanga Luka 24:21.) Ke vavioka kolo ko, antumwa bayuvula Yesu vo: “E Mfumu, nga mu ntangwa yayi ovutula kintinu kwa Isaele?”—Mavangu 1:6.

5. (a) Ekuma o nkangu a Ngalili bazolela vo Yesu kakala ntinu au? (b) Aweyi Yesu kasingikila e ngindu zau?

⁵ Ayuda bavingilanga vo Masia yandi wadi fokola e mpasi zau. Nanga kiaki i kuma o nkangu a Ngalili bazolela kitulwila Yesu se ntinu au. Bayindulanga vo Yesu nyadi ambote kekala. Yesu mpovi ambote kakala, wawukanga ambevo yo dikila wantu bakala ye nzala. O nkangu wasivika kikilu vava Yesu kadikila tezo kia 5.000 ma wantu. Yesu wabakula e ngindu bakala zau. Nkand’a Nzambi uvovanga vo: “O Yesu wau kazeye wo vo kwiza bekwiza, bambakila kuna kingolo kimana bantumbika se ntinu, okatukidi vo, wele diaka yandi mosi kaka kuna mongo.” (Yoane 6:10-15) Muna lumbu kialanda, o nkangu wavuvika o ntima. Muna kuma kiaki,  Yesu wabasasila vo e kani kayizila ke lungisa nsatu zau za nitu ko, kansi muna kubalonga oma ma Kintinu kia Nzambi. Wabavovesa vo: “Ke nusadila madia mana mekuyifwila ko, kansi madia mana mezingila yamuna moyo a mvu ya mvu kaka.”—Yoane 6:25-27.

6. Aweyi Yesu kasongela vo kazola kuyisia mu mambu ma tuyalu twa nza yayi ko? (Tala e fwaniswa kuna lubantiku lwa longi.)

⁶ Ekolo kiafinamanga lufwa lwandi, Yesu wabakula vo akaka muna alandi andi bayindulanga vo mu ntangwa yayina kadi yantika yala se ntinu muna Yerusaleme. Yesu wabatela e kingana kia mina muna kubasadisa babakula vo dina bavingilanga ke divangama ko. E kingana kiaki kiayika “nkwa tunda” mosi, i sia vo, Yesu ona okwenda ku nsi yandá. (Luka 19:11-13, 15) Yesu wavovesa Pontio Pilato wa nyadi a Roma vo ke kuyisia mu mambu ma tuyalu twa nza yayi ko. Pilato wayuvula Yesu vo: ‘Nga ngeye i Ntinu a Ayuda?’ (Yoane 18:33) Pilato nanga wonga kakala wau vo Yesu ofila nkangu muna telamena luyalu lwa Roma. Kansi Yesu wamvutula vo: “E Kintinu kiame ke kia nza yayi ko.” (Yoane 18:36) Yesu katonda kuyisia mu mambu ma tuyalu ko kadi e Kintinu kiandi tuka kuna zulu kiyadila. Wavova vo e salu kayizila ova ntoto i “sila e ludi umbangi.”—Tanga Yoane 18:37.

7. Ekuma dilenda kadila diampasi mu venga yikama e buka ya tuyalu kana nkutu muna ntima mieto?

⁷ Yesu wazayanga e kiyekwa kavewa. Avo yeto mpe tutomene zaya e kiyekwa kieto, tuvenga yikama e buka ya tuyalu, kana nkutu muna kati kwa ntima. Ediadi ke dikalanga diasazu ko. Nkengi mosi a zunga wavova vo wantu a zunga kiandi tezo beviokesanga. O wantu awaya betundidikanga e nsi zau yo kwikila vo e zingu kiau kiambote kiadi kala avo bayadilu kwa esi nsi. Wakudikila vo: “Diakiese wau vo ampangi betatidilanga e kintwadi kieto yo sia e sungididi mu salu kia  samuna e nsangu zambote. Bevingilanga vo Yave kasingika mambu mawonso mampasi mekututokanesanga.”

8. Nkia mambu matokanesanga Ayuda ayingi muna lumbu ya Yesu?

⁸ Vava wantu bemonanga mambu mambi mevangamanga, nkumbu miayingi bevavanga kuyikotesa muna mambu ma tuyalu. Muna lumbu ya Yesu, o futa e mpaku i diambu diatoma filanga wantu mu kuyisia muna mambu ma mbumba. Yuda wa mwisi Ngalili wakolamena luyalu lwa Roma kadi esi Roma basonekesanga wantu kimana balembi tina o futa e mpaku. Lekwa yayingi bafutilanga e mpaku, nze mavua, ntoto ye nzo. Vana ntandu, avakulwisi a mpaku akwa loko bakala, ediadi diakudikilanga e mpasi kwa nkangu. Ezak’e ntangwa, bafutanga e mfumu za tuyalu kimana bavewa fulu kia tunda, i bosi basadilanga e wisa kiau muna vua nzimbu zayingu. Zakai wa mfumu a avakulwisi a mpaku kuna Yeriko, wakituka mvuama mu kuma kia nzimbu kalombanga kw’akaka.—Luka 19:2, 8.

