AVO ozolele zaya e ola, adieyi ovanganga? Nanga otalanga muna lolonzi aku. Olenda zaya vo mu ola kumi ye tatu ye miniti 30 se twina. Adieyi wadi vova kwa nkundi aku avo uyuvuidi vo: “Nkia ola se twina?”

E mpila ya zayisila e ola yaswaswana mun’owu wa fulu tuzingilanga. Kasikil’owu, olenda vova vo: “1:30” yovo “13:30”. Muna fulu yankaka olenda mpe vova vo “miniti 30 misidi mu lwaka mu ola ya kumi ye yá.”

Aweyi o wantu kuna nz’ankulu bayikilanga e ntangwa yovo ola? Mu mpila zayingi mpe bayikilanga e ntangwa. E Sono ya Kiyibere isadilanga e mvovo nze “mene-mene,” “ntangw’anlungu” yovo midi ye “masika.” (Etuku 8:11; 19:27; 43:16; Nsiku 28:29; 1 Ntinu 18:26) Kansi, ezak’e ntangwa o Nkand’a Nzambi usadilanga mvovo miankaka miasikididi.

Kuna Isaele yankulu, ayingidi batoma sadilanga musungula muna fuku. Aneyisaele bavambula o fuku mu ndambu tatu zina bayikilanga vo “ngingila.” (Nkunga 63:6) E sono kia Afundisi 7:19 kiyikanga e “ngingil’akati” yovo yanzole. Muna kolo kina o Yesu kawutuka, Ayuda bavambulanga e fuku mu ngingila yá, nze una esi Ngerekia ye Roma bavanganga.

E Nsangu Zambote zasoneka antumwa nkumbu miayingi ziyikanga e ngingila za fuku. Kasikil’owu, “muna ngingil’a fuku ina yeya,” Yesu wadiatila vana ntandu a maza ma mbu mu kwenda kuna kwakala alongoki andi. (Matai 14:25) I bosi, Yesu watá e kingana eki: “Kele vo mfumu a nzo kayizayila e ola ikwiza o mwivi muna fuku, yingila kadi yingila, ke mu yambula ko vo e nzo andi yabangulwa.”—Matai 24:43.

Yesu ngingila zau yá kayika vava kavovesa alongoki andi vo bayingila kadi ‘ke bazeye ko e ntangwa yadi kwiza o mfumu a nzo, kana masika, ovo mu dingidingi, ovo muna nkielo a kuma, ovo mu mene-mene.’ (Maku 13:35; tala e mvovo vana yanda) E ngingila yantete, ya “masika,” yayantikanga muna ndimuk’a ntangwa yamuna ola yavua ya fuku. E ngingila yanzole, ya “dingidingi,” yayantikanga muna ola yavua ya fuku yamuna dingidingi yovo midi mia mpimpa. E ngingila yantatu, i sia vo, “muna nkielo a kuma” yovo “nkokol’a nsusu,” yayantikanga muna midi mia mpimpa yamuna ola yatatu ya mene-mene. Nanga mu ngingila yayi kakangwa o Yesu kwa mbeni, vava e nsusu yakokola. (Maku 14:72) E ngingila yayá, i sia vo,“mu mene-mene,” yayantikanga muna ola yatatu ya mene-mene yamuna mpaik’a ntangwa.

Kana una vo kuna nz’ankulu o wantu ke bakala ye lolonzi ko nze zina tuna zau o unu, bakalanga ye mpila bayikilanga e ntangwa.