1. Aweyi nkangu a Yave watoma kubikilwa muna tandu kiantete?

 VAVA Yave kevananga e kiyekwa kwa nkangu andi ovingilanga vo balungisa kio mun’owu wa luludiku lwa nkubik’andi. (1 Kor. 14:33) Kasikil’owu, i luzolo lwa Nzambi vo e nsangu zambote za samunua mu nza yawonso. (Mat. 24:14) Yave watumbika Yesu mu vita o ntu mu salu kiaki. Yesu ovanganga mawonso kimana e salu kiaki kiasadilwa mu mpila yatoma kubama. Muna tandu kiantete, ekolo e nkutakani zasayananga mu fulu yayingi, akuluntu batumbikwanga mu vana luludiku yo vita o ntu. (Mav. 14:23) Muna Yerusaleme i mwakala e Selo Yambuta, i sia vo, antumwa ye ambuta ana bavitanga o ntu mu baka e nzengo zasadilwanga muna nkutakani zawonso. (Mav. 15:2; 16:4) Wau vo mpangi zazi balemvokelanga tuludiku batambulanga, ‘e nkutakani zakwamanana sikila muna lukwikilu, o lutangu lwawokelanga lumbu ke lumbu.’—Mav. 16:5.

2. Tuka muna mvu wa 1919, aweyi Yave kekutuvaninanga luludiku ye madia ma kimwanda?

² Kana nkutu o unu, Yave okwamanananga kubika nkangu andi. Muna lutumu lwa Yave, tuka muna mvu wa 1919, Yesu osadilanga e buka kiakete kia Akristu akuswa muna kubika e salu kia samuna e nsangu zambote yo vana madia ma mwanda kwa alandi andi. a (Luka 12:42) Kieleka, Yave osambulanga e salu kiau.—Yes. 60:22; 65:13, 14.

3-4. (a) Yika e nona ya una tuvuilanga e nluta wau vo twatoma kubikwa. (b) Nkia mambu tubadika mu longi diadi?

 ³ Kele vo ke twatoma kubikwa ko, ke twadi lenda sala e salu kina Yesu katuvana ko. (Mat. 28:19, 20) Muna bonga e nona, yindula dina diadi vangama kele vo ampangi ke bakubika ko vo twasilanga kaka umbangi muna zunga kia nkutakani eto. Konso muntu wadi sila umbangi konso fulu kazolele. E zunga yankaka yadi toma silwa umbangi kwa ateleki ayingi, vo i yankaka ke yadi silwa sungididi ko. Nga olenda yindula nluta miankaka tuvuanga wau vo twatoma kubikwa?

⁴ Mana Yesu kavanga vava kakala ova ntoto, mena se mbandu muna mpila kekwamanenanga kubikila nkangu a Nzambi o unu. Muna longi diadi, tubadika e mbandu ina Yesu kasisa ye una e nkubika eto ilandilanga e mbandu yayi. Tubadika mpe una tulenda kumikina e vuvu kieto muna nkubik’a Yave.

E NKUBIKA ETO MBANDU A YESU ILANDANGA

5. Mu nkia mpila e nkubik’a Yave ilandilanga mbandu a Yesu? (Yoane 8:28)

⁵ Yesu walongoka kwa Se diandi dia zulu mana kavanga yo vova. Muna landa e mbandu a Yesu, e malongi ye tuludiku twa nkubik’a Yave mu Diambu dia Nzambi tutukanga. (Tanga Yoane 8:28; 2 Tim. 3:16, 17) Ntangwa zawonso tulukiswanga vo twatanganga e Diambu dia Nzambi yo sadila mana tutanganga. Nkia nluta tuvuanga vava tulandanga tuludiku twatu?