9, 10. (a) Aweyi atantu a Yesu bavavila kunkotesela muna mambu ma tuyalu? (b) Adieyi tulongokele muna mvutu kavana o Yesu? (Tala e fwaniswa kuna lubantiku lwa longi.)

⁹ Atantu a Yesu bavava kunkotesa muna diambu ditadidi futa e mpaku. Banyuvula mu kuma kia “futa e mpaku,” mpaku a denali mosi ina Ayuda awonso bafutiswanga. (Tanga Matai 22:16-18.) Ayuda ke bazolanga futa mpaku ko kadi diabasungamesanga vo ku nsi a wisa kia luyalu lwa Roma bakala. E “buka kia alandi a Erodi,” i sia vo, ana bayikamanga e ngindu zandi, bazola bakila Yesu muna mvovo. Kadi kele vo Yesu kabavutula vo ke bafwete futa mpaku ko, badi kumbadikila vo mbeni a Luyalu lwa Roma. Kansi kele vo Yesu kabavutula vo bafwete futa e mpaku, o nkangu wadi yambula kunlanda. Adieyi Yesu kavanga?

¹⁰ Yesu wasadila e ndekwa mu lembi kuyisa ku sambu edi ngatu ku sambu diankaka. Wavova vo: “Nuvana kwa Kaisa ina ya Kaisa, kwa Nzambi ina ya Nzambi.” (Matai 22:21) Yesu wazaya wo vo avakulwisi ayingi a mpaku akwa loko bakala, kansi kasia sungididi mu diambu diadi ko. Wasia e sungididi muna Kintinu kia Nzambi kina kisukisa e mpasi zawonso za wantu. Yesu mbandu ambote kikilu katusisila. Tufwete venganga kuyisia mu mambu ma tuyalu, kana nkutu tumwene vo vena ye buka kibadikilwanga vo kiambote, e kiankaka kiambi. Akristu besianga e sungididi kiau muna Kintinu kia Nzambi ye mana Nzambi kebdikilanga vo mansongi. Muna kuma kiaki, tuvenganga songa e ngindu zeto mu kuma kia mambu mambi mevangamanga yovo vovela e mambu mama.—Matai 6:33.

11. Aweyi tulenda sadisila akaka mu soba e ngindu yo solola unsongi wakieleka?

¹¹ Ayingi muna Mbangi za Yave belendanga katula e ngindu bakala zau yo kuyivambula muna mambu ma tuyalu. Kasikil’owu, vitila kalongoka e ludi, mpangi mosi ankento ozingilanga kuna Grã-Bretanha walongoka mambu ma mbumba kuna sikola, mana kalongoka mamfila mu yantika telamena ayadi. Wavova vo: “Yanuaninanga andombe kimana bakala yo luvevoko, kadi mpasi zayingi twamweswanga. Kana una vo ngolo yakala muna kwikidisa o wantu, ediadi  mpasi kaka diantwasilanga muna ntima. Kiabakulanga ko vo e fu kia sia e mpambula kifwete teka katulwa muna ntima mia wantu. Vava yayantika longoka Nkand’a Nzambi, i ntangwa yabakula vo mono kibeni mfwete soba e mpila yabadikilanga o wantu.” Mpangi mosi ankento wa mundele i wansadisa mu soba mana makala muna ntim’andi. Wakudikila vo: “Owau se i mviti a nzila muna nkutakani ya nding’a sinsu. Yalongoka vo mfwete mokenanga ye wantu a mpila zawonso.”

12. Nkia mpil’a “mfuna” ina Yesu kalukisila alongoki andi vo bavenga?

¹² Muna lumbu ya Yesu, e mfumu za mabundu bayikamanga e buka ya tuyalu. Kasikil’owu, o nkanda Daily Life in Palestine at the Time of Christ (Zingu Kuna Palestina Muna Lumbu ya Yesu) uvovanga vo Ayuda bavambana bakala mu buka ya nsambila yakala nze buka ya tuyalu. Muna kuma kiaki, Yesu walukisa alongoki andi vo: “Nulungalala; nuyikenga ye mfuna ya Afarisi ye ya Erodi.” (Maku 8:15) Vava Yesu kayika Erodi, nanga alandi a Erodi kayika. E buka kiankaka i kia Afarisi, kina kiazolanga vo Ayuda bakatuka muna wisa kia Luyalu lwa Roma. Mun’owu wa lusansu kasoneka Matai, Yesu walukisa mpe alongoki andi mu kuma kia Asaduki. Asaduki bazolanga vo esi Roma bakwamanana yala kimana bakwamanana kala ye tunda. Yesu walukisa alongoki andi vo bayikenga mu kuma kia “mfuna” yovo malongi ma buka tatu yayi. (Matai 16:6, 12) Yesu wavana lulukisu lwalu ke vavioka kolo ko vava o nkangu wazola kuntumbika se ntinu.

