1. E fu kia loko kia wantu a nza yayi adieyi kilenda vanga muna lulembamu lweto?

EKUMA dikadilanga diampasi mu sadila mana tulongokanga muna Diambu dia Nzambi? E kuma kadi muna vanga edi diambote, divavanga vo twakala alembami. Mu ‘lumbu yayi yambaninu,’ diampasi mu kala alembami kadi wantu ayingi batuzungidi bena vo “akwa kizola, minzol’a nzimbu, akwa lusanu, akwa lulendo” ye “minkondwa volo.” (2 Timoteo 3:1-3) Wau vo tu selo ya Nzambi, tuzeye wo vo e fu yayi yambi kikilu. Kansi, tulenda mona vo awana bevanganga mambu mama zingu kiambote bena kiau. (Nkunga 37:1; 73:3) Tulenda nkutu kukiyuvula: ‘Nga diambote kikilu mu sia zolela ya wantu ankaka va fulu kiantete, ke mu zolela yame ko? Nga o wantu bekunzitisa avo mvangidi mambu kuna lulembamu? (Luka 9:48) Avo tuyambwidi vo e fu kia loko kia wantu a nza yayi kiatusambukila, tulenda fwasa e ngwizani ye mpangi zeto ye diampasi dikala kw’akaka mu zaya vo tu Akristu. Kansi, avo tulongokele e nona ya selo ya Nzambi ana basonga lulembamu yo kubatanginina, nluta miayingi tuvua.

2. Adieyi tulenda longoka muna mbandu a selo yakwikizi ya Nzambi kuna nz’ankulu?

 ² Nki kiasadisa e selo ya Nzambi yakwikizi kuna nz’ankulu mu kala akundi andi? Adieyi bavanga muna yangidika Yave? Akweyi bavuila o nkuma wa vanga oma mambote? Avo tutangidi o lusansu lwau muna Nkand’a Nzambi yo badika mana tutanganga, lukwikilu lweto lukumama.

3, 4. (a) Aweyi o Yave kekutulongelanga? (b) Vana ntandu a zayi, adieyi diaka divavuanga muna kumika lukwikilu lweto?

³ Yave okutuvananga yawonso tuvuidi o mfunu muna kwamanana kumika lukwikilu lweto. Tutambulanga luludiku ye malongi metukanga muna Nkand’a Nzambi, nkanda mieto, nzil’eto ya internete, JW Broadcasting, tukutakanu twakete ye twampwena. Kansi, Yesu wasonga vo ke zayi kaka ko tuvuanga o mfunu. Wavova vo: “O madia mame i vanga luzolo lwa ndiona wantuma, yamanisa mpe salu kiandi.”—Yoane 4:34.

⁴ Kuna kwa Yesu, o vanga luzolo lwa Nzambi diakala nze madia. O dia madia mambote mekumikinanga yo dikila e nitu zeto. Diau dimosi mpe, o vanga luzolo lwa Nzambi dikumikanga lukwikilu lweto. Kasikil’owu, nga wayenda kala muna lukutakanu lwa salu kia umbangi ye mabibi, kansi wavutuka kuna nzo ye kiese kiawonso?

5. O kala ye ngangu aweyi dilenda kututwasila nluta?

⁵ Avo tuvangidi mana Yave kekutulombanga, tukala akwa ngangu. (Nkunga 107:43) Awana bena ye ngangu nluta miayingi bevuanga. ‘Ke vena lekwa ko kilenda tezaniswa ye ngangu. . . . I nti a moyo kw’awana besimbinina zo. Nkwa nsambu ona osimbinina zo.’ (Ngana 3:13-18) Yesu wavova vo: “Avo nuzeye mambu mama, nu akwa nsambu avo nuvanga mo.” (Yoane 13:17) Muna kala ye kiese, diavavanga vo alongoki a Yesu bakwamanana vanga mana Yesu kabavovesa. O landa malongi ye mbandu andi yakituka se mpil’a zingu kiau.

