1-3. (a) Nkia diambu tufwete sianga va fulu kiantete? (b) Nkia mpasi benwananga zau awana belongokanga ndinga yampa? Nkia yuvu divaikisanga? (Tala fwaniswa va ntandu.)

O UNU, ayingi muna Mbangi za Yave bekuyivananga kuna mvevo mu lungisa o ungunza wa samuna e nsangu zambote “kwa zula yawonso, makanda, ndinga ye nkangu.” (Lusengomono 14:6) Nga u mosi mun’awana belongokanga ndinga yampa? Akaka besalanga nze misionario yovo sadila kuna kuvuidi ateleki ayingi o mfunu. Akaka belungananga mu nkutakani ya ndinga ya kinzenza muna nsi au.

² Selo yawonso ya Nzambi bafwete sianga ngwizani au yo Nzambi va fulu kiantete. Bafwete mpe lunga-lunganga kimwanda kia esi nzo zau. (Matai 5:3) Ezak’e ntangwa, dilenda kala diampasi mu vaula e ntangwa ya kala ye longi dia yeto kibeni dia Nkand’a Nzambi. Kansi, awana besadilanga mu  nkutakani ya ndinga ya kinzenza, mpasi zankaka diaka benwananga zau.

³ Divavanga vo awana bena mu nkutakani ya ndinga ya kinzenza balongoka ndinga yampa, kansi bafwete mpe vaula e ntangwa ya longoka mambu masina ma Nzambi. (1 Korinto 2:10) Aweyi balenda wo vangila wau vo ke betoma bakulanga ko mana mevovuanga muna nkutakani? Ekuma mase besadilanga mu nkutakani ya ndinga ya kinzenza bafwete kadila ye ziku vo e ludi kitoma kotanga muna ntima mia wan’au?

4. Nkia diambu dilenda sia e ngwizani eto yo Yave mu vonza? Yika nona.

⁴ Avo ke tubakulanga ko malongi ma Nkand’a Nzambi melongwanga mu ndinga ya kinzenza, dilenda sia e ngwizani eto yo Yave mu vonza. Vava Nekemiya kavutuka kuna Yerusaleme, wamona vo wana ayingi ke balendanga vova nding’a Kiyibere ko. (Tanga Nekemiya 13:23, 24.) Wau vo wana awaya ke babakulanga Diambu dia Nzambi ko, e ngwizani au yo Yave yakuluka.—Nekemiya 8:2, 8.

5, 6. Adieyi bemonanga mase mankaka ana besadilanga mu nkutakani ya ndinga ya kinzenza? Ekuma divangamenanga?

⁵ Mase mankaka besadilanga mu nkutakani ya ndinga ya kinzenza, bemonanga vo e ngwizani ya wan’au yo Yave yakuluka. Wau vo wan’au ke betoma bakulanga ko mana mevovuanga muna tukutakanu, ke mevanganga konso diambu ko muna zingu kiau. Mpangi Pedro ona watuka kuna América do Sul yo kwenda zingila kuna Austrália ye esi nzo andi, wavova vo: “Muna bakula mambu ma mwanda, divavanga vo masimba o ntima ye ngindu zeto.” ^[1] (Tala mvovo miansuka.)—Luka 24:32.

⁶ Avo tutangidi diambu mu ndinga ya kinzenza, e mpila tumona yaswaswana kikilu ikala ye una tumona avo tutangidi dio mu nding’eto. Vana ntandu, wau vo diampasi dikalanga mu mokena mu ndinga yankaka, tulenda yoya yo fwasa e ngwizani eto yo Yave. Muna kuma kiaki, ekolo tusadilanga mu nkutakani ya ndinga ya kinzenza, tufwete mpe lunga-lunganga e ngwizani eto yo Yave.—Matai 4:4.

7. Aweyi esi Babele bavavila komekena Daniele mu landa e fu yau ya kisi nsi ye nsambil’au?

⁷ Vava Daniele ye akundi andi banatwa mu kinkole kuna Babele, esi Babele bavava kubakomekena mu landa e fu yau ya kisi nsi ye nsambil’au. Mu nkia mpila? Babalonga e “nding’a Akaladi” yo kubavana e nkumbu za esi Babele. (Daniele 1:3-7) E nkumbu yampa yavewa Daniele yakala ye nsas’a Bel, nzambi yatoma zayakana kuna Babele. Nanga o Ntinu Nebukandesa wazola vo Daniele kakwikila vo e nzambi za esi Babele zasunda Yave wa Nzambi a Daniele o nkuma.—Daniele 4:8.

