1-3. (a) Nkia mambu malenda kala mampasi mu soba ku nim’a luvubu? (b) Avo diampasi dikalanga kwa yeto mu vanga e nsobani, nkia yuvu tulenda kiyuvula? (Tala fwaniswa vana ntandu.)

MU MVU miayingi, Kevin wazolanga tá nsaka za mpanza, nua fomo, malavu ye lekwa yankolwa. ^[1] (Tala mvovo miansuka.) Kuna kwalanda, walongoka oma ma Yave ye wazola kituka se nkundi andi. Kansi muna vanga wo, diavavanga vo kavanga nsobani yampwena muna zingu kiandi. Walenda soba e zingu kiandi muna lusadisu lwa Yave ye lwa Nkand’a Nzambi una vo i Diambu diandi.​—Ayibere 4:12.

² Vava Kevin kavubwa, diavava vo kavanga diaka nsobani muna kiwuntu kiandi kimana kakituka Nkristu wakieleka. (Efeso 4:31, 32) Kasikil’owu, wakala ye fu kia funga makasi mu nzaki. Wasivika kikilu kadi wamona vo diampasi diakala mu yambula e fu kiaki. Kevin wavova vo o yambula e fu kiaki  diampasi kikilu diakala lutila nkutu e ngolo kavanga mu yambula mambu mambi kavanganga vitila kavubwa. Kansi, walenda vanga e nsobani kadi walombanga lusadisu lwa Yave yo longoka Nkand’a Nzambi.

³ Vitila twavubwa, ayingi mu yeto twavanga nsobani muna zingu kieto kimana twazingila e ngwizani ye nkanikinu mia Nkand’a Nzambi. Kansi, kana nkutu owau, tumonanga vo vena ye maka mambu tufwete soba kimana twatanginina Nzambi yo Kristu una ufwene. (Efeso 5:1, 2; 1 Petelo 2:21) Kasikil’owu, dilenda kala vo fu kia yidima, kumba ye kia vovela akaka e mbi tuna kiau. Yovo ezak’e ntangwa tulenda mona wonga mu kuma kia dina akaka beyindula yovo vova yo kutufila mu vanga edi diambi. Dilenda kala vo se kolo twayantika vanga e ngolo za soba, kansi ke tulendanga ko. Muna kuma kiaki, tulenda kiyuvula: ‘Ekuma dikadilanga diampasi kwa mono mu vanga e nsobani mu mambu mama makete? Adieyi mfwete vanga mu sadila mana Nkand’a Nzambi uvovanga kimana yakwamanana soba kiwuntu kiame?’

4. Ekuma dikadilanga diampasi mu yangidika Yave mu mambu mawonso?

⁴ Yave tuzolanga ye tuna ye luzolo lwa kunyangidika ye nsi a ntim’eto yawonso. Kansi, diankenda kikilu vo ke tulendi kunyangidika mu mambu mawonso ko, kadi tu wantu alembi lunga. Nkumbu miayingi tumonanga nze una wamona Paulu wa ntumwa ona wavova vo: “Ngina ye tima dia vanga edi diambote, kansi kina ye ngolo za vanga dio ko.”​—Roma 7:18; Yakobo 3:2.

5. Nkia nsobani twavanga vitila twavubwa? Nkia mambu malenda kala mampasi mu soba?

⁵ Vitila twayantika sadila Yave kumosi ye nkutakani, diavava vo twayambula mana Yave kemenganga. (1 Korinto 6:9, 10) Kansi, twakinu wantu alembi lunga. (Kolosai 3:9, 10) Kana nkutu vo se mvu miayingi miviokele kala tuka twavubilwa, twakinu vanga o vilwa. Ezak’e ntangwa tulenda yima ngindu yovo zolela yambi. Dilenda mpe kala diampasi mu sunda lutovoko tuna lwau. Muna kuma kiaki, valenda vioka mvu miayingi vitila twavanga e nsobani.

6, 7. (a) Adieyi dikutusadisanga mu kala akundi a Yave kana una vo tu wantu alembi lunga? (b) Ekuma ke tufwete yambulwila samba ko kwa Yave yo kunlomba e ndoloki?

⁶ Kana una vo tu wantu alembi lunga, tulenda kala akundi a Yave yo kunsadila. Sungamenanga una wakitukila nkundi a Yave. Yandi kaka wamona edi diambote diakala muna ngeye, wazola vo wanzaya. (Yoane 6:44) Yave wazaya wo mpe vo u muntu alembi lunga, onuananga yo lutovoko yo vanga vilwa. Kana una vo i wau, Yave wazola vo wakituka nkundi andi.

