1. Nkia diambu diamfunu kavovela o Yesu muna fuku wansuka kakala ye alongoki andi?

MUNA fuku wansuka kakala ye alongoki andi vitila kafwa, Yesu wayika e fu kia zola tezo kia nkumbu 30. Wavovesa alongoki andi vo bafwete ‘zolaziananga.’ (Yoane 15:12, 17) Diavavanga vo zola kwau kwamoneka kwa wantu ankaka yo zayakana vo yau i alandi akieleka a Kristu. (Yoane 13:34, 35) O zola kayika o Yesu ke mpasi zola kaka ko, kansi kuvavanga vo muntu kasongela ko muna mavangu yo ntim’amvevo. Yesu wavova vo: “Ke vena muntu ko wina ye nzola isundidi yayi, i sia vo muntu kayekola moyo andi muna wete dia akundi andi. Oyeno nu akundi ame avo nuvangidi oma inukanikini.”—Yoane 15:13, 14.

2. (a) Nkia fu kiswaswanesanga selo ya Yave o unu?(b) Nkia yuvu tubakila e mvutu mu longi diadi?

² O unu, e selo ya Yave bazayakene mu kuma kia zola kwakieleka besongananga ye kintwadi bena kiau. (1 Yoane 3: 10, 11) Ke tulandanga e nsi ko, kanda, ndinga, fulu twatuka yovo mpila twasansukila. Mu nza yawonso, selo ya Yave besonganga kikilu o zola muna muntu yo nkwandi. Ekuma o zola kwinina o mfunu o unu? Aweyi o Yave yo Yesu bekutukumikinanga kuna zola? Aweyi tulenda songela o zola kwaku muna fiaulwisa yo kasakesa akaka?—1 Korinto 8:1.

3. E “nsungi zampasi” zilenda fila wantu mu vanga nkia diambu?

³ Mu “nsungi zampasi” tuzingilanga. E zingu kieto ‘kiazala ye mpasi ye ntantu.’ (2 Timoteo 3:1-5; Nkunga 90:10) Wantu ayingi belwakilwanga kwa ngindu za kuyivonda mu kuma kia mpasi zasaka. Vioka 800.000 ma wantu bekuyivondanga konso mvu, i sia vo, muntu mosi muna segundu 40. Diankenda vo, kana nkutu akaka muna mpangi zeto belwakilwanga kwa ngindu zazi yo kuyivonda.

4. Nkia selo ya Nzambi kuna nz’ankulu balomba vo bafwa kwau?

⁴ Kuna nz’ankulu, akaka muna selo yakwikizi ya Nzambi bakendalala kwayingi mu kuma kia mpasi yo zola vo bafwa kwau. Kasikil’owu, vava Yobi kakala mu mpasi wavova vo: ‘Mbembwele moyo; kizolele diaka zinga ko.’ (Yobi 7:16; 14:13) Yona wakendalala kwayingi yo vova vo: “Watu, e Yave, do, wankatul’o moyo; kadi deke yafwa kwame ke mu kala una ko.” (Yona 4:3) Eleya wa ngunza wakendalala kikilu yo vova vo: “Difwene, e Yave, unkatul’o moyo; kadi kisundidi mase mame ko.” (1 Ntinu 19:4) Kansi, Yave wazolanga kikilu e selo yayi yakwikizi ye wazola vo bazinga. Kabatumba ko mu kuma kia ngindu bakala zau. Kansi, wabasadisa mu vutukila kala ye tima dia zinga kimana bakwamanana kunsadila ye kwikizi kiawonso.

5. Ekuma tufwete zolelanga ampangi zeto?

⁵ O unu, mpangi zayingi benuananga ye mambu mampasi. Muna kuma kiaki, tufwete kubasonga o zola. Akaka muna yau bevezuanga yovo bangikwa. Akaka bevovelwanga e mbi yovo kumbwa kuna salu. Akaka beyoyanga kadi ola zayingi besalanga yovo mu kuma kia salu yampasi. Akaka benuananga ye mambu mampasi kuna nzo. Nanga bakazala yo muntu una vo ke sambilanga Yave ko, ona okumvovelanga e mbi nkumbu miayingi. Mu kuma kia mpasi zazi ye zankaka, mpangi zayingi bemonanga vo ke bena diaka ye nkuma ko yo yantika katikisa kana vo bakinu kikilu o mfunu. Aweyi tulenda kubasadisila?

