1, 2. (a) Adieyi Yave kavova divangama mu lumbu yeto? (b) Nkia yuvu tubakila e mvutu mu longi diadi? (Tala fwaniswa va ntandu.)

YAVE wavova vo mu lumbu yeto “wantu kumi muna ndinga zawonso za zula, besimbinina mvwatu a Nyuda, oku vo, kwenda tukwenda yeno, kadi tuwidi vo o Nzambi wina yeno.” (Zakariya 8:23) O “Nyuda” osunzulanga awana Nzambi kekusanga muna mwand’avelela. Wantu awaya beyikilwanga mpe vo “Isaele a Nzambi.” (Ngalatia 6:16) O “wantu kumi” besunzulanga awana bena ye vuvu kia zingila yakwele mvu ova ntoto. Bazeye wo vo Yave osambulanga buka kia Akristu akuswa. Bebadikilanga dio se lau diampwena mu sambila Nzambi kumosi ye buka kiaki.

² Nze Zakariya wa ngunza, Yesu wavova vo nkangu a Nzambi wayikakiana ukala. Wayikila awana bena ye vuvu kia kwenda zingila kuna zulu vo “fikambi-kambi.” Vo i awana bezingila ova ntoto, wabayikila vo “mameme mankaka.” Kansi, Yesu wavova vo e buka yole yayi ikala se “kambi dimosi” yo landa “mvungudi mosi.” (Luka 12:32; Yoane 10:16) Wau vo vena ye  buka yole, akaka balenda kiyuvula: (1) Nga mfunu dina kwa mameme mankaka mu zaya e nkumbu za Akristu awonso akuswa? (2) Aweyi Akristu akuswa bafwete kuyibadikilanga? (3) Avo mpangi muna nkutakani ame oyantikidi dia mbolo yo nua vinyu muna Luyindulu, aweyi mfwete kumbadikila? (4) Nga mfwete tokana wau vo lutangu lw’awana bedianga mbolo yo nua vinyu muna Luyindulu mu wokela kaka lwina? E longi diadi divana e mvutu za yuvu yayi.

3. Ekuma ke tulendi kadila ye ziku ko kana nani okala muna buka kia 144.000?

³ Nga mfunu dina kwa mameme mankaka mu zaya e nkumbu za Akristu awonso akuswa bakinu ova ntoto? Ve. Ekuma? E kuma kadi ke muntu ko olenda kala ye ziku vo akuswa awaya betambula kikilu o nsendo au. ^[1] (Tala mvovo kuna nsuk’a longi.) Kana una vo Nzambi wabakusa mu kwenda kuna zulu, betambula kaka nsendo au avo basikidi ye kwikizi. Satana ozeye diambu diadi. Muna kuma kiaki, osadilanga “ngunza zaluvunu” mu vava ‘kubavukumuna.’ (Matai 24:24) Akristu akuswa ke balendi kikilu zaya ziku ko kana vo betambula nsendo au yavana Yave kekubasengomwena vo akwa kwikizi vana meso mandi. Yave okubatondanga yo kubasia e dimbu kiansuka vitila bafwa yovo vitila kiayantika “mpasi zayingi.”​—Lusengomono 2:10; 7:3, 14.

4. Wau vo ke tulendi zaya nkumbu za Akristu awonso ko akuswa bakinu ova ntoto, aweyi tulenda ‘kwendela’ yau entwadi?

⁴ Wau vo ke dilendakana ko mu zaya e nkumbu za Akristu awonso akuswa bakinu ova ntoto, aweyi mameme mankaka balenda ‘kwendela’ yau entwadi? Nkand’a Nzambi uvovanga vo “wantu kumi” “besimbinina mvwatu a Nyuda, oku vo, kwenda tukwenda yeno, kadi tuwidi vo o Nzambi wina yeno.” E sono kiaki Nyuda mosi kiyikanga. Kansi, o mvovo “yeno” ke muntu mosi kaka ko uyikanga. Diadi disongele vo o Nyuda kesunzulanga kaka muntu mosi ko, kansi buka kiawonso kia Akristu akuswa. Mameme mankaka batomene wo zaya. Muna kuma kiaki, besadilanga Yave vamosi ye buka kiaki. Ke dina mfunu ko vo bazaya e nkumbu za konso muntu una muna buka kiaki yo landa mosi-mosi muna yau. Yesu kaka i Mfumu eto. Nkand’a Nzambi ukutuvovesanga vo twalanda kaka yandi.​—Matai 23:10.

