Ekuma o Wantu Bemengenanga akaka?
Ekuma e fu kia menga akaka kisayanene mu nza yawonso? Muna zaya e mvutu za kiuvu kiaki, entete tufwete zaya kana nki i menga, kuma kifilanga wantu mu yantika menga akaka ye una fu kiaki kisayanenanga.
Nki i Menga?
O menga disongele vo, kala ye fidititi diasaka muna muntu yovo buka kia wantu kina ke tuzolanga ko. O menga, ke mpasi mwena muntu makasi ko mu fikolo.
KUMA KIFILANGA WANTU MU YANTIKA MENGA AKAKA
Vena ye kuma yayingi ifilanga wantu mu yantika menga akaka. O wantu balenda menga buka kiankaka kia wantu yovo kanda dimosi ke mu kuma kia sia ko vo diambu diambi bavangidi, kansi mu kuma kia mpil’au. Nanga bemengwanga kadi bebadikilwanga vo wantu ambi, akwa nsoki yovo wantu ana ke besinga soba nkutu ko. Vana ntandu, balenda mpe badikilwa vo mpasi wantu yovo mvuanga kaka betwasanga. Ayingi muna awana bemenganga akwau nanga mu kuma kia sia vo oyau mpe bavangwa kala mambu makondwa unsongi, bamweswa e mpasi ye mambu mankaka mambi mabafila mu kala ye fidititi muna ntima.
UNA E FU KIA MENGA AKAKA KISAYANENANGA
O muntu olenda menga wantu kana nkutu kabazeye ko. Kasikil’owu, nkumbu miayingi o muntu lembi wo zaya olenda yantika yima e ngindu za wantu ana ketoma zitisanga, nze yitu yandi ye akundi yo badikila mambu nze una yau bebadikilanga mo. Muna kuma kiaki, avo akaka muna yitu yovo akundi bayantikidi menga wantu a kanda diankaka, kuna kulanda, yau awonso balenda yantika menga o wantu a kanda diodio.
Avo tubakwidi una e fu kia menga akaka kisayanenanga, tubakula mpe e kuma wantu ayingi bemengenanga akwau. Kansi, muna fokola e fu kia menga akaka kisayanene omu nza, entete tufwete zaya una e fu kia menga akaka kiayantikila. E Bibila kilenda kutusasila e diambu diadi.
E BIBILA KISASILANGA UNA E FU KIA MENGA AKAKA KIAYANTIKILA
KE WANTU KO BASOKA E FU KIA MENGA AKAKA. E fu kiaki kiayantika vava mbasi mosi kuna zulu ona wayiza yikilwa vo Satana wa Nkadi Ampemba, kakolamena Nzambi. O Nkadi ampemba “mumponda-muntu tuka kuna lubantiku” vava kakolama. Wau vo “nkwa luvunu kwandi ye se dia luvunu,” okwamanananga wokesa e fu kia menga yo nsoki. (Yoane 8:44; 1 Yoane 3:11, 12) E Bibila kisonganga vo Satana muntu ambi, mfwasi ye ozele yo makasi.—Yobi 2:7; Lusengomono 12:9, 12, 17.
DIASAZU KWA WANTU ALEMBI LUNGA MU MENGA AKAKA. Adami una vo i muntu antete, walanda e nzil’a Satana yo sumuka. Muna kuma kiaki, e kanda diawonso dia wantu diasambukila e sumu yo kondwa lunga. (Roma 5:12) O Kaini una vo i mwan’antete a Adami, wamenga o mbunzi andi Abele yo kumvonda. (1 Yoane 3:12) Dialudi vo e fu kia menga akaka ke kiasambukila wantu awonso ko, vena ye wantu besonganga o zola ye nkenda. Kansi mu kuma kia sumu twasambukila, ulolo wa wantu bena se akwa loko, akwa maketo ye bazola kuyitundidika, e fu yayi i yau itwasanga e fu kia menga akaka.—2 Timoteo 3:1-5.
O LEMBI ZOLA WANTU AKAKA KUWOKESANGA E FU KIA MENGA. Wau vo e nza tuzingilanga iwokesanga e fu kia kondwa nkenda ye fu yankaka yambi, ediadi difilanga wantu mu toma yima e fu kia menga akaka. E fu nze lembi zitisa e ngindu z’akaka, sia mpambula, finga, veza yo mavangu mansoki mu wokela kaka mena kadi “e nza yawonso ina muna wisa kia ndiona wambi,” i sia vo, Satana wa Nkadi ampemba.—1 Yoane 5:19.
Kansi, e Bibila ke kisengomonanga kaka tuku ko dia fu kia menga akaka. Kisonganga mpe una e fu kiaki kifokokela.
Nanga Oyangalela Mpe Malongi Mama
MVUTU ZA YUVU YA BIBILA
Nga Nzambi Wasema Nkadi Ampemba Muna Kututont’e?
E mvutu za Nkand’a Nzambi za ziku yo lufiaulwisu.
