“Vava osambanga, kuvutukilanga mambu mau mamosi ko.”—Matai 6:7.

Yave kazolele ko vo twalundanga e sambu muna ntu yo vutukila yo ngatu tanga yo muna nkanda. Kansi, ozolele vo twavovanga mana tuna mau muna ntima. Aweyi omona kele vo nkundi aku ovutukilanga mvovo miau mimosi konso ntangwa numokenanga? Ediadi dilenda kufungisa makasi. Kadi akundi ambote beziulanga o ntima yo vova mawonso bena mau. Vava tusadilanga e mvovo mia yeto kibeni muna sambu yo kunzayisa mambu mekututokanesanga, tusonganga vo Se dieto dia zulu nkundi eto.

“Vava nulombele, ke nutambwidi ko, kadi muna kani diambi nulombele.”—Yakobo 4:3.

Ke tulendi vingila ko vo Nzambi kavana e mvutu za sambu yeto avo tulombele mana ke zolanga ko vo twavanga. Kasikil’owu, yindula muntu ozolele tá e nsaka za mpanza yo lomba lusadisu lwa Yave kimana kansadisa kasunda e nsaka zazi yo vua e nzimbu zayingi. Nga o Yave ovana e mvutu za sambu kiaki? Ve! Kadi e Bibila kivovanga vo Yave ke yangalelanga fu kia loko ko ye muntu okwikilanga muna mambu mena vo ke maludi ko, nze kwikila muna nzambi a malau. (Yesaya 65:11; Luka 12:15) Ke diangangu ko mu vingila vo Yave kavana e mvutu za sambu nze yayi. Muna kuma kiaki, avo tuzolele vo Nzambi kavana e mvutu za sambu yeto, tufwete kala ye ziku vo mana tulombanga ngwizani mena ye mana kekutuzayisanga muna Bibila.

 “Ndiona ovengomonanga matu muna nsiku—e sambu kiandi nkutu kiangemi.”—Ngana 28:9.

Kuna nz’ankulu, awana ke balemvokelanga nsiku miansongi ko, o Nzambi kawanga e sambu yau ko. (Yesaya 1:15, 16) Nzambi kasobele ko. (Malaki 3:6) Avo tuzolele vo Nzambi kavana e mvutu za sambu yeto, tufwete lemvokelanga e nsiku miandi. Kansi, adieyi tuvova avo muna mvu miavioka mambu mambi twavanga? Nga ediadi disongele vo Yave kesinga wá e sambu yeto ko? Ve! Kadi Nzambi kuna zola kwawonso okutuloloka avo tuvilukidi o ntima yo vanga mawonso muna kunyangidika.—Mavangu 3:19.