WAU VO mu nza yazala ye ntokani tuzingilanga, dilenda kadila diampasi mu kala ye luvuvamu. Tulenda kala mu luvuvamu, kansi diasazu mu vidisa lo. Adieyi o Nkand’a Nzambi uvovanga dilenda kutusadisa mu solola luvuvamu lwakieleka yo lembi lo vidisa? Aweyi tulenda sadisila akaka mu solola luvuvamu?

Muna solola luvuvamu lwakieleka, lutaninu tuvuidi o mfunu. Tufwete vanganga yikundi diambote, kansi edi disundidi o mfunu i kala ye ngwizani ambote yo Nzambi. Aweyi tulenda wo vangila?

E nsiku ye nkanikinu mia Yave nluta kaka mikututwasilanga. Vava tulemvokelanga mio, tusonganga vo tubundanga e vuvu muna Yave ye tuzolele kala ye ngwizani ambote yo yandi. (Yeremiya 17:7, 8; Yakobo 2:22, 23) Muna mpila yayi, Yave okutufinama yo kutuvana luvuvamu lwa ntima. Muna Yesaya 32:17 tutanganga vo: ‘E salu kia unsongi i luvuvamu; e kumu kia unsongi i pi-i yo lutaninu lwakwele mvu.’ Tulenda solola luvuvamu lwakieleka avo tulemvokele Yave kuna ntim’amvevo.—Yesaya 48:18, 19.

Yave okutuvananga mpe lukau lwamfunu mu kutusadisa mu kala ye luvuvamu lwakieleka. O lukau lwalu i mwand’avelela.—Mavangu 9:31.

Paulu wa ntumwa wavova vo luvuvamu kimosi muna fu ya “mbongo a mwanda.” (Ngalatia 5:22, 23) Wau vo mwand’a Nzambi uyimanga luvuvamu, tufwete yambula vo mwand’avelela watufila avo tuzolele kala ye luvuvamu. Aweyi tulenda wo vangila?

Diantete, tufwete tanganga e Diambu dia Nzambi lumbu yawonso. (Nkunga 1:2, 3) Vava  tutoma yindulanga mana tutanganga, o mwand’avelela ukutusadisanga mu bakula e mpila ina Yave kebadikilanga e mambu. Kasikil’owu, tubakula una Nzambi ketatidilanga luvuvamu ye kuma o luvuvamu lwinina lwamfunu kwa yandi. Avo tulemvokele mana tulongokanga muna Nkand’a Nzambi, tukala yo luvuvamu lwayingi muna zingu kieto.—Ngana 3:1, 2.

Diazole, tufwete lombanga mwand’avelela a Nzambi muna sambu. (Luka 11:13) Yave wasia nsilu kw’awana belombanga lusadisu lwandi vo: “O luvuvamu lwa Nzambi luna luviokele umbakuzi wawonso luyingila ntima mieno ye makani meno muna Kristu Yesu.” (Filipi 4:6, 7) Avo tufinamene Yave yo bunda vuvu muna mwand’andi, okutuvana luvuvamu lwakieleka lwa ntima.—Roma 15:13.

Nkand’a Nzambi usadisanga wantu ayingi mu vanga nsobani muna zingu kiau, owau bena mu luvuvamu yo Yave, luvuvamu lwa ntima yo luvuvamu ye akaka. Aweyi bevangilanga e nsobani zazi?

Vitila bazaya e ludi, akaka muna mpangi zeto akwa nganzi ye akwa nsoki bakala. Kansi, bavanga ngolo za soba, owau bakituka se akwa ngemba, luzindalalu yo kadila kuna luvuvamu ye akaka. * (Tala mvovo vana yand’a lukaya.) (Ngana 29:22) Tala una mpangi mosi una ye nkumbu a David ye mpangi ankento una ye nkumbu a Rachel basobela e kiwuntu kiau.

Vitila David kazaya e ludi, wakala ye fu kia kumba akwandi yo vovesela esi nzo andi kuna makasi. Kansi, wabakula vo kafwete soba. Aweyi kasololwela luvuvamu? David wavova vo: “Yayantika sadila e nkanikinu mia Nkand’a Nzambi muna zingu kiame, ediadi diasadisa esi nzo ame mu yantika zitisa muntu yo nkwandi.”

Rachel watanginina e fu ya wantu ana kasansuka yau. Wavova vo: “Kana nkutu owau, inuananga  ye fu kia funga makasi, kadi muna nzo yasansukila wantu bafwemanga mu nzaki.” Adieyi diasadisa Rachel mu solola luvuvamu? Wavova vo: “Yalombanga lusadisu kwa Yave.”