5. Nkia lulukisu bafwete sungamenanga Akristu akuswa? Ekuma?

⁵ Akristu akuswa bafwete sungamenanga lulukisu luna muna 1 Korinto 11:27-29. (Tanga.) Aweyi Nkristu akuswa kalenda dila mbolo yo nua vinyu muna Luyindulu ‘lembi kala wafwana’? Avo muntu odidi e mbolo yo nua vinyu, kansi kena ye ngwizani ambote ko yo Yave yo kunkolamena, Nzambi katiangwini. (Ayibere 6:4-6;  10:26-29) Lulukisu lwalu lufwete sungamesa Akristu akuswa o mfunu wa sikila ye kwikizi avo bazolele tambula ‘o nsendo babokelelwa kwa Nzambi muna Kristu Yesu.’​—Filipi 3:13-16.

6. Aweyi Akristu akuswa bafwete kuyibadikilanga?

⁶ Paulu wavovesa Akristu akuswa vo: “Omono mbakami muna Mfumu, inudodokele nwakangala e nkangala ifwene e mboka ina nwabokelwa.” Aweyi balenda wo vangila? Paulu wavova vo: ‘Kuna lusakalalu lwawonso yo lulembamu yo luzindalalu, nuyambuziananga e mambu muna zola, nusianga e sungididi kia tatidila untwadi wa mwanda muna kangwa kia ungudi.’ (Efeso 4:1-3) O mwand’avelela a Yave usadisanga selo yandi mu kala alembami, ke akwa lulendo ko. (Kolosai 3:12) Muna kuma kiaki, Akristu akuswa ke bafwete kuyibadikilanga ko vo basundidi akaka. Bazeye wo vo Yave ke vananga mwand’avelela kwa Akristu akuswa ko lutila una kevananga kwa selo yandi yankaka. Vana ntandu, ke beyindulanga ko vo yau betoma bakulanga malongi ma Nkand’a Nzambi lutila akaka. Ke bafwete mpe vovesa muntu ko vo kayantika dia mbolo yo nua vinyu muna Luyindulu wau vo yandi mpe wakusilu muna mwanda. Bafwete songanga lulembamu yo sungamena vo Yave kaka olenda sola muntu okwenda kuna zulu.

7, 8. Adieyi Akristu akuswa ke bevingilanga ko? Ekuma?

⁷ Kana una vo Akristu akuswa bebadikilanga dio se lau wau batambula e mboka ya kwenda kuna zulu, ke bevingilanga ko vo batundidikwa. (Efeso 1:18, 19; tanga Filipi 2:2, 3.) Bazeye wo mpe vo vava Yave kabakusa muna mwanda, kazayisa dio kwa muntu ankaka ko. Muna kuma kiaki, o Nkristu akuswa ke sivikanga ko vava muntu kekatikisanga vo wakuswa muna mwanda. Ozeye dina Nkand’a Nzambi ukutuvovesanga vo twalembi kwikila mu nzaki ndiona ovovanga vo kiyekwa kiampwena kavewa kwa Nzambi. (Lusengomono 2:2) Wau vo Nkristu akuswa kevingilanga ko vo akaka bamvana zitu wasaka, ke kuyisananga ko kwa wantu ana kewanananga yau mu nkumbu antete vo yandi Nkristu akuswa. Diambote nkutu kalembi dio zayisanga kwa wantu. Kafwete kuyisana ko mu kuma kia mambu kesinga vanga kuna zulu.​—1 Korinto 1:28, 29; tanga 1 Korinto 4:6-8.

⁸ Akristu akuswa ke beyindulanga ko vo bafwete kalanga kaka vamosi ye akwau akuswa nze vika sia vo buka kia tá somba. Ke bekwenda vavinge Akristu akaka ko akuswa muna mokena oma ma kikuswa yovo kutakana mu longoka Nkand’a Nzambi. (Ngalatia 1:15-17) Avo bavangidi wo, e nkutakani ke ikala kintwadi ko. Ke besala ntwadi ko yo mwand’avelela, owu usadisanga nkangu a Nzambi mu kala mu luvuvamu yo ungudi.​—Tanga Roma 16:17, 18.

9. Ekuma ofwete kuyikebela mu mpila obadikilanga awana bedianga mbolo yo nua vinyu muna Luyindulu? (Tala e babu “ O Zola ke Kuvanga Mambu Malembi Songa Ko.”)

