1. Nkia lekwa kikutuswaswanesanga ye bulu?

YAVE wavana lukau lwamfunu kwa wantu. O lukau lwalu i ntona. E kiaki i lekwa kikutuswaswanesanga ye bulu. Aweyi tuzayidi wo vo Adami yo Eva ntona bakala zau? Kadi vava bakolamena Nzambi baswekama. E ntona zau zabatumba.

2. Aweyi e ntona zinina nze bússola? (Tala e fwaniswa kuna lubantiku lwa longi.)

² E ntona zeto i lekwa kikutusadisanga mu swaswanesa edi diambote y’edi diambi yo fila e zingu kieto. O muntu kena ye ntona zatoma longwa ko una nze nzaza ina ye bússola yawudika. E tembwa ye mavuku ma kalunga malenda fila e nzaza kuna ke ikanini ko. Kansi e bússola avo mu toma sala ina, isadisa o mfidi a nzaza mu kwamanana nata e nzaza kuna fulu ikwendanga. Diau dimosi, avo tutomene longa e ntona zeto, zilenda kutufila mu mpila yambote.

3. Nkia diambu dilenda bwa avo ke tutomene longa ntona zeto ko?

³ Avo e ntona zeto ke zatoma longwa ko, ke zikutusadisa ko  mu swaswanesa edi diambote y’edi diambi. (1 Timoteo 4:1, 2) Zilenda nkutu kutufila mu badikila o “bi vo wete.” (Yesaya 5:20) Yesu wazayisa alandi andi vo: “E ntangwa ikwiza, konso ona okunuvonda oyindula vo Nzambi kasadidi e salu kiavauka.” (Yoane 16:2) I diau bayindula ana bavonda Setefano wa nlongoki a Yesu. (Mavangu 6:8, 12; 7:54-60) Tuka kuna nz’ankulu, asambidi ayingi a mabundu bevanganga mambu mansoki, nze vonda wantu yo vova vo mu nkumbu a Nzambi bavangidi wo. Kansi e ludi i kiaki, mana bevanganga ke mena ngwizani ko ye nsiku mia Nzambi. (Luvaiku 20:13) Kieleka, e ntona zau ke zikubafilanga mu mpil’ambote ko.

4. Aweyi tulenda kadila ye ziku vo e ntona zeto zisalanga mu mpila yambote?

⁴ Aweyi tulenda kadila ye ziku vo e ntona zeto zisalanga mu mpila yambote? E nsiku ye nkanikinu mia Nkand’a Nzambi ‘miamfunu muna longa, muna tumba, muna singika mambu, muna ludika kuna unsongi.’ (2 Timoteo 3:16) Tufwete longokanga o Nkand’a Nzambi lumbu yawonso, badika mana tulongokanga yo sadila mo muna zingu kieto. Avo tuvangidi wo, tukala yo nyindu a Yave. Muna mpila yayi, tukala ye ziku vo e ntona zeto zikutufilanga mu mpila yambote. Yambula twazaya una tulenda sadila e nsiku ye nkanikinu mia Yave muna longa e ntona zeto.

5, 6. Aweyi e nsiku mia Nzambi mikutusadisilanga?

⁵ Avo tuzolele vo e nsiku mia Nzambi miatusadisa, mayingi tufwete vanga ke tanga kaka ko ngatu zaya mio. Tufwete zolanga yo zitisa e nsiku miami. Nkand’a Nzambi ukutuvovesanga vo: “Numenga bi, nuzola wete.” (Amose 5:15) Aweyi tulenda wo vangila? Tufwete longoka badikila mambu nze una Yave kebadikilanga mo. Yindula e nona eki: Avo tulu twaku vempoka tuvempokanga, o dotolo uvovese vo wasolanga madia mambote, nana e nitu yo soba maka mambu muna zingu kiaku. Vava olende luludiku lwalu, omwene nsobani muna nitu. Aweyi obadikila luludiku lwa dotolo?

