1. Adieyi dikututwasilanga e kiese?

TUTOMA yangalalanga mu wá una e selo ya Nzambi betemesenanga o ntemo. Mu mvu waviokele, o nkangu a Yave balongokele o Nkand’a Nzambi ye vioka 10.000.000 ma wantu. Mafunda ye mafunda ma wantu bayiza muna Luyindulu lwa lufwa lwa Yesu yo longoka oma ma lukûlu luna vo i lukau lwa zola lwa Yave.—1 Yoane 4:9.

2, 3. (a) Nkia mambu ke malendi kutukakidila ko mu ‘kezima nze mini’? (b) Mun’owu wa mvovo mia Yesu muna Matai 5:14-16, adieyi tuvovela mu longi diadi?

² Mu nza yawonso, e Mbangi za Yave bevovanga ndinga zayingi. Kansi, ediadi ke dikutukakidilanga ko mu kembelela Yave nze wan’angudi. (Lusengomono 7:9) Kana nkutu nkia ndinga tuvovanga yovo fulu tuzingilanga, tulenda kweto ‘kezima nze mini omu nza.’—Filipi 2:15.

³ Salu kieto kia umbangi ye kintwadi kieto kia Kikristu kumosi ye tima dieto dia sala, mawonso mama Yave  mekembelelanga. Mu longi diadi tuvovela una tulenda temesena o ntemo eto.—Tanga Matai 5:14-16.

4, 5. (a) Katula e salu kia umbangi, aweyi diaka tulenda temesena o ntemo eto? (b) Nkia nluta tusonganga kiese ye ngemba kwa wantu? (Tala e fwaniswa kuna lubantiku lwa longi.)

⁴ E salu kia umbangi yo kitula o wantu se alongoki i mpila yamfunu tulenda temesena o ntemo eto. (Matai 28:19, 20) Longi dimosi diavaikiswa muna mvu wa 1925 diakala yo ntu a diambu “Ntemo muna Tombe,” diavova vo mu lumbu yayi yambaninu, ke vena muntu ko olenda sikila ye kwikizi muna Mfumu avo “ke temesanga ntemo andi ko.” Diakudikila vo: “O muntu kafwete wo vanga muna samunanga e nsangu zambote kwa wantu yo diatila muna ntemo.” (Eyingidilu dia 1 Yuni 1925) Katula e salu kieto kia umbangi, e mavangu meto mpe nkembo mevananga kwa Yave. Wantu ayingi bekutumonanga vava tukalanga muna salu kia umbangi. Vava tukubasevesanga yo kubakayisa, tukubasadisanga mu kala yo nyindu asikila mu kuma kieto ye Nzambi ona tusambilanga.

⁵ Yesu wavovesa alongoki andi vo: “Avo se nukota muna nzo, nukayisa awana bena mo.” (Matai 10:12) Muna zunga ina Yesu kasilanga umbangi, o wantu bakala ye fu kia tambula e nzenza muna nzo zau. Mu fulu yayingi o unu, e diambu diadi ke ditoma vangamanga ko. Nkumbu miayingi, o wantu befunganga kikilu o makasi vava bemonanga nzenza ododelanga e kielo kiau. Kansi avo tubasongele kiese ye ngemba, balenda kala ye tima dia kutuwá. Vava osadilanga e tandabala muna sila umbangi vana fulu kia ndonga, o wantu balenda finama vana tandabala mu baka e nkanda avo ubasevese yo kubakayisa kuna ngemba zawonso. Nanga balenda kala yo luzolo lwa mokena yaku.

6. Nki kisadisanga akazi mosi bena vo se anunu mu kwamanana sala e salu kia umbangi?

⁶ Akazi mosi bena vo se anunu bezingilanga kuna Inglaterra, ke belendanga diaka sila umbangi mu nzo ye nzo ko mu kuma kia kimbevo. Muna kuma kiaki, besianga nkanda mieto vana meza vana ndambu a nzo au. Wau vo lukufi bezingilanga ye sikola mosi, besianga nkanda milenda tunta e sungididi kia mase ekolo bekwiza bakanga wan’au. Mase mayingi bebakanga e nkanda miami, akaka benatanga o nkanda Os Jovens Perguntam—Respostas Práticas, Volume 1 ye 2. Mpangi mosi ankento una vo mviti a nzila ozolanga sala entwadi ye akazi awaya. Mase bemonanga vo mpangi ankento ndioyu nkwa ngemba, bemonanga mpe vo akazi awaya anunu luzolo lwa sadisa akaka bena lwau. Muna kuma kiaki, mosi muna mase mama wayantika longoka o Nkand’a Nzambi.

7. Aweyi olenda sadisila anzenza muna zunga kiaku?

⁷ Mu mvu miaviokele, wantu ayingi bayalukidi mu nsi zau yo kwenda zingila ku nsi zankaka. Adieyi olenda vanga muna sadisa  wantu awaya kimana balongoka oma ma Yave? Entete, longoka una olenda kubakayisila muna nding’au. Sadila e aplicativo JW Language muna longoka mvovo miankufi milenda kubafila mu mokena yaku. I bosi, ubasonga e video ye nkanda mieto mina muna nding’au muna jw.org.—Nsiku 10:19.

