MU MVU waviokele, mpangi zayingi mu nza yawonso batumbikilu se akuluntu ye selo ya salu. Avo u mosi muna yau, tuna ye ziku vo una ye kiese wau osadilanga Yave ye mpangi zaku mu mpila yayi.

Kansi, ke diambi ko mu telamwa o moyo avo otumbikilu se nkuluntu yovo selo kia salu. Mpangi Jason una vo nkuluntu, wavova vo: “Vava yatumbikwa se nkuluntu, yamona vo kiyekwa kiampwena kikilu muna kio lungisa.” Mose yo Yeremiya bakimwena vo ke bakala bafwana ko vava Yave kabavana kiyekwa. (Luvaiku 4:10; Yeremiya 1:6) Avo i wau mpe omonanga, adieyi olenda vanga muna toma kuyifwanisa yo kwamanana nungunuka muna kimwanda? Olenda longoka mayingi muna mbandu a Timoteo.—Mavangu 16:1-3.

Timoteo nanga kimbuta kia mvu 20 kakala vava kayantika kangala yo Paulu wa ntumwa. Vava katambula e mboka yayi, Timoteo nanga wayindula vo kakala wafwana ko mu longa yo vana tuludiku kw’akaka wau vo nleke kakala. (1 Timoteo 4:11, 12; 2 Timoteo 1:1, 2, 7) Kana una vo i wau, wakwamanana nungunuka. Una vavioka mvu kumi, Paulu wavovesa ampangi kuna Filipi vo: “Ngina ye vuvu muna Mfumu Yesu vo ke kolo ko se yanutumina Timoteo.” Ekuma Paulu kavovela e mvovo miami? Wasasila vo: “Kadi kina yo muntu ankaka ko wina ye tima nze yandi.”—Filipi 2:19, 20.

Ekuma Timoteo kenena se mbandu ambote kwa akuluntu? Badika kuma sambanu.

1. Watokanenanga e wete dia wantu. Paulu wavovesa ampangi kuna Filipi vo Timoteo ‘watokanenanga’ wete diau. (Filipi 2:20) Timoteo wazolanga vo ampangi bakwamanana finama Yave, wasadilanga e ntangwa ye ngolo zandi muna kubasadisa.

Mpangi William, una vo nkuluntu se vioka mvu 20, ovovesanga ampangi batumbikilu se akuluntu ke kolo ko vo: “Nuzolanga ampangi. Nusianga e sungididi muna nsatu za mpangi vana fulu kia tokanena kaka mambu masikidiswa.” Ke nukadi nze nati a kalu ko ona otokanenanga kaka lwaka mu ola yasikidiswa vana fulu kiningamenanga makalu, kansi keyambulanga ko vo wantu bamanta muna kalu.

2. Wasianga e salu kia Yave vana fulu kiantete. Paulu wavova vo Timoteo waswaswana kakala ye awana ‘bavavanga mambu ma yau kibeni kaka, ke mana ma Yesu Kristu ko.’ (Filipi 2:21) Paulu wamona vo mpangi zankaka mu mambu ma zingu kia yau kibeni batoma sianga e sungididi. Ezak’e ntangwa, basianga zolela ya yau kibeni vana fulu kiantete ke mu salu kia Yave ko. Kansi, Timoteo ke diau ko kavanganga. Kuna kwalanda vava kavewa e lau dia vanga mayingi muna salu kia Nzambi, watambulwila nze Yesaya, ona wavova vo: “Mono oyu; untuma.”—Yesaya 6:8.

Aweyi olenda kadila ye tezo vana vena e nsatu za ngeye kibeni ye nsatu za nkutakani? Diantete, landa luludiku lwa Paulu: “Nwazaya oma masundidi o mfunu.” (Filipi 1:10) Sia e salu kia Yave vana fulu kiantete. Dianzole, venga e salu yovo mambu malenda kudia ntangwa ye ngolo zayingi. Paulu wavovesa Timoteo vo: “Tina zolela ya kileke, kansi tatidila unsongi, lukwikilu, zola, luvuvamu.”—2 Timoteo 2:22.