⁶ Diau dimosi, o Mvangi eto watuvana nsiku muna kututanina muna mfwilu mitukanga muna sumu yo tomesa e zingu kieto. Kasikil’owu, Nkand’a Nzambi ukutulonganga twavenga luvunu, yiya, tá e zumba, mavangu mansoki yovo konso lekwa kina e ngwizani ye mpandu. (Tanga Ngana 6:16-19; Lusengomono 21:8) Vava tumonanga e nluta tuvuanga muna lemvokela Yave, o zola kweto muna yandi ye nsiku miandi kuwokelanga.

7. Aweyi o tusansu twa Nkand’a Nzambi tukutusadisilanga?

⁷ Muna zaya edi diambote y’edi diambi, ke dina mfunu ko twateka baka ntete e mfwilu mu kuma kia lembi lemvokela e nsiku mia Nzambi. Tulenda mio longoka muna vilwa wa wantu akaka kuna nz’ankulu. E nona yayi ina muna Nkand’a Nzambi. E sono kia Ngana 1:5 kivovanga vo: “O nkwa ngangu kawa, kanungunukw’o zayi.” E luludiku lwalu kwa Nzambi lwatuka ye lwambote kikilu. Muna bonga e nona, yindula e mpasi kamona o Davidi vava kakolamena Yave yo tá e zumba yo Bate-seba. (2 Samuele 12:7-14) Vava otanganga lusansu lwalu ukiyuvula: ‘Aweyi Davidi kadi vengela e mpasi zazi? Aweyi yadi vanga muna diambu diadi? Vava itontwanga  mu tá e zumba, nga Davidi itangininanga yovo Yosefe?’ (Etuku 39:11-15) Avo tutomene badika e mfwilu mia sumu, tukala ye tima dia ‘menga oma mambi.’

8, 9. (a) E ntona zeto zikutusadisanga mu vanga nkia diambu? (b) Aweyi e ntona zeto zilenda kadila e ngwizani ye nkanikinu mia Yave?

⁸ Tufwete venga mana Yave kemenganga. Kansi, adieyi tufwete vanga avo ke vena nsiku wasikididi ko muna Nkand’a Nzambi? Aweyi tulenda zayila dina Yave kazolele vo twavanga? Avo tuyambulanga vo Nkand’a Nzambi walonga ntona zeto, ediadi dikutusadisa mu baka nzengo zambote.

⁹ Wau vo Yave okutuzolanga, watuvana nkanikinu milenda fila e ntona zeto. Wavova vo: “Omono i Yave wa Nzambi aku, on’okulong’oma ma mfunu, yo kufila muna nzila in’ofwete kwenda.” (Yesaya 48:17, 18) Vava tutoma badikanga e nkanikinu mia Nkand’a Nzambi yo yambula vo miakota muna ntima mieto, tulenda longa yo singika e ntona zeto. Ediadi dikutusadisa mu baka nzengo zambote.

10. Nki i nkanikinu? Aweyi Yesu kasadila e nkanikinu vava kalonganga?

¹⁰ E nkanikinu i malongi mefilanga e ngindu  zeto yo kutusadisa mu baka nzengo zambote. O zaya nkanikinu mia Nzambi dikutusadisanga mu bakula ngindu za Nzambi ye kuma kekutuvaninanga e nsiku. Yesu wasadila e nkanikinu mu longa alongoki andi vo e mavangu mau malenda twasa nluta yovo mfwilu. Muna bonga e nona, Yesu walonga vo makasi malenda fila muntu mu mavangu mansoki, e ngindu za usafu zilenda fila muntu muna tá e zumba. (Matai 5:21, 22, 27, 28) Avo tuyambwidi vo e nkanikinu mia Yave miatufila, e ntona zeto zitoma longwa ye tukala ye tima dia vana nkembo kwa Nzambi.—1 Korinto 10:31.

