1. Nkia nsambu tuvua mu kuma kia lukûlu?

E KIMENGA kia Yesu Kristu kia lukûlu kiaziula e nzila kimana twavua nsambu zayingi. Kasikil’owu, o lukûlu luziulanga e nzila kwa wana awonso a Adami ana bezolanga unsongi kimana bakituka wan’a Yave kuna sentu. E nsambu zankaka tuvua i moyo a mvu ya mvu. Vana ntandu, o lukûlu lwasingika mambu mamfunu muna wete dia vangwa yawonso, kiakala kuna zulu yovo ova ntoto.—Ayibere 1:8, 9.

2. (a) Nkia mambu mamfunu mu kuma kia zulu ye ntoto kayika o Yesu muna sambu? (Tala fwaniswa va ntandu.) (b) Adieyi tubadika mu longi diadi?

² Tezo kia mvu miole vitila lufwa lwa Yesu, walonga alongoki andi basambanga vo: “E Se dieto koko zulu, yambula nkumbu aku yazitiswa. E Kintinu kiaku kiza. O luzolo lwaku lwavangama ova ntoto nze koko zulu.” (Matai 6:9, 10) Mu longi diadi, tubadika una lukûlu lwasadisila kimana nkumbu a Yave yazitiswa yovo veleleswa, una lwaziulwila e nzila kimana Kintinu kia Nzambi kiayala ye una lusadisilanga kimana luzolo lwa Nzambi lwalungana.

3. E nkumbu a Yave nki isunzulanga? Aweyi Satana kayivisila e nkumbu a Yave?

³ Entete, Yesu wasamba vo e nkumbu a Yave yazitiswa yovo yaveleleswa. E nkumbu a Yave isunzulanga kiwuntu kiandi. Yandi i Muntu osundidi o nkuma ye unsongi mu nsema wawonso. Yesu wanyikila mpe vo: “Tata Avelela.” (Yoane 17:11) Wau vo Yave wavelela yovo wansongi, mawonso kevanganga ye konso nsiku kesianga miansongi. Kansi, muna mpatu a Edene, Satana wakatikisa e wisa kena kiau Nzambi kia sikidisa nsiku mu kuma kia wantu. Wavova luvunu mu kuma kia Yave yo tianguna yovo yivisa e nkumbu a Nzambi.—Etuku 3:1-5.

4. Aweyi Yesu kavelelesela e nkumbu a Nzambi?

⁴ Kuna diak’e sambu, Yesu wazolanga kikilu e nkumbu a Yave, wavanga mawonso kalenda mu velelesa yo. (Yoane 17:25, 26) Mu nkia mpila? Muna mavangu ye malongi mandi, Yesu wasadisa akaka mu mona vo e nsiku mia Yave miansongi, mawonso kekutulombanga i mu kuma kia wete dieto. (Tanga Nkunga 40:8-10.) Kana nkutu vava kamweswa e mpasi kwa Satana yo fwa lufwa lwampasi, Yesu wasikila ye kwikizi muna Se diandi. Wasonga vo muntu alunga olenda kwandi lemvokela Yave muna mawonso.

5. Aweyi tulenda velelesela e nkumbu a Yave?

⁵ Aweyi tulenda songela vo tuzolanga e nkumbu a Yave? Muna mavangu meto. Yave ovavanga vo twakala twavelela. (Tanga 1 Petelo 1:15, 16.) E diadi disongele vo tufwete sambila kaka yandi yo kunlemvokela ye nsi a ntim’eto wawonso. Kana nkutu vava tubangikwanga, tuvanganga mawonso tulenda mu zingila e ngwizani ye nsiku mia Yave. Vava tuzingilanga e ngwizani ye nsiku mia Yave, tuvananga e nkumbu andi nkembo. (Matai 5:14-16) Tusonganga vo e nsiku miandi miambote, Satana nkwa luvunu. Wau vo tu wantu alembi lunga, vilwa tuvanga. Kansi, avo tusumukini, tufwete viluka o ntima yo sia e ngolo za yambula vanga mambu mana mevezesanga e nkumbu a Yave.—Nkunga 79:9.

6. Kana una vo tu wantu alembi lunga, Yave olenda kutubadikila vo tu asongi. Ekuma?

⁶ Kiakala vo mu buka kia akuswa twina yovo kia “mameme mankaka,” Yave ololoka masumu meto avo tusongele lukwikilu muna lukûlu. Vava tukukiyekolanga kwa Yave, okututambulanga nze asambidi andi. Obadikilanga Akristu akuswa akwa unsongi vo wan’andi. Vo i “mameme mankaka,” okubabadikilanga vo akundi andi. (Yoane 10:16; Roma 5:1, 2; Yakobo 2:21-25) Muna kuma kiaki, kana nkutu owau, o lukûlu luziulanga e nzila kimana twakala ye ngwizani ambote yo Se dieto yo zitisa e nkumbu andi.