13, 14. (a) Aweyi e mambu ma tuyalu ye mabundu metwasilanga e ntantani ye mambu malembi songa? (b) Ekuma ke tufwete nuanina ko kana nkutu vava tuvangwanga mambu malembi songa? (Tala e fwaniswa kuna lubantiku lwa longi.)

¹³ Vava mabundu mekuyisianga muna mambu ma tuyalu, nkumbu miayingi ediadi ntantani ditwasanga. Yesu walonga alongoki andi vo bayivambula emvimba ye mambu ma tuyalu. Ekiaki i kuma e mbuta za nganga ye Afarisi bazola vondela Yesu. Wonga bakala wau wa sia vo nkangu uwila Yesu yo yambula kubalanda. Kele vo e diambu diadi diavangama, e wisa kiau kiadi kuluka. Bavova vo: “Avo tunyambwidi, ozevo wantu awonso bekwikila muna yandi, esi Roma mpe bekwiza baka fulu kieto ye nsi eto.” (Yoane 11:48) Muna kuma kiaki, Kayafa wa Ngang’ambuta wavanga e nkubika za vondesa Yesu.—Yoane 11:49-53; 18:14.

¹⁴ O Kayafa wavingila yavana kuma kwabwita, i bosi watuma masoladi benda kanga Yesu. Kansi o Yesu wazaya wo vo kani dia kumvonda bakala diau. Muna kuma kiaki, vava kadia e lambu diandi diansuka ye ntumwa zandi, Yesu wabavovesa vo banata e nsosolo. E nsosolo miole miafwana kwandi muna kubalonga diambu diamfunu. (Luka 22:36-38) Muna fuku walanda, e buka kiayiza kimana bakanga Yesu. Muna  kuma kiaki, Petelo wafunga makasi, wavola nsosolo yo zenga o kutu kwa kesa dimosi. (Yoane 18:10) Kansi Yesu wavovesa Petelo vo: “Vutula nsosolo aku vana fulu kiandi, kadi awonso bebong’e nsosolo muna nsosolo befwila.” (Matai 26:52, 53) Nkia longi diamfunu kalonga o Yesu kwa alongoki andi? Wabalonga vo ke bafwete kala ba nza ko. I diau Yesu kalomba muna sambu muna fuku wauna (Tanga Yoane 17:16.) Nzambi kaka una ye wisa kia fokola mambu malembi songa.

15, 16. (a) Aweyi e Diambu dia Nzambi disadisilanga Akristu mu venga e ntantani? (b) Nkia nswaswani kemonanga o Yave ova nza?

¹⁵ O mpangi ankento kuna Europa, ona tuyikidi kuna lubantiku, diau dimosi kalongoka. Wavova vo: “Yabakula vo e mavangu mansoki ke metwasanga unsongi ko. Nkumbu miayingi, awana bevanganga oma ma nsoki yau nkutu befwanga. Akaka bekendalanga kwayingi. Yatoma yangalala kikilu vava yalongoka muna Bibila vo Nzambi kaka olenda twasa unsongi wakieleka ova nza. Ezazi i nsangu isamunanga se vioka 25 dia mvu.” O mpangi ayakala kuna África wavingisa e “nsosolo a mwanda,” i sia vo Diambu dia Nzambi, vana fulu kia dionga. (Efeso 6:17) Owau osamunanga e nsangu za luvuvamu kwa wantu awonso, ke kw’awana kaka ko bena kanda dimosi. Vava mpangi ankento ona ozingilanga kuna Europa kakituka Mbangi a Yave, wasompana yo mpangi wa mwisi kanda dina kamenganga. E mpangi tatu zazi bavanga e nsobani e kuma kadi bazola tanginina e mbandu a Kristu.

¹⁶ O vanga e nsobani zazi diamfunu kikilu. Nkand’a Nzambi uvovanga vo wantu bena nze kumbu dia kalunga, ke divuvamanga ko. (Yesaya 17:12; 57:20, 21; Lusengomono 13:1) E mambu ma tuyalu wantu mekitulanga akwa lulendo, kubavambanesa yo fila wantu mu mavangu mansoki. Kansi oyeto mu luvuvamu ye kintwadi twina. Vava Yave kemonanga kitantu vana vena wantu mu nza yayi, otoma yangalalanga vava kemonanga kintwadi vana vena nkangu andi.—Tanga Sefaniya 3:17.

17. (a) Nkia mambu tatu malenda siamisa e kintwadi kieto? (b) Adieyi tubadika muna longi dilanda?

¹⁷ Mu longi diadi, tulongokele mambu tatu tulenda vanga mu siamisa kintwadi kieto: (1) Sia vuvu kieto mu Kintinu kia Nzambi, kadi i kiau kaka kisinga fokola e mambu mawonso mambi, (2) lembi kuyisia mu mambu ma tuyalu ye (3) venga mavangu mansoki. Kansi e fu kia sia mpambula i diambu dilenda fwasa e kintwadi kieto. Muna longi dilanda, tulongoka una tulenda sundila e fu kia sia mpambula nze una Akristu a tandu kiantete bavanga.