1, 2. Nkia yuvu ilenda yuvulwa mu kuma kia mvovo mia Yesu miasonama muna Matai 24:14?

YESU wasakula vo mu lumbu yambaninu, e nsangu zambote za Kintinu zisamunwa kwa wantu awonso. (Matai 24:14) Wau vo tu Mbangi za Yave, tuzayakene mu nza yawonso mu kuma kia salu kieto kia samuna e nsangu zambote. Wantu ayingi beyangalelanga e nsangu tusamunanga, kansi akaka ke beyangalelanga zo ko. Kana nkutu awana ke beyangalelanga nsangu tusamunanga ko, bekutuzitisanga mu kuma kia salu kieto. Tulenda vova vo yeto kaka tusalanga e salu kina Yesu kasakula. Nga dialudi kikilu ye ziku? Nkia ziku tuna kiau vo e salu kia umbangi tusalanga i kiau kikilu kasakula o Yesu?

² Mabundu mayingi mevovanga vo nsangu za Yesu besamunanga. Kansi, mu nzo za nzambi kaka besamunwinanga zo yovo mu televizau ye Internete. Nkumbu miayingi bezayisanga kaka kwa wantu una bazayila Yesu. Akaka bebanzanga vo salu kia samuna nsangu zambote besalanga vava besadisanga  awana bena muna mpasi yovo vava besalanga nze madotolo, mfelemi yovo alongi. Kansi, nga yayi i salu kavovela o Yesu?

3. Mon’owu wa sono kia Matai 28:19, 20 nkia mambu yá bafwete vanga alandi a Yesu?

³ Nga Yesu edi kazola vo alongoki andi bavingilanga vo wantu beza kwa yau? Ve. Vava kafuluka, Yesu wavovesa kwa ulolo wa alandi andi vo: “Nwenda, nwakitula wantu a zula yawonso se alongoki, nwabavuba . . . , nubalonga balunda mambu mawonso inukanikini.” (Matai 28:19, 20) Muna kuma kiaki, mambu yá tufwete lungisa yeto alandi a Yesu. Tufwete kitula wantu se alongoki, kubavuba yo kubalonga. Kansi muna lungisa mambu mama, entete tufwete kwenda kwa wantu. Nkwa ngangu mosi ofimpanga oma ma Nkand’a Nzambi wavova vo: “O kwenda i kiyekwa kia konso munkwikizi, kana nkutu divava vo kasauka e nzila yovo kalunga.”​—Matai 10:7; Luka 10:3.

4. Adieyi divavuanga mu kala “abaki a wantu”?

⁴ Adieyi Yesu kevavanga kwa alongoki andi? Nga ovavanga vo konso muntu kasamuna e nsangu zambote muna mpil’andi? Yovo ovavanga vo basalanga nze buka kiatoma sikidiswa? Wau vo muntu mosi kalendi sila umbangi kwa wantu a “zula yawonso” ko, alongoki andi bafwete salanga entwadi nze buka kimosi. I diau kazola vova o Yesu vava kavovesa alongoki andi vo bakituka se “abaki a wantu.” (Tanga Matai 4:18-22.) Yesu kayika mbaki mosi a mbizi ko osadilanga o nsinga yo luvaku yo vingila vo e mbizi yamina lo. Kansi, e salu kia baka e mbizi kayika o Yesu, kia sadila makonde. Wau vo salu kiayingi, divavanga vo vakala yo wantu ayingi besala entwadi yo toma sikidisa e salu.—Luka 5:1-11.

5. Nkia yuvu yá ifwete vaninwa e mvutu? Ekuma?

⁵ Muna zaya awana besamunanga e nsangu zambote o unu, tufwete vava e mvutu za yuvu yá ilende:

• Nkia nsangu bafwete samuna alandi a Yesu?

• Nkia kani bafwete kala diau?

• Nkia ndekwa bafwete sadila?

• Yamu nkia tezo kifwete salwa e salu kiaki? Kolo kwa kifwete salwa?

E mvutu za yuvu yayi zikutusadisa mu zaya awana besalanga e salu kiaki kisinga vuluza mioyo mia wantu. Ziwokesa mpe tima dieto dia kwamanana samuna e nsangu zambote. —1Timoteo 4:16.