8. Aweyi Daniele kalunga-lungila e ngwizani andi yo Yave?

⁸ Ekolo kakala kuna Babele, Daniele wavanwanga madia mambote ma ntinu. Kansi, Daniele wabaka e nzengo muna ntim’andi vo ke kolamena nsiku a Nzambi ko. (Daniele 1:8) Wau vo wakwamanana longoka nkanda miavauka mia nding’a Kiyibere, walunga-lunganga e ngwizani andi yo Yave  ekolo kazingilanga mu nsi ya kinzenza. (Daniele 9:2) Muna kuma kiaki, vioka tezo kia 70 lwa mvu tuka kayizila muna Babele, wazayakana kaka muna nkumbu andi ya Kiyibere vo Daniele.—Daniele 5:13.

9. Aweyi o nsoneki a Nkunga 119 kabadikilanga Diambu dia Nzambi?

⁹ Diavavanga vo nsoneki a Nkunga 119 kazizidila luvezo vava esi lumbu lwa ntinu bavovanga e mbi mu kuma kiandi. Kansi, wavua nkuma muna Diambu dia Nzambi. Ediadi diansadisa mu kala waswaswana ye akaka. (Nkunga 119:23, 61) Wayambula vo e Diambu dia Nzambi diakota kikilu muna ntim’andi.—Tanga Nkunga 119:11, 46.

10, 11. (a) Nkia kani tufwete kala diau vava tutanganga Diambu dia Nzambi? (b) Aweyi tulenda lungisila kani diadi? Yika nona.

¹⁰ Kana una vo tulenda kala ye salu yayingi muna nkutakani ye kuna salu, yeto awonso tufwete vaulanga e ntangwa ya kalanga ye longi dia yeto kibeni ye nsambila ya esi nzo. (Efeso 5:15, 16) E kani dieto ke tanga kaka ulolo wa mambu ko yo kubika e mvutu tuvana muna tukutakanu. Tufwete kala ye kani dia yambula vo Diambu dia Nzambi diakota muna ntima mieto yo kumika lukwikilu lweto.

¹¹ Muna lungisa e kani dieto, tufwete zayanga e tezo kieto. Vava tulongokanga, ke tufwete yindulanga kaka nsatu za wantu ankaka ko, kansi tufwete yindulanga mpe nsatu zeto. (Filipi 1:9, 10) Tufwete sungamena vo vava tukubikanga malongi ma salu kia umbangi ye ma tukutakanu yovo longi dina tufila, ezak’e ntangwa ke yeto ko tuvuilanga dio nluta. Kasikil’owu, vitila kavana madia kwa wantu, divavanga vo nlambi kateka mo yeleka. Kansi, ke disongele ko vo mana keyelekanga i mau kaka kevua o mfunu muna zinga. Avo vimpi wambote kazolele, kafwete lambanga madia mambote mu kuma kia yandi kibeni. Diau dimosi mpe, avo tuzolele kumika e ngwizani eto yo Yave, tufwete tanganga Nkand’a Nzambi lumbu yawonso. Avo tuvangidi wo, dikutukumika kikilu.

12, 13. Ekuma akaka bemwenanga vo diambote mu longokela o Nkand’a Nzambi mu nding’au ya kingutukila?

¹² Ayingi mun’awana bena mu nkutakani ya ndinga ya kinzenza, bemonanga vo diambote mu longokelanga o Nkand’a Nzambi mu ndinga ina bawutukila. (Mavangu 2:8) Kana nkutu awana besalanga e salu kia kimisionario, bazeye wo vo muna kumika e ngwizani au yo Yave ekolo besadilanga mu nsi yankaka, ke bafwete bundanga kaka vuvu ko mu mana bewanga muna tukutakanu.

¹³ Mpangi Alain, ona olongokanga ndinga ya Persa se vioka tezo kia mvu nana, wavova vo: “Vava ikubikanga tukutakanu mu  nding’a Persa, muna ndinga isianga sungididi. Wau vo e ngindu zame mu longoka kaka e ndinga zikalanga, mana itanganga ke mesimbanga ntim’ame ko. Kiaki i kuma ivaulwilanga e ntangwa mu longoka o Nkand’a Nzambi ye nkanda miankaka mu nding’ame a kingutukila.”

14. Nkia ziku mase bafwete kalanga kiau? Ekuma?

¹⁴ Mase bena vo Akristu bafwete kalanga ye ziku vo e ludi mu kota kina muna ngindu ye ntima mia wan’au. Badika e nona kia mpangi Serge yo nkaz’andi Muriel ana basadila mu nkutakani ya ndinga ya kinzenza vioka mvu tatu. Bayantika mona vo mwan’au ona wakala ye mvu 17, kayangalelanga diaka salu kia umbangi ko ngatu kwenda muna tukutakanu. Muriel wavova vo: “O sila umbangi mu ndinga yankaka dianyoyesanga kikilu. Kansi, entete wayangalelanga sila umbangi muna Kifalanse ina vo i nding’andi ya kingutukila .” Mpangi Serge wavova vo: “Vava twabakula vo i diau diakakidilanga mwan’eto mu nungunuka muna mwanda, twabaka e nzengo za vutuka muna nkutakani twatuka.”

