1. Mu nkia mambu tusadilanga kumosi yo Yave?

VAVA Yave kavanga o wantu, wazola vo basala kumosi yo yandi. Kana una vo wantu bakituka wantu alembi lunga, akwa kwikizi balenda sala entwadi yo Yave lumbu yawonso. Kasikil’owu, ‘tusalanga kumosi yo Nzambi’ vava tusamunanga e nsangu zambote za Kintinu kiandi yo kitula wantu se alongoki. (1 Korinto 3:5-9) Lau diampwena kikilu tuna diau wau o Mvangi eto wa mpungu-ngolo katusola mu sala e salu kiaki kiamfunu. Kansi, e salu kia samuna e nsangu zambote ke kiau kaka ko kikutuvananga e lau dia sala kumosi yo Yave. Mu longi diadi, tulongoka mpe una tulenda sadila entwadi yo Nzambi vava tusadisanga esi nzo zeto ye mpangi zeto za nkutakani, vava tutambulanga e nzenza, vava tuvananga moko muna salu kisalanga e nkubik’a Yave mu nz’amvimba ye vava tubakanga e nzengo za kuyivana emvimba muna salu kia Yave.—Kolosai 3:23.

2. Ekuma ke tufwete kuyitezanesa ko ye akaka mu mana tulenda vanga muna salu kia Yave?

² Ekolo tulongokanga e longi diadi, diambote twasungamenanga  vo konso muntu mu yeto waswaswana. Twaswaswana muna kimbuta, vimpi, mambu ma zingu ye ngangu. Muna kuma kiaki, venga e fu kia tezanesa dina olenda vanga muna salu kia Yave ye dina akaka balenda vanga. Paulu wa ntumwa wavova vo: “Yambula konso muntu kafimpa mavangu mandi, ozevo okala ye kuma kia yangalela, ke mu kuyitezanesa ye ankaka ko.”—Ngalatia 6:4.

3. Ekuma tulenda vovela vo muntu ntwadi kesalanga yo Nzambi vava kelunga-lunganga esi nzo andi?

³ Yave ozolele vo twalunga-lunganga esi nzo eto. Kasikil’owu, divavanga vo wasala kimana wakala ye nzimbu mu lungisa e nsatu za esi nzo aku. Ngudi zayingi bekalanga ku nzo mu lunga-lunga wan’au akete. Avo mase meto ke belendanga diaka kuyilunga-lunga ko, dilenda vava vo twabalunga-lunga. Mawonso mama mfunu mena. Nkand’a Nzambi uvovanga vo: “Avo vena yo muntu olembi lungisanga e nsatu za awana kavuidi, musungula esi nzo andi, ovanini lukwikilu o nkalu, oviokele mundembi-kwikila o bi.” (1 Timoteo 5:8) Avo mbebe ya lunga-lunga esi nzo una yau, nanga kuvanganga diaka mayingi ko muna salu kia Yave nze una wadi zola. Kansi, kuyoyi ko. Yave oyangalalanga vava olunga-lunganga esi nzo aku.—1 Korinto 10:31.

4. Aweyi mase balenda sila e Kintinu kia Nzambi va fulu kiantete? Nkia diambu divangama avo bavangidi wo?

⁴ Mase bena vo Akristu balenda sala kumosi yo Yave vava besadisanga wan’au mu kuyisila makani ma mwanda muna salu kia Yave. Mase mayingi i diau bevanganga. Ediadi disadisanga wan’au mu baka e nzengo za kota muna salu kia ntangwa ke ntangwa, kana nkutu divava vo benda sadila kwandá ye nzo au. Akaka bekuyivananga muna salu kia kimisionario, akaka besalanga se aviti a nzila muna zunga ivuidi ateleki ayingi o mfunu, akaka besadilanga kuna Betele. Dialudi vo, avo wana bele sadila mu zunga yandá, mase ke belenda diaka viokesa ntangwa yayingi ko yo wan’au nze una bazolele. Kana una vo i wau, bekasakesanga wan’au mu kwamanana sadila Yave kana nkutu nkia fulu bena. Ekuma? Ekuma kadi kiese kiayingi bekalanga kiau mu mona vo wan’au besianga Yave vana fulu kiantete muna zingu kiau. (3 Yoane 4) Ayingi muna mase mama bemonanga nze una Ana kamona ona wavova vo ‘ovene’ mwan’andi Samuele kwa Yave. Bebadikilanga dio se lau diampwena kikilu dia sala entwadi yo Yave.—1 Samuele 1:28.