6. Nkia ziku una kiau vo Mbangi za Yave yau besamunanga e nsangu zambote?

⁶ Tanga Luka 4:43: Yesu nsangu zambote za Kintinu kasamunanga. Ovavanga vo alongoki andi bavanga diau dimosi. Aki nani besamunanga e nsangu zazi kwa wantu awonso? Mbangi za Yave kaka besalanga e salu kiaki! Kana nkutu awana ke bekutuzolanga ko, i wau bevovanga. Kasikil’owu, tala dina mfumu mosi a dibundu wasala e salu kia kimisionario mu nsi zayingi kavova kwa Mbangi a Yave. Muna konso nsi, mfumu ndioyo a dibundu wayuvulanga Mbangi za Yave  kana nkia nsangu basamunanga. Wavova vo: “Yau awonso mvutu zimosi kaka bavananga nze mazowa: ‘nsangu zambote za Kintinu.’” E mvovo mia mfumu ndioyo misonganga e ziku vo yeto ke tu mazowa ko, kansi twayikakiana nze Akristu akieleka. (1 Korinto 1:10) E Kintinu kia Nzambi i mbut’a diambu ditoma vovelwanga muna finkanda Eyingidilu Disamunanga Kintinu kia Yave. Finkanda fiafi fivaikiswanga mu 254 dia ndinga, tezo kia 59.000.000 mia yinkanda inietekwanga konso ngonde. Eyingidilu i zulunalu itoma vaikiswanga mu nza yawonso.

7. Aweyi tuzayidi wo vo e mfumu za Kikristu kia Kimpangila ke besamunanga nsangu zambote ko?

⁷ E mfumu za mabundu ma Kikristu kia Kimpangila ke besamunanga nsangu za Kintinu kia Nzambi ko. Vava bevovelanga Kintinu, ndonga muna yau bevovanga vo i ngindu zina muna kati kwa ntim’a muntu. (Luka 17:21) Ke belonganga ko vo Kintinu i luyalu lwakieleka luna kuna zulu lufilwanga kwa Yesu. Bevovelanga kaka Yesu muna nkinzi a Noele yovo wa Nduta. Ke belonganga ko vo Kintinu kiaki i kisinga fokola e mpasi zawonso bemonanga o wantu ye ke kolo ko kifwasa yimpumbulu yawonso ovo nza. (Lusengomono 19:11-21) Kieleka, e mfumu za mabundu ma Kikristu kia Kimpangila ke bazeye ko dina Yesu kesinga vanga nze Ntinu a Kintinu kia Nzambi. Wau vo ke bebakulanga ko e nsangu za Yesu, ke bebakulanga mpe ko e kuma bafwete zo samunwina.

8. Nkia kani diambi difilanga mabundu mayingi mu samuna e nsangu zambote?

⁸ Alongoki a Yesu ke bafwete samunanga nsangu zambote ko mu vua nzimbu yovo mu tunga e nzo zampwena mu sivikisa wantu. Yesu wavova vo: “Ngovo nutambwidi, ngovo nuvana.” (Matai 10:8) Muna kuma kiaki, e salu kia samuna e nsangu zambote ke salu kia vangila kinkita ko. (2 Korinto 2:17, mvovo vana yand’a lukaya) Alongoki a Yesu ke belombanga nzimbu ko muna samuna e nsangu zambote. (Tanga Mavangu 20:33-35.) Kana una vo luludiku kavana o Yesu lwatoma kiá, mabundu mayingi besianga o meso muna nzimbu kimana batunga nzo za nzambi, futa mfumu zau ye asadi akaka. I dianu tumwenanga mfumu zayingi za mabundu bakituka se amvuama.—Lusengomono 17:4, 5.

9. Aweyi Mbangi za Yave besongelanga vo mu kani diambote besadilanga e salu kia samuna e nsangu zambote?

⁹ Nga Mbangi za Yave nsinsani bevanganga yovo kubiswa nzimbu muna Maseka ma Kintinu yovo muna tukutakanu twau twampwena? Ve. E salu kiau mu lusadisu lwa tukau twamvevo kisadilwanga. (2 Korinto 9:7) Kana una vo i wau, mu mvu waviokele Mbangi za Yave tezo kia biliões zole za ola bavangidi muna salu kia samuna e nsangu zambote yo longoka Nkand’a Nzambi ye vioka milhões vua dia wantu konso ngonde. Ke befutwanga nzimbu ko muna salu besalanga, kansi bekalanga ye kiese kia sadila nzimbu za yau kibeni muna sala e salu kiaki.  Nkwa ngangu mosi wavova mu kuma kia Mbangi za Yave vo: “E kani diau i samuna e nsangu zambote yo longa wantu.” Wakudikila vo Mbangi za Yave ke bena ye mfumu zifutwanga ko. Wau vo ke nzimbu ko zikutufilanga mu samuna e nsangu zambote, adieyi i kani dieto? Tusalanga e salu kiaki yo vema kwawonso kadi Yave tuzolanga yo wantu. Diadi dilungisanga ungunza una muna Nkunga 110:3. (Tanga.)