⁷ Yave okutuzolanga kikilu, i dianu katuvanina lukau lwantalu. Wafila Mwan’andi Yesu ova ntoto kimana kavana moyo andi se lukûlu mu kuma kia masumu meto. (Yoane 3:16) Avo tusumukini, tulenda lomba ndoloki kwa Yave. Muna kuma kia lukûlu, tulenda kala ye ziku vo Yave okutuloloka yo kwamanana kala akundi andi. (Roma 7:24, 25; 1 Yoane 2:1, 2) Sungamena vo Yesu wafwa mu kuma kia asumuki ana bevilukanga o ntima. Muna kuma kiaki, kana nkutu tumwene vo dina twavanga  diambi kikilu, ke tufwete yambula samba ko kwa Yave yo kunlomba e ndoloki. Avo ka tunlombele ko vo katuloloka, dikala nze yeto ke tuzolele sukula moko ko mena ye mvindu. Tuvutulanga kikilu matondo kwa Yave wau vo waziula e nzila kimana twakituka akundi andi kana una vo tu wantu alembi lunga.​—Tanga 1 Timoteo 1:15.

8. Ekuma ke tufwete vezelanga lutovoko lweto ko?

⁸ Kansi, ke tufwete vezanga lutovoko lweto ko ngatu kwamanana vava vakuba. Yave okutuzayisanga dina kevavanga kwa akundi andi. (Nkunga 15:1-5) Muna kuma kiaki, avo tuzolele kumfinama, tufwete kwamanana sia ngolo za kuntanginina yo Mwan’andi. Tufwete mpe sianga ngolo za venga e zolela yambi. Kana nkutu vo se kolo twavubwa, tufwete kwamanana singika kiwuntu kieto.​—2 Korinto 13:11.

9. Aweyi tuzayidi wo vo tulenda kwamanana vuata kiwuntu kiampa?

⁹ Paulu wa ntumwa wavovesa Akristu vo: “Nwalongwa kimana nwakatula kiwuntu kiankulu kina kiafwanana ye kadilu kieno kiantete, kina kiyiviswanga mun’owu wa maketo mandi ma luvuki. Nukwamanana vanguluka muna nyindu mieno, nuvuata kiwuntu kiampa kina kiavangilwa muna luzolo lwa Nzambi, muna unsongi ye kwikizi kiakieleka.” (Efeso 4:22-24) Ediadi disongele vo tufwete kwamanana sia e ngolo za vanga nsobani yo ‘vuata kiwuntu kiampa.’ Muna kuma kiaki, kiakala vo se kolo tusadilanga Yave, tulenda kwamanana longoka e fu yandi. Nkand’a Nzambi ulenda kutusadisa mu kwamanana tomesa kiwuntu kieto kimana twatanginina Yave una ufwene.

10. Adieyi tufwete vanga kimana twakwamanana vanga e nsobani muna lusadisu lwa Nkand’a Nzambi? Nkia yuvu tulenda kiyuvula?

¹⁰ Yeto awonso tuzolele lemvokela dina Nkand’a Nzambi uvovanga. Kansi, tufwete sianga ngolo avo tuzolele kwamanana vanga nsobani. Ekuma tufwete silanga ngolo? Nga Yave kalendi dio kitula ko se diasazu kwa yeto mu vanga edi diambote?

11-13. Ekuma Yave kezolelanga vo twavanga e ngolo za venga e zolela yambi?

¹¹ Vava tuyindulanga o nsema ye yawonso ina mo, ke tukalanga ye lukatikisu ko vo Yave una yo nkuma wa vanga konso diambu. Kasikil’owu, wavanga ntangwa ina yo nkuma wayingi. Konso segundu, e ntangwa ivaikisanga ulolo wa ntemo ye mbangazi. Kansi, ntemo ye mbangazi yakete kaka ya ntangwa ivuilu o mfunu kimana o ntoto wakala ye vangwa yamoyo. (Nkunga 74:16; Yesaya 40:26) Yave ovananga mpe nkuma kwa selo yandi ova ntoto vava bevuanga wo mfunu. (Yesaya 40:29) Muna kuma kiaki, avo Yave ozolele, olenda dio kitula se diasazu kwa yeto mu sunda lutovoko yo yambula yima zolela yambi. Kansi, ekuma kevangilanga wo ko?

¹² Yave watuvana nswa wa kuyisolela.  Oyambulanga vo yeto kibeni twasola kana vo tukunlemvokela yovo ve. Vava tusolanga kunlemvokela yo sia ngolo za vanga luzolo lwandi, tusonganga vo zola tukunzolanga ye tuzolele kunyangidika. Satana wavova vo Yave kena ye wisa ko kia yala. Kansi, vava tulemvokelanga Yave, tusonganga vo tuzolele vo kakala Nyadi eto. Tulenda kala ye ziku vo Se dieto oyangalelanga e ngolo tuvanganga za kunlemvokela. (Yobi 2:3-5; Ngana 27:11) Vava tusianga e ngolo za sunda lutovoko lweto kana una vo ke diasazu ko mu vanga wo, tusonganga kwikizi muna Yave yo songa vo tuzolele vo kakala Nyadi eto.