5. Aweyi olenda sadisila mpangi muna nkutakani eno? (Tala e fwaniswa kuna lubantiku lwa longi.)

⁵ Avo kuna ye mbebe ya lunga-lunga esi nzo ko, nga olenda sadisa ampangi bena vo ambevo, anunu yovo konso ona ovuidi lusadisu o mfunu? Nga olenda sadisa awana bekubalunga-lunganga? Sianga e sungididi kw’awana bavuidi lusadisu o mfunu muna nkutakani eno. Kasikil’owu, nanga mpangi ankento olunga-lunganga se yovo ngudi una vo nunu. Nga olenda viokesa ntangwa yo se yovo ngudi andi kimana o mpangi kasia sungididi mu mambu mankaka? Olenda mpe sadisa muntu kimana kenda muna tukutakanu, kunsumbila lekwa kuna zandu yovo kwenda kingula muntu una ku lupitalu. Avo ovangidi wo, olenda sala entwadi yo Yave mu vana e mvutu za sambu kia muntu.—Tanga 1 Korinto 10:24.

6. Aweyi tulenda songela e fu kia zola nzenza?

⁶ Awana besalanga kumosi yo Nzambi bazayakene vo azodi a nzenza. Muna Nkand’a Nzambi, o mvovo wa kingerekia wasekolwa vo “tambula nzenza” usongele vo “songa e ngemba kwa nzenza”. (Ayibere 13:2) Muna Diambu dia Nzambi tutanganga nona yayingi ikutulonganga una tulenda songela o zola. (Etuku 18:1-5) Tufwete sadisanga akaka konso ntangwa tukalanga ye lau dia vanga wo, kiakala vo mpangi zeto muna mwanda yovo ve.—Ngalatia 6:10.

7. Nkia nluta olenda vua vava otambulanga awana bena mu salu kia ntangwa ke ntangwa?

⁷ Nga olenda sala kumosi yo Yave muna songanga e fu kia tambula e nzenza kw’awana bena muna salu kia ntangwa ke ntangwa vava bevavanga e fulu kia leka? (Tanga 3 Yoane 5, 8.) Avo tuvangidi wo, kiese kiayingi bekala kiau, yeto mpe tukala ye kiese. Muna Nkand’a Nzambi, ediadi diyikilwanga vo ‘kasakesa muntu yo nkwandi.’ (Roma 1:11, 12) Badika e nona kia mpangi Olaf. Vava kakala nleke, nkengi a zunga mosi ona wakala vo mpumpa wayenda kingula e nkutakani au. Fulu kia leka kavuanga o mfunu, kansi ke vakala muntu ko muna nkutakani wamvana e fulu. Muna kuma kiaki, Olaf wayuvula kwa mase mandi ana bakala vo ke Mbangi za Yave ko, kana vo balenda tambula nkengi a zunga muna nzo au. Bamvutula vo dilendakana, kansi bavovesa Olaf vo oyandi vana kunda keleka. I diau Olaf kavanga. Kekuyibanzanga ko wau kavanga wo. Olaf waviokesa lumingu lwambote kikilu yo nkengi a zunga. Muna konso mene, mambu mayingi mambote bamokenenanga ekolo badianga o dia kwa mene. O nkengi a zunga wakasakesa kikilu Olaf. Ediadi diamfila mu baka e nzengo za kota muna salu kia ntangwa ke ntangwa. Mu mvu 40 miviokele, Olaf mu nsi zayingi kala katwikwa mu kwenda sala e salu kia kimisionario.

8. Ekuma tufwete vangila o wete kw’akaka kana nkutu vo ke batuvutwidi matondo ko kuna lubantiku? Yika e nona.

⁸ Tulenda songa zola muna nzenza mu mpila zayingi, kana nkutu ke batuvutwidi matondo ko kuna lubantiku. Kasikil’owu, mpangi mosi ankento kuna Espanha walongoka Nkand’a Nzambi yo Yesica wa mwisi Equador. Lumbu kimosi, ekolo balongokanga e Nkand’a Nzambi, Yesica wayantika dila kwayingi. O mpangi ankento wanyuvula e kuma kadidilanga. Yesica wavova vo vitila kenda kuna Espanha, nsukami kikilu kakala. Lumbu kimosi, kakala ye madia ko kalenda vana kwa mwan’andi, maza kaka kakala mau. Yesica walomba lusadisu muna sambu ekolo kawondelelanga o mwana kimana kabaka o tulu. Vana vau, mpangi zole bayenda kuna nzo a Yesica yo kunkayila Eyingidilu. Kansi kuna makasi mawonso watiazuna e nkanda wau yo kubayuvula: “Nga omama i madia nuzolele vo yavana kwa mwan’ame?” Ampangi bavava kumvuvika o ntima, kansi Yesica kazola kubawila ko. Muna fuku wauna, ampangi bavutuka ye kitunga kia zala yo madia yo sisa kio vana  mwelo a nzo andi. Owau, ekolo balongokanga, wadila wau kalembi bakula vo zazina i mvutu za Nzambi muna sambu kavanga. Yesica wabaka e nzengo za sadila Yave. Kieleka, e mpangi zole zazi z’akento nluta miayingi babaka wau basonga e fu kia kayila akaka.—Kimpovi 11:1, 6.