3. Wasalanga kwayingi muna salu kia Yave. Paulu wavova mu kuma kia Timoteo  vo: “Nze mwana osadilanga se diandi, osadidi yame muna lunungunuku lwa nsangu zambote.” (Filipi 2:22) Timoteo kakala molo ko. Wasalanga entwadi yo Paulu, ediadi diawokesa kikundi kiau.

O unu, vena ye salu kiayingi muna nkubik’a Yave. E salu kiaki kiese kiayingi kitwasanga ye kilenda kusadisa mu finama mpangi zaku. Muna kuma kiaki, vanga mawonso muna ‘wokesa e salu kia Mfumu.’—1 Korinto 15:58.

4. Wasadilanga mana kalongokanga. Paulu wasonekena Timoteo vo: “Ongeye watoma landa malongi mame, mpila zingu kiame, e kani diame, lukwikilu lwame, ntim’ame a vunda, nzol’ame ye luzindalalu lwame.” (2 Timoteo 3:10) Timoteo wasadilanga mana kalongokanga. Muna kuma kiaki, watambula diaka malau mankaka.—1 Korinto 4:17.

Ekuma olembi vavila nkuluntu wazikuka ona olenda kala se mbandu kwa ngeye? Mpangi Tom ona osalanga se nkuluntu mu mvu miayingi, osungamenanga nkuluntu mosi wazikuka ona wansianga e sungididi yo kunlonga mambu mayingi. Wavova vo: “Nkumbu miayingi yanlombanga lusadisu yo sadila tuludiku kampananga. Ediadi diansadisa mu zikuka muna mwanda.”

5. Wakilonganga yandi kibeni. Paulu wavovesa Timoteo vo: “Sia e ngolo wasonganga o vumi wa Nzambi.” (1 Timoteo 4:7) Kana una vo nlundumuki okalanga ye nlongi, divavanga mpe vo kayilonga yandi kibeni. Paulu wavovesa Timoteo vo: “Kwamanana kuyivana muna tangila nkangu e sono yavelela, kubakasakesa yo kubalonga. . . Toma badika yo kukivana muna mambu mama; kimana lunungunuku lwaku lwamoneka kwa wantu awonso.”—1 Timoteo 4:13-15.

Ngeye mpe ofwete kwamanana tomesa e ndekwa zaku. Kalanga ye fululu kia longoka Nkand’a Nzambi, sadilanga tuludiku twampa tutambulanga muna nkubik’a Yave. Kuyibundi vuvu kiasaka ko. Kuyindula ko vo wau vo mambu mayingi kala ozeye, olenda kwaku baka nzengo muna konso diambu dibwidi lembi teka vavulula yo toma dio fimpa. Nze Timoteo, “toma kuyilunga-lunga ye longi diaku.”—1 Timoteo 4:16.

6. Wabundanga e vuvu muna mwand’a Yave. Vava kavovela e salu kia Timoteo, Paulu wansungamesa vo: “Lunda eki kiambote oveno muna mwand’avelela, owu wina omu yeto.” (2 Timoteo 1:14) Diavavanga vo Timoteo kabunda e vuvu muna mwand’a Nzambi.

Mpangi Donald osalanga se nkuluntu mu mvu miayingi wavova vo: “Akuluntu ye selo ya salu bafwete kumikanga e ngwizani au yo Nzambi. Awana bevanganga wo, benungunuka muna ‘nkuma yamuna nkuma.’ Avo balombele mwand’a Nzambi muna sambu yo yima e fu ya mbongo a mwanda, bekala se nsambu kuna kwa mpangi zau.”—Nkunga 84:7; 1 Petelo 4:11.

Dialukasakeso kikilu mu mona selo ya salu ye akuluntu ampa nze ngeye, bekwamanananga nungunuka muna salu kia Yave. Jason ona tuyikidi kala, wavova vo: “Tuka yatumbikilwa se nkuluntu, mambu mayingi ndongokele kala. Umbakuzi wame wawokela. Owau, iyangalelanga e kiyekwa kiame, ibadikilanga kio se lau diampwena kikilu.”

Nga okwamanana nungunuka? Avo olende e mbandu a Timoteo, ngeye mpe okala se nsambu kwa mpangi zaku.