UNA OLENDA YAMBULWILA E FU KIA MENGA AKAKA
4 | Muna Lusadisu lwa Nzambi Olenda Yambula e Fu kia Menga Akaka
Bibila kivovanga vo:
“E mbongo a mwanda i zola, kiese, luvuvamu, luzindalalu, walakazi, wete, lukwikilu, lulembamu, volo.”—NGALATIA 5:22, 23.
E sono kiaki aweyi kisongele?
Nzambi olenda sadisa o muntu kayambula e fu kia menga akwandi. O mwand’avelela Nzambi ulenda yima fu omu yeto ina ke tulenda yima ko muna ngolo za yeto kibeni. Muna kuma kiaki, vana fulu kia vava sunda e fu kia menga akaka muna ngolo za yeto kibeni, diambote twabundanga e vuvu muna lusadisu lwa Nzambi. Avo tuvangidi wo, tumona una Paulu wa ntumwa kamona, oyandi wavova vo: “Muna mambu mawonso ngina ye nkuma muna ndiona okunkumikanga.” (Filipi 4:13) Ye tuvova mpe vo: “O lusadisu lwame kwa Yave lutuka.”—Nkunga 121:2.
Aweyi e sono kiaki kilenda kusadisila?
“O Yave wansoba, nkwa mavangu mansoki yakala owau yakituka se nkwa luvuvamu.”—WALDO
Samba kwa Yave, umlomba mwand’andi avelela. (Luka 11:13) Umlomba mpe kasadisa kimana wasonga e fu yandi muna zingu kiaku. Longoka e fu iyikwanga muna Bibila eyi ilenda kusadisa mu sunda e fu kia menga akaka, e fu nze: zola, luvuvamu, luzindalalu ye volo. Vanga e ngolo za yima yo songa e fu yayi muna zingu kiaku. Vanga kikundi yo wantu bevanganga e ngolo za songa e fu yayi. O wantu awaya balenda kusadisa “wasikamesa o zola ye mavangu mambote.”—Ayibere 10:24.