¹³ Yave okutuvovesanga vo twasianga ngolo za tanginina e fu yandi. (Kolosai 3:12; tanga 2 Petelo 1:5-7.) Yave ovingilanga mpe vo twayikeba mu mana tuyindulanga. (Roma 8:5; 12:9) Konso ntangwa tulendanga vanga e nsobani, kiese kiayingi tumonanga

14, 15. Adieyi tufwete vanga muna yima e fu ina Yave keyangalelanga? (Tala e babu “ Basoba e Zingu Kiau Muna Lusadisu lwa Nkand’a Nzambi ye Sambu.”)

¹⁴ Adieyi tufwete vanga mu yima e fu iyangidikanga Yave? Vana fulu kia baka nzengo yeto kibeni mu kuma kia nsobani tuvanga, tufwete yambula vo Nzambi katufila. E sono kia Roma 12:2 kivovanga vo: “Nuyambula kuyisi’e fwani-fwani ye tandu kiaki, kansi nuvanguluka muna soba nyindu mieno, kimana nwazaya owu wina luzolo lwa Nzambi, lwambote, lwatondakana ye lwalunga.” Muna zaya dina Yave  kazolele, tufwete bundanga e vuvu muna lusadisu kekutuvananga. Tufwete tanganga Nkand’a Nzambi, badika mana tutanganga yo samba kwa Yave kimana katuvana mwand’andi avelela. (Luka 11:13; Ngalatia 5:22, 23) Avo tuvangidi wo, Yave okutusadisa mu zaya dina dikunyangidikanga. Ediadi dikutusadisa mpe mu badikila mambu nze una yandi kebadikilanga mo. Muna mpila yayi, mana tuyindula, vova yo vanga, meyangidika Yave ye tuzaya una tulenda sundila lutovoko lweto. Kansi, kana una vo i wau, divava vo twakwamanana sia e ngolo za venga e sumu.​—Ngana 4:23.

¹⁵ Vana ntandu a tanganga Nkand’a Nzambi lumbu yawonso, tufwete wo longokanga muna lusadisu lwa nkanda mieto nze Eyingidilu ye Despertai! Vena ye malongi mayingi muna nkanda miami mekutulonganga una tulenda tanginina fu ya Yave ye una tulenda sundila lutovoko. Tulenda solola longi dimosi yovo sono kina betela ye diambu dikututokanesanga. Tulenda lunda e sono ye malongi mama kimana twatanganga mo konso ntangwa.

16. Ekuma ke tufwete kendalela ko avo kiwuntu kieto ke kisobele ko vana vau?

¹⁶ Ntangwa divavanga muna yantika tanginina e fu ya Yave. Muna kuma kiaki, avo omwene vo e kiwuntu kiaku ke kisobele ko nze una ozolele, kala ye luzindalalu. Kuna lubantiku dilenda vava vo wasia e ngolo za  vanga dina o Nkand’a Nzambi uvovanga. Kansi, avo oyantikidi yima e fu ina Yave kezolanga, diasazu dikala mu badikila mambu nze una kebadikilanga mo yo vanga mambu mambote.​—Nkunga 37:31; Ngana 23:12; Ngalatia 5:16, 17.

17. Avo tusikidi ye kwikizi muna Yave, nkia vuvu tulenda kala kiau?

¹⁷ Tuvingilanga ye kiese kiawonso e ntangwa ina tusinga kala wantu alunga yo sadila Yave yakwele mvu. Muna ntangwa yayina, ke divava diaka ko vo twasia e ngolo za sunda konso lutovoko. Diasazu dikala mu tanginina Yave. Kansi kana nkutu o unu, tulenda kweto sadila Yave kadi watuvana lukau lwa lukûlu. Kana una vo tu wantu alembi lunga, tulenda kunyangidika avo tukwamanene sia e ngolo za vanga e nsobani yo landa mana kekutulonganga muna Nkand’a Nzambi.

18, 19. Aweyi tulenda kadila ye ziku vo Nkand’a Nzambi una yo nkuma wa kwamanana soba e zingu kieto?

¹⁸ Mpangi Kevin wavanga mawonso kalenda mu sunda e fu kiandi kia funga makasi mu nzaki. Wabadikanga mana katanganga muna Nkand’a Nzambi yo sia e ngolo za vanga nsobani muna zingu kiandi. Walandanga mpe luludiku kavanuanga kw’ampangi. Kana una vo mvu miayingi miavioka kimana mpangi Kevin kasoba emvimba kiwuntu kiandi, kuna kwalanda watumbikwa se selo kia salu. Owau, mpangi Kevin osalanga se nkuluntu vioka 20 ma mvu. Kana nkutu o unu, mpangi Kevin ozeye wo vo kafwete kwamanana sia e ngolo za sunda lutovoko lwandi.

¹⁹ Nze mpangi Kevin, oyeto mpe tulenda kwamanana tomesa kiwuntu kieto. Avo tuvangidi wo, tukwamanana finama Yave. (Nkunga 25:14) Avo tuvangidi mawonso tulenda mu soba kiwuntu kieto muna yangidika Yave, okutusadisa mu sunda. Tulenda kala ye vuvu vo muna lusadisu lwa Nkand’a Nzambi, tulenda kwamanana vanga nsobani muna zingu kieto.—Nkunga 34:8.