11. Aweyi e ntona zeto zilenda kadila zaswaswana ye za mpangi zankaka?

¹¹ Kana una vo Akristu besadilanga Nkand’a Nzambi mu longa ntona zau, ezak’e ntangwa balenda baka nzengo zaswaswana, nze muna diambu ditadidi nua malavu mankolwa. O Nkand’a Nzambi ke uvovanga ko vo diambi mu nua malavu mankolwa, kansi ukutulukisanga mu lembi nua malavu mayingi yovo kolwa. (Ngana 20:1; 1 Timoteo 3:8) Nga ediadi disongele vo Nkristu ona kenuanga malavu mayingi ko, kafwete tokanena diambu diakaka ko vava kebakanga e nzengo zandi? Ve. Kana nkutu vo e ntona zandi zikumfilanga mu nua malavu mankolwa, kafwete zitisa mpe e ntona z’akaka.

12. Aweyi e mvovo mina muna Roma 14:21 milenda kutusadisila mu zitisa e ntona za wantu ankaka?

¹² Paulu wa ntumwa wasonga o mfunu wa zitisa e ntona za wantu ankaka vava kasoneka vo: “Ke diambote ko mu dia mbizi yovo nua vinyu ngatu vanga konso diambu ditesesa mpangi aku e sakuba.” (Roma 14:21) Kana una vo o nua malavu ke diambi ko, tulenda vanga e ngolo za lembi nua malavu avo tuzeye vo dilenda tesa mpangi eto e sakuba. Nanga o mpangi vitila kalongoka e ludi malavu mayingi kanuanga, kansi owau wabaka e nzengo za yambula nua malavu. Ke tuzolele vanga konso diambu ko dilenda fila mpangi eto mu vutukila e fu kiambi kakala yau. (1 Korinto 6:9, 10) Avo mpangi tubokele kuna nzo eto kazolele nua malavu mankolwa ko, nga tukunkomekena kanua? Ve kikilu!

13. Adieyi Timoteo kavanga mu zitisa e ntona za wantu ankaka kimana batambulwila e nsangu zambote?

¹³ Vava Timoteo kakala toko, watonda zengwa kana una vo mpasi kamona. Timoteo wazaya wo vo o zengwa diambu diamfunu kuna kwa Ayuda ana kadi samunuina e nsangu zambote. Nze Paulu, Timoteo kazola vanga konso diambu ko dilenda kendeleka akaka. (Mavangu 16:3; 1 Korinto 9:19-23) Nga ngeye mpe olenda yambula vanga maka mambu ozolanga mu zitisa e ntona za akaka?

14, 15. (a) Aweyi tulenda kitukila Akristu azikuka? (b) Aweyi Akristu azikuka bekadilanga ye akaka?

¹⁴ Tuzolele songa vo twayambula “mambu ma lubantiku mu kuma kia Kristu” yo “nungunuka  yamuna nzikuka.” (Ayibere 6:1) Ke tukitukanga Akristu azikuka ko mu kuma kia mvu miayingi twina muna ludi. Tufwete vanga e ngolo muna zikuka. Tufwete kwamanana nungunuka muna zayi yo umbakuzi. Muna kuma kiaki, tufwete tanganga Nkand’a Nzambi lumbu yawonso. (Nkunga 1:1-3) Avo okedi ye fu kia tanga o Nkand’a Nzambi e lumbu yawonso, otoma bakula e nsiku ye nkanikinu mia Yave.