7. Nkia nsambu tuvua muna Kintinu kia Nzambi mu kuma kia lukûlu?

⁷ Muna sambu kia S’eto, Yesu wavova vo: “E Kintinu kiaku kiza.” Aweyi lukûlu lwinina e ngwizani ye Kintinu kia Nzambi? E Kintinu kia Nzambi i luyalu luyalwa kwa Yesu ye 144.000 ma wantu basolwa ova ntoto. O lukûlu luziulanga e nzila kimana wantu awaya bavuila moyo kuna zulu. (Lusengomono 5:9, 10; 14:1) Bekituka atinu ye nganga yo yala yo Yesu e nza yawonso mu funda dia mvu. Muna kolo kiakina, Yave osadila Kintinu mu kitula e nza se paradiso  yo sadisa wantu awonso mu kituka alunga. E selo ya Yave kuna zulu yo va ntoto besinga kituka esi kanda dimosi. (Lusengomono 5:13; 20:6) Yesu ofwasa Satana yo fokola e mpasi zawonso katwasa.—Etuku 3:15.

8. (a) Aweyi Yesu kasadisila alongoki andi mu bakula vo Kintinu kia Nzambi mfunu kina? (b) Aweyi tulenda yikamena e Kintinu o unu?

⁸ Yesu wasadisa alongoki andi mu bakula o mfunu wa Kintinu kia Nzambi. Mu nkia mpila? Ke vavioka lumbu yayingi ko vava kavubwa, Yesu wayantika samuna e “nsangu zambote za Kintinu kia Nzambi” muna fulu yawonso kayendanga. (Luka 4:43) Wavovesa mpe alongoki andi vo bakala mbangi zandi “yakuna nsuk’a nza.” (Mavangu 1:6-8) O unu, mu kuma kia salu kia samuna e nsangu za Kintinu, wantu bena ye lau dia longoka oma ma lukûlu yo yikama Kintinu kia Nzambi. Tusonganga vo tuyikamanga Kintinu ye kwikizi kiawonso muna sadisanga Akristu akuswa muna salu kia samuna e nsangu zambote mu nza yawonso.—Matai 24:14; 25:40.

9. Ekuma tulenda kadila ye ziku vo Yave olungisa e kani diandi mu kuma kia wantu?

⁹ Adieyi Yesu kazola vova vava kavova vo: “O luzolo lwaku lwavangama”? Avo Yave ovovele vo diambu kingandi vangama divangama, tuna ye ziku vo vangama kikilu divangama. (Yesaya 55:11) Ukolami wa Satana ke ulendi kakidila Yave ko. Adieyi Yave kazola mu kuma kia ntoto? Wazola vo Adami yo Eva bawuta wana yo zadisa e nza yo wantu alunga. (Etuku 1:28) Kele vo Adami yo Eva bafwa lembi wuta wana, e kani dia Nzambi dia zadisa e nza yo wana ke diadi lungana ko. Muna kuma kiaki, Yave wabayambula vo bawuta wana. O lukûlu luvananga e lau kw’awonso ana besonganga e kwikizi mu kituka wantu alunga yo zinga yakwele mvu muna Paradiso ova ntoto. Wau vo Yave ozolanga kikilu wantu, ozolele vo twakala ye zingu kiambote kina kakana tuka kuna lubantiku.

10. Aweyi lukûlu lutwasila nluta kw’awana bafwa?

¹⁰ Adieyi tuvova mu kuma kia ulolo wa wantu ana bafwa lembi kala ye lau dia zaya Yave? Yave ozolanga vo wantu bazinga. Muna kuma kiaki, osinga fula awana bafwa. O lukûlu luziulanga e nzila kimana wantu awaya bavutuka diaka o zinga. I bosi, belongoka oma ma Yave yo zinga yakwele mvu. (Mavangu 24:15) Yave i Nto a moyo. Vava Yave kefula awana bafwa, okituka Se diau. (Nkunga 36:9) Muna sambu kia S’eto, Yesu wayikila Yave vo ‘Se dieto una kuna zulu.’ (Matai 6:9) Yave ovana Yesu salu kiamfunu kia fula mafwa. Yesu wavova vo: “Mono i lufuluku yo moyo.—Yoane 6:40, 44; 11:25.

11. Adieyi i kani dia Yave mu kuma kia “ndong’ayingi”?

¹¹ Yesu wavova mpe vo: “Konso ona ovanganga luzolo lwa Nzambi, i mpangi ame, i nsang’ame ye ngudi ame.” (Maku 3:35) Yave ozolele vo wantu a zula, makanda ye ndinga zawonso bakituka asambidi andi. Beyikilwanga vo “ndong’ayingi ina ke ilendi tangakana kwa muntu ko.” Bekwikilanga muna lukûlu yo lemvokela Nzambi. Bekunkembelelanga yo vova vo: “Luvuluzu lutukidi kwa Nzambi eto ona ovuende ova kunda ye kwa Mwan’a meme.”—Lusengomono 7:9, 10.