6. Nkia nluta tuvuanga vava tulongokanga e Bibila muna lusadisu lwa nkanda mieto?

⁶ Tuvuanga nluta miayingi vava tulongokanga e Bibila muna lusadisu lwa nkanda mieto. Kasikil’owu, tulenda tezanesa malongi ma Bibila yo tuludiku tutambulanga muna nkubik’a Yave muna lusadisu lwa nkanda mieto. Vava tumonanga vo tuludiku tutambulanga ngwizani twina ye Bibila, e vuvu kieto muna nkubik’a Yave kikumamanga.—Roma 12:2.

7. Nkia nsangu o Yesu kasamuna? Aweyi e nkubik’a Yave ilandilanga mbandu andi?

⁷ Yesu wasamuna e “nsangu zambote za Kintinu kia Nzambi.” (Luka 4:43, 44) Yesu wakanikina mpe alongoki andi mu samuna e nsangu za Kintinu. (Luka 9:1, 2; 10:8, 9) O unu, awonso bena muna nkubik’a Yave, besamunanga e nsangu zambote za Kintinu kia kala nkia fulu bezingilanga yovo nkia kiyekwa bena kiau.

8. Nkia lau tuna diau?

⁸ Lau diampwena kwa yeto mu samuna e nsangu za Kintinu kwa akaka. Ke wantu awonso ko bena ye lau diadi. Kasikil’owu, vava Yesu kakala ova ntoto, kayambula ko vo mianda miambi bantela kimbangi. (Luka 4:41) O unu, vitila o muntu kayantika sila umbangi ye Mbangi za Yave, kafwete zingila mu mpila iyangidikanga Yave. Muna songa vo tuyangalelanga e salu kia samuna e nsangu za Kintinu kia Nzambi, tufwete vanganga mawonso tulenda muna sila umbangi kwa wantu konso fulu ye konso ntangwa. Nze Yesu, e kani dieto i kuna yo yitila maza muna mbongo a ludi kia Kintinu muna ntima mia wantu.—Mat. 13:3, 23; 1 Kor. 3:6.

9. Aweyi e nkubik’a Yave isadisilanga wantu mu zaya e nkumbu a Nzambi?

⁹ Yesu wasadisa wantu mu zaya e nkumbu a Nzambi. Muna sambu kavanga kwa Se diadi dia zulu, Yesu wavova vo: “Yabazayisa e nkumbu aku.” (Yoa. 17:26) E nkubik’a Yave itangininanga e mbandu a Yesu muna vanga mawonso muna sadisa akaka mu zaya e nkumbu a Nzambi. Imosi muna mpila e nkubik’a Yave ivangilanga wo i sadila Bibila—Nsekola ya Nz’ampa. E nsekola yayi, yavutula e nkumbu a  Nzambi muna fulu yakala muna sono yantete. E nsekola yayi yamvimba yovo ndambu, yasekolwa mu vioka 270 lwa ndinga. Muna Nkudika A4 ye A5 ina muna nsekola yayi, olenda longoka mayingi yo zaya e kuma ye una e nkumbu a Nzambi yavutulwilwa muna fulu yandi. E Nkudika A5 isonganga mpe e ziku vo e nkumbu a Nzambi yasonama muna Sono ya Kingerekia nkumbu 237.

10. Adieyi olongokele muna lusansu lwa nkento mosi ozingilanga kuna Mianmar?

¹⁰ Wauna Yesu kavanga, o yeto mpe tuzolele sadisa wantu ayingi mu zaya e nkumbu a Nzambi. Nkento mosi kuna Mianmar ona una ye mvu 67, vava kalongoka vo Nzambi una ye nkumbu, wadila yo vovesa nteleki vo: “Mu zingu kiame e yayi i nkumbu antete ngwidi vo e nkumbu a Nzambi, Yave. . . . Undongele diambu diamfunu kibeni.” Nze una tumwene mu lusansu lwalu, vava o muntu kelongokanga e nkumbu a Nzambi, olendanga vanga nsobani muna zingu kiandi.