6. Aweyi o zola kwa Yave kukumikinanga e selo yandi?

⁶ Yave ovovesanga selo yandi vo zola kekubazolanga ye okwamanana kubazola yakwele mvu. Yindula una Aneyisaele bamona vava Yave kabavovesa vo: ‘Wau vo nukitukidi se nuantalu ova meso mame, nuzitisu, omono inuzolele.’ Wakudikila vo: ‘Ke numoni wonga ko, kadi ngina yeno.’ (Yesaya 43:4, 5) Tuzeye wo vo konso muntu mu yeto mfunu kena vana meso ma Yave. * (Tal’e mvovo vana yand’a lukaya.) Nkand’a Nzambi uvovanga vo: ‘Nkwa ngolo ona ovuluza. Oyangalela omo ngeye ye kiese.’—Sefaniya 3:16, 17.

7. Ekuma tulenda tezanesena o zola kwa Yave yo zola kwa ngudi? (Tala e fwaniswa kuna lubantiku lwa longi.)

 ⁷ Yave osianga o nsilu wa kumika yo fiaulwisa nkangu andi kana nkutu nkia mpasi zilenda kubabwila. Wavova vo: ‘Oyeno nuyema yo natinwa vana luvati, nusakaneswa vana nkata. Wauna o ngudi kefiaulwisilanga o mwan’andi, ikwamanana kunufiaulwisa.’ (Yesaya 66:12, 13) Yindula e kiese kekalanga kiau o nsedia vava kelelwanga kwa ngudi andi yovo kunsakanesa. Yave zola kikilu kekuzolanga, ozolele vo wakala ye kiese. Kukadinge yo lukatikisu ko vo mfunu wina vana meso ma Yave.—Yeremiya 31:3.

8, 9. Aweyi o zola kwa Yesu kukutukumikinanga?

⁸ Vena ye kuma kiankaka kikutukwikidisanga vo Yave zola kikilu kekutuzolanga. Muna Nkand’a Nzambi tutanganga vo: “Muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.” (Yoane 3:16) E kimenga kia Yesu kisonganga vo yandi mpe zola kekutuzolanga. O zola kwaku kukutukumikanga. Nkand’a Nzambi uvovanga vo e “mpasi yovo ntantu” ke zilendi ‘kutuvambula ko muna zola kwa Kristu.’—Roma 8:35, 38, 39.

⁹ Ezak’e ntangwa, tunuananga ye mpasi zikutuyoyesanga muna nitu yovo muna ngindu. E mpasi zazi zilenda kulula e kiese kieto muna salu kia Yave. Kansi, o sungamena una Kristu katuzolela kulenda kutuvana nkuma wa zizidila e mpasi zazi. (Tanga 2 Korinto 5:14, 15.) O zola kwa Yesu kukutuvananga e tima dia kwamanana zinga yo sadila Yave. Kulenda kutusadisa mu lembi dimbula e vuvu, kana nkutu vava  tubwilwanga sumbula, lubangamu, lukendalalu yovo vava tukalanga yo ntelamw’a moyo.

10, 11. Nani una ye mbebe ya kasakesa ampangi ana bena bakendalala? Sasila.

¹⁰ Yave osadilanga mpe e nkutakani muna kutukumika kuna zola. Vava tuzolanga e mpangi zeto, tusonganga o zola kweto muna Yave. Tuvanga mawonso tulenda muna sadisa mpangi zeto bazaya wo vo mfunu tukubavuanga, Yave mpe zola kekubazolanga. (1 Yoane 4:19-21) Paulu wa ntumwa wasoneka vo: “Nukasakesanga yo kumika muntu yo nkw’andi, wauna nuvanganga.” (1 Tesalonika 5:11) Ke akuluntu kaka ko balenda vanga e diambu diadi. Konso muntu mu yeto olenda tanginina Yave yo Yesu muna kasakesa mpangi zeto.—Tanga Roma 15:1, 2.