12. Adieyi tulongokele mu sambu kia Yesu mu kuma kia kani dia Yave muna wantu?

 ¹² Mayingi tulongokele mu kuma kia Yave ye kani diandi mu kuma kia wantu muna sambu kia S’eto kalonga o Yesu. Diantete, tufwete vanga mawonso tulenda mu zitisa e nkumbu a Yave yo vana yo nkembo. (Yesaya 8:13) E kimenga kia Yesu kia lukûlu eki kiaziula e nzila kimana twavuluzua, kivananga mpe nkumbu a Nzambi o nkembo. Owau tulenda bakula e kuma e nkumbu a Yesu inina ye nsasa vo “Yave i Mvuluzi.” Diazole, Yave osadila Kintinu kiandi mu twasa nsambu za lukûlu kw’awana belemvokelanga Nzambi. Diatatu, tuna ye ziku vo ke vena diambu ko dilenda kakidila luzolo lwa Yave lwalembi lungana.—Nkunga 135:6; Yesaya 46:9, 10.

13. Ekuma tuvubilwanga?

¹³ Imosi muna mpila tusongelanga vo tuvutulanga matondo mu kuma kia lukûlu, i yekola e zingu kieto kwa Yave yo vubwa. Muna mpila yayi, tusonganga vo lukwikilu tuna lwau muna lukûlu ye “kwa Yave tuvuilu.” (Roma 14:8) Vava tuvubwanga, dina nze yeto tulombanga kwa Yave vo katuvana “ntona zambote.” (1 Petelo 3:21) Yave osadilanga e nluta mia lukûlu muna vana e mvutu za ndomba zazi. Tuna kikilu ye ziku vo okutuvana yawonso katusila o nsilu.—Roma 8:32.

14. Ekuma Yave katukanikina vo twazolanga akaka?

¹⁴ Mawonso kevanganga o Yave i mu kuma kia zola kwandi. I luzolo lwandi vo asambidi andi bantanginina yo zola muntu yo nkwandi. (1 Yoane 4:8-11) Vava tusonganga zola muna wantu, tusonganga vo tuzolele kikilu kala “wan’a Se [dieto] wina kuna zulu.” (Matai 5:43-48) O nkanikinu wantete muna nkanikinu miole misundidi o nene i zola Yave, wanzole, zola akaka. (Matai 22:37-40) Imosi muna mpila tusongelanga zola muna wantu i kubasamunuina e nsangu zambote za Kintinu kia Nzambi. Avo tulemvokele nkanikinu a Yave wa zola akaka, musungula e mpangi zeto, o zola kweto muna yandi “kuwokela.”—1 Yoane 4:12, 20.

15. (a) Nkia nsambu za Yave tutambulanga owau? (b) Nkia nsambu tutambula kuna sentu?

¹⁵ Yave okutuvovesanga vo masumu meto ‘mevunzunwa’ avo tukwikidi muna lukûlu. Yave olenda loloka emvimba masumu meto. (Tanga Mavangu 3:19-21.) Nze una tulongokele kala, lukûlu luziulanga e nzila kimana Yave kabadikila Akristu akuswa se wan’andi. (Roma 8:15-17) Obokelanga awana bena mu buka kia “mameme mankaka” mu kituka esi kanda diandi ova ntoto. Vava bekituka wantu alunga yo vioka muna lutonto lwansuka, Yave okubakitula mpe se wan’andi. (Roma 8:20, 21; Lusengomono 20:7-9) Yave okwamanana songa zola muna wan’andi awonso. O lukûlu lukwamanana twasa e nsambu yakwele mvu. (Ayibere 9:12) Yave watuvana lukau lwalu lwantalu. Ke vena muntu ko olenda kutukatula lo.

16. Aweyi lukûlu lwatuvevolwela muna lufwa?

¹⁶ Avo tuvilukidi o ntima muna masumu meto, ke vena diambu ko kalenda vanga o Nkadi ampemba mu kutukakidila twalembi kituka esi kanda dia Yave kuna sentu. Yesu nkumbu mosi kaka kafwa. O lukûlu lwafutwa yakwele mvu. (Ayibere 9:24-26) Adami watutwasila lufwa, kansi kimenga kia Yesu kikututwasila moyo a mvu ya mvu. O lukûlu lulenda kutuvevola muna ubundu wa nza ya Satana ye muna wonga wa lufwa.—Ayibere 2:14, 15.

17. O zola kwa Yave nkia nsasa kwina kwa ngeye?

¹⁷ E nsilu mia Nzambi lungana kaka milungana. Nze una e nsiku mina Yave kasikidisa muna nsema ke misobanga ko, Yave kesinga soba ko. Kesinga kutukendeleka ko. (Malaki 3:6) Yave katuvana kaka lukau lwa moyo ko. Okutuvananga mpe zola kwandi. “Oyeto tuzeye yo kwikila e nzola ina katuzolele o Nzambi. Nzambi i zola.” (1 Yoane 4:16) E nsilu miandi ke mifunganga ko. Ke kolo ko, o ntoto ukituka se paradiso yambote-mbote. Awonso bezingila mu paradiso betanginina Yave yo zola muntu yo nkwandi. E selo yawonso ya Yave kuna zulu yo va ntoto bevova vo: “Lusanisinu yo nkembo ye ngangu yo matondo yo zitu ye nkuma ye ngolo kuna kwa Nzambi eto yamu mvu ya mvu. Amen.”—Lusengomono 7:12.