10. Nkia ndekwa basadilanga o Yesu ye alongoki andi vava basamunanga e nsangu zambote?

¹⁰ Nkia ndekwa basadilanga o Yesu ye alongoki andi vava basamunanga e nsangu zambote? Bayendanga konso fulu balenda wana o wantu. Kasikil’owu, basilanga umbangi muna nzila ye muna mazandu. Bayenda vavinge mpe wantu muna nzo zau. (Matai 10:11; Luka 8:1; Mavangu 5:42; 20:20) O sila umbangi mu nzo ye nzo, i ndekwa zambote basadilanga muna solola wantu a mpila zawonso.

11, 12. Nkia nswaswani ina vana vena mabundu ma Kikristu kia Kimpangila yo nkangu a Yave muna diambu ditadidi e salu kia samuna e nsangu zambote?

¹¹ Nga mabundu ma Kikristu kia Kimpangila besamunanga e nsangu zambote nze una Yesu kavanga? Nkumbu miayingi e mfumu za mabundu ana befutwanga e nzimbu minkwikizi miau kaka belonganga. Vana fulu kia kitula wantu akaka se alongoki, e mfumu zazi bevanganga mawonso kimana minkwikizi miau balembi tina muna dibundu. Ezak’e ntangwa, bevavanga kasakesa minkwikizi miau benda sila umbangi. Muna bong’e nona, muna mvu wa 2001, o Papa  João Paulo II wasonekena mabundu o nkanda yo vova vo minkwikizi mia dibundu bafwete kwenda samuna e nsangu zambote yo songa o vema nze Paulu wa ntumwa ona wavova vo: “Tâtu kwa mono avo kisamwini nsangu zambote ko.” O papa wakudikila vo e salu kiaki kifwete salwa kwa minkwikizi miawonso, ke kwa wantu akete kaka ko ana balongwa. Kansi, akete kaka bevanganga wo.

¹² Adieyi tuvova mu kuma kia Mbangi za Yave? Yau kaka besamunanga vo Yesu wayantika yala se Ntinu tuka muna mvu wa 1914. Belemvokelanga Yesu yo sia e salu kia samuna e nsangu zambote vana fulu kiantete muna zingu kiau. (Maku 13:10) Nkanda mosi (Pillars of Faith—American Congregations and Their Partners) wavova vo kuna kwa Mbangi za Yave, e salu kia samuna e nsangu zambote i salu kisundidi o mfunu. Nkanda wau wavova mpe vo vava Mbangi za Yave bemonanga wantu bena mu nzala, mu kinsona yovo beyelanga, bevanganga mawonso mu kubasadisa. Kansi, ke bevilakananga ko vo e kani diau i lukisa wantu mu kuma kia mbaninu a nza yayi yo kubalonga dina bafwete vanga muna vuluzwa. Mbangi za Yave bekwamanananga samuna e nsangu zazi yo tanginina e ndekwa basadilanga Yesu ye alongoki andi.

13. Yamu nkia tezo e nsangu zambote zifwete samunwa?

¹³ Yesu wavova vo alandi andi belonga yo samuna e nsangu zambote “mu nza yawonso.” Wabakanikina vo bakitula “wantu a zula yawonso” se alongoki. (Matai 24:14; 28:19, 20) Ediadi disongele vo e nsangu zambote zifwete samunwa mu nza yawonso.

14, 15. Nkia ziku tuna kiau vo Mbangi za Yave belungisanga ungunza wa Yesu mu kuma kia sayana kwa salu kia samuna e nsangu zambote? (Tala fwaniswa kuna lubantiku lwa longi.)