8, 9. (a) Aweyi o lukutakanu lwa kati kwa lumingu lukutusadisilanga? (b) Aweyi mase balenda sadisila o wan’au mu tomesa e nkomena zau muna tukutakanu?

⁸ Yave okutulonganga una tulenda sadila e salu kia umbangi una ufwene. Kasikil’owu, mana tulongokanga muna Lukutakanu Zingu ye Salu Kieto kia Kikristu, mekutusadisanga mu zaya e ndekwa zambote tulenda sadila muna vutuka kingula muntu yo yantika longoka yandi o Nkand’a Nzambi.

⁹ Vava e nzenza bekwizanga muna tukutakanu tweto, nkumbu miayingi besivikanga vava bewanga e nkomena za wan’akete. Muna kuma kiaki, longanga wan’aku una balenda vanina e nkomena muna mvovo mia yau kibeni. Wantu ayingi betambulwilanga e ludi vava bewanga una wana akete bevovelanga oma ma lukwikilu lwau mu mpila yakiá ye yaleboka.—1 Korinto 14:25.

10. Aweyi e nsambila ya esi nzo ilenda sadisila awonso muna nzo mu kala mu kintwadi?

¹⁰ Vava tulonganga esi nzo eto mu sala entwadi kuna luvuvamu, tuvananga o nkembo kwa Yave. Kasikil’owu, avo u se, vaulanga e ntangwa muna kalanga yo fuku wa Nsambila ya Esi Nzo. Esi nzo zayingi betalanga entwadi e JW Broadcasting, i bosi  bebadikanga una balenda sadila mana balongokele muna zingu kiau. Sungamena vo malongi mana wan’akete bavuidi o mfunu maswaswana ye mana matoko bavuidi o mfunu. Vanganga mawonso olenda mu sadisa konso muntu muna nzo kavua e nluta muna nsambila ya esi nzo.—Nkunga 148:12, 13.

11-13. Aweyi tulenda siamisina e kintwadi muna nkutakani eto?

¹¹ Kana nkutu vo u nleke, olenda sadisa konso muntu muna nkutakani mu mona vo mfunu kena. Imosi muna mpila ina olenda wo vangila i vanga kikundi ye mpangi bena vo se anunu. Ubayuvula nki kikubasadisanga mu kwamanana sadila Yave mu mvu miayingi. Balenda kulonga mambu mayingi mamfunu. Ediadi dikubakasakesa yo ngeye mpe. Yeto awonso, kiakala aleke yovo ambuta, tulenda vanga diambu muna vana ngiz’ambote kwa nzenza zikwizanga kutakana yeto muna Seka dia Kintinu. Olenda kubakayisa, kubasevesa, kubasadisa mu solola e fulu kia vuanda yo kubasunzula kwa mpangi zankaka. Vanga mawonso kimana bayimwena nze yau bena kuna nzo zau.

¹² Avo kiyekwa una kiau kia fila lukutakanu lwa mpaika muna salu kia umbangi, olenda kasakesa anunu mu kwamanana temesa o ntemo au. Vavanga zaya kana vo bena ye zunga kiambote. Solanga aleke ana balenda sala yau entwadi. Nkumbu miayingi, e mpangi z’anunu ye awana bena vo ambevo bekendalalanga wau vo ke belendanga diaka vanga mayingi ko muna salu kia umbangi nze una bavanganga. Kansi beyangalalanga kikilu vava bezayanga vo mfunu okubavuanga yo bakula e mpasi zau. Kana una vo se anunu yovo se mvu miayingi bena muna ludi, o zola okubasonganga kulenda kubakasakesa mu kwamanana samuna e nsangu zambote yo vema kwawonso.—Fuka 19:32.

¹³ Aneyisaele bayangalelanga sambila Yave vamosi. O ntozi a nkunga wasoneka vo: “Wa, kuna kwa wete, kuna kwa kiese kwa mpangi bakadila vamosi.” (Tanga Nkunga 133:1, 2.) O ntozi a nkunga watezanesa e kintwadi kiaki ye mazi oma melengolanga o nkand’a nitu yo twasa nsunga zambote. Diau dimosi mpe, tulenda vuvika mpangi zeto muna kadilanga yau kuna ngemba ye zola. Ediadi disiamisanga e kintwadi muna nkutakani. Nga olenda vanga e ngolo za toma zaya e mpangi za nkutakani eno?—2 Korinto 6:11-13.