KWAMANANA KUMIKA E VUVU KIAKU MUNA NKUBIK’A YAVE

11. Aweyi akuluntu balenda songela luyangalalu lwau muna nkubik’a Yave? (Tala mpe mafoto.)

¹¹ Mu nkia mpila akuluntu balenda songela luyangalalu lwau muna nkubik’a Nzambi? Vava betambulanga tuludiku, akuluntu bafwete to tanga ye sungididi kiawonso yo sadila to muna mpila yambote. Kasikil’owu, vana ntandu a tambula luludiku lwa una bafwete lungisilanga yiyekwa yau yovo una balenda vangila e sambu muna nkutakani, betambulanga mpe luludiku lwa una balenda lunga-lungila mameme ma Kristu. Vava akuluntu besadilanga tuludiku twawonso betambulanga muna nkutakani a Yave, ampangi bemonanga vo Yave okubazolanga yo kubalunga-lunganga.

12. (a) Ekuma tufwete yikamena awana bevitanga o ntu? (Ayibere 13:7, 17) (b) Ekuma tufwete silanga e sungididi muna fu yambote ya awana bevitanga o ntu?

¹² Vava tuvewanga luludiku kwa akuluntu, tufwete lo tambulwilanga. Avo tuvangidi wo, e salu kia awana bevitanga o ntu ke kikala kiampasi ko. Bibila kikutukasakesanga vo twalemvokelanga yo sakalela awana bevitanga o ntu. (Tanga Ayibere 13:7, 17.) Ezak’e ntangwa o vanga wo dilenda kala diampasi. Ekuma? Kadi awana bevitanga o ntu, wantu alembi lunga. Kansi, avo tusidi e sungididi muna fu yau yambi yo lembi sia e sungididi muna fu yau yambote, tusadisa mbeni zeto. Mu nkia mpila? E mbeni zeto bazolele vo twakala yo lukatikisu vo Nzambi osadilanga e nkubik’andi muna kutufila. Ozevo, avo tuna ye ngindu zabendomoka mu kuma kia akuluntu, tulenda kala ye ngindu zabendomoka mu kuma kia nkubik’a Yave yo lembi bunda diaka e vuvu muna nkubika yayi. Adieyi tulenda vanga muna zaya yo bembola luvunu lwa mbeni zeto?

KUYAMBULA KO VO AKAKA BAYOYESA E VUVU KIAKU MUNA NKUBIK’A YAVE

13. Aweyi e mbeni za Nzambi zivavanga fidila wantu mu yindula vo e nkubik’a Nzambi yambi?

¹³ Atantu a Nzambi bevanganga mawonso kimana e mambu mambote muna nkubik’a Yave mamoneka vo mambi. Kasikil’owu, tulongokanga muna Bibila vo Yave ovingilanga vo selo yandi bakala bavelela muna nitu, muna ngindu ye muna kimwanda. Yave wasikidisa vo avo muntu okwamanene vanga mambu mambi yo lembi viluka o ntima, kafwete vaikiswa muna nkutakani. (1 Kor. 5:11-13; 6:9, 10) Tulemvokelanga e nkanikinu wau. Kansi, atantu eto besadilanga diambu diadi muna kututumba vo ke tuyambulanga wantu  ko bavanga konso mana bazolele, wantu tufundisanga ye ke tuzolanga wantu ko.

14. Aki nani Satana kesadilanga muna sayanesa e nsangu zaluvunu mu kuma kia nkubik’a Nzambi?

¹⁴ Zaya ana bekutubangikanga. Satana wa Nkadi ampemba osayanesanga luvunu mu kuma kia nkubik’a Nzambi. Yandi i “se dia luvunu.” (Yoa. 8:44; Tuku 3:1-5) Muna kuma kiaki, tufwete vingila vo Satana osadila alandi andi muna sayanesa nsangu zaluvunu mu kuma kia nkubik’a Yave. Ediadi diavangama muna tandu kiantete.