9, 10. (a) Nkia malau bakala mau Aneyisaele mu kuyivana kuna mvevo? (b) Mu nkia salu ampangi z’akala balenda sadisila e nkutakani o unu?

⁹ Kuna nz’ankulu, Aneyisaele malau mayingi bakala mau mu kuyivana kuna mvevo. (Luvaiku 36:2; 1 Tusansu 29:5; Nekemiya 11:2) O unu, ngeye mpe una ye malau mayingi mu sadila e ntangwa, mavua ye ngangu zaku muna sadisa mpangi zaku. Avo ovangidi wo, kiese kiayingi okala kiau. Yave mpe okusambula.

¹⁰ E Diambu dia Nzambi dikasakesanga e mpangi z’akala muna nkutakani muna sala kumosi yo Yave mu sadila akaka nze selo ya salu yovo akuluntu. (1 Timoteo 3:1, 8, 9; 1 Petelo 5:2, 3) Awana bevanganga wo bekalanga ye tima dia sadisa akaka muna mambu mayingi bevuanga o mfunu kumosi ye nsambil’au. (Mavangu 6:1-4) Nga akuluntu balomba kala wasala nze nsongi a fulu yovo wavana e moko mu lunga-lunga e nkanda, zunga, luveleleso yovo salu kiankaka? Ampangi bevananga lusadisu mu mpila yayi bevovanga vo kiese kiayingi dikubatwasilanga.

11. Aweyi mpangi mosi ankento kavuila nluta wau kayivana muna salu kia tunga?

¹¹ Awana bekuyivananga muna salu ya tunga bevanganga yikundi yayingi. Mpangi mosi ankento una ye nkumbu a Margie, mvu 18 kasala e salu kia tunga Maseka ma Kintinu. Vava kasalanga e salu kiaki, wakasakesanga mpangi z’akento bakala vo andumba yo  kubalonga. Wavova vo eyayi i mpila yambote kikilu ampangi bena mu salu kiaki balenda kasakesela muntu yo nkwandi. (Roma 1:12) Vava kewanananga ye mpasi muna zingu, okasakeswanga kwa ampangi ana kavanga yau kikundi ekolo kasalanga e salu kiaki. Nga olenda kuyivanina muna salu kia tunga? Olenda kwaku kuyivana mu salu kiaki kana nkutu vo kuna ye umbangu wa salu kia tunga ko.

12. Aweyi tulenda vanina lusadisu vava vebwanga e sumbula?

¹² Tusalanga mpe kumosi yo Yave vava tusadisanga mpangi zeto bebwilanga e sumbula. Imosi muna mpila tulenda wo vangila i tukau twa nzimbu. (Yoane 13:34, 35; Mavangu 11:27-30) E mpila yankaka tulenda kubasadisila i velelesa yovo vangulula e nzo zau ku nim’a sumbula. Kasikil’owu, vava e nzo ya mpangi Gabriela wa mwisi Polônia yabangulwa kwa kizalu, wayangalala kikilu vava kamona ampangi za nkutakani zankaka bayiza kunsadisa. Vava keyindulanga dina diavangama, ovovanga vo ketokananga ko mu kuma kia mavua kavidisa, kansi osianga e sungididi muna nsambu katambula. Wavova vo: “Dina diambwila diatoma kunkwikidisa vo o kala muna Nkutakani ya Kikristu lau diampwena kikilu ye kiese kiayingi divananga.” Ayingi ana bevewanga lusadisu vava babwilwa sumbula i wau mpe bevovanga. Awana besalanga kumosi yo Yave mu sadisa mpangi zazi, kiese kiayingi ye nsambu zayingi bevuanga.—Tanga Mavangu 20:35; 2 Korinto 9:6, 7.