6. Ekuma tufwete kwamanena sadila mana tulongokanga?

⁶ O unu, yeto mpe tufwete kwamanana sadila mana tulongokanga. Yindula e nona kia muntu ovangululanga makalu una ye nsabi, salanganu yo zayi. E lekwa yayi ikunsadisa kaka mu toma sala e salu kiandi kele vo osadidi yo. O muntu ndioyo olenda sala e salu kiaki mu mvu miayingi, kansi ofwete kwamanana sadila mana kalongoka avo ozolele kala nsadi ambote. Diau dimosi mpe, vava twayantika longoka e ludi, twakala ye kiese kadi twasadila mana twatanga muna Nkand’a Nzambi. Kansi muna lembi vidisa e kiese kiaki, tufwete kwamanana sadila mana Yave kekutulonganga muna zingu kieto kia lumbu ke lumbu.

7. Adieyi tufwete vanga kimana twalongoka diambu muna mbandu ya wantu beyikwanga muna Nkand’a Nzambi?

⁷ Mu longi diadi, tuvovela maka mambu mekitulanga dio se diampasi kwa yeto mu kala alembami. Tulongoka una e selo yakwikizi kuna nz’ankulu basongela lulembamu. Kansi, mayingi tufwete vanga ke tanga kaka ko. Tufwete badikanga mana tutanganga yo sadila mo muna zingu kieto.

8, 9. Adieyi tulenda longoka muna Mavangu 14:8-15 mu kuma kia lulembamu kasonga Paulu? (Tala e fwaniswa kuna lubantiku lwa longi.)

⁸ Nzambi ozolele vo wantu a mpila zawonso  “bavuluzwa yo vua zayi wasikila wa ludi.” (1 Timoteo 2:4) Aweyi tubadikilanga wantu awonso ke balongokele ntete ludi ko? Paulu wa ntumwa wasamunanga e nsangu zambote kwa Ayuda ana bakizayila kala maka mambu mu kuma kia Yave. Kansi, Paulu wasamunanga mpe nsangu zambote kw’awana basambilanga nzambi zaluvunu. Diavavanga vo Paulu kakala ye lulembamu muna kubasamunuina e nsangu zambote. Ekuma?

⁹ Muna nkangalu wantete kavanga o Paulu muna salu kia kimisionario, wayenda kumosi yo Banaba kuna mbanz’a Luseta. O nkangu a Lukaonia wabadikila Paulu yo Banaba nze nzambi yo kubayikila muna nkumbu za nzambi zau zaluvunu Dezo ye Ereme. Nga diadi diayangidika Paulu yo Banaba? Nga bamona vo diambu disobele wau vo kitantu basiwa muna mbanza zole zansuka bakingula? Nga bayindula vo e mpila yambote batambulwilwa ifila wantu ayingi mu wá e nsangu zambote? Ve. Bafunga kikilu makasi yo vova vo: “Ekuma nuvangilanga mambu mama? Oyeto mpe tu wantu, tumonanga e mpasi zina numonanga.”—Mavangu 14:8-15.

10. Ekuma Paulu yo Banaba ke bayimwena ko vo basundidi esi Lukaonia?

¹⁰ Vava Paulu yo Banaba bavova vo oyau mpe wantu, edi bazola vova vo yau mpe wantu alembi lunga bakala. Ke bazola vova ko vo e mpila basambilanga Nzambi yafwanana ye ina ya esi Lukaonia. Paulu yo Banaba batumwa kwa Nzambi mu sala e salu kia kimisionario. (Mavangu 13:2) Wau vo bakuswa muna mwand’avelela, bakala ye vuvu kia kwenda kuna zulu. Kansi, ekiaki ke kuma ko kifwete kubafila mu kuyibadikila vo basundidi akaka. Bazaya wo vo wantu awaya balenda mpe vua e vuvu kia zingila kuna zulu kele vo batambulwidi nsangu zambote.