15. Adieyi mfumu za mabundu bavanga kwa Yesu ye alandi andi?

¹⁵ Muna tandu kiantete, awana bayikamanga Satana bavovanga luvunu mu kuma kia Mwan’a Nzambi ona wakala vo muntu alunga ye wavanga masivi mayingi. Kasikil’owu, mfumu za mabundu bavovanga kwa nkangu vo Yesu mu “nkum’a mfumu a nkuya” kavaikisilanga e nkuya. (Maku 3:22) Vava Yesu kakala mu mpasi, mfumu za mabundu bamvunina mambu vo Nzambi katianguna ye baleba o nkangu mu lomba vo Yesu kavondwa. (Mat. 27:20) I bosi, ekolo alandi a Kristu basamunanga e nsangu zambote, atantu ‘bakomekena nkangu’ kimana babangika Akristu awaya. (Mav. 14:2, 19) Mu kuma kia Mavangu 14:2, Eyingidilu dia 1 kia Desemba 1998, disasilanga vo: “Awana bayikama Satana babembola e nsangu zina Akristu basamunanga ye bavova mambu maluvunu mu kuma kiau kimana o nkangu wamenga Akristu yo lembi wa e nsangu zau.”

16. Nkia diambu tufwete sungamenanga avo tuwidi nsangu zaluvunu?

¹⁶ Nze muna tandu kiantete, yamu wau Satana okwamanananga vuna yo ‘vukumuna nza yawonso.’ (Lus. 12:9) Avo owidi nsangu  zaluvunu mu kuma kia nkubik’a Nzambi, sungamena dina atantu a Nzambi bavanga kwa Yesu ye alongoki a tandu kiantete. Nze una Bibila kiasakula, o unu nkangu a Nzambi ubangikwanga yo vuninua mambu. (Mat. 5:11, 12) Avo tuzeye e tuku dia nsangu zaluvunu yo vanga diambu vana vau, ke tuvunginikwa muna nsangu zazi ko. Nkia diambu tufwete vanga?

17. Aweyi tulenda vengela mwena mpasi muna nsangu zaluvunu? (2 Timoteo 1:13) (Tala mpe e babu, “ Aweyi Tulenda Vengela Nsangu Zaluvunu?”)

¹⁷ Venga tusansu twaluvunu. Paulu wa ntumwa wavova dina tufwete vanga avo tuwidi nsangu zaluvunu. Wavovesa Timoteo vo ‘kakanikina akaka balembi . . . sia e sungididi muna tusansu twaluvunu’ yo “venga tusansu twa luvunu.” (1 Tim. 1:3, 4; 4:7) Yindula e diadi: O nsedia olenda dia e lekwa kia mvindu kisotokele va ntoto, kansi o mbuta kalendi wo vanga ko kadi ozeye wo vo dilenda kuntwasila kimbevo. Ozevo, tuvenganga nsangu zaluvunu kadi tuzeye e tuku dia nsangu zazi. Tusimbininanga “mambu mavimpi” ma ludi.—Tanga 2 Timoteo 1:13.

18. Aweyi tulenda songela vo tubundanga e vuvu mu nkubik’a Yave?

¹⁸ Tulongokele mpila tatu muna mpila zayingi e nkubik’a Nzambi itangininanga Yesu. Ekolo olongokanga e Bibila, vava zaya mpila zankaka e nkubik’a Nzambi itangininanga Yesu. Sadisa akaka muna nkutakani aku mu kumika e vuvu kiau muna nkubik’a Nzambi. Kwamanana kumika e vuvu kiaku muna sadila Yave ye kwikizi kiawonso yo kwamanana finama e nkubika ina Yave kesadilanga muna lungisa luzolo lwandi. (Nku. 37:28) Yambula twakwamanana zitisa e lau tuna diau dia kala entwadi yo nkangu a Nzambi ana besonganga zola ye kwikizi kwa Yave.