13. Aweyi tukumikinanga o zola kweto muna Yave vava tusadisanga akaka? Yika e nona.

¹³ Mpangi Stephanie ye ateleki ankaka muna zunga kiandi besalanga kumosi yo Nzambi muna sadisa mpangi zankaka batinina kuna Estados Unidos mu kuma kia vita yabwa kuna nsi zau. Besadisanga mintayila mia vita mu solola nzo ye salanganu ya nzo. Wavova vo: “E diambu diatusimba kikilu e ntima i kiese yo luyangalalu besonganga vava bemonanga o zola kwa wana-ngudi mu nza yawonso. E mpangi zazi beyindulanga vo yeto tukubasadisanga, kansi muna vova e ludi, yau beluta kutusadisanga. O zola, kintwadi, lukwikilu ye vuvu bena kiau ampangi muna Yave kikumikanga o zola kweto muna Yave. Ediadi dikutusadisanga mu yangalela yawonso tutambulanga muna nkubik’andi.”

14, 15. (a) Nkia tima kakala diau o Yesaya wa ngunza? (b) Aweyi Akristu balenda tanginina e mbandu a Yesaya?

¹⁴ Aweyi olenda wokesela e tima diaku dia  sala kumosi yo Yave? Nga olenda kuyivana mu kwenda sadila ku zunga kivuidi ateleki ayingi o mfunu? Muna songa o ntim’amvevo, ke divavanga ko vo yeto awonso twayaluka mu zunga yankaka. Kansi vena ye mpangi zayingi bevanganga. Bena ye tima nze dina Yesaya wa ngunza kakala diau. Vava Yave kayuvula vo: “Nga nani ntuma, ovo nani okutuyendela?” Wavova vo: “Mono oyu; untuma.” (Yesaya 6:8) Nga una yo umbangu yo luzolo lwa sadisa e nkubik’a Yave? Nkia mpila zankaka olenda vanina lusadisu?

¹⁵ Yesu wavova mu kuma kia salu kia samuna e nsangu zambote yo kitula wantu se alongoki vo: “E mbongo yayingi muna kutika, kansi e nsadi mike. I dianu vo, nudodokela Mfumu a mpatu katuma asadi muna mpatu andi.” (Matai 9:37, 38) Nga olenda sala nze mviti a nzila ku zunga kivuilu ateleki ayingi o mfunu? Nga olenda sadisa muntu ankaka mu vanga wo? Mpangi zayingi bemonanga vo e mpila yambote balenda songela o zola kwau muna Nzambi ye mfinangani zau i sala se mviti a nzila kuna kuvuilu ateleki ayingi o mfunu. Nga olenda yindula mpila zankaka olenda wokesela e salu kiaku? Avo ovangidi wo, kiese kiayingi dikutwasila.

16, 17. Nkia mpila zankaka olenda wokesela o vema kwaku muna salu kia Yave?

¹⁶ Nga una ye tima dia sadila ku Betele yovo muna salu kia tunga, kana nkutu vo mu fikolo yovo lumbu kimosi yovo lumbu yole muna lumingu? E nkubik’a Yave akwa luzolo lwambote ivavanga ana balenda sadila konso fulu bavuilu o mfunu yo sala konso salu balombelo kana nkutu vo ke bazeye sala e salu kiakina ko. Yave oyangalelanga awonso bekuyivananga kuna mvevo mu kwenda sadila konso kuna bavuilu o mfunu.—Nkunga 110:3.

¹⁷ Nga ozolele longwa kimana wasala e salu kia Yave una ufwene? Olenda twika e ndomba kimana wakota e Sikola ya Ateleki a Kintinu. E sikola yayi ilonganga mpangi z’akala ye z’akento bena mu salu kia ntangwa ke ntangwa kimana batoma sadilwa muna nkubik’a Yave. Awana bekotanga sikola yayi beyangalalanga kwenda sadila konso fulu betumwa. Nga olenda sadila Yave mu mpila yayi?—1 Korinto 9:23.

18. Nkia nluta tuvuanga vava tusalanga entwadi yo Yave lumbu ke lumbu?

¹⁸ Wau vo tu nkangu a Yave, tu akwa ntim’amvevo, tu wantu ambote, akwa ngemba ye zola. Tusadisanga akaka e lumbu yawonso. Ediadi dikututwasilanga kiese, luvuvamu ye nsambu zayingi. (Ngalatia 5:22, 23) Kana nkutu nkia mpil’a zingu una kiau, olenda kala ye kiese avo otanginini o ntim’amvevo a Yave yo kala mosi mun’awana besalanga yandi entwadi.—Ngana 3:9, 10.