¹⁴ Mbangi za Yave kaka belungisanga ungunza wa Yesu vo e nsangu zambote zifwete samunwa mu nza yawonso. Nkia ziku tuna kiau? Kuna Estados Unidos, kuna ye tezo kia 600.000 ma mfumu za mabundu ma Kikristu kia Kimpangila, kansi tezo kia 1.200.000 ma Mbangi za Yave besamunanga e nsangu zambote kuna nsi yayina. Mu nza yawonso, vena ye tezo kia 400.000 mia mpelo mia dibundu dia Katolika, kansi vioka milhões 8 dia Mbangi za Yave besamunanga e nsangu zambote mu 240 ma nsi. Kieleka, Mbangi za Yave mu samuna bena e nsangu zambote mu nza yawonso. Ediadi ditwasanga nkembo yo zitu kwa Yave.—Nkunga 34:1; 51:15.

¹⁵ Wau vo tu Mbangi za Yave, e kani dieto i samuna e nsangu zambote kwa wantu ayingi vitila e mbaninu yiza. Muna lungisa e salu kiaki, tusekolanga yo nieteka ulolo wa nkanda, yinkanda-nkanda ye mboka za lukutakanu lwa mvivu ye za luyindulu mu vioka 700 za ndinga. Tuvananga wantu e nkanda miami lembi kubalomba e nzimbu. Mu mvu waviokele, twanietekene tezo kia milhões yá ye ndambu za nkanda misasilanga o Nkand’a Nzambi. Twanietekene mpe vioka milhões 200 za Nsekola ya Nz’ampa ya Nkand’a Nzambi mu vioka 130 ma ndinga. Vana ntandu, e nzil’eto ya Internete ina ye nsangu mu vioka 750 za ndinga. Mbangi za Yave kaka besalanga e salu kiaki kiawonso.

16. Aweyi tuzayidi wo vo Mbangi za Yave bena yo mwand’a Nzambi?

 ¹⁶ Kolo kwa kifwete salwa e salu kia samuna e nsangu zambote? Yesu wavova vo e nsangu zambote zisamunwa yavana e mbaninu ikwiza. Wau vo tu Mbangi za Yave, tulendanga sala e salu kiaki mu lumbu yayi yambaninu kadi tuna yo mwand’avelela a Yave. (Mavangu 1:8; 1 Petelo 4:14) Minkwikizi mia mabundu mankaka balenda vova vo: “Yeto tuna yo mwand’avelela.” Kansi, nga balenda kikilu sala e salu kina Mbangi za Yave besalanga mu lumbu yayi yambaninu? Vena ye mabundu metezanga kututanginina, kansi ke belendanga ko. Akaka bekalanga ye luzolo lwa samuna e nsangu zambote, kansi mu fikolo kaka. Vena ye buka itezanga sila umbangi mu nzo ye nzo, kansi ke besamunanga nsangu zambote za Kintinu ko. Muna kuma kiaki, e salu besalanga ke kiau ko kayantika o Yesu.

17, 18. (a) Nkia ziku tuna kiau vo Mbangi za Yave yau besamunanga e nsangu zambote za Kintinu o unu? (b) Adieyi dikutusadisanga mu zindalala muna salu kiaki?

¹⁷ Ozevo, aki nani besamunanga e nsangu zambote za Kintinu o unu? Mbangi za Yave kaka besalanga e salu kiaki. Nkia ziku tuna kiau? Yeto kaka tusamunanga e nsangu zasikidiswa, i sia vo, nsangu zambote za Kintinu. Ndekwa zambote tusadilanga kadi wantu tukwenda vavinge muna salu kieto kia umbangi. Tuna ye kani diambote dikutufilanga mu samuna e nsangu zambote, i sia vo, zola muna Yave yo wantu. E salu kieto kia samuna e nsangu zambote kisayananga kadi tusilanga umbangi kwa wantu a zula ye ndinga zawonso. Vana ntandu, tukwamanana samuna e nsangu zambote za Kintinu yavana mbaninu ikwiza.

¹⁸ Kieleka, diasivi kikilu mu mona e salu kia samuna e nsangu zambote besalanga o nkangu a Yave mu lumbu yayi yambaninu. Kansi, adieyi dikutusadisanga mu lungisa e salu kiaki kiawonso? Paulu wa ntumwa wavova vo: “Kadi o Nzambi muna luzolo lwandi, okunusiamisa, muna kunuvana tima yo nkuma wa sala.” (Filipi 2:13) Yambula Yave kakwamanana kutuvana nkuma kimana twavanga mawonso tulenda mu zindalala samuna e nsangu zambote.​—2 Timoteo 4:5.