Ekuma ke tufwete tudila e nkanda mia Mbangi za Yave mu nzila zankaka za internete ko yovo muna redes sociais?

Wantu ayingi beyindulanga vo wau vo e nkanda mieto ke mitekwanga ko, balenda mio bandula yovo tula muna nzila zankaka za internete yovo muna redes sociais. Kansi, o vanga wo dilenda twasa vonza ye ke dina ngwizani ko ye nsiku mia Mpila ya Sadila *(tal’e mvovo vana yand’a lukaya) e nzil’eto. E nsiku miami mivovanga vo ke muntu ko ofwete “katula fwaniswa, nkanda, nkunga, mafoto, video ye mambu mankaka mena mu site yayi yo sia mo mu site yankaka.” Ekuma e nsiku miami minina miamfunu?

E mambu mawonso mena muna nzila zeto mena muna lutumu lwa asoneki, ediadi disongele vo vena ye nsiku mitaninanga mambu mama. E diambu diadi diamfunu kikilu, kadi disadisanga mu lembi sadila nkanda mieto mu mpila yambi. Avengomoki ye wantu akaka ana bezolanga fwasa e salu kieto, ezak’e ntangwa betulanga e nkanda mieto muna nzila zau za internete kimana batunta e sungididi kia Mbangi za Yave ye kia wantu akaka. Kansi muna nzila zazi, betulanga mo mpe malongi mekotesanga lukatikisu muna ntima mia wantu. (Nkunga 26:4; Ngana 22:5) Akaka besadilanga nkanda mieto yovo sinsu kia jw.org muna sayanesa e mambu mau, muna aplicativo zau yovo muna lekwa betekanga. Kansi, wau vo vena ye nsiku mitaninanga e nkanda ye sinsu kieto kia jw.org, tulenda kubafunda kuna mbazi a nkanu yo kubasima kimana bayambula wo vanga. (Ngana 27:12) Kansi, afundisi ke bekutuvana ndungidi ko avo tuyambulanga vo wantu ankaka, kana nkutu mpangi zeto, batula nkanda mieto muna nzila zakaka yovo sadila sinsu kieto kia jw.org muna lekwa betekanga.

Avo tubakidi nkanda mieto mu nzila zankaka vana fulu kia bakila mio muna nzil’eto jw.org, dilenda kututwasila vonza. Yave mu nzil’a “ntaudi akwikizi yo lulungalalu” kaka kekutuvaninanga madia ma mwanda. (Matai 24:45) O “ntaudi akwikizi yo lulungalalu” osadilanga kaka e nzila zeto muna kutuvana o madia ma mwanda—www.pr418.com, tv.pr418.com, ye wol.pr418.com. Vana ntandu, aplicativo zitatu kaka tuna zau—JW Language^®, JW Library^®, ye JW Library Sign Language^®. Muna nzila ye aplicativo zazi, ke tusolola mo tuzayisu twa kinkita ko yovo konso diambu dia nza yayi ya Satana. Kansi, avo tubakidi nkanda mieto muna nzila yovo aplicativo zankaka, ediadi diavonza kikilu kadi wantu balenda bendomona mambu mena mu nkanda mieto.—Nkunga 18:26; 19:8.

Vana ntandu, avo tutudidi nkanda mieto muna nzila za internete zina vo wantu balenda vana e ngindu zau, tuvana e nzila kwa avengomoki ye wantu akaka mu vovela e nkubik’a Yave e mbi. Mpangi zakaka befilanga e mpaka yo wantu awaya. Ediadi dilenda fusulwisa e nkumbu a Yave e nsoni. E mbokena zazi muna internete ke mpila yambote ko ya singikila ngindu za muntu yo kunsadisa mu bakula e ludi. (1 Timoteo 6:3-5; 2 Timoteo 2:23-25) Wantu ankaka besokanga nzila za internete yovo ziula e conta muna redes sociais zilenda moneka nze za nkubik’a Yave yovo za mpangi za Buka kia Selo Yambuta. Kansi, e nzila zazi za akwa umpuki. Ke mosi ko muna mpangi za Buka kia Selo Yambuta una ye nzila ya yandi kibeni muna internete.

Vava tufilanga wantu muna nzil’eto ya jw.org, tuyikamanga e salu kia samuna e “nsangu zambote.” (Matai 24:14) E nzil’eto ye aplicativo zeto mu tomeswa kaka zina. Tuzolele vo konso muntu kavua e nluta. Muna kuma kiaki, tulenda twikila wantu e nkanda mieto muna email yovo kubatwikila e link ya nzil’eto. Muna mpila yayi, tufila wantu muna nzila mosi kaka kesadilanga o Yave muna kutuvana madia ma mwanda, i sia vo, “ntaudi a kwikizi yo lulungalalu.”