11. Aweyi tulenda songela lulembamu nze Paulu vava tusamunanga e nsangu zambote?

¹¹ Eyayi imosi muna mpila tulenda songela vo tu alembami nze Paulu. Ke tulendi yindula ko vo e salu kia samuna e nsangu zambote yovo salu yankaka kekutuvananga o Yave ikutukitulanga tu wantu amfunu. Tulenda kukiyuvula: ‘Aweyi ibadikilanga o wantu muna zunga kiame? Nga mpambula isianga muna wantu? Mu nza yawonso, Mbangi za Yave bevavanga awana bazolele wá e nsangu zambote. Akaka muna yau bevanganga ngolo za longoka e ndinga yovo fu ya kisi nsi ya wantu ana bebadikilwanga vo ke bena mfunu ko. Kansi, ke bekuyimwenanga ko vo basundidi awana besamunuinanga e nsangu zambote. Bevavanga zaya una balenda sadisila wantu ayingi kimana batambulwila e nsangu za Kintinu.

12. Aweyi Epafera kasongela vo watokanenanga e wete dia mpangi zandi?

¹² E mpila yankaka tulenda songela vo tu alembami i sambanga muna wete dia mpangi zeto ana “batambula lukwikilu lwantalu nze i lweto.” (2 Petelo 1:1) I diau kavanganga Epafera. Nkand’a Nzambi ukunyikilanga kaka mu nkumbu ntatu. Vava Paulu kakala mu pelezo kuna Roma, wasonekena Akristu kuna Kolosai yo vova mu kuma kia Epafera vo: “Ntangwa zawonso ozindalalanga o samba muna wete dieno.” (Kolosai 4:12) Epafera watoma zaya ampangi, watokanenanga e wete diau. Paulu wayikila Epafera vo “nkw’ame mbakami.” Ediadi disongele vo  yandi mpe wakala ye mpasi zandi. (Filemone 23) Kana una vo i wau, watokanenanga e nsatu za mpangi zandi yo vanga diambu muna kubasadisa. Epafera wasambanga mu kuma kia mpangi zandi, oyeto mpe tulenda vanga diau dimosi yo kubayikila nkutu muna nkumbu. E sambu yayi ilenda sadisa kikilu e mpangi zeto.—2 Korinto 1:11; Yakobo 5:16.

13. Aweyi olenda tanginina e mbandu a Epafera vava osambanga?

¹³ Yindula o mpangi olenda yika muna sambu kiaku. Nanga ozeye ampangi muna nkutakani yovo yitu yaku benuananga ye mpasi. Dilenda kala vo nzengo zampasi bazolele baka yovo ntonta benuananga zau. Olenda mpe samba mu kuma kia ampangi ana olenda solola e nkumbu zau muna longi dina mu jw.org ye ntu a diambu: “Testemunhas de Jeová presas por causa de sua fé.” (Tala vana vasonama IMPRENSA > CASOS JURÍDICOS E DIREITOS HUMANOS.) Olenda mpe samba mu kuma ki’awana bafwidilu muntu betoma zolanga, ana babwidilu sumbula ke kolo ko yovo bezingilanga mu nsi zina mu mvita ye awana benuananga ye mpasi mu kuma kia kondwa kwa nzimbu. E mpangi zazi zawonso sambu yeto bavuidi o mfunu! Vava tusambanga mu kuma kiau, tusonganga vo ke tutokanenanga kaka nsatu zeto ko, kansi ye nsatu za wantu akaka mpe. (Filipi 2:4) Yave owanga e sambu yayi!

14. Aweyi Yave kenena se mbandu ambote muna diambu ditadidi toma wá?

¹⁴ E mpila yankaka tusongelanga vo tu alembami i kala awe ambote. E sono kia Yakobo 1:19 kikutuvovesanga vo ‘twakala ye nzaki za wá.’ Yave i mbandu ambote muna diambu ditadidi toma wá. (Etuku 18:32; Yosua 10:14) Kasikil’owu, tanga e mbokena zina muna Luvaiku 32:11-14. (Tanga.) Kana una vo kavuanga kwandi ngindu za Mose mfunu ko, Yave wayambula vo Mose  kavova dina diantokanesanga. Nga olenda kwamanana tamba o matu kwa muntu wavanga vilwa yo vanga dina kavovese? Kuna luzindalalu, Yave owanga awonso besambanga ye lukwikilu.

