UNA OLENDA YAMBULWILA E FU KIA MENGA AKAKA
3 | Yambula Menga Akaka Muna Ngindu
Bibila kivovanga vo:
“Nuvanguluka muna soba nyindu mieno, kimana nuazaya owu wina luzolo lwa Nzambi, lwambote, lwatondakana ye lwalunga.”—ROMA 12:2.
E sono kiaki aweyi kisongele?
O mambu tuyindulanga mfunu mena kwa Nzambi. (Yeremiya 17:10) Mayingi tufwete vanga, ke yambula kaka mvovo ko ye mavangu mesonganga vo akaka tumenganga. E fu kia menga akaka mu nyindu yo ntima kiyantikilanga. Muna kuma kiaki, tufwete venganga e fu kia yindula mambu malenda kutufila mu menga akaka. Muna mpila yayi, tulenda ‘vanguluka’ yo yambula e fu kia menga akaka.
Aweyi e sono kiaki kilenda kusadisila?
Toma kuyifimpa wazaya kana vo aweyi obadikilanga wantu akaka, musungula awana bena ye se kia nitu kiaswaswana ye kiaku yovo ana batuka mu nsi zankaka. Ukuyivula: ‘Aweyi ikubabadikilanga? Nga ikubabadikilanga mun’owu wa mana nzeye mu kuma kiau? Yovo muna ngindu zame mpambula isianga?’ Venga tala e nsangu, filme ye nsaka zivovelanga e fu kia menga akaka ye mavangu mansoki.
E Diambu dia Nzambi dilenda katula muna ntima ye ngindu zeto e fu kia menga akaka
Dialudi vo, ezak’e ntangwa diampasi mu toma fimpa e ngindu yo makani meto una ufwene. Kansi, e Diambu dia Nzambi dilenda kutusadisa mu “sengomona e ngindu ye makani ma ntima” mieto. (Ayibere 4:12) Muna diadi, kwamanana longoka e Bibila. Tezanesanga e ngindu zaku ye mana olongokanga muna Bibila, vanga e ngolo za wizanesa e ngindu zaku ye mana e Bibila kilonganga. E Diambu dia Nzambi dilenda kutusadisa mu “bangula e nzo zangolo,” i sia vo, katula fu kia menga akaka eki kina muna ngindu ye ntima mieto.—2 Korinto 10:4, 5.