¹⁵ Nkia nsiku usundidi o mfunu kwa Akristu? I nsiku a zola. Yesu wavovesa alongoki andi vo: “Muna wau i bezayila o wantu awonso vo nu alongoki ame—avo nzolani nuna yau.” (Yoane 13:35) O zola kuyikilwanga muna Nkand’a Nzambi vo “nsiku a kintinu” ye ‘lulungisu lwa nsiku.’ (Yakobo 2:8; Roma 13:10) Ke tusivikanga ko mu zaya vo zola mfunu kikilu kwina, kadi o Nkand’a Nzambi uvovanga vo “Nzambi i zola.” (1 Yoane 4:8) Kuna kwa Nzambi, o zola ke mpasi ngindu kaka ko. Nzambi osonganga o zola kwandi muna mavangu. Yoane wavova vo: “Muna mpila yayi kwasengomokena o zola kwa Nzambi omu yeto, o Nzambi watuma Mwan’andi mosi ova nza kimana twavuila moyo muna yandi.” (1 Yoane 4:9) Vava tusonganga o zola kwa Yave, Yesu, mpangi zeto ye kwa wantu akaka, tusonganga vo tu Akristu azikuka.—Matai 22:37-39.

16. Muna kituka Akristu azikuka, ekuma tufwete zitisilanga e nkanikinu mia Nzambi?

¹⁶ Vava tukitukanga Akristu azikuka, tutoma zitisanga e nkanikinu mia Nzambi. E nsiku misadilwanga muna mambu masikididi, kansi e nkanikinu misadilwanga muna mambu mayingi maswaswana. Muna bonga e nona, dilenda kala vo o mwan’akete ke bakulanga ko e vonza kia vanga kikundi ye wantu ambi. Muna kuma kiaki, mase mandi bafwete vanga mawonso balenda muna  kuntanina. (1 Korinto 15:33) Kansi, ekolo o mwana kenungunukanga, olongoka sadila e nkanikinu mia Nkand’a Nzambi. E nkanikinu miami mikunsadisa mu sola akundi yambote. (Tanga 1 Korinto 13:11; 14:20.) Avo tulongokele toma sadila e nkanikinu mia Nkand’a Nzambi, e ntona zeto zisala mu mpila yambote. Tutoma bakula dina Nzambi kazolele vo twavanga muna konso diambu.

17. Ekuma tulenda vovela vo tuna ye yawonso tuvuidi o mfunu muna baka nzengo zambote?

¹⁷ Tuna ye yawonso tuvuidi o mfunu muna baka e nzengo zilenda yangidika Yave. O Nkand’a Nzambi uvuidi nsiku ye nkanikinu mikutusadisanga mu kala ‘twatoma fwana ye twatoma kubama muna mavangu mawonso mambote.’ (2 Timoteo 3:16, 17) E nkanikinu mia Nkand’a Nzambi mikutusadisanga mu bakula e ngindu za Yave. Kansi, ngolo divavanga muna solola e nkanikinu miami. (Efeso 5:17) Muna solola mio, tuna ye nkanda Índice das Publicações da Torre de Vigia, Nkanda wa Vavulwila wa Mbangi za Yave, LUNDILU DIA NKANDA muna nzil’eto ya internete ye aplicativo JW Library. Avo tusadidi e salanganu yayi, tubaka nluta muna longi dia yeto kibeni ye muna nsambila ya esi nzo.

18. Nkia diambu divangama avo tulemvokele e nsiku ye nkanikinu mia Yave muna zingu kieto?

¹⁸ E zingu kieto kisobanga kikilu vava tusadilanga e nsiku ye nkanikinu mia Yave. E sono kia Nkunga 119:97-100 kivovanga vo: “I mpimpit’ame e lumbu mvimba. E nkanikinu miaku minsundisi mbeni zame e ngangu; kadi mikalang’aka yame. Nsundidi alongi ame awonso o umbakuzi, kadi mabika maku i mpimpit’ame. Nsundidi anunu o umbakuzi, kadi ndundidi malongi maku.” Avo tuvaula e ntangwa ya toma fimpa e nsiku ye nkanikinu mia Nzambi, tukala ye ngangu ye umbakuzi. Vana ntandu, avo tusadidi e nsiku ye nkanikinu mia Yave mu longa e ntona zeto, “tuzikuka yo luaka emvimba muna tezo kia kiwuntu kia Kristu.”—Efeso 4:13.