Kele vo diakala dialudi, yindula una diadi vanga muna zingu kieto. Kasikil’owu, yindula vo mwana wa mpangi mosi uyivondele. O se okendalele kikilu. Ukiyuvuidi kana vo Yave wateka kana mana mebwa yo mona vo yandi yo nkaz’andi balenda kwau zizidila e sumbula kiaki. Mu nza yayi tuzingilanga, ayingi muna yeto tuwanana ye sumbula. Muna kuma kiaki, nga tufwete kwikila vo Yave oteka zayanga mawonso mekutubwila muna zingu kieto?

Ekolo tufimpanga e sono kia 1 Korinto 10:13, tumona vo Nkand’a Nzambi ke uvovanga ko vo Yave oteka kuyizayilanga mana tulenda zizidila yo sola e mpasi zina tuwanana zau. Ekuma tuvovele wo? Yambula twabadika kuma yá.

Kiantete, Yave wavana wantu o nswa wa kuyisolela, i sia vo, wa baka e nzengo yau kibeni. Yave ozolanga vo twabaka nzengo yeto kibeni. (Nsiku 30:19, 20; Yosua 24:15) Avo tubaka e nzengo ziyangidika Yave, tulenda kala ye vuvu vo okutusadisa. (Ngana 16:9) Kansi, avo tubakidi nzengo zambi, tulenda mona e mpasi mu kuma kia nzengo zazi. (Ngalatia 6:7) Kele vo Yave kasolanga mana mekutubwila, nga twadi kala kikilu yo nswa wa kuyisolela?

Kiazole, Yave ke kututaninanga ko mu ‘mambu ma kinsalukisa’ mekutubwilanga. (Kimpovi 9:11) O muntu olenda bwilwa sumbula kiampwena mu kuma kia sia vo va fulu kiambi kawanukini, muna ola yambi. Yesu wavovela sumbula kimosi kiavonda wantu 18 vava nzo yandá yababwila. Yesu watoma dio kiesesa vo ke Nzambi ko watwasa lufwa lwa wantu awaya. (Luka 13:1-5) Ke diangangu ko mu yindula vo vitila e sumbula kiabwa, Nzambi oteka kananga ndiona ovuluka yovo ndiona ofwa.

Kiatatu, konso muntu mu yeto kafwete songa kwikizi muna Yave. Satana wavova vo e selo ya Yave bekunsadilanga mu kuma kia lekwa kekubavananga. Satana wavova vo ke tusikila ye kwikizi ko muna Yave avo tuwananene ye mpasi. (Yobi 1:9-11; 2:4; Lusengomono 12:10) Kele vo Yave katutaninanga mu zaka mpasi, diadi moneka nze vika sia vo Satana ndungidi kena yau.

Kiayá, Yave kevavanga zaya mawonso ko malenda kutubwila. Dialudi vo Yave olenda zaya mana mevangama kuna sentu avo ozolele. (Yesaya 46:10) Kansi, Nkand’a Nzambi usonganga vo Yave ke vavanga teka zaya mawonso ko mevangama. (Etuku 18:20, 21; 22:12) Yave nkwa zola ye unsongi. Muna kuma kiaki, ke kakidilanga luvevoko lweto ko lwa baka e nzengo yeto kibeni.—Nsiku 32:4; 2 Korinto 3:17.

Adieyi Paulu kazola vova vava kavova vo Yave “ke yambula ko vo nwatontwa e ntontwa ina ke nulendi zizidila ko”? Mu sono kiaki, Paulu wayika mana Yave kevanganga vava tukalanga mu mpasi, ke vitila twabwilwa mpasi ko. * (Tala mvovo vana yand’a lukaya.) Avo tubundidi e vuvu muna Yave, okutusadisa muna konso mpasi tuwanana zau muna zingu kieto. (Nkunga 55:22) Owau, tufimpa kuma yole yafila Paulu mu vova e mvovo miami.

E kuma kiantete i kia sia vo e mpasi zikutubwilanga ‘zibwilanga mpe akaka.’ Ekolo tuzingilanga mu nza iyalwanga kwa Satana, yeto awonso tuwanana ye mambu mampasi, tulenda mpe bwilwa e sumbula. Kansi, avo tubundidi e vuvu muna Yave, tulenda kweto zizidila e mpasi zazi yo sikila ye kwikizi muna yandi. (1 Petelo 5:8, 9)  Muna 1 Korinto kapu kia 10, Paulu wasoneka mu kuma kia ntonta zankaka zina Aneyisaele bawanana zau muna makanga. (1 Korinto 10:6-11) Awana babunda e vuvu muna Yave, balenda zizidila e ntonta zazina. Kansi, ayingi muna Aneyisaele bakolamena Yave. Ke basikila ye kwikizi ko muna Yave, kadi ke bambundanga vuvu ko.

E kuma kiazole i kia sia vo Nzambi ‘nkwa kwikizi.’ Ediadi aweyi disongele? Avo tuyindwidi una Yave kelunga-lungilanga e selo yandi muna lusansu lwawonso lwa wantu, tumona vo Yave osadisanga kikilu ‘awana bekunzolanga yo lunda nkanikinu miandi.’ (Nsiku 7:9) Tulongoka vo Yave olungisanga e nsilu miandi. (Yosua 23:14) Ediadi dikutuvananga e ziku vo (1) Yave ke singa yambula ko vo e mpasi zatuviokela e tezo yo lembi zo lenda zizidila ye (2) ‘oteta e nzila’ kimana twazizidila zo.

Aweyi Yave ‘ketetelanga e nzila’ kw’awana bekumbundanga e vuvu? Dialudi vo olenda katula e mpasi. Kansi, sungamena dina Paulu kavova vo Yave ‘oteta mpe nzila kimana nwalenda zizidila.’ Muna kuma kiaki, nkumbu miayingi Yave otetanga e nzila vava kekutuvananga nkuma kimana twasikila ye kwikizi. Yambula twabadika zaka mpila kevangilanga wo.

• Yave “okutufiaulwisanga muna mpasi zeto zawonso.” (2 Korinto 1:3, 4) Olenda vuvika ngindu ye ntima mieto muna lusadisu lwa Nkand’a Nzambi, mwand’andi avelela ye ntaudi akwikizi.—Matai 24:45; Yoane 14:16; Roma 15:4.

• Yave olenda sadila mwand’andi avelela mu kutufila. (Yoane 14:26) O mwand’avelela ulenda kutusadisa mu sungamena tusansu ye nkanikinu mia Nkand’a Nzambi kimana twabaka nzengo zambote.

• Yave olenda sadila mbasi zandi mu kutusadisa.—Ayibere 1:14.

• Yave olenda sadila mpangi zeto mu kutusadisa. Balenda kutukumika muna mvovo ye mavangu mau.—Kolosai 4:11.

Muna kuma kiaki, adieyi tulongokele muna mvovo mia Paulu mina muna 1 Korinto 10:13? Yave ke solanga ko e mpasi tuwanananga zau. Kansi, tuna ye ziku vo avo tubundidi e vuvu muna Yave, tulenda zizidila konso mpasi. Tuzeye wo vo Yave oteta e nzila kimana twasikila ye kwikizi muna yandi.