⁹ Aweyi tufwete badikilanga mpangi zeto ana bakuswa muna mwanda? Yesu wavovesa alongoki andi vo: “Yeno awonso nu ampangi.” Wakudikila vo: “Konso ona okuyitundidika, okululwa, konso ona okuyikulula, otundidikwa.” (Matai 23:8-12) Muna  kuma kiaki, ke diambote ko mu tundidika muntu, kana nkutu vo mpangi akuswa a Kristu. Vava Nkand’a Nzambi uvovelanga akuluntu, ukutukasakesanga twatanginina lukwikilu lwau, kansi ke ukutuvovesanga ko vo twabadikila muntu nze mfumu eto. (Ayibere 13:7) Dialudi vo Nkand’a Nzambi uvovanga vo akaka “bafwene nzitiswa zole.” Kansi i mu kuma kia sia vo akuluntu awaya “betoma ludikanga nkutakani” yo ‘funtuka muna vova yo longa,’ ke mu kuma kia sia ko vo Akristu akuswa. (1 Timoteo 5:17) Avo tuvene Akristu akuswa zitu wasaka, tulenda kubafusulwisa e nsoni. Vana ntandu, tulenda kubafila mu kituka akwa lulendo. (Roma 12:3) Ke mosi ko mu yeto ozolele vanga diambu dilenda fila mpangi akuswa a Kristu mu vanga vilwa wau.—Luka 17:2.

10. Aweyi olenda zitisila Akristu akuswa?

¹⁰ Aweyi tulenda songela vo tuzitisanga awana basolwa kwa Yave? Ke tufwete kubayuvulanga ko una bakitukila Akristu akuswa. Diadi diambu dia muntu yandi kibeni. Ke tuna yo nswa ko wa zaya dio. (1 Tesalonika 4:11; 2 Tesalonika 3:11) Ke tufwete yindulanga ko vo akazi au, ngatu mase yovo yitu yau Akristu akuswa mpe. E vuvu kena kiau o muntu ke vua ko ditukanga kwa yitu yandi. (1 Tesalonika 2:12) Tufwete mpe venganga yuvula mambu malenda kendeleka akaka. Kasikil’owu, ke tufwete yuvulanga ko kwa nkento a mpangi akuswa una kemonanga wau keyindulanga e ntangwa kesinga zinga yakwele mvu ova ntoto kondwa kwa yakala diandi. Tufwete kala ye vuvu vo muna nz’ampa, Yave ‘olungisa zolela ya vangwa yawonso yamoyo.’​—Nkunga 145:16.

11. Aweyi tulenda kuyitanina avo tuvengele e fu kia ‘sivika wantu’?

¹¹ Avo tuvengele e fu kia tundidika Akristu akuswa, tukuyitanina mpe yeto kibeni. Mu nkia mpila? Nkand’a Nzambi uvovanga vo muna nkutakani muna ye “mpangi zaluvunu” ana balenda vova vo Akristu akuswa. (Ngalatia 2:4, 5; 1 Yoane 2:19) Dilenda kala vo Akristu akaka akuswa ke besikila ye kwikizi ko. (Matai 25:10-12; 2 Petelo 2:20, 21) Avo tuvengele e fu kia ‘sivika wantu,’ ke tukituka alandi a wantu ko, kana nkutu Akristu akuswa ngatu ampangi ana batomene zayakana yovo ana besadilanga Yave se mvu miayingi. Kadi, avo bakitukidi minkondwa kwikizi yovo bayambwidi e nkutakani, ke tuvidisa lukwikilu lweto ko ngatu yambula sadila Yave.​—Yuda 16, mvovo vana yand’a lukaya.

12, 13. Ekuma ke tufwete tokanenanga ko mu kuma kia lutangu lw’awana bedianga mbolo yo nua vinyu muna Luyindulu?

¹² Mu mvu miayingi, lutangu lw’awana badianga mbolo yo nua vinyu muna Luyindulu kuluka lwakulukanga. Kansi owau, lutangu lwalu mu wokela kaka lwina konso mvu. Nga tufwete tokana mu kuma kia diambu diadi? Ve. Yambula twazaya e kuma.