¹¹ Mpangi zankaka muna nkutakani ana benuananga ye mpasi mu kuma kia lukendalalu lwasaka yovo ntokani, balenda vava lusadisu lwa madotolo. (Luka 5:31) Kana una vo akuluntu ye mpangi zankaka muna nkutakani ke madotolo ko, o lusadisu ye lukasakeso balenda vana lwamfunu kikilu. Awonso muna nkutakani balenda ‘fiaulwisa awana bakendalele, sadisa ana batovokele, kala yo luzindalalu kwa wantu awonso.’ (1 Tesalonika 5:14) Tufwete sianga e ngolo za bakula una mpangi zeto bemonanga. Tufwete kadilanga yau kuna luzindalalu yo kubavovesela kuna ngemba vava bekalanga bakendalala. Nga okumikanga akaka? Adieyi olenda vanga muna kwamanana fiaulwisa yo kasakesa akaka?

12. Yika nona kia mpangi wakasakeswa muna zola kasongwa kwa mpangi za nkutakani.

 ¹² Mpangi mosi ankento kuna Europa wavova vo: “Ezak’e ntangwa ilwakilwanga kwa ngindu za kuyivonda, kansi itambulanga lusadisu. E nkutakani ikuntaninanga muna lembi kuyivonda. Ampangi z’akala ye z’akento bekunkasakesanga yo kunsonga o zola. Kana una vo akete kaka bazeye wo vo lukendalalu lwasaka ikalanga lwau, e mpangi za nkutakani ke bekumvavukanga ko. Akazi mosi bena nze mase mame muna kimwanda. Bekundunga-ndunganga e lumbu yawonso.” Dialudi vo ke awonso ko balenda vana lusadisu mu mpila mosi. Kansi, yeto awonso tulenda vanga mayingi muna sadisa mpangi zeto. * (Tala e mvovo vana yand’a lukaya.)

13. Adieyi tufwete vanga muna fiaulwisa akaka?

¹³ Toma winikinanga. (Yakobo 1:19) Tusonganga vo zola tuna kwau muna wantu vava tukubawinikinanga kuna ngemba zawonso. Vanganga e yuvu ilenda kusadisa mu bakula dina o mpangi kenuananga diau. Avo umvovesele kuna ngemba yo songa wo vana ndose aku, o mpangi obakula vo mfunu kikilu okumvuanga. Vava keyantika vova, kala ye luzindalalu yo lembi kunzenga e mvovo. Avo otomene kuntamba o matu, olenda bakula una kemonanga. Ediadi dikumfila mu kubunda e vuvu. Diasazu mpe dikala kwa yandi mu wá dina okumvovesa ekolo osianga e ngolo za kunsadisa. Avo osongele zola muna wantu, olenda kikilu kubafiaulwisa.

14. Ekuma tufwete vengela e fu kia tumba akaka?

¹⁴ Venga e fu kia tumba akaka. O muntu una yo lukendalalu lwa ntima olenda sakisa lukendalalu avo tuntumbidi. Diampasi dikala muna kunsadisa. Nkand’a Nzambi uvovanga vo: “Vena ye mpov’a losola-losola nze ntoba za nsosolo, o lubini lu’akwa ngangu, wuka luwukanga.” (Ngana 12:18) Kana una vo ke tukalanga ye kani dia lweka muntu ko muna mvovo mieto, tulenda wokesa e ntantu zandi avo tuvovele lembi teka yindula. Muna fiaulwisa mpangi eto, tufwete vanga mawonso kimana kakala ye ziku vo tubakulanga e mpasi zandi.—Matai 7:12.