David yo Rachel i nona ya wantu wole ana basolola luvuvamu vava bayantika sadila e nkanikinu mia Nkand’a Nzambi yo lomba lusadisu lwa mwand’avelela. Kana una vo tuzingilanga mu nza yazala ye akwa makasi, tulenda kala yo luvuvamu lwa ntima. Ediadi dikutusadisa mu kala ye ngwizani ambote ye esi nzo eto ye mpangi zeto muna nkutakani. Kansi Yave okutuvovesanga vo twakadila kuna luvuvamu “yo wantu awonso.” (Roma 12:18) Nga ediadi dilendakana? Ekuma tufwete silanga e ngolo za kadila kuna luvuvamu ye akaka?

Muna salu kieto kia umbangi, tusamunanga e nsangu za luvuvamu za Kintinu kia Nzambi. (Yesaya 9:6, 7; Matai 24:14) Wantu ayingi beyangalelanga nsangu zazi yo tambulwila zo. Muna kuma kiaki, ke befunganga diaka makasi ko mu kuma kia mambu mebwanga ova nza. Owau bena ye vuvu kiasikila kia kusentu, ediadi dikubasadisanga mu “vava luvuvamu.”—Nkunga 34:14.

Kansi, ayingi ke beyangalelanga nsangu zeto ko kuna lubantiku. (Yoane 3:19) Diakala vo wantu betambulwila e nsangu zeto yovo ve, Nzambi okutuvananga mwand’andi. Ukutusadisanga mu tatidila luvuvamu yo songa luzitu vava tusilanga umbangi. Muna mpila yayi, tulandanga luludiku lwa Yesu, oku vo: “Avo se nukota muna nzo, nukayisa awana bena mo. Avo muna y’akwa luzolo lwambote, yambula luvuvamu lweno lwakala mo; kansi avo ke mwina akwa luzolo lwambote ko, yambula luvuvamu lweno lwanuvutukila.” (Matai 10:11-13) Avo tusongele fu kiaki, tutatidila luvuvamu kana nkutu nkia diambu wantu balenda vova yovo vanga. Tusungamenanga vo kuna sentu tulenda kala ye lau dia kubasadisa.

Tuwokesanga luvuvamu muna songanga luzitu vava tumokenanga ye mfumu za luyalu kana nkutu vo besianga kitantu muna salu kieto. Kasikil’owu, mu nsi mosi ya África, ayadi ke bayambulanga ko vo twatunga Maseka ma Kintinu. Ampangi zeto bazaya wo vo bafwete singika diambu diadi kuna luvuvamu. Batuma mpangi mosi ona wakala misionario muna nsi yayina kenda mokena yo Nsunzudi a luyalu kuna Londres, Inglaterra, mu kuma kia salu kia luvuvamu besalanga e Mbangi za Yave.

O mpangi wavova vo: “Vava yayenda mokena yo nkento ona otambulanga wantu, yabakula muna mpil’andi ya vuatila vo musi kanda divovanga e ndinga ina yalongoka. Muna kuma kiaki, yankayisa muna nding’andi. Wasivika kikilu yo kungiuvula vo: ‘Ekuma wizidi kwaku?’ Kuna luzitu lwawonso yamvovesa vo nzolele mokena yo Nsunzudi a luyalu. Wabokela o mfumu ndioyo muna telefone, wayiza yo kunkayisa muna nding’a nsi yayina. I bosi, watoma tamba e matu ekolo yansasilanga e salu kia luvuvamu besalanga e Mbangi za Yave.”

Vava Nsunzudi a luyalu kawá mpangi eto, watoma bakula e salu kieto yo katula e ngindu zabendomoka kakala zau. Ke vavioka kolo ko, luyalu lwasoba e nzengo yo yambula vo e Mbangi za Yave batunga Maseka ma Kintinu. Ampangi batoma yangalala. Kieleka, vava tusonganga luzitu kw’akaka, tusiamisanga luvuvamu.

O unu, nkangu a Yave mu paradiso ya kimwanda bezingilanga, wau vo bekunsadilanga kuna luvuvamu. Konso muntu mu yeto olenda siamisa luvuvamu lwalu muna sianga ngolo za yima luvuvamu muna zingu kiandi. Avo tuvangidi wo, Yave okutuyangalela. Muna nz’andi ampa, Yave okutuvana luvuvamu lwakwele mvu.—2 Petelo 3:13, 14.