15. Aweyi tulenda tanginina Yave muna diambu ditadidi zitisa akaka?

¹⁵ Ukiyuvula: ‘Wau vo Yave wayisakidika yo tamba o matu kwa wantu nze Abarayama, Rakele, Mose, Yosua, Manoa, Eleya yo Kizekeya, nga kilendi vanga diau dimosi ko? Nga ndenda zitisa e mpangi zame zawonso muna toma wanga e ngindu zau yo landa zo avo dilendakana? Nga vena ye mpangi muna nkutakani yovo yitu kiame ona ndenda toma sia e sungididi? Aweyi ndenda wo vangila?’—Etuku 30:6; Afundisi 13:9; 1 Ntinu 17:22; 2 Tusansu 30:20.

16. Adieyi Davidi kavanga vava Simi kamvanga e mbi?

¹⁶ O lulembamu mpe lukutusadisanga mu kala ye volo vava akaka bekutuvanganga e mbi. (Efeso 4:2) Tulenda solola mbandu ambote muna 2 Samuele 16:5-13. (Tanga.) Simi wa yitu kia Saulu, walevola Davidi ye selo yandi yo kubatuba matadi. Davidi wafwana nuanisa Simi, kansi kavanga wo ko. Wazizidila luvezo lwandi. Adieyi diasadisa Davidi mu kala ye volo? Tulenda baka e mvutu muna Nkunga watatu.

17. Adieyi diasadisa Davidi mu kala ye volo? Aweyi tulenda kuntanginina?

¹⁷ Davidi wasoneka o nkunga watatu vava o mwan’andi Abesalome kavavanga kumvonda. I mu kolo kiakina o Simi kabangika Davidi, kansi Davidi wavua nkuma muna kwamanana songa e volo. Aweyi kavuila o nkuma wau? Muna sono kia Nkunga 3:4, tutanganga e mvovo mia Davidi: “Mbokelele Yave muna nding’ame, umputulwidi muna mongo andi avauka.” Vava akaka bekutuvanganga e mbi, tufwete sambanga nze una Davidi kavanga. Yave okutuvananga mwand’andi avelela, kimana twalenda zizidila. Nga olenda songa e volo yovo loloka avo muntu uvangidi e mbi? Nga una ye vuvu vo Yave ozeye mpasi zaku, okusadisa yo kusambula?

18. Nkia nluta tulenda tambula avo tusadidi luludiku lwa Yave?

¹⁸ Avo tuvangidi dina tuzeye vo diansongi, tusonga vo tu akwa ngangu yo sambulwa kwa Yave. Muna sono kia Ngana 4:7 tutanganga vo: “Ngangu i mbuta diambu.” Kana una vo e ngangu mu zayi zitukanga, kansi ke mpasi bakula kaka mambu ko. E ngangu zimonekenanga muna nzengo tubakanga. Kana nkutu e yimfietete bena ye ngangu za kubika madia muna nsungi a mvula. (Ngana 30:24, 25) Kristu, ona oyikilwanga vo “ngangu za Nzambi,” ovanganga luzolo lwa Se diandi. (1 Korinto 1:24; Yoane 8:29) Nzambi okutusambula mpe mu songa vo tu akwa ngangu vava tusolanga vanga dina tuzeye vo diansongi avo tukwamanene kala alembami. (Tanga Matai 7:21-23.) Muna kuma kiaki, kwamanana sia e ngolo kimana e nkutakani yakala se fulu kina awonso balenda sadila Yave kuna lulembamu lwawonso. Ntangwa ye luzindalalu divavanga muna sadila mambu mana tuzeye vo mansongi. Kansi, vava tuvanganga wo tusonganga vo tu alembami. O lulembamu lukututwasila kiese owau ye yakwele mvu.