15. (a) Nki kilenda sadisa mase mu baka e nzengo za soba yovo lembi soba e nkutakani? (b) E sono kia Nsiku 6:5-7 nkia luludiku kivananga kwa mase?

¹⁵ Nki kilenda sadisa mase mu baka e nzengo za kwenda yovo lembi kwenda mu nkutakani ya ndinga ina wan’au betoma bakulanga? Diantete, bafwete vava zaya kana vo bena ye ntangwa ye ngolo zafwana mu longa wan’au mu zola Yave yo kubalonga diaka  ndinga yampa. Diazole, balenda mona vo wan’au ke bazolele kwenda mu salu kia umbangi ko, mu tukutakanu yovo sadila mu nkutakani ya ndinga ya kinzenza. Muna kuma yayi tuyikidi, mase balenda baka nzengo za vutuka muna nkutakani ya ndinga ina wan’au betoma bakulanga. I bosi, vava bemona vo wan’au se kikundi kiasikila bena kiau yo Yave, mase balenda baka e nzengo za vutuka diaka muna nkutakani ya ndinga ya kinzenza.—Tanga Nsiku 6:5-7.

16, 17. Adieyi disadisanga mase mankaka mu longa wan’au mambu ma Yave?

¹⁶ Mase mankaka bavanga nkubika za longanga wan’au mambu ma Yave muna nding’au ya kingutukila ekolo bena mu nkutakani yovo buka kia ndinga ya kinzenza. Mpangi Charles una ye wana tatu amakento, bena ye kimbuta tuka mvu 9 yakuna 13. Mu buka kia ndinga Lingala bena. Wavova vo: “Twabaka e nzengo za vangila e longi dia Nkand’a Nzambi ye nsambila ya esi nzo muna nding’eto ya kingutukila. Kansi, tuvanganga mpe nsongesela ye nsaka muna ndinga Lingala kimana balongoka e ndinga yayi ekolo besakananga.”

¹⁷ Mpangi Kevin una ye wana wole amakento. Omosi wa mvu nana, wankaka mvu tanu. Ngolo kevanganga za kubalonga e ludi kadi ke betoma bakulanga ko mana mevovuanga mu tukutakanu muna ndinga ya kinzenza ina bena. Wavova vo: “Mono yo nkaz’ame tulongokanga  yau muna ndinga Kifalansa, ina vo i nding’au ya kingutukila. Twavanga mpe nkubika ya kwendanga mu tukutakanu twa ndinga Kifalansa nkumbu mosi muna ngonde. Tusadilanga mpe lumbu yeto ya vundu mu kwenda mu tukutakanu twa mvivu tuvangamenanga muna nding’eto ya kingutukila.”

18. (a) Aweyi e sono kia Roma 15:1, 2 kilenda kusadisila mu baka nzengo zambote mu diambu ditadidi sadisa wana? (b) Adieyi bavova mase mankaka? (Tala mvovo miansuka.)

¹⁸ Konso esi nzo bafwete baka e nzengo zina bemona vo zambote mu kuma kia wan’au yo kubasadisa mu kala ye ngwizani ambote yo Yave. ^[2] (Tala mvovo miansuka.) (Ngalatia 6:5) Mpangi Muriel wavova vo kana una vo yandi yo nkaz’andi bazola kikilu kwamanana sadila mu nkutakani ya ndinga ya kinzenza, babaka e nzengo za yambula e nkutakani yayina kimana basadisa mwan’au mu siamisa zola kwandi muna Yave. (Tanga Roma 15:1, 2.) O unu, mpangi Serge omonanga vo nzengo zambote babaka. Wavova vo: “Tuka muna ntangwa ina twavutuka muna nkutakani ya Kifalanse, mwan’eto wanungunuka muna mwanda yo vubwa. Owau, osalanga se mviti a nzila a ngonde ke ngonde. Mu vanga nkutu kena e nkubika za kwenda sadila diaka mu buka kia ndinga ya kinzenza.”

19, 20. Aweyi tulenda songela zola kweto muna Diambu dia Nzambi?

¹⁹ Yave ozolanga wantu awonso. Wasonekesa Nkand’a Nzambi mu ndinga zayingi kimana “wantu a mpila zawonso” bavua o zayi wakieleka wa ludi. (1 Timoteo 2:4) Yave ozeye wo vo e ngwizani eto yo yandi isikila avo tutangidi Nkand’a Nzambi muna ndinga ina tutoma bakulanga.

²⁰ Yeto awonso tufwete sia ngolo mu kala ye ngwizani ambote yo Yave. Tulenda wo vanga muna longokanga Nkand’a Nzambi lumbu yawonso muna ndinga ina tutoma bakulanga. Tukala mpe twakubama mu sadisa esi nzo eto mu lunga-lunga e ngwizani au yo Yave. Muna mpila yayi, tusonga vo tuzolanga kikilu e Diambu dia Nzambi.—Nkunga 119:11.