14. Aweyi olenda temesena ntemo aku kuna belo ozingilanga?

¹⁴ Olenda temesa ntemo aku kana nkutu nkia fulu una. E mpil’a zingu kiaku kilenda sadisa mfinangani zaku mu longoka mayingi mu kuma kia Yave. Ukiyuvula: Adieyi e mfinangani zame beyindulanga mu kuma kiame? Nga itoma lunga-lunganga yo velelesa e nzo ame? Nga e nzo ame ivananga kimbangi kiambote kwa mfinangani zame? Nga isadisanga esi belo kiame? Yuvula mpangi zankaka una e kadilu kiau ye mbandu au ambote isadisilanga yitu yau, mfinangani zau, akwau a salu yovo a sikola.—Efeso 5:9.

15. Ekuma tufwete kwamanana yingila?

¹⁵ Avo tuzolele kwamanana temesa ntemo eto, tufwete zaya e lumbu tuzingilanga. Nkumbu miayingi, Yesu wavovesanga alongoki andi vo: ‘Nukwamanana yingila.’ (Matai 24:42; 25:13; 26:41) Avo tuyindulanga vo e kolo kia “mpasi zayingi” kwandá kina, ediadi dilenda kutufila mu lembi sadila malau tukalanga mau mu sadisa akaka kimana balongoka oma ma Yave. (Matai 24:21) Vana fulu kia temesa o ntemo eto, ulenda yantika kuluka yo zima nkutu.

16, 17. Adieyi olenda vanga mu kwamanana yingila?

¹⁶ Tufwete luta yingila owau ke mu lumbu iviokele ko, kadi e mambu mampasi omu nza mu wokela kaka mena. Kansi, tuzeye wo vo e mbaninu ikwiza muna ntangwa ina Yave kasikidisa. (Matai 24:42-44) Muna kuma kiaki, tufwete kala ye luzindalalu yo sia sungididi muna vuvu kieto kia kusentu. Tanganga Nkand’a Nzambi lumbu yawonso yo kwamanana samba kwa Yave. (1 Petelo 4:7) Longokanga muna mbandu ambote ya mpangi z’akala ye z’akento besadilanga Yave se mvu miayingi. Kasikil’owu, olenda  tanga lusansu luna muna Eyingidilu dia 15 Abidi 2012, lukaya lwa 18-21, luna yo ntu a diambu: “Lusambwadi lwa mvu Tuka Yasimbinina Mwatu a Nyuda.

¹⁷ Ukivana emvimba muna salu kia Yave. Vanganga oma mambote kuna kw’akaka, kalanga entwadi ye mpangi zaku. Ediadi dikutwasila e kiese yo mona vo e ntangwa nzaki iviokanga. (Efeso 5:16) E selo ya Yave mayingi bavangidi kala mu mvu nkama miviokele. O unu, salu kiayingi tuna kiau ke mu mvu miviokele ko. E salu kia Yave kiwokele muna mpila ina ke twayindulanga ko. Mu toma temesa twina o ntemo eto.

18, 19. Aweyi akuluntu balenda kutusadisila mu sadila Yave yo vema kwawonso? Yika e nona.

¹⁸ Kana una vo ezak’e ntangwa tusumukanga, Yave oyambulanga vo twansadila. Muna kutusadisa, watuvana ‘tukau twa wantu,’ i sia vo, akuluntu muna nkutakani. (Tanga Efeso 4:8, 11, 12.) Avo akuluntu bakingwidi, vanga mawonso walongoka diambu diamfunu muna umbakuzi wau ye luludiku bekuvana.

¹⁹ Muna bonga e nona, akazi mosi kuna Inglaterra banuananga ye mpasi muna longo lwau. Muna kuma kiaki, balomba lusadisu kw’akuluntu awole. O nkento wamonanga vo yakala kavitanga ntu ko muna salu kia Yave. O yakala wamonanga vo kakala nlongi ambote ko yo tambulwila vo ke ntangwa zawonso ko kavanganga e nkubika ya nsambila ya esi nzo. Akuluntu basadisa akazi awaya bayindula e mbandu a Yesu. Bakasakesa o yakala katanginina e mpila ina Yesu kalunga-lungilanga alongoki andi. Bakasakesa o nkento kasonganga luzindalalu kwa nkaz’andi. Basadisa mpe akazi awaya mu zaya una balenda kubikila e nsambila ya esi nzo yo wan’au wole. (Efeso 5:21-29) O yakala wavanga mawonso muna toma fila esi nzo andi. Akuluntu bankasakesa kimana kalembi yoya yo kwamanana bunda e vuvu muna mwand’a Yave. O zola ye ngemba kuna basonga akuluntu kwasadisa kikilu esi nzo awaya.

20. Nkia nluta dilenda twasa avo otemese ntemo aku?

²⁰ ‘Nkwa kiese ona ovumina Yave, ona okangadila muna nzila zandi.’ (Nkunga 128:1) Avo otemese ntemo aku, kiese dikutwasila. Muna kuma kiaki, longanga akaka oma ma Nzambi, vanga mawonso muna sadisa esi nzo aku ye mpangi za nkutakani kimana bakala bayikakiana yo kwamanana yingila. Akaka bemona e mbandu aku yambote yo kubafila mu vana nkembo kwa Yave wa Se dieto.—Matai 5:16.