Muna Bibila, tulenda solola tusansu twa akala ye akento ana banuana ye mambu nze mana tunuananga mau. Muna kuma kiaki, vava tutanganga tusansu twau, tulenda wana lusansu lwa muntu ona wanuana ye mpasi zafwanana ye zeto.

Yeto awonso tuzolanga vo akaka babakula una tumonanga, musungula vava tunuananga ye kimbevo kia ntelamw’a moyo. Vava tutanganga muna Bibila o tusansu twa wantu ana bakala ye ngindu nze zeto, tubakulanga vo akaka mpe bawanana ye mambu mampasi. Ediadi dilenda kutusadisa mu mona vo ke tuna yeto mosi ko vava tukalanga mu lukendalalu ye ntelamw’a moyo.

• Muna Bibila, tulenda solola mvovo mia wantu ana bayimwena vo ke bakala ye tininu ko. Nga wayindula kala vo, ‘kilenda diaka ko’? I una mpe o Mose, Eliya yo Davidi bayindula.—Ntalu 11:14; 1 Ntinu 19:4; Nkunga 55:4.

• Bibila kivovelanga nkento mosi una ye nkumbu Ana, ona wamona ‘ntantu zayingi’ wau vo sita kakala ye wavezwanga kwayingi kwa mband’andi.—1 Samuele 1:6, 10.

• Bibila kivovelanga mpe muntu mosi una ye nkumbu Yobi, ona una se mbandu kwa yeto. Kana una vo lukwikilu kakala lwau muna Nzambi, lumbu kimosi walwaka mu tezo kia vova vo: “Mbengene moyo ame; kizolele zinga diaka ko.”—Yobi 7:16.

O wantu awaya beyikwanga muna Bibila balenda zizidila e mpasi zau. E mbandu au ilenda kutuvana o nkuma muna zizidila o ntelamw’a moyo.