Rosie wavova vo: “Nkumbu miayingi, e mambu yatokanenanga ke mavangama kwandi ko, mono kibeni yawokesanga mo muna ngindu.” Nkia sono ya Nkand’a Nzambi yansadisa? Kimosi muna sono yayi i kia Matai 6:34 kivovanga vo: “Ke nutokani ko mu kuma kia mbazi, kadi e mbazi kikala ye ntokani zandi. Konso lumbu kina ye ntokani zandi.” Rosie wavova vo e mvovo miami mia Yesu miansadisa mu yambula tokanena e mambu malenda vangama o mbazi. Wakudikila vo: “Yasianga e sungididi muna mpasi yanuananga zau, lembi tokanena diaka mambu mana ke mavangamene ko yovo ke mesinga vangama ko.”

Yasmine mpe wabakula vo ntokani zayingi kakala zau. Wavova vo: “Nkumbu miayingi yadilanga muna lumingu. Eyaka lumbu kialekanga ko. E ntokani zayantika kunkatula e kiese kia zinga.” Nkia sono kia Nkand’a Nzambi kiansadisa? Wayika e sono kia 1 Petelo 5:7 kivovanga vo: “Nuyekeka ntokani zeno zawonso kwa [Nzambi], kadi mfunu kekunuvuanga.” Yasmine wavova vo: “Ekolo e ntangwa yaviokanga, yakwamanana samba kwa Yave. E sambu yame yavaninua e mvutu. Yamona nze vika sia vo zitu dikatukidi vana mavembo mame. Ezak’e ntangwa e ntokani zivutukanga, kansi izayanga una ndenda zo sundila.”

Nkento mosi una ye nkumbu a Isabella wavova vo: “Nanga e fu kia kimbazi-mbazi sambukila kisambukilanga kadi o se diame mpe fu kiaki kakala kiau. Vana fulu kia vanga mambu mena mamfunu, ifwasanga e ntangwa muna tala televizau. E fu kiaki ke kiambote ko kadi ntokani kisakisanga yo fila muntu mu lembi sala salu mu mpila yambote.” O nkanikinu ukunsadisanga i una wasonama muna sono kia 2 Timoteo 2:15 kivovanga vo: “Vanga wawonso wayisonga kwa Nzambi vo wafwana, u nsadi wakondw’e nsoni.” Isabella wavova vo: “Kizolele ko vo mu kuma kia kiwolo, e salu kiame kiafusulwisa Yave e nsoni.” Malembe-malembe, wayantika sunda e fu kiaki.

Kelsey wavova vo: “Ezak’e ntangwa yavingilanga yavana imona vo e ntangwa yasikidiswa se ifokoka i bosi iyantika sala. Nkumbu miayingi yadilanga, lembi leka yo tokana kwayingi. Ediadi mfwilu diantwasilanga.” Kelsey wavua lusadisu vava katanga e sono kia Ngana 13:16 kivovanga vo: “O nlungaladi muna zayi kevangila mambu, Kansi, e zowa osenzekanga uzowa wandi.” Wavova vo badika e sono kiaki kianlonga diambu diamfunu: “Diangangu mu lembi kala ye fu kia kimbazi-mbazi yo sikidisa e mambu nzolele vanga. Owau, ngina yo nkanda isianga vana ntandu a meza muna isonekanga e salu isala. Ediadi dikunsadisanga mu toma sadila e ntangwa, yo venga e kimbazi-mbazi.”

Kirsten wavova vo: “O yakala diame wambembola yo kunsisa mono mosi kaka yo wana yá.” Nkia sono kiansadisa? Muna Ngana 17:17 tutanganga vo: “O nkundi ozolanga ntangwa zawonso, o mpangi muna mpasi kawutukila.” Kirsten wavava lusadisa kw’awana besadilanga Yave nze yandi. Nkia nluta diantwasila? Wavova vo: “Akundi ame bansadisa mu mpila zayingi. Akaka bantwasilanga madia ye mvuma vana mwelo. Nkumbu ntatu, buka kia mpangi bansadisa kumosi yo wan’ame mu yaluka mu nzo yankaka. Mpangi mosi wampavila e salu. Akundi ame ke bambembola ko.”

Delfina tuyikidi kala, wanuananga mpe ye kinsona. Osungamenanga una kamona vava kabwilwa ulolo wa mambu: “Yakimwenanga nze muntu ovididi, otalanga awonso beviokanga. Kinsona kikilu yamonanga.” E sono kiansadisa i kia Nkunga 68:6 kivovanga vo: ‘Awana ben’e kinsona, o Nzambi ubasongele e nzo.’ Wavova vo: “Yazaya wo vo e sono kiaki ke kiyikanga kaka nzo yakieleka ko. Yabakula vo Nzambi okutuvananga nzo ya kimwanda, fulu kina tulenda sololwela luvuvamu ye kikundi kiambote y’awana bezolanga Yave. Kansi, muna kala nkundi ambote kwa akaka, entete mfwete vanga e kikundi yo Yave. Muna kuma kiaki, e sono kia Nkunga 37:4 kiansadisa kikilu. Kivovanga vo: ‘Mwena wete waku muna Yave; Oyandi okuvana zolela ya ntim’aku.’”

Delfina wakudikila vo: “Yabakula vo mfwete kala ye ngwizani ambote yo Yave. Yandi i nkundi osundidi akundi awonso. Muna kuma kiaki, yasikidisa mana ndenda vanga entwadi ye akaka, kimana yavanga kikundi ye awana bezolanga Yave nze mono. Yalongoka sia e sungididi muna mambu mambote bevanganga akaka, yo lembi sia sungididi muna vilwa wau.”

Akundi ana besadilanga Nzambi bakinu wantu alembi lunga. Mbangi za Yave benuananga ye mpasi nze zina wantu awonso benuananga zau. Kansi, malongi ma Nkand’a Nzambi mekasakesanga wantu mu sadisa akaka avo dilendakana. Diangangu mu vanga yau kikundi. Kansi, nga nkanikinu mia Nkand’a Nzambi milenda mpe sadisa wantu mu zizidila e mpasi zina ke zilenda fokoka ko o unu, nze yimbevo ilembi sasukanga?