¹³ “Yave ozeye awana bavuilu kwa yandi.” (2 Timoteo 2:19) Nswaswani yo Yave, ampangi ana betanganga wantu bedianga mbolo yo nua vinyu muna Luyindulu ke bezayanga ko kana nani kikilu i kuswa. Muna kuma kiaki, muna lutangu lwalu mukalanga mpe y’awana bekuyibadikilanga vo akuswa, kinga ke akuswa kwau ko. Kasikil’owu,  akaka ana badianga mbolo yo nua vinyu, owau ke bevanganga wo diaka ko. Akaka nanga kimbevo kia ntu beyelanga yovo ngindu zabendomoka bekalanga zau zikubafilanga mu kwikila vo ku zulu bekwenda mu yala kumosi yo Kristu. Ozevo, ke tulendi zaya ko lutangu lwasikididi lwa Akristu akuswa ana bakinu ova ntoto.

14. Adieyi Nkand’a Nzambi uvovanga mu kuma kia lutangu lwa Akristu akuswa bekala ova ntoto vava mpasi zayingi ziyantika?

¹⁴ Vekala ye Akristu akuswa mu fulu yayingi ova ntoto vava Yesu kekwiza kubanata kuna zulu. Nkand’a Nzambi uvovanga vo Yesu “otuma mbasi zandi ye zú diangolo dia mpungi balungalakesa awana basolwa muna konko yau yá ya nza, tuka kuna nsuk’a zulu ye kuna yaka e nsuka.” (Matai 24:31) Nkand’a Nzambi usonganga mpe vo muna lumbu yambaninu, vekala ye lutangu lwakete lwa Akristu akuswa ova ntoto. (Lusengomono 12:17) Kansi, ke uvovanga ko kana vo akwa bekala vava kolo kia mpasi zayingi kiyantika.

15, 16. Adieyi tufwete zaya mu kuma kia buka kia 144.000 ana besolwanga kwa Yave?

¹⁵ Yave ozayanga e ntangwa kazolele sola akuswa. (Roma 8:28-30) Yave wayantika sola akuswa vava Yesu kafuluka. Nanga muna tandu kiantete, Akristu awonso akieleka akuswa bakala. Mu kolo kia mvu miayingi, ndonga mun’awana bayibadikilanga vo Akristu ke balandanga Kristu ko. Kana una vo i wau, Yave wakusa awana bakala vo Akristu akieleka muna mvu miami. Bakala nze mbongo ambote ina Yesu kayika vo imena kumosi ye mbongo ambi. (Matai 13:24-30) Mu lumbu yayi yambaninu,  Yave wakinu sola wantu mu lungisa lutangu lwa 144.000. ^[2] (Tala mvovo kuna nsuk’a longi.) Muna kuma kiaki, avo Nzambi obakidi nzengo za sola akaka muna lungisa lutangu lwa akuswa lumbu yakete kaka vitila mbaninu yiza, ke tukatikisa nzengo zandi ko. (Yesaya 45:9; Daniele 4:35; tanga Roma 9:11, 16.) ^[3] (Tala mvovo kuna nsuk’a longi.) Tufwete keba muna lembi vanga nze una wavanga asadi ana bayidima mu kuma kia mfutu una mfumu au kavana kw’awana basala ola mosi kaka.​—Tanga Matai 20:8-15.

¹⁶ Ke awonso ko bena ye vuvu kia kwenda kuna zulu i bena muna buka kia “ntaudi akwikizi yo lulungalalu.” (Matai 24:45-47) Nze muna tandu kiantete, Yave yo Yesu wantu akete kaka besadilanga o unu mu dikila yo longa ndonga. Akete kaka muna Akristu akuswa muna tandu kiantete basadilwa mu soneka Sono ya Kingerekia ya Kikristu. Mu lumbu yeto, akete kaka muna Akristu akuswa bena ye kiyekwa kia vana nkangu a Nzambi “madia muna ntangwa ifwene.”

17. Adieyi olongokele mu longi diadi?

¹⁷ Adieyi tulongokele mu longi diadi? Yave wabak’e nzengo za vana moyo a mvu ya mvu ova ntoto kwa ayingi muna selo yandi. Akaka ku zulu bekwenda mu yala kumosi yo Yesu. Yave ovana nsendo kwa selo yandi yawonso, kiakala “Nyuda” yovo “wantu kumi.” Ovavanga vo balemvokela nsiku miau mimosi yo sikila ye kwikizi. Yau awonso bafwete kala alembami. Awonso bafwete kunsadila entwadi yo kala mu ungudi. Yau awonso bafwete sianga ngolo za tatidila luvuvamu muna nkutakani. Wau vo e mbaninu ifinamene, yambula yeto awonso twakwamanana sadila Yave yo landa Kristu nze kambi dimosi.