“E ngeye Owanga e sambu, o wantu a mpila zawonso kwa ngeye bekwiza.”—Nkunga 65:2.

Wantu ankaka besambanga kana una vo bekwikilanga vo ke vena muntu ko owanga e sambu yau. Kadi edi bevovanga vo e sambu ngindu za muntu kivuvikanga. Kansi, e sambu ke kivuvikanga kaka e ngindu zeto ko kimana twazizidila e mpasi. Kadi e Bibila kivovanga vo: “Yave * ofinamene awonso bekumbokelanga, awonso bekumbokelanga kuna ziku. . . . Owánga kazu kiau.”—Nkunga 145:18, 19.

Muna kuma kiaki, tulenda kala ye ziku vo Yave wa Nzambi owanga e sambu ya selo yandi. Kuna zola kwawonso okutuvovesanga vo: “Nukumbokela, nukwiza kwa mono yo kunsambila, omono ikunuwá.”—Yeremiya 29:12.

“Nusiamanana muna sambu.”—Roma 12:12.

E Bibila kikutukasakesanga mu “kwamanana samba” yo ‘lombanga ntangwa zawonso.’ Kieleka, Yave wa Nzambi ozolele vo twasambanga kwa yandi.—Matai 26:41; Efeso 6:18.

Ekuma Nzambi kazolele vo twasambanga kwa yandi? Yindula diambu edi: Nkia se ke yangalalanga ko vava o mwan’andi kekunzayisanga vo “E Papa, unsadisa”? Dialudi vo nkumbu miayingi, o se ozayanga kala dina mwan’andi kavuidi o mfunu yovo una kemonanga. Kansi, vava o mwan’andi kekunlombanga lusadisu, osonganga vo vuvu kekumbundanga yo kumbadikila se nkundi. Diau adimosi, vava tusambanga kwa Yave wa Nzambi, tusonganga vo vuvu tukumbundanga ye tuzolele kala akundi andi.—Ngana 15:8; Yakobo 4:8.

“Nuyekekanga kwa yandi mawonso mekunutokanesanga, kadi mfunu kekunuvuanga.”—1 Petelo 5:7.

Nzambi ozolele vo twasambanga kwa yandi kadi zola kekutuzolanga ye mfunu kekutuvuanga. Ozeye mpasi ye ntokani zeto zawonso ye ozolele kutusadisa.

Muna zingu kiandi kiawonso, Davidi wa Ntinu wasambanga kwa Yave wa Nzambi muna kunzayisa e ngindu ye ntokani zandi zawonso. (Nkunga 23:1-6) Aweyi Nzambi kabadikilanga Davidi? Nzambi wazolanga Davidi yo wá ulolo wa sambu yandi. (Mavangu 13:22) Diau adimosi, Nzambi owanga e sambu yeto kadi mfunu kekutuvuanga.

E mvovo miami mia mosi muna awana basoneka o nkand’a Nkunga muna Bibila. Wakala ye ziku vo Nzambi wawanga e sambu yandi. Ediadi diatoma kunkumika kikilu. Wabadikilanga Nzambi se nkundi andi. Muna kuma kiaki, wakala yo nkuma wa zizidila e mpasi za zingu.—Nkunga 116:1-9.

Vava tukalanga ye ziku vo Nzambi owanga e sambu yeto, ediadi dikutufilanga mu kwamanana samba kwa yandi. Tala e nona kia Pedro ona ozingilanga kuna Espanha. Wafwilwa o mwan’andi wakala ye kimbuta kia mvu 19 muna sumbula kia kalu. Mu kuma kia ntantu zazi, Pedro waziula o ntim’andi kwa Nzambi yo kwamanana lomba lufiaulwisu ye lusadisu muna sambu. Adieyi diavangama? Pedro wavova vo: “Yave wavana e mvutu za sambu yame, muna lufiaulwisu ye lusadisu luna mono yo nkaz’ame twatambula kwa mpangi zeto za Akristu.”

Kana una vo e sambu ke yavutulwisa e zingu kia mwan’au ko, Pedro yo nkaz’andi batambula lusadisu mu mpila zayingi. María Carmen wa nkaz’andi wavova vo: “E sambu yansadisa mu zizidila e ntantu zame. Yazaya wo vo Yave wa Nzambi wambakulanga, kadi vava yasambanga yamonanga vo o ntim’ame wavuvamanga.”

Mana meyikwanga muna Bibila ye nona kia akazi awaya i ziku kisonganga vo Nzambi owanga e sambu yeto. Kansi, Nzambi ke wanga sambu yawonso ko. Ekuma Nzambi kewilanga sambu yankaka, kansi yankaka ke wanga yo ko?