15. Nkia sadilwa tulenda sadila muna fiaulwisa akaka?

¹⁵ Sadilanga e diambu dia Nzambi muna fiaulwisa akaka. (Tanga Roma 15:4, 5) E Bibila i nkanda watuka kwa “Nzambi ona ovananga luzindalalu ye lufiaulwisu.” Muna kuma kiaki, ke diasivi ko mu solola lufiaulwisu muna Nkand’a Nzambi. Tuna mpe ye Índice das Publicações da Torre de Vigia ye Nkanda wa Vavulwila wa Mbangi za Yave. Avo tusadidi e sadilwa yayi, tulenda solola sono ye nkanda tulenda sadila mu fiaulwisa yo kasakesa mpangi zeto.

16. Nkia fu ilenda kutusadisa mu kasakesa muntu una wakendalala?

¹⁶ Fiaulwisanga akaka kuna ngemba yo lulembamu. Yave i “Se dia nkenda ye Nzambi a fiauzi wawonso.” Osonganga “walakazi” kwa selo yandi. (Tanga 2 Korinto 1:3-6; Luka 1:78; Roma 15:13) Paulu wa ntumwa watusisila mbandu ambote muna diambu diadi kadi watangininanga Yave. Wasoneka  vo: “Twayisakidika vovo nwina, nze ngudi oyemekanga yo wonzakana wan’andi kuna zola kwawonso. Wau vo twatoma kunuzola, ke twakala kaka ye kani dia kunusamunwina e nsangu zambote za Nzambi ko, kansi twayekola mpe mioyo mieto, kadi nwatoma zolakana kwa yeto.” (1 Tesalonika 2:7, 8) Avo tusongele ngemba nze Yave, tufiaulwisa mpangi zeto belombanga lufiaulwisu muna sambu.

17. Ekuma tufwete kadila ye ngindu zasikila avo tuzolele kasakesa mpangi zeto?

¹⁷ Kuvavinge ko vo mpangi zaku bakala wantu alunga. Kala ye ngindu zasikila. Avo ovavidi vo mpangi zaku bakala wantu alunga, ediadi dilenda kuyoyesa. (Kimpovi 7:21, 22) Tusungamena vo Yave ke vavanga ko vo twakala wantu alunga. Muna kuma kiaki, tufwete songanga luzindalalu kwa muntu yo nkw’andi. (Efeso 4:2, 32) Ke tuzolele ko vo e mpangi zeto bayindula vo ke besalanga salu ko ngatu kubatezanesa ye wantu ankaka. Tufwete kubakasakesanga yo kubasanisina muna mambu mambote bevanganga. Ediadi dilenda kubasadisa mu kala ye kiese kia sadila Yave.—Ngalatia 6:4.

18. Ekuma tuzolele kasakesela akaka kuna zola?

¹⁸ E selo yawonso ya Yave mfunu bena kwa yandi yo Yesu. (Ngalatia 2:20) Wau vo tutoma zolanga ampangi zeto, tukadilanga yau kuna ngemba. Tufwete ‘tatidilanga mambu metwasanga luvuvamu yo kasakesa muntu yo nkw’andi.’ (Roma 14:19) Tuvingilanga ye kiese kiawonso e zingu muna Paradiso vava ke vekala diaka muntu ko okendalala. Ke vekala mayela ko ngatu mvita. Wantu ke befwa diaka ko mu kuma kia sumu basambukila, lubangamu ke lukala diaka ko ngatu ntokani mu kuma kia zingu kia esi nzo yovo mpasi za zingu. Kuna mfoko a luyalu lwa funda dia mvu, wantu awonso bekituka alunga. Awana besikila ye kwikizi muna lutonto lwansuka, Yave okubatonda nze wan’andi ova ntoto ye bevua “luvevoko lwa nkembo a wan’a Nzambi.” (Roma 8:21) Muna kuma kiaki, tuzolele songa zola kwa wantu awonso yo sadisa muntu yo nkwandi mu kota muna nz’